شعراء الطنبور

[أبو وائل]

هذا البوست خاص بكل شعراء الطنبور
و ما جادت به قرائحهم من أشعار ظلت خالدة
يرددها الجميع .

[أبو وائل]

الشاعر الفاتح إبراهيم بشير


الفاتح ابراهيم بشير
عفوا


انا قلبى عشان ينساك دايرلو تانى زمن


عفوا حبيب قلبى ما انت لى وطن
***********
انا قلبى ذنبه شنو عودته انت عليك


علمته يبكى ينوح يوم ما يشوف عينيك


وكتين ملكته خلاص فريتها لجنحيك


خاطبته باستبداد قلت ليه اختار ليك
**********


هو الصبار المسكين راجى اليالى تروق


لا كل لا مل لا عاتب المعشوق


كل القدر قاله ياناس كتلنى الشوق


والضقته فى دنياى ما ضاقه قط مخلوق
********
انا يا خلائق اه ضقت العذاب اصناف


شلت الليالى سقد تشهد تبارك وقاف


جربت صبر ايوب كانت نهايته جفاف


والصابنى يالمريود بالعين محال ينشاف
*************
لو دار تعرف البى ارجوك مرة تعال


اقعد وعاين بس ما تسال اى سؤال


انا يا حليلى انا اصبح يمنى شمال


جوايا عشرة اشياء خلت حياتى محال


حظى التعيس الشوم الغيرة والعزال


ليل الضياع والخوف والحيرة والاهمال


انك تملى معاى و بيناتنا كم اميال


احساسى انى بسيط واحلامى واقفه جبال


صبر اً صبرتو عليك ذكرنى سيدنا بلال


حتى ان سكت انا تتكلم الاطلال


وآخر المطاف بالليل سافرت باستعجال


لا طلت بلح الشام ولا ضقت راحة البال


*******
برضك تقول لى اصبر اتحمل المكتوب


واتعوض الله خلاص انسانى يالمحبوب


خلتنى ذى عصفور هبت عليه هبوب


فنتله عشه شمال شالت صغاره جنوب

[أبو وائل]

الفاتح ابراهيم بشير

أريتو الشوق

أريتو لو الشوق زى البريد بيطوف

أنا كنتا يا خلاي سويتو فى مظروف

سطرت بى دمي أجمل وأرق حروف

وعنوتو لى إنسان ملك السمع والشوف

زولاً بريدو شديد كان لى مسافة طوف

فى لجة الأحزان وكتين ملانا الخوف

بهواهو يا خلاي ودغدغ هواهو الجوف

ما استغلا هواى مع إنى بيهو شغوف

علمنى كيف الريد نبنيهو طوف فوق طوف

ونتحدي للآلآم ونتجاوز أي ظروف

أصلو البريد غير زولو ما بيشوف

لو جابو ليهو الحور قدامو ماشه صفوف

أريت وصالنا يدوم ما يبقى بينا عزوف

نوصل مراسى الريد بعد الشقى المردوف

أنا اصلى يا خلاي بين الخلوق معروف

زولا بريد الناس ودايماً قليبي شغوف

أنا نفسى أشيد دار بالريد دوام مسروف

لى كل زول مظلوم ردا الحبيب مكسوف

وأكتب على بابوا تعبير دوام مألوف

يا صاحبى لا تحزن فى الدنيا نحن ضيوف

[أبو وائل]

الفاتح ابراهيم بشير
قبــــلة غُنـــاي


احترت كيفن اوصفك .. والله يا قبلة غناي
لو كان بحور الكون مداد بتجف قبل ما تنصفك

حاولت اكتب ليك واقول * واوصف ملامحك بالشعر
لكن حروفي تذوب عديل * قدام عيونك تنصهر
يا عايشة في دمي وغناي * يا ديدن الروح والفكر
خلدت اسمك بي حروف * قطرات دماي كانت حبر

يا غنوة في وتري الحزين * يا ضحكة في الزمن الصعب
يا واحة في عز الهجير * يا راحة من بعد التعب
يا نسمة هبت في الدغيش * عزفت علي وتر العصب
يا رحمة من رب العباد * مكبوبة فوق خلق الله كب

سافرت في عينيك سنين * زادي المعاي ابيات غنا
مكتوبة بي دمي الصبح * شلال من الهم والعنا
صورت احساسي الدفين * بي قافية ليك معنونة
بتقول بلا كلفة ورتوش * يا انتي يا الموت والفنا

احترت في وصفك انا * وحارت معاي كل الحروف
مرات بشوفك يا مناي * ياقوتة في قلبي الولوف
مرات بشوفك ضي امل * دبج خطاي رغم الظروف
مرات بشوفك جارية نيل * امواجو عانقت الجروف

[أبو وائل]

الفاتح ابراهيم بشير
عشان خاطر عيونك

عشان خاطر عيونك ديل افارق حلتي وطني
اسافر من بلاد لي بلاد كمل صبري وراح بدني
اضوق المرة واتغرب واكون مجبور اشد رحلي
وافوت ناسا حنان طيبين واقوت مرتع صباي واهلي
اشيل الزاد غنيواتن اردد فيها من جهلي
كلامه يقول انا الراحل وجاييك بكرة يا املي
جاييك يا غرام الروح لو حتى السنين دار تابة
وجاييك لو سنيني تدور وتدوس امالي انيابة
وجاييك لو يطول الليل ولو يبقى الوطن غابة
جاييك قولي لي كيف انساك وانا السافرته عشان عينيك
فت درب الوطن والعزة والحله المنورة بيك
فت امي وقليبه الحاني وحاجات تاني خافي عليك
وانت لا تشغل قليبك بيها ما دام الصحاب حوليك
قول لي يا حبيب برجاك لو حتى اغترابك طال
وقل لي ما بخونو هواك وما بسمع كلام عزال
وقول لي غير غرامك انت ريد يشغل قليبي محال
وطمن قلبي يا مريودي باقي الغربه زاته نضال

[أبو وائل]

الفاتح ابراهيم بشير

يانسمة مين غيرك

يانسمه مين غيرك يكسر حواجز البين
يتحفني بي اخبار مريودي نور العين
طولته مستني يكتبلي لو سطرين
يحكيلي كيف حالو وان شاء الله هو زين
مفروض يكاتبني مهما اكون انا وين
حسب اتفاقنا الكان يوم كنا متفارقين
رسلته مكتوبين ما جاتني أي ردود
ان شاء الله مانعو هو خير لا يبقى صد وجحود
يا حليلي انا الممكون وصابر على ناري
وكل ما ادس حزني تفضحني اشعاري
وكل العلي والبي اسبابو من جاري
ويومي الاقصر انا ما بيقبل اعزاري
يا نسمه قوليلو الحال وراك مايل
والليل بلاك ليلين وديمه الدمع سايل
قوليلو يومك داك يومي البقيت راحل
ماقلت لي الرد ما تشيلو هم واصل
يا نسمه عارفاني مكتول ضناني الشوق
للبلد من جم صلحاب كري والسوق
عمرابنا والقوزين ليهن سلام مطبوق
خاصه المحطه تحت وقز ام شديرة الفوق
شوق البلد جواي يا نسمه ازاني عديل
خلاني ابكي وانوح كل ما اشوف النيل
اطرى الجروف والناس تنزل دموعي تسيل
يمارى لي منظر منقه و قرين ونخيل
يا نسمه شفتي البي وتابعتي بالتفصيل
ارجوكي سافري خلاص واوعك من التاجيل
برجاكي فوق نارين حزني وظلام الليل
وبصبر لي يوم يومين فيها الله بيه كفيل

[أبو وائل]

الفاتح ابراهيم بشير
ليه كل الدروب
يا قلبي الحزين وين تمشي ليه كل الدروب مقفولة
كيفن زول يصل للجامعة يرجع تاني لي سنة أولى
ياما كتار حليلهم ضاعوا في زحمة دروب مجهولا
يزرعو في النوايا الطيبة كان ثمرة ضياع محصولا
الواحد يريد النجمة ما بيقبل يشوفو افولا
تلقى وسط ظروفو يشابي عشمان انو بكرة يطولا
مسكين كان يخادع نفسو بي سحب الخريف وهطولا
متعشم يقول المسرة يوم باكر يدقو طبولا
مسكين ياحليلو اتناسى نكبات الزمان وفصولا
واتناسى انو نحن غلابا احلامنا العراض مطبولا
من زمن القراية شراي ما بشوف غير سيوف مسلولا
كل ما اقول وصل لي مرسى القى احزاني شادى خيولا
قاسي الزي يقلى الداريو نقاي يعرف المصقولا
اول ما يقول ديك لي كل خلق الله بكرة يجولا
عايش فد سؤال جواي ليه لحظات فرحنا عجولا
وايام الحزن تندب زي السلحافية مهولا
اختلطت على ايامي قدامي الهموم مسدولا
ممشكلتي العلي ومالبي ما هو مرض دوا وكبسولا
اه اه اه اه اه اه اه
اه من دنيتي واقدارا اه من جحيما وهولا
شينا الزي بلقى الدايرو منو الدمعة ما مقبولا
لكن يا رفاق بالدغري كلمات بي صراحة بقولا
انا كان جنيت او ودرت تبقى ظروفي هي المسئولة

[أبو وائل]

الفاتح إبراهيم بشير

الطمبور

معروف من قديم انو الجمال نسبي
وللموجب دوام لابد من سلبي
لكن نتفق رسمي وكمان شعبي
الطمبور علاج لكل مرض عصبي
سبحان الاله خالق العباد ربي
سوا قدح حراز دكا راصي العربي
مكسي جلد بقر ومطلي وتقول دهبي
وفوقو تلات عصي واقفات بلا شعبي
وخمسه سلوك حنان موزونه بالنسبي
لو رنة تزوب ترقص جبال كجبي
البركل يمر يتحول العقبي
لو ما كت بخاف والناس تشيل كضبي
كت بقول يرن وتتحل لوكربي
اندح الوئام بين الخلق يدبي
والبوسني الجريح يستئمن الصربي
بالطمبور دوام يتلاشي كل سلبي
وينشرا الفرح من كايا لا اوربي

[أبو وائل]

الفاتح إبراهيم بشير

ده الشمال يا الداير تشوفو

شوف شمال اهلي الافاضل ليل نهار في العزة رافل
فيه مضبوع سر الاهي بدري كان تحلمبو بابل
حاضنو هو النيل بي محنه وبس عشانو هو جانا مايل
وانحنى وغير مسارو ولفة ابو حمد الدلايل
كل منابع الطيبه فيه نالبهن اعلى المنازل
وبي شعر محفوظ مخلد في دواوين الاوائل
دا اليطوف هيبة ربوعو يستفيد لو يبقى ماهل
يا يشملو نسمه عابري ماخده ريقه من الخمايل
ويا ملك وجدانو منظر يقتل الهم والبهادل
والرسول قال في حديثو ومافي اصدق منو قايل
الخدار والمويه جمبو بلثم الهم والمشاكل
يا سمعلو قصيده صادقي ترسل الاشواق قوافل
يا نغم طمبور حنين يستقر جوه الدواخل
ويا قمريتا تقوقي فوق تميره صبطه شايل
يا قعد بي ايدينو يشرب مويه صافي من الجداول
ويا يشوفلو كمان مزارع شايل الطوريه نازل
بي نشاط قاصد زراعتو والصعب بيشوفو ساهل
ويا كمان متع عيونو بي حسان زي الارايل
زوق وطيبه ادب خيالي في عفاف ما منو مايل
ويا كمان لاقوهو اهلنا بي كرم من غير مقابل
وروهو انو الدنيا لسع فيها خير وانبل خصايل
يكرموك لو جيته فوقم يجبروك لو ماكا نازل
ده الشمال يالداير تشوفو بالنهار الفيهو حاصل
اما في وقت الاماسي ليلو ضمه جميل وحافل
نتفق من بدري شله ونطلع القيزان قوافل
فيها يجمع شملنا في رباط زي العوائل
ونبدا نسأ ل عن بعضنا يا محمد وينو عادل
وشوفو يا ناس وين سيد احمد اصلو زولا ديمه ماهل
ونمسك الطمبور ننقرش لحن تنهاربو المفاصل
ونحن في عزت قعادنا يبدا واحد داير يجادل
وبي محنخ نقولو ياخي .. يا فلان خليك عاقل
خلنا النسمع معاكا ..اشتهيت بس اسي كامل
ويا فلان قلك قصيده تروي ايا منا القواحل
جايه من وجدان وصادقي ليها تهتز الجنادل
وفي الختام نطرب نغني وما بنعرف قيل وقايل
ده الشمال يالداير تشوفو رغم وصفي انا ماهو كامل
ده الكمال لله وحدو لا بينوم لا بتلقى قافل

[أبو وائل]

الفاتح إبراهيم بشير

عم الزين

يوم الناس قالولك لا لا
واترجوك ماتفوت الدار
ضرب بي كلامن عرض الحائط
وشلت شنيطك بي اصرار
قلت بسافر يعني بسافر
كل الناس بتقوم وتسافر
فعلا قمت ومشيت رايك
واتصرفت بدون ماتشاور
جيت البندر بي امالك
الا لقيت الوضع مغاير
خاب الامل الجيت عشانو
وقمت تلوم في الزمن الجاير
===========
كنت هناك بالجد متريح
فوق واطتك طالع ونازل
تاكل وتشرب من نخلاتك
وتصرف وتنفق من غير طايل
آخر اليوم لي بيتك ترجع
لا في مدافره لافي مشاكل
لابتقيف في بص شماعه
دمك فاير وعرقك سايل
لانشال ينشل ماهيتك
لاكمساري معالك متثاقل
لابتأشر للملاكي
سوقني معاك ياعم ان واصل
تحرج نفسك انت بتعرف
انو الطيبه انصارا قلايل
==========
انو تعوم عكس التيار
انت براك البدري اخترت
ليه ياقلبي تنوح تتبكى
وتندب حظك ليل ونهار
===========
لمن قمت وجيت البندر
كنت بظن الحال اتصلح
كنت بتحلم بي مستقبل
فيهو ابواب الخير تتفتح
الا لقيت الواقع امرّ
وزينا ناس تعبانه وتكدح
ناسا عايشه معيشة راقيه
بي تلفونا بتخسر وتربح
وناسا عايشه علي الماهيه
من يوم خمسه الجيب اتقمح
وناسا عايشه على خلق الله
يوما شحده ويوما تلفح
غايتو الحاله معادله صعبه
كأنو الناس قاعدين في مسرح
===========
عتدي سؤال بالجد حيرني
ونشف ريقي وراهو نشاف
ليل ونهار شاغل تفكيري
لما بقيت انا منو اخاف
حال الزول القالو موظف
وراتبو الشهري شوية الاف
لو عديت مصروفو الشهري
اكيد تلقاهو اضعاف اضعاف
===========
حلو معاي المسأله دي
وساعدوا معاي العم الزين
زول محمول وعندو اطفال
عشان ماياكلو يجيب من وين
يسرق ينهب يشحد
ولا كمان يغرق في الدين
عندو محمد واحمد وساره
وخمسه اطفال فوقم تومين
لازم يقرو وياكلو كويس
لازمن يلبسو لبسا زين
قولو معاي يسوي شنو
عشان مايعيشو يجيب من وين
===========
عم الزين يعلمبو الباري
ديمه عليهو الجوف محروق
كان في الماضي ركازة الحله
وياهو البربط للمطلوق
هسه وين ياحليلو التايه
ودر واصبح جنو كلام
يصرف عربي مبالغ فيهو
وناس الحي سمو النضام
مرات يضحك لمن تشفق
ومرات يبكي بكا الايتام
عندو عباره تملي يقولا
اوعك تحسبا بالارقام
تتعب نفسك في تضريبا
وآخر حاجه تجيك اوهام
===========
بعد الشفتو براك ياقلبي
اخير لك ترجع منك وليك
خلي وظيفة المكتب طايره
لا لا قسم مالايقه عليك
عود من تاني وازرع ارضك
دي مابتخدر الابايديك
عزة نفسك في واطتك
جنب نخلاتك وبين والديك

[أبو وائل]

الشاعر محمد سعيد دفع الله

الطيف



اقيف يا طيف اقيف وارجانى ... وين فايتى عابر
شن حارس وراك انا تانى .. يانى معاك مسافر
لالا لاتقول لى اى كدى استنانى... بمشى واجيك باكر
يبقى انا ما الم فيك تانى ... مين عارف المصاير
الليلة هاك اسمع رنين الحانى .. وابقى معاى سامر
وخفف لى قليل احزانى ... يا ما انا عشت صابر
شوف كيفن يسوى زمانى ... ديمة على جاير
آه مر العذاب ورانى ... سهمو فى قلبى غاير
شوف الليلة كيف بستانى ... دا الكان ماشى ناضر
من حر السموم بيعانى ... طيرو يفر يهاجر
أحوم وارجع واصد لبكانى ... مقطوع راسى حاير
وين احبابى وين خلانى ... آه يا الله قادر
ما عارف العلى ترانى ... فوق كرعى ساير
اسكت اسوى فى اوزانى .. اشعار مالا آخر
الليلة يا طيف عليك أحزانى ...لى شوية كابر
عشان خاطر قليبى عشانى لحظات بس تخاطر

[أبو وائل]

محمد سعيد دفع الله
لا شوفتاً تبل الشوق


لاشوفتا تبل الشوق ولا ردا يطمن
اريتك تبقي طيب انت انا البي كلو هين
قليبا لي رهيف عارفو ماب يحمل حنين
انت ماغابيك حالا فيهو كل البيهو بين
بقيت مالي غير اشعاري اكتبها فيك وادون
اقول يمكن تزيل مابي والله قليل تهون
مالكن يا قماري بتشدن ايه لازمت تغنن
بديكن وصية امانة لي سيد روحي طيرن
ترا الحال العلي شفتنو قولن ليهو واحكن
قولل السحب في روضو ما عادن يكبن
اضحي محل خراب ما فيهو غير زهرا مضبلن
قولن ليهو ليلو طويل طولا يجنن
لا قمرا ظهر في سماهو لا نجمات يضون
كلما ليهو يتصبر يقول ايام يعدن
يمني لنفسو بي رؤياك والله تردلو يمكن

[أبو وائل]

محمد سعيد دفع الله

مليت من الغربة




مليت من الغربه آعلى ياولدىياايدى اليمين
داير الرجوع بس كيف يكون يكون وتفكيرى فيهو أنا من متين
كل ما أقول اصبر شوي باكر تكون الحالة زين
القي الظروف ياها الظروف بل زايده سوء بحلف يمين
وآخد لى لفته على الزمان القاها مرت كم سنين
لمتين بتتفك القيود القاسي قلبها ما بيلين

جيت فاكر أنى أكون سعيد بى مال بيجرى على اليدين
لكنو مقسوم ياالعزاز رزقا يكون دايما ضنين
والشى العجيب مما وصل ولليلى فوق اكتافى دين
حسره وهموم متواليات والدمعه يوت هالابه عين
نيران مولعى فى القلب مسكين فقد لضرا الأمين
كان عيشتو هاديه قبل يجى وفى بيتو كان قوتو اليقين
والليله في الأهوال دوام يصرخ ومو لاقى البعين
وينك بعدتى على ليه وأنا ليكى كاتلنى الحنين
يالسمحه سموكى القرير والناس تجيك من وين ووين
وأنا قمت منك شن أقول غير ده المسطر في الجبين
يادرة الوطن العزيز ياالنادره ياالماليك وزين
عشمى ومناي ارجع واجيك أنا غيرهواك متل السجين
داير اكون بين الاهل محضون وحاضن اعز طين
داير حياتى مع الصحاب واللقمه مابين العوين
يالوبه شمر للضراع والليلى جيت أوصيك دحين
كونك تقصرمااظن وأنا عارفو طبعك ياالخزين
يات من معلم درسك شاكرك علم وخلقا يزين
ما عليك خوف مادام معاك زولا مسمى الزين وزين
آنت البتعرف للأصول كاسب رضاء الوالدين
من قمت درفونا صغير ماكت يوم نيا عجين
دايما مواظب ومجتهد في الجانبين دنيا ودين
ورافع السماوات غير عمد داعيهو ينصر وليك يعين

[أبو وائل]

محمد سعيد دفع الله
الهديل

ابديهو الهديل .. كدى غنى لى ّ
حتى ان كان قليل .. يبرد علىّ
يقيف دمعى البسيل وتجف عينى
لا تبكى و تنوحى ... كفاك انينى
تفتقى لى جروحى ... مع حنينى
انا الفارقت روحى ... قضيت سنينى
اريت ان كان مرادى انا بى ايدى

اه قمريه ... ماك شايفاهو حالى
حالى البى ّ ... يغنيك عن سؤالى
زولا لى ... ّ طول شايفو سالى
زاد البي ْ بدّلْ يرحم شوي

ماراعى النحول ... الفى عضايا
اظن صدقلو .. قول كذب هوايا
خلاص لمالو زول ... تانى وسوايا
وانا البكا والذهول صار لى ْسجيه

انا الختيتو ... فى داخل فؤادى
انا الضاريتو ... من كل الاعادى
انا الغذيتو ... يشرب من ودادى
اه ياريتو خفف لى الاذيه

اه اواه واه ... قمريه غنى
معاكى قليبى تاه ... بس لا تضنّى
انا القاسيت اذاه .... اهديكى فنى
لا تزيديلى جرحى على العلى

[أبو وائل]

محمد سعيد دفع الله

عرجون تميرة

انتنت عرجون تميره
وقايمى قوم عز فى قريره
شايله ناجحه وماها صيره
وليل نهار غنايا طيره
رمت الجدلات حريره
ومال جسيم ناعم فطيره
عينه سيافه الشهيره
ساوى قلبى عديل جفيره
خدها الزهره النضيره
ومازج الصندل عبيره
زين التفاح صديره
ويا (حسن )وصف ضميره
دى الخلوق جات من عِصيره
وهايجى زى مويه الدميره
نازله للشبال فى سيره
وكل زول شايلاه غيره
قالوا ما شايفين نظيره
والجميع عشمان نِظيره
وهى الخطيوه وكت تديره
يمين رؤو س الناس تديره
ليك قلوب الناس اسيره
وغير غناك ما ليها سيره

[أبو وائل]

محمد سعيد دفع الله
يا نوري


جيتك وقيع يانوري آه أطويني في جوفك هنا
ودسيني ضمة من الزمان تب ما يعرفوا بكاني أنا
ما دام شقاني بلد عزيز خلدتو بي أعذب غنا
وجرّح قليبي بلا سبب صبّح حويلتي مبشتنا
كان وجهو ضاحك لي زمان ريّان يفيض رقة وسنا
وآهٍ بشوف وجهو الجميل الليلة كمّل للشنا
يا حليل زمان وكت السنين تتجارى زي لحظة هنا
والليلة آه لحظة عذاب تنجر زي مليون سنة
جابتني طيبتك من هناك أهلك ينسوني الضنا
ويسقوني من رقة شعور كاسات نبيذ مسكّنة
جاييك شان أنسى الهموم أحفر غريق فيك وأدفنا
وأرجع أغرد من جديد في كل جرح زهرة هنا
ما دام هناك نهاري صار زي ليلي أسود داكنا
وقمرك يلهلج منشرح نوّر ربوعك زيّنا
جار بي الزمان أنا في القرير لي قلبي هذّم ما بنا
وجاييك فيك ارتاح أنوم تنصح جروحي المزمنا
ما ديك قماري على النخيل ضمت جناحه علي الجنا
وجدول يصفق لي فريع في نشوة ميّل وانتنى
في كل خطوة أمشيها فيك تمسح تزيل شي من عنا
وأشعر براحة تجم عضام قلبي الحزين شقيش رنا
وحوراً حسان مال عوده بان صافي وأصيل كان معدنا
ما ديل شباب يملوا العيون بي رقة خالية من الخنا
الله على قلبي السعيد يا دوبو تمالو المنا
وشايفو انتشى وللهم نسى وفرحان يقول موجود أنا
عاد وآحلال قلبي الشفوف ما دام على الحبان دنا
غني وبسم وسط الصحاب ينسى الليالي المحزنا

[أبو وائل]

محمد سعيد دفع الله
قول الناس

البوجع قليبى انا ديمه فيهو النارتقيد
ده القول البقولوا الناس يقولوا على سعيد
ما عارفين قليبى وحالو كيف عايش وحيد
والبعطف عليهو نساهو منو رحل بعيد
كم قاسى العذاب متو الى كل صباح جديد
غرقان فى هموم اهاتو كل ما يوم تزيد
وشبيه البى تحت فى امو مال فدع الجريد
لاحام الدباس بى فوقو لا اتمدتلو ايد
حارسنا ليهو قاسى
قليبو مصنوع من حديد
بالليل والنهار قاصيهو لانوم لاغميد
ماراعى القرابة والفة والريد الشديد
ولا حنن لقلبو قليبى انا المكتول شهيد
يمر العيد طروبه الناس تغنى تميل تعيد
الا قليبى حزنان باكى ما مرابو عيد
عايش فى الارض غير هادى زى طفلا شريد
البكاء و النواح هداهو ليهو اكيد يبيد

[أبو وائل]

محمد سعيد دفع الله
القلب الجريح

القلب الجريح الديمه ينزف فى دماهو
اشرح لى بس ورينى ايه ذنبو الجناهو
حافظ لى زمان العشره ذاكر ما نساهو
وكيف تنساهو انت يا روحو ليه بتزيد شقاهو
كلما ا شرق صباح يا روحى قلبى يزيد عناهو
وانت القاسى ما راعيت كفاهو عذاب كفاهو
مره اطراهو انت طبيبو فيك يكمن شفاهو
ومن غيرك محال ينصح يطيب ويجد دواهو
ده الزول القبيل حباك فى جهلو وصباهو
ليه خليتو عاش وحدانى كيف اختر سواهو
بانى عليك حياتو قبيل و فاكرك كت معاهو
حرام تنساهو والله حرام تهد ماضى البناهو
اساهر الليل ويشهد لى نجمو الفى سماهو
وانوح حدى الصباح عينى النوم ماب تراهو
باكى الماضى ديمه بنوح حكيت فاقد جناهو
وين زولى الوسيم دلونى عيشتى جحيم بلاهو
حليلو ويا حليل الماضى فى ودو وصفاهو
وطريت برقو البشيل عبادى من تبسم سناهو
وفرعو البان رشيق يتنى مال هتف نداهو
وضميرو الزى جدى الغزلان بعيد ضارب خلاهو
ضلام الليل سبيبو سوادو مسدول فوق قفاهو
مهما طال عذابى انا برضى دايما فى رجاهو

[أبو وائل]

محمد سعيد دفع الله

الودار

هسـع خـلاص بـاكـر تــروح
وتسيبني وحدي أنا في الودار
سايلـة الدمـوع أبكـي وأنــوح
مــا بـفـرز اللـيـل مــن نـهـار
وأنا صبري كيف قولي دحين
بعـدك خــلاص جـفـت ديــار
كان ليها زيف ورشة خريـف
وأزهـار منـورة فـي الـخـدار
ضلاً وريـف وأغصـان تميـل
فوقـه الكـنـار داعــب هــزار
آه يا لطيـف ويـا حليـل حليـل
داك الزمـان جـا الليلـة جــار
كت ناوي أجيك فجرا صبـاح
وأوصل معـاك حتـى المطـار
وأنظر وشيك وأنسى الجراح
لكـنـو آه فــي جـوفـي غـــار
آه يــــا زمــــن آه آه أحـــــيّ
في النـار دوام وتزيدنـي نـار
بكـيـت عيـنـي مـالــك عـلــي
مـتــل الـتـقـول بينـاتـنـا تـــار
جــف الـشـدر كنـكـش يـبـس
قمريهـو خـل عشيـشـو طــار
لجنـاحـو فــر يـدقـس دقـــس
في تيه غبار وهبـوب عصـار
ضهبان ودر تب ماب يشـوف
غطـت عيونـو دمـوع حسـار
مسكين غمر بي شوق ولـوف
ولليـلـة فــي نــص الـمـسـار
غلبو الصبـر فـوق نـار جمـر
مـوقــودة زادت فـــي الأوار
عاد ليهو حق كان مات شهـق
صــح دة الصـبـر والله حــار
عاش بي أمـل يمشـي ويصـل
لحـبـو يصـبـح فــي الـجـوار
لــكـــنـــو آه روّح أفـــــــــل
نجمو وبعيد في سماهـو غـار
وأصبح كسير مجهول مصير
مـا أظنـو رفّ جنـاحـو طــار
مسكين ينيـن بـي شـوق دفيـن
ودّر عـمـيـرو مــتــل كــتــار

[أبو وائل]

محمد سعيد دفع الله

شجون العيد


مر العيد وفات لا شوق لا تهانى
وما قادر اقول انو قسا ونسانى
كم ناجيت حروفو الخمسه فيها نظمت اغانى
ساهر ديمه افكر فيهو فر النوم جفانى
اعيد لحظات قضيته معاهو انسج فى الامانى
كان ياهو الامل يا حياتى مالى غيرو تانى
ما عارف اذايا البىّ كيف الشوق برانى
والعارف لحالى يا روحى قبل الموت بكانى
عاد هسع الومك انت ولا الوم زمانى
واقول ياهو المقدر كان والمكتوب لى جانى
اسمك ديمه الهج بيهو ما فارق لسانى
طيفك ده الملازم لى ما فات يوم ختانى
ما بقدر اطيق الفرقة ما بحمل ثوانى
كيفن هان عليك تنساهو كان ريدى وحنانى
شوف حتى الطيور حزنانه تبكى توح عشانى
وينو حنان قليبك لىّ ليه صد وابانى
ما غلط على حا شاهو ديمه عطوف وحانى
مالو الليله بى ايديهو كاس الويل سقانى

[أبو وائل]

محمد سعيد دفع الله


بت الأصول


مشكــوره يابت الأصــول يازهره ماب تعرف ذبـــــول
تنفح أريجــا قريب بعيــــــد ريانــه فى كل الفصــــــول
مهما كتبت حروفى فيـــــك وإخترت أفضل ما أقـــــول
ألقاهــا ما أوفت ثنــــــاك ومقـــامه ما وصل الحجــــول
يالمنظرك يبهج يســـــــــــر كل البشاهدك فى الحقـول
مهما تطول نظراتو ليـــــك فيها إرتياح وما كــان ملـــول
سامحيهــو كان قطفك محب من شوقو ماراعى الأصول
وطبع البشر من يوم وُجد يا زهره معروف كان عجــول
يا إنت ياشمس الفـــرح فى دارنــا حاربـــت الأفـــــــول
فضلك علينا بلا فـــرز طبعــك عطا الغيــث الهطـــــول
غذيتـــى للمغروس نبت وإفتـــرَ باســـم فى الشتـــول
لما إستوى وأينــــــع بديع وأثمــر عناقيد العقـــــــــــول
حاشاكِِ ما كليتِِ تـــــب فى غيبتى كم شلــتى الحمـول
حامله الرساله بلا مــــلل عارفانـــى ما درت الرَحـــول
معليــش رحلت على أمل كان ظنى أحققو بس فى حول
وحالت ظروف فرضت على تتمــدد السنوات تطــــــول
عانيت كتير فى غربتى ومن شوقى خاويت الذهــــول
عايش همـــــوم من كل لون والبى ما يبـــــلابــــو زول
يا رب تسهل لى النزول ولى بلدى أنعـــم بالوصــــــول
وأرجــع وأكون بين العدول عيشــا هَنــىِ وعمـرا يطول

[أبو وائل]

محمد سعيد دفع الله


تعال غنينا يامامان


يامامان تعال غنينا قول فوق حرفو
جيب نغما على الشاد ن غلبنى انا وصفو
عام بصديرو زى وزينه موجه تد فو
فج الداره كل زول ماعرف وين وصفو
مال وانتنى حاكى البان سبيبو ينسفو
سابل ريش نعام مندلى هادل كتفو
ضاوى جبينو يلمع نور خدودو يلصفو
فج الليل بروق من بسمو فرو يرفو
رويان جسمو زى الدوبو قام فى جرفو
محروس ماب يفوت تب سيدو الله يصرفو
مضمور هافو زى الصيد كاحل طرفو
يرنع فى الرقيص يترج صدرو ورد فو
ود عينيهو ماهر سهمو رميو يعرفو
والقبلان يعاينلو ويقابل حتفو
وكتن ماع حتل فى رقيصو سخن كقو
جرجر توبو كل لحظات يقيف ويلفو
الواقفين جميع فى الداره عرقو وجفو
دايرنك تعيد الرقصة لو يتكفو
اجبر خاتر الحبوك لا ينكسفو
لو ماجيت يخلوا الصفقة ضمه يحلفو
صادنا هواك رحماك جيش غرامك كفو
من البينا ينجينا الكريم بى لطفو

[خالد النذير]

الحبيب جدا ابووائل
عذرا
ان قاطعت بمشاركتي
هذا الجمال
الذي اتحفتنا به
حقيقة
اشعار اكثر من رائعة
وأغاني سامقة كالنخيل
وأكرر
اعتذاري مرة اخري
لان روعة المكان هنا
تحتم علي المار
ان يتوقف
ويوقع
اعجابه
..سلمت يداك

[أبو وائل]

محمد سعيد دفع الله

العين بصيرة والايد قصيرة

تراها العين بصيرة .. إلا الأيد قصيرة
محكوم بي إرادة المولى .. ما لي فيها خيرة
ديل حولين تمام يا السمحة.. عشمان في سفيرة
أوصل بيها لكن آه .. قيودي بقيت أسيره
جافة حياتي غيرك إنتي .. مابتصب مطيرة
ما إنتي السحاب لي روحي ..يسقي لي خديره
وين ست الحسان في قريرنا .. ما حبيت غيره
عاد يا ناس حقيقة الطولة .. صح صعبة ومريره
لا متين يا كريم توصلني .. لى زهرة قريره
دي المن مروي لا قوز هندي .. يتفاوح عبيره
متين أسمع زغاريد قاجي .. في ساعة الضريرة
وأشوف أختي ومعاها الوالدة .. يربطوا في الحريره
أخواني وجميع خلاني .. الحبان وجيره
فرحانين تشوفها وجوهنا ..منسرة ونضيره
حتّن للنخيل والمنقة ..قطعن لي سيره
تردد في العديل والزين .. يشيله معاها طيره
بيت مال وعيال قالن لي .. تنهلوا منو خيره
تبنوا الجنة أما الريدة ..ليها تكون حصيره
تتبدل حياتكم ديكه .. من صيفه وهجيره
وتبقالكم نعيم شان انتو .. صافين السريره

[أبو وائل]

محمد سعيد دفع الله

يا طير روح أمش وتعال

يا طير روح أمش وتعال اشرح قول لى إيه أخبارو
فســراع إنت عارفو قليبــى ولهان لا تزيد لى نارو
حلق فى سماك فوق عالى لا يهمك رياح وأمطارو
وإتجه الشمال لقريرنا تلقــى مندى زاهى خدارو
من عِند الحفير لا فوق تروح بيتو وتقيف فى أسوارو
وأحكيلو العلى ِ بأمانه .. جيب لى أنا منو كل أخبارو
ذكرو كان نسأهو الماضى كيف ينسى القليب الدارو
لا تكتر تزيد فى لومو .. معزور أنا قبلت أعزارو
روضنا الكان قِبيل فى خضارو كل ما يوم يزيد فى نضارو
قـوللو أصبح خراب مِن فُت .. فد يوم الربيع ما زارو
يبس الكان مُخدر فيهو ماتت ضبلنت ازهارو
حلابو المَحَل بعُصارو .. قّلع رَمّى كل اشجارو
حتى الدوبو فرهد غصنو ما إتفتح فتق نوارو
جافاهو الربيع يا خِلى وين زمنو البهب فى أسحارو
من بعد النضــاره الفيهو وكتن كان يغنى كنارو
إنعدم البغرد شادى طربان عازفا أوتارو
إتحت الصَفق من شِدرو كان للقُمرى فيهو أوكارو
خلَ جناهُو فارق عِشو حزنان يبكى ينعِى صغارو
جار بيهو الزمن يا خِلى وإتفزعت عليهو أقدارو
روضو معينو قلت مويتو وإنعدم إنقطع سرسارو
عاشقو الكان بيسكن فيهو رَوح عقلو راح مزمارو
ساب أنغامو خَلَ غٌناهو ودّر بالو كل أشعارو

[أبو وائل]

محمد سعيد دفع الله
ياحليل القرير

مالي مال البعد المرير ......... ومالو كان لازمت القرير
ياحسن وجرقندي المروّه.......... الحقوني حتل جوّه كير

جيت مهاجر قلت القى خير...... بيهو نسعد ويربى الصغير
الا جيت وازداد العلي ............. من هجير اصبح في سعير
لا تقولو معاك السرير ............ اشتكيلو البيك كان يدير
نحن مشتركين في العذاب.........وبرضو زيي يكوس في النصير
بينا حال..العدو حالو أخير................وخوفنا يبقى الموت يا المصير
من عذاب يزداد كل يوم ................في طريق مكتوب أن نسير

ياحليل وياحليل القرير ................وياحليل الزمن النضير
بين جناين تسبي العقول................والجروف وألوان الخدير
اشتهيت لي قعيده العصير................بين صحابي وفوق الحفير
ولّا ونسه على الرمله ديك................صافيه في ضيْ قمراً منير
وينو مامان ود المدير ................وين غُنا وطنبورو الشهير
كل زول فينا ضربلو فج................ياكريم اجمعنا آقدير

جيت وقيعكم هل من مجير................يمسح الدماع الغزير
بي حروف من يانع القصيد................تبقى زادي لباقي العمير
كلكـــم فنــاناً قديـــر ................ينظم الياقوت في الحرير
كان كتمت البيْ ماشكيت................الا صِر في حالاً خطير
لو لقيت مناي كان بطير................الا كيف بجناحي الكسير
داير اعود بي عَدلي آ صحاب...............مو اجازه تكون فد شهير

[مصطفى هاشم]

لله درك عمنا الغالي ابو وائل سلمت يداك
كلمات في منتهى الروعة من شعراء الطمبور ابداعات بلا حدود وفي انتظار المزيد من اشعارهم وياريت خالد شقوري او حاتم حسن الدابي
وربنا يعطيك العافية وتقبل مروري

[أبو وائل]

الحبيب جدا ابووائل

عذرا
ان قاطعت بمشاركتي
هذا الجمال
الذي اتحفتنا به
حقيقة
اشعار اكثر من رائعة
وأغاني سامقة كالنخيل
وأكرر
اعتذاري مرة اخري
لان روعة المكان هنا
تحتم علي المار
ان يتوقف
ويوقع
اعجابه

..سلمت يداك




الأخ العزيز الغالي
أبو وليد
تحايا معطرات
الجمال صفتكم
و الروعة انتم أهلها
الإبداع أنتم منبعه
لنعش معاً روعة شعرائنا
و هم كثر
و نأمل أن يمتد إبداعكم
ليتحفنا بمن أجادوا النظم
ليسعدونا به
لك كل الود

[أبو وائل]

لله درك عمنا الغالي ابو وائل سلمت يداك




كلمات في منتهى الروعة من شعراء الطمبور ابداعات بلا حدود وفي انتظار المزيد من اشعارهم وياريت خالد شقوري او حاتم حسن الدابي


وربنا يعطيك العافية وتقبل مروري



شعلة المنتدى
المسكون بالروعة و الإبداع
معطر المنتدى بالرياحين
هذا إمتداد لإبداعك عبرصفحات
هذا القسم الذي كان لبصمتك فيه الأثر الكبير
يلا معاً نواصل نثر إبداعات بلادنا
من جميل الكلم و شجي اللحن
لك كل مودتي

همسة :
بإذن الله سيتم نشر قصائد كل المبدعين
في مقدمتهم خالد شقوري و حاتم حسن الدابي

[أبو وائل]

خالد شقوري


أم الحسن


وقفت بعد حلبت لبينة الشاي تكورك يا الحسن
يا ام الحسن وينو الحسن
لمن صفت رغوة شخيبات اللبن
في حلتا المبني من طبق السكن
واقفي في حوش البهايم ولسع تكورك يا الحسن
جاها حسا من بعيد مارق من القاطوع ورا
قال ليها خير يا الحاجي خير
قالتلو خير تعال لي جاي
دايراك تعنون لي جواب يا الراسي لي ولدي الخدير
لا تبقي زي شافع السرير
يقول لي زين آيمة زين وزين تبقي بعد شهير
وان جاني يكتب فد سطير
اقولو يا سجم السجم انا زي قرايتك ما قريت
لكن عويناتي بيفرزن الوريقة البيضاء من لون القلم
بعد المغيرب بي شوي جاها الحسن تعبان يسير
العشى غنمو من الدرب سرقت ندي وشو الهجير
سوتلو شايا بي لبن قرض معاهو حرف فطير
قالتلو بسم الله قول وأكتب وصيتي انا للخدير
الزمن يا ولدي ماحقاهو السنين
البعيش في الدنيا ما بعيش مرتين
العمير فاضلي بس منو اليقين
وانت طول في البنادر يا الحبيب لا متين
تعال اوريك حق ابوك الجم حقيق حاج اللمين
ان عرفتو بلا عمار يقولو ولدا عندو طين
العلاج لا تنسي رسلو لي دحين
العوينات آجناي شوفن ضنين
سلامنا ليك مطرز للبنيات والبنين
ولو الارض يا ولدي تنشال في الايدين
انا كت برسلا ليكا في لوري الخزين
####
وقفت
العمير فاضلي بس منو اليقين
وانت طول في البنادر يا الحبيب لا متين
تعال اوريك حق ابوك الجم حقيق حاج اللمين
ان عرفتو بلا عمار يقولو ولدا عندو طين
العلاج لا تنسي رسلو لي دحين
العوينات آجناي شوفن ضنين
سلامنا ليك مطرز للبنيات والبنين
ولو الارض يا ولدي تنشال في الايدين
انا كت برسلا ليكا في لوري الخزين

[أبو وائل]

خالد شقوري
غيم الوداد صبا

نزل غيم الوداد صبا
غمر وديان غناي عبا
سرى الفرح الحنين تبا
حضر وفد الولف سايق بشاشات المطر لبا
***
تعال يا العمرو ما غبا
تعال أنا وأنت في عينيك من عينيك نتخبا
تعال أشواقي ما قدرت تقاوم نسمك الهبا
كان جيتك تكون أروع زمن دابو الحرف تبا
زاهية الدنيا بالأفراح ولسة أساي ما تبا
وكنت دخرتلك غنوات عشان أحلامنا تتربا
كفاك طول الأمـل يا ليـل
أخير تديني باقي الحيــل
قبل يجرف هواي السـيل
وألم في العمــرو ما غبــا
معاك ببني المشاعر بيت
معاك بحلف بقـول غنيت
ولا بندم وأقول يــــاريت
ولا بالجــــــــاي بتنبـــــا
***
نزل غيم الوداد صبا
غمر وديان غناي عبا
سرى الفرح الحنين تبا
حضر وفد الولف سايق بشاشات المطر لبا
***
وكان حبل العمر ساكن
بسيمة زولة تتحبا

[أبو وائل]

خالد شقوري
مسافة السكة
يا الشايل شمسك في جواك خليها تبين للناس تطلع
يا النازع فرحة والدة هناك غير حس آهاتك ما بتسمع
***
يا الناسي اللبقة المفتوحة دي بلاك طوريتك ما بتقرع
المنجل في راس التمرة ناسيهو وامك ما بتطلع
الكتقة وقعت والحملان في اللوبي بقت تجري وترتع
والزير الفي بيت الضيفان حرمان لا نزّ ولا نقع
***
يا السبت عقابك وروحت وحيات عز بلدك لا تنجع
الشتلة تقولك لاتنجع الواطة تقولك لا تنجع
الحوض الما رفعت سرابو ينادي يقولك لا تنجع
الحبل الما تميت وسيرو يهاتي يقولك لا تنجع
والنيل الفي واطاتنا ترع بيقولك ازرع ولا تنجع
***
ماك فاكر يوم داير ترحل وابوك الحاج شايلو عصا
لا حيلو وقف طقش الابريق اندفق سال فوق المصلاة
قام بارى الحيطة واتوكل ويقوم فد مرة ومية يقع
ويقولك يا المبروك ارجع
***
ارجع ارجع يا زول ارجع غير ارضك عاد ما بتلقى بطاح
شن داير في بلدا والناس ما فيهن حاس وما فيها صباح
الليل الويل مليان اتراح الويل الليل مليان اتراح
بياع بيقول افراح افراح زي البيقول تفاح تفاح
***
مجلوبة الفرحة ومفروشة من ضحك الناس دايرين ارباح
لو كان في ايدن ملك الكون كان لمّو عبير الزهر الفاح
كان علمو نفس الزول العاش في سدر الليل داير يرتاح
كان حجزوا الغيم في واطاتو وكان آمسكين باعو الارواح
***
وين تلقى الفرحة وتتهنى في دارا ضيقي ومافي براح
جم ناسا من عين العطشان تخطف ومضات البرق اللاح
***
سايب اهلك ونخلك راحل قول وين ماشي وين آ صاح
الشمس النايري ابت تطلع النيل يا زول اصبح رحراح
الضل قصر ما غتى رويس ولدا ساكب عرق الكتاح
الواطة ابت تديك الخير ولا انت عليك ما هابي رياح
***
قولي وين ماشي ووين غاشي ولي شن سايب بلد الصلاح
النسمة ان جاتك بتجيك ملياني عبير عند الفياح
الموية ان داير تلقاها نقاعا واطيب من الراح
ان درت نغيم الموج تلقى وان درت كمان الطير صداح
***
ارجع ارجع يا زول ارجع
الضحكة هناك من جوة الجوف الفرحة هناك ما فيها الخوف
الشقى ارحم في ضل النيم وبعيد من ناسا واقفة صفوف
جم ناس حبان تلقى المكسور مشيول في كتاف واحد مكفوف
الجن الاحمر فاقد الحيل في خلوة حاج الخير مكتوف
دكان الشيخ فوق الواطة كيمان كيمان ما فيهو رفوفhttp://forum.goansport.net/images/myframes/7_cdr.gif

يا الشايل شمسك في جواك خليها تبين للناس تطلع
يا النازع فرحة والدة هناك غير حس آهاتك ما بتسمع
***
يا الناسي اللبقة المفتوحة دي بلاك طوريتك ما بتقرع
المنجل في راس التمرة ناسيهو وامك ما بتطلع
الكتقة وقعت والحملان في اللوبي بقت تجري وترتع
والزير الفي بيت الضيفان حرمان لا نزّ ولا نقع
***
يا السبت عقابك وروحت وحيات عز بلدك لا تنجع
الشتلة تقولك لاتنجع الواطة تقولك لا تنجع
الحوض الما رفعت سرابو ينادي يقولك لا تنجع
الحبل الما تميت وسيرو يهاتي يقولك لا تنجع
والنيل الفي واطاتنا ترع بيقولك ازرع ولا تنجع
***
ماك فاكر يوم داير ترحل وابوك الحاج شايلو عصا
لا حيلو وقف طقش الابريق اندفق سال فوق المصلاة
قام بارى الحيطة واتوكل ويقوم فد مرة ومية يقع
ويقولك يا المبروك ارجع
***
ارجع ارجع يا زول ارجع غير ارضك عاد ما بتلقى بطاح
شن داير في بلدا والناس ما فيهن حاس وما فيها صباح
الليل الويل مليان اتراح الويل الليل مليان اتراح
بياع بيقول افراح افراح زي البيقول تفاح تفاح
***
مجلوبة الفرحة ومفروشة من ضحك الناس دايرين ارباح
لو كان في ايدن ملك الكون كان لمّو عبير الزهر الفاح
كان علمو نفس الزول العاش في سدر الليل داير يرتاح
كان حجزوا الغيم في واطاتو وكان آمسكين باعو الارواح
***
وين تلقى الفرحة وتتهنى في دارا ضيقي ومافي براح
جم ناسا من عين العطشان تخطف ومضات البرق اللاح
***
سايب اهلك ونخلك راحل قول وين ماشي وين آ صاح
الشمس النايري ابت تطلع النيل يا زول اصبح رحراح
الضل قصر ما غتى رويس ولدا ساكب عرق الكتاح
الواطة ابت تديك الخير ولا انت عليك ما هابي رياح
***
قولي وين ماشي ووين غاشي ولي شن سايب بلد الصلاح
النسمة ان جاتك بتجيك ملياني عبير عند الفياح
الموية ان داير تلقاها نقاعا واطيب من الراح
ان درت نغيم الموج تلقى وان درت كمان الطير صداح
***
ارجع ارجع يا زول ارجع
الضحكة هناك من جوة الجوف الفرحة هناك ما فيها الخوف
الشقى ارحم في ضل النيم وبعيد من ناسا واقفة صفوف
جم ناس حبان تلقى المكسور مشيول في كتاف واحد مكفوف
الجن الاحمر فاقد الحيل في خلوة حاج الخير مكتوف
دكان الشيخ فوق الواطة كيمان كيمان ما فيهو رفوفhttp://forum.goansport.net/images/myframes/7_cdr.gif
كنت بقصِر المشوار لو عارف متين أرجع
كنت بحدد الميعاد وأبقى من الزمن أسرع
إلا مصيري في الأيام هي البتقول وأنا البسمع
وما لاقاني يوم في الدنيا زولاً حظو كان فاتو
***
مسافة السكة وأرجع ليك معايا الشوق وغُنواتو
أنا البهواك وقلبي عليك وأنا الزول البِحب زاتو
***
مسافة السكة مهما تطول برضي مصيري أرجع ليك
ألم حزن السنين الفات وأقيِّل في ظلال عينيك
ألمِّع بالحروف دنياي وأخاف أحزاني ترسى عليك
ألِِم باقي العُمر تحنان وأقول للناس حِكاياتو
***
ما يهِمك كلام الناس وحاتك إنتي ما ناسي
أنا البحسِب عشان ألقاك ثواني الفرقة وأنفاسي
وعارف لوعتك يا روح كيفن إنتي بتقاسي
وأعمل إيه مع الأيام مع قلبي وصباباتو
***
مراسيك وين عشان أرتاح وأعِوض قلبي عن صبرو
معاك بحصِد من الأفراح حصاد زولاً زرع عُمرو
أنا الراجيك ولي جِراح مُناي بي إلفتك يبرو
والآقيك في زمن نشوان تصُب للحب غماماتو

[أبو وائل]

خالد شقوري
حــــواء

ضمه جسم الليل عويله وضمت الاهـات زليلـه
حوا يانـاس ياحليلـه وثانـي يانـاس ياحليلـه
ماسكي كف الثوب تخيط والدموع تنـزل هميلـه
كان متاكي الباب وخايفي من ابوها يشوف حويله
مالعليهو هو ماهو هين كيف تعل روحو العليلـه
كان يقول لها حوا مالك والعذاب كيفن مشى لـك
حوا لا تزيدي العليكي فوق كتيفي انا شايلو فالك
حوا ماهميني حالـي الا بـس هامينـي حالـك
حو ا حوا باقي نصبر ونحبـس العبـر الثقيلـه
حوا برد الدنيا اكبـر والله اكبـر مـن عغتاهـا
كان بامكانه تسرق بس ضميـر الخيـر حماهـا
زاد ازاها وزاد شقاها لمه ابوهـا الراجيـه ودع
وروحـــو دقـــت بـــوغ رحـيـلــه
حوا قالت داير تاكل لو لقـت لهـا لقمـه نيـه
قالوا ليها ان دايري تاكلي اكلي في خاطرك شويه
اضحكيلـم وابسميلـم تلقـي بـدل القمـه ميـه
حوا قالت دايره تغمر لو حلـم بالفرحـه طافـه
قالو ليها الدايري تغمر الا في صـدر السخافـه
بينا وبين عيشة المعزه ماخلاص بعـدت مسافـه
حتى قدر الموت اباها مش حرام الموت ياعافـا
سوت الشاي للعطالـي ماجنـت غيـر الرزالـه
حامت الحلات تغسل شالو نـاس الحلـه حالـه
مـدت الايـد للعمايـه ختـو فـي ايدينـه لالا
قنبت في ضل مصغر سارحة تلتـق فـي نعالـة
في ضجيج عجلات زمانه مانست صرخة جماله
حوا ماتت لمـه ماتـت امهـا وكانـت طفيلـه
ماتت لمه ابوهـا روحـو دقـت بـوغ رحيلـه
وماتـت الـف مـره لمـه سلبوهـا الفضيلـه

[أبو وائل]

خالد شقوري

صيبرية


طفت اطراف الفيافي
شلت صبحي وليلي حافي
مانسيت ارد القوافي
زي طعم صبريه مافي
زي عشم صبريه مافي
زي نغم صبريه مافي
***
شافعي من عربان بلدنا
منها وفيها الوداعه
شتله في قيزان بلدنا
قايمي بايده وضراعه
القديم اللافه طرقي
زاهي في روعة طباعه
البسيمات في وجيها
الباهي من زمن الرضاعه
فاقعي زي شمس العصاري
في العمر باقي له ساعه
في القليب الشايله صافي
زي صفا صبريه مافي
في الهجير راحت تدقق
في النهارالحار تورق
للهدوم بالليل تلتق
***
في الجرف زارعه له حوض
راجي قبل الحين يبتق
والبسالمه من بلدنا
هي تقولو انشالله عافي
زي كلام صبريه مافي
وزي سلام صبريه مافي
في كريقة خاله احمد
شايله ليله وايده تنبح
شوكي لاقته في دريبه
لما كان بالمعز تسرح
نامت المسكيني تقنت
والفوينيس زادو روح
باقي تمتمه في خشيمه
تسال الله المسره تنجح
ماله مال المسره الا
شان حبيب روحه يفرح
***
دي البنيه الريده وافي
زي غرام صبريه مافي
زي شعور صبريه مافي
زي غرام صبريه مافي
رادت الناس السمر
رادت الصفا والعكر
رادت الموج الهدر
ردات الحله وبيوته
***.
في عيون صبريه طلت
ريدة الخلا للبحر
نافري من قيلة الكرارق
وخايفي من قولة السفر
والرحيل السرو خافي
في قلب صبريه مافي
في زمن صبريه مافي
وفي خيال صبريه مافي
***
والنهايه المن فصول
سيرة البنيه
لما عادت للبيوت
الكانو قبل المغربيه
مالقت غير الزوامل
شايله احلام الصبيه
شايلي عيدان الكرراق
في الصباحات والعشيه
ضاربي بطن الوادي
زفه لمت الناس والسعيه
والمطيره الضاربي
قبلي لاقت الدمعه العصيه
***
والرحيل عز البوداي
الرحيل وجع البنيه
زي رحيل صبريه مافي ِ
زي سفر صبريه مافي
زي حلم صبريه مافي

[أبو وائل]

خالد شقوري
غلطان أنا

عاشق عيونك كم سنـه معليـش خـلاص غلطـان أنـا
مشيـت علـى دربـك سنيـن افــرش دريـبـك بالمـنـى
سرحت فى واديك زمن ناس الهمـوم نـاس الضنـى
كتبـت فيـك احلـى الكـلام نظمتـا فـيـك اجـمـل غـنـا
خليـت يميـن كـل الـبـلاد واختـرتـا دنـيـاك احضـنـا
معليش خـلاص غلطـان أنـا وكـل الحصـل بتحملـو
***
انا لى زمن متمنى يوم آخـر المطـاف بـس اوصلـو
ويقولـو لـى مبـروك عليـك ونبـدأ الفـرح مـن أولـو
نضحك كتير جنب الصحاب فى يوم سعيد ما اجملو
معليش خلاص غلطان أنا غلطان عشان بغلـط كتيـر
***
غلطان عشان قايلك هنـا إمكـن معـاى تبـدى المسيـر
غلطان عشان من النسيم لو مـس لـى جسمـك اغيـر
غلطان عشان من دون جراح فى دنيتك دايـر اطيـر
ماكان زمان بتقولى لى غيرك محـال اعشـق حبيـب
مهما قست كل الظـروف أنـا ليـك مـا ممكـن اسيـب
آيـه الجديـد فـى حبنـا آيــه الحـصـل آيــه الغـريـب
لو ما الزمان غير هواك ولقيتى لى جرحـك طبيـب
قولى زى ما الناس تقول انو الزواج قسمه ونصيب
معليش خلاص غلطان أنا ومن قلبى ليك كل المنـى
***
تتهـنـى بــى فــرح العـمـر ويــذدان قليـبـك بالمـنـى
ياهو القدر وانا راضى حتى لو انكتـب لـى الضنـى
تتهنى انـت مـع النصيـب وانـا ليـك بنظـم فـى الغنـا
اصلوا الحصل ما منك انتى بس صحيح غلطـان أنـا

[أبو وائل]

خالد شقوري
بلد الغبش

يا راحلى لبلد الغش شيلينى فى خاطرك نغيم كان القى لى هناك عش
وارجع معاك انا ياطيور .. خلف الزمن كمين سنة
اتمد فى امل الوصال .. وارحل معاك سرب المنى
وانزل هناك انا فوق تقى ..واطاطه يابسى مشققه
كانت مسقية بالغنا وليك ياطيور كانت وطن كانت رخا وخيرادن
***
اطرا البلد وناس البلد ..ليل البلد وصبح البلد
لو عارفى يا الفاردى الجناح انا بي شوق ماليه حد
للنيمى والضل الرهيف .. والنسمة والسعن والبرد
لى لوبى فى صدر الجروف .. والنيل من الحيضان شرد
***
لى ابوى فوق برش الصلاة .. فرش طرف توبه ورقد
لى مرقة القيت العصير .. قاصد سبيل الخير قصد
لى لحظة من عمر الزمان لا حسرة لا هم لا حرد
***
آهـ يا طيور واشوقى انا .. انا ياطيور مشتاق كتير
ما لى جناح متلك انا .. لو لى جناح انا كت بطير
وانزل قصاد بير الفريق .. لى شوفت الواردات عصير
وامسك دلو الرايقى واجر .. واملالها وابراهن غفير
لامن خلاص هن يوصلن .. وانا تانى اواصل للمسير
***
اوصل هناك حد الترب .. واقعد قصاد جدى الكبير
اضحك من الشبه الشديد .. بين حظى والليل والمصير
واذكر الزمن البعيد .. وكتيت ابوى الحاج سعيد
يقلعلو فى انتاى كانت .. قايمالها فى حوضا جديد
***
وانا ذكرة الناس العزاز تلقانى فى نومة الدغش آهـ يا طيور آه

[أبو وائل]

خالد شقوري

لا تنجــــــع

يا الشايل شمسك في جواك خليها تبين للناس تطلع
يا النازع فرحة والدينك غير حسة اهاتك مابتسمع
يا الناسي اللبقة المفتوحة هي بلاك طوريتك ما بتقرع
المنجل فوق راس التمرة ناسيهو و امك ما بتطلع
الكتقة وقعت و الحملان في اللوبي بقت تجري و ترتع
و الجر الفي بيت الضيفان حرمان لا نزّ ولا نقّع
يا السبتا عقابك روحتا وحيات عز بلدك لا تنجع
الشتلة تقولك لا تنجع ! الرملة تقولك لا تنجع ! الواطة تقولك لا تنجع
الحوض الما رفّعت سرابو ينادي يقولك لا تنجع
الحبل الما تميت مسيرو يهاتي يقولك لا تنجع
و النيل الفي واطاتنا ترع يقولك ازرع و لا تنجع
ماك فاكر يوم داير ترحل و ابوك الحاج شايلو عصاة
لا حيلو وقف طقش الابريق اندفق سال فوق المصلاة
قام بارى الحيطة و اتوكل و يقوم فد مرة و مية يقع و يقولك يا المبروك ارجع
ارجع ارجع يا زول ارجع غير ارضك عاد وين تلقى بطاح
شن داير في بلدا" ما فيهم حاس و ما فيها صباح
الليل الليل مليان اتراح بياع بيقوا افراح افراح زي البيقول تفاح تفاح
مجلوبة الفرحة و مفروشة من ضحك الناس دايرين ارباح
لو كان في ايدن ملك الكون كان لمو عبير الزهرة الفاح
كان علقو نفس الزول العاش في صدر الليل داير يرتاح
كان حجزو الغيم في واطاتو و كان يا مسكين باعو الارواح
وين تلقى الفرحة و تتهنى في دارا ضيقة و مافي براح
جم ناس من عغين العميان بتخطف ومضات البرق اللاح
سايب نخللك و اهلك راحل قول لي ليه ماشي و وين يا صاح
الشمس النايرة ابت تطلع .. النيل يا زول اصبح رحراح
الضل قصّر ما غتا رويس ولدا كايس عرق الكدّاح
الواطة ابت تديك الخير و الا انتا عليك ما هابة رياح ؟؟
قول لي وين ماسي و ليشن سايب بلد الصلاح ؟
النسمة ان جاتك بتجيك مليانة عبير عند البياح
الموية ان داير تلقاها نقاعا" و اطيب من الراح
ان درت نغيم الموج تلقى و ان درت كمان الطير صداح
ارجع يا زول ارجع الضحكة هناك من جوة الجوف
الفرحة هناك ما بتعرف خوف
الشقا ارحم في ضل النيم و بعيد من ناسا" واقفة صفوف
جم ناس حبان تلقى المكسور مشيول في اكتاف واحد مكفوف
الجن الاحمر فاقد القيد في خلوة حاج الخير مكتوف
و دكان الشيخ فوق الواطة كيمان كيمان ما فيهو رفوف

[أبو وائل]

خالد شقوري
نوم العافي

إنت ياوافي الصفات ياصافي
نوم العافي
يالقمر المغطي الحلة بي ضيو وسمرنا قوافي
يا لحني البديتو معاكي قبلو الدنيا كانت مافي
......
نوم العافي لامن خيل همومي تعدي
وتصحي عوافي تلقي الدنيا لسع تدي
ما الزمن الجديد الجاي بي طل الأماني مندي
والريح المعانده الموجه ما بتقدر تصد مجدافي
......
نوم العافي يا سر الغنا الجواني
يامعنى السماح والطيبة والنفس الدوام غنياني
ماالأمل الملازم الإلفة لمن تسري في وألحاني
والشوق المحدد دربو عازم إنو بكره يوافي
......
إنتي لاقي المعنى قبال الغنيوة تلاقي
وفجي النسمة وأنزلي بي طريف الساقي
وأوعه تغيري لما تعرفي حتى القيفة من عشاقي
لو ما الليلة بكرة بجيكي شايل حلمي فوق أكتافي
......
صحي الماضي والشوق المعاك غنيتو
وأحلم هاني بي إنك مناك لقيتو
باكر تلقى يازاهي المعاك بديتو
وألقاك في عيون الغنوة زي لحن الصباح الدافيhttp://forum.goansport.net/images/myframes/7_cdr.gif
إنت ياوافي الصفات ياصافي
نوم العافي
يالقمر المغطي الحلة بي ضيو وسمرنا قوافي
يا لحني البديتو معاكي قبلو الدنيا كانت مافي
......
نوم العافي لامن خيل همومي تعدي
وتصحي عوافي تلقي الدنيا لسع تدي
ما الزمن الجديد الجاي بي طل الأماني مندي
والريح المعانده الموجه ما بتقدر تصد مجدافي
......
نوم العافي يا سر الغنا الجواني
يامعنى السماح والطيبة والنفس الدوام غنياني
ماالأمل الملازم الإلفة لمن تسري في وألحاني
والشوق المحدد دربو عازم إنو بكره يوافي
......
إنتي لاقي المعنى قبال الغنيوة تلاقي
وفجي النسمة وأنزلي بي طريف الساقي
وأوعه تغيري لما تعرفي حتى القيفة من عشاقي
لو ما الليلة بكرة بجيكي شايل حلمي فوق أكتافي
......
صحي الماضي والشوق المعاك غنيتو
وأحلم هاني بي إنك مناك لقيتو
باكر تلقى يازاهي المعاك بديتو
وألقاك في عيون الغنوة زي لحن الصباح الدافيhttp://forum.goansport.net/images/myframes/7_cdr.gif
إنت ياوافي الصفات ياصافي
نوم العافي
يالقمر المغطي الحلة بي ضيو وسمرنا قوافي
يا لحني البديتو معاكي قبلو الدنيا كانت مافي
......
نوم العافي لامن خيل همومي تعدي
وتصحي عوافي تلقي الدنيا لسع تدي
ما الزمن الجديد الجاي بي طل الأماني مندي
والريح المعانده الموجه ما بتقدر تصد مجدافي
......
نوم العافي يا سر الغنا الجواني
يامعنى السماح والطيبة والنفس الدوام غنياني
ماالأمل الملازم الإلفة لمن تسري في وألحاني
والشوق المحدد دربو عازم إنو بكره يوافي
......
إنتي لاقي المعنى قبال الغنيوة تلاقي
وفجي النسمة وأنزلي بي طريف الساقي
وأوعه تغيري لما تعرفي حتى القيفة من عشاقي
لو ما الليلة بكرة بجيكي شايل حلمي فوق أكتافي
......
صحي الماضي والشوق المعاك غنيتو
وأحلم هاني بي إنك مناك لقيتو
باكر تلقى يازاهي المعاك بديتو
وألقاك في عيون الغنوة زي لحن الصباح الدافي

[أبو وائل]

خالد شقوري

أمي البتصحى مع الفجر

أمي البتصحى (http://www.hiltna.com/vb/showthread.php?t=2439)مع (http://www.hiltna.com/vb/showthread.php?t=2439)الفجر..
وتندلى لا طرف الجرف..
وتجينا لا عند الضُهر..
تفرش بشنتيقا وتجُر..
نماً تمسربو الصبر..
وقداما لوبايات خُدر..
تقعد قصادن للعصر..
ولا حيلا كب تنهض تقوم..
وبلا كسل توقد الجمر..
وتجيب حليلتا دي الزماان..
كانت تشد فوقا النزُر..
وتكرد قعيرا من المكرتب فيها عاد من كم تشر..
وترمي البليلة وتزردا..
بي المي تب لامن تخر..
وترميلا بصلاتا قلاد الحلة من تقلن تتُر..
وساساقا لا عند العشا ولامن يأذن بابكُر..
وكتين خلاص تبقى استوت..
ترميلا فيها هوين تمر..
وتملا الصحين للحاج أبوي..
دايماً تقسم بالكُبر..
وتنده علي بت الخزين..
الحاجة أمنا أم نصر..
وتملا الكويرية وتخب لي ود علي الحامي العزر..
ونحنا البطان..
تملالنا عاد قدحاً يمين ما شاف فقر..
توقدلنا اللمبة ام ضنيب..
وترميلنا تاني هوين تمر..
وبلا وصية نغرفو تب..
ونجغم الميهية ضُر..
يغلبنا ما نقدر نقوم نافخين بطيناتنا السمر..
فوقا السيايل والغبار تنجارى من حد السدُر..
كاتل عويناتنا النعاس..
نصل العناقريب بالجبر..
وامي البتصحى (http://www.hiltna.com/vb/showthread.php?t=2439)مع (http://www.hiltna.com/vb/showthread.php?t=2439)الفجر..
تلقاها لا عند الفجر..
تنده علي سابل الستر..
زيد الاجر..
زيد الاجر..
زيد الاجر..

[أبو وائل]

خالد شقوري

المواجع


لما نبكى من المواجع قلنا نرتاح فى بكانا
قولى كيف نرتاح ونحن نبكى من شدة هوانا
الليلة رحلة الأشواق بعيدة والشواطئ بعيد مكانه
حتى فى بر الأمانى السنين هدت قوانا
كنا نحلم بمداين فيها نرتاح من شقانا
قولى كيف نرتاح ونحن نبكي من شدة هوانا
القدر طاوع قلوبنا وخلى بحر الريد حدانا
ونحن ماصدقنا قمنا نشرب فوق روانا
دى المشاعر فينا فاضت غرقت فرحة صبانا
ما النعم مرات بتشقى والله بالريد إبتلانا
مرة طلت دارنا غيمة ونحن ياما الريد غشانا
شايلة فى الخاطر محنة جات تعيش الريد معانا
جات تصب فى الريدة ريدة لو قليل يبرد جوانا
كيف يا غيمة نرتاح ونحن غلبنا فى هوانا
ما غريبة على البريدو يلقوا فى الريده المهانة
ياما كتير أحبه غرقوا فى بحور الذل عشانا
فى الحقيقة الريدة مره ضقنا مرها فى غنانا
ماهو قيس بكى من هواهو مانحن برضوا الريد أذانا
يا زمن لو تصفى نصفى فى البوادى يعم صفانا
والعيون تصبح مرافئ فيها نرتاح من عنانا
رحلة الهم بينا طالت ملت التسيار خطانا
نعمل آيه ما نحن غلبنا فى هوانا .

[أبو وائل]

خالد شقوري

جسور الدمعة


انكسرت جسور الدمعه واندلقت منابع احزانـــه
الله لقلوب مكلومه يوم خبر السواد الجانـــــا
ادمنت العيون الدمعه متوالى الجفون مليانــــه
اغرقت الخدود بى سيله طبعت فى الوجوه اشجانـه
الله من مرارة الفرقه وآه أنا من جحيم احزانـــه
سدت فى الحلوق العبرة لامن بالنويح شرقانـــه
القدر اللعين فاجعنا لفح الفرحه مــــــن تالانا
خلى صبرنا عاضى الجمرة تأكل فى الهشيم جـوانا
الحزن الدخل اعماقنا باقى الى الازل فى حشــانا
لا نوحنا وبكانا يزيلو لابتغسل دموعوا اســــانا
تقودنا خطانا نحو اجلنا مو معروف محل مرســانا
يبرانا الممات وين نمشى شقيش ما نسوقه خطــانا
الدنيا العبوس ملعونه اوعك من تنوم فى امانــــه
ترميلك ضليل خداعه ضامرى وراء مقيلو خيانــه
تتفتح زهور فى روضه تجزب للفراش بالونـــه
من قبل الثمار تتحت قبال ما تجف اغصانــــه
أه أنا من نضارة ورده حين طل المحل بستانـــه
ما إتمهلت تفوح طيبه تبرز للزمان الوانـــــه
وأه أنا من سكيل الوالده وكتين ترسى اعز بطانـه
تفتش فى الخلق كايسالو بيناتن بلا الضهبانــــه

[أبو وائل]

خالد شقوري

الزول القيمة
يلا نسافر فوق الكلمة نشيل الزاد احلام وردية
نحكي حكاية الزول القيمة الزول العاش للخاطر الحية

عاهد نفسو ببذل الروح علم كيف العزة تكون
شال امالو كتاب مفتوح مشروح وتروح من بينو قضية


كان مكتوب في اول صفحة وطن مزروع حنيه وقمحة
ومدن مصقولة عوالم سمحة وناس بتعرف الناس من لمحة


كان مكتوب في الصفحة التانية طفلة تقالد الغيمة الحانية
ونخلة بتهدي قطوف الدانية وهاك البلد الغالي هدية


اغنية فيها تلاتة مقاطع مقطع شال لون الدوبيت
ومقطع شال نفس الجراري ومقطع طالع من قمرية

كان مكتوب في الصفحة الرابعة طالب بيقراء وعيونو متابعه
خريطة البلد العالي الغالي وموية النيل المنها نابعة


وعز موصول للصفحة الرابعة وشوق موصول للصفحة المية


يلا نسافر فوق الكلمة نشيل الزاد احــــــــــلام وردية
ونحكي حكاية الزول القــــــــــــــيمة الزول العاش للخاطر الحيه

[أبو وائل]

خالد شقوري

ابقى واصل

لـيـــــــنـا واصــــل يـا حـنـيــــــن وابـقـى واصل
الــدرب قـــدامــك أخـضـــر والوداد البينا واصل
والعيون الفى انتظارك شوقها زي مطر الفواصل

ما فى اروع من رسائل تحكي بي تحنان فصولا
ما فى أجـمــل مــن مـقـاطع انت بالأشواق تقولا
البـلــد مـنـتـظــره جـيـتـك فارده غاباتها وسهولا
والكـلـيــمــات الـتـطـمــن نحن منتظرين وصولا

بـيــن حـكــايـاتى السعيدة قصة من أشواق فريدة
جايـه لا لـون لا ملامـح زى نجوم طاشه وبعيدة
لا هى غـنـيـة ولاها منية ولاها إحساسات جديدة
ما الـبـحـسـو مـع عـيونك حاجة اكبر من قصيدة

كلـمـة مـنـك لـو تـعــاتـب أغـلى من كل الغناوى
والـبـتهمسو بين سطورك عندي بى كل الحكاوى
الـحروف الفى انتظارك رافله فى الزى السماوى
عـارفه إنـو الـغـنـيـة غـيـرك يا حنين ما بتساوى .

[مصطفى هاشم]

لله درك عمنا ابو وائل ابداع ابداع قصائد خالد شقوري لك التحية وما قصرت نهائي ربنا يعطك العافية وسلمت يداك وما ننحرم منك ابدا

[بت البحر]

مرور من اجل التحية والثناء علي
المجهود الرائع والمقدر ونثر
الروائع
واصل من غير فواصل

[أبو وائل]

لله درك عمنا ابو وائل ابداع ابداع قصائد خالد شقوري لك التحية وما قصرت نهائي ربنا يعطك العافية وسلمت يداك وما ننحرم منك ابدا




شعلة منتدانا
ملك الروعة و الإبداع
ود هاشم
هذا جزء يسير أمام ما أتحفتونا به
من روائع و إبداع
الشاعر التالي بإذن الله
حاتم حسن الدابي

[أبو وائل]

مرور من اجل التحية والثناء علي

المجهود الرائع والمقدر ونثر
الروائع

واصل من غير فواصل




ست البلد
الرائعة جداً
بت البحر
تشكري كتير على مرورك
الذي أثلج صدري
و معاً بإذن الله
نقدم كل ما هو جميل و مبهج

[أبو وائل]

حاتم حسن الدابي

مــرام

::::::::::::::::::::::
مرام مرقت على الجيران
ومرن ديل كم ساعات
غابت نجمة الضيفان
واكتست الارض ظلمات
مرام ما جات…!!
حكاية كان وياما كان
حكاية تشيب الولدان
حيرت الانس والجان
وبرهنت انو ما في امان
رجع وأد الطفولة زمان
زمن عبدة(هبل)و (اللات)
بعد لبست جديد في جديد
******
مرام مرقت تبارك العيد
وقفت سمعتنا نشيد
حلاوة موبايلا الفي الايد
مع التسريحة والباندات
اتاريهو الغدر منصوب
مسطر ومافي منو هروب
برغم رضانا بالمكتوب
ده غدر ما وراهو سكات
بدون إنزار..بدون اسباب
مرام غدروها جمب الباب
مرام هجمت عليها ذئاب
طباعم من شريعة الغاب
ملاكاً حولوهو رفات
قلوب لا رحمة لاإحسان
مدبجة بي صفات شيطان
وظهرت قدرة الرحمن
محل اسنانها هو الاثبات
دريبها على الارض منقوش
سريرها من العصر مفروش
معالمو باقية وسط الحوش
ملابس الروضة واللبسات
بعد شمس العصاري تغيب
مرام كانت تودي تجيب
عندها بسكويت وحليب
في تلاجتن راقدات
وحيدة اخوانا والوالدين
عليها يخافو متمنين
تتعلم تتم الدين
وليها يوزعوا الشربات
*******
يا صاحباتها وينها مرام
سماح يادوبو فرهد قام
عمير ما تم خمسة اعوام
ملازماها البراءة سمات
عيال الروضة ياسمحين
لمن جيتو متماسكين
ما شفتوها راحت وين
مرام سرقت منام العين
مرام حرقت حشا الامات
وليه بتقول مرام ما جات
*******
مرام كلما وجيها يلوح
تبق جوانا احساسات
مرام بقت القلب والروح
سحابة تخدر البلدات
مرام غصة حلق مجروح
تقوقيها القميريات
مرام صفحة كتاب مفتوح
يقروه الطلبة والطالبات
مرام عصفور يئن مجروح
ما شفعها الدمعات
مرام جزء من (محمد) و(نوح)
و(تبارك) و(عم) و(النازعات)
مرام شربت محاية ولوح
وفي ساعة المغيب بخرات
مرام دعاء للجميع مسموح
بعد ما تكمل الصلوات
مرام حاتظل سؤال مطروح
جوه بيوتنا والطرقات
مرام حاتظل سؤال مطروح
وسط اولادنا في الجامعات
مرام حاتظل سؤال مطروح
موجه للشباب بالذات
وليه بدت السماحة تروح
إرث اجدادنا والعادات
*******
اخيرا داير اجيز القول
منو المسؤول..؟؟!!
تقول دي ثقافة البتر
ولا سيف العولمة المجهول
الدجتل مع المحمول
افلام فاضحة والمسكول
عموماً…….
بيوتنا في فك غول
مخيف اسموا الفضائيات
ومرام ما جات..!!

[أبو وائل]

حاتم حسن الدابي

لسان الحال

معذرة.. لو معاك منى الكلام حـــــره .. معليش الخطاب كاتباهــــــو مضطرة
حـــــــــــرام والله مننـــا إنت تتبرا .. خمسة سنين تفوت تجى فيها فد مرة
وراك أنا كم شقيت وعشت فى مرة .. وتعبـــت مع البطان الهم للعيون غرة
بيخاف الغرق الغاص ورا درة .. قالو أدب الصغار والعقــــدة من خدرة
حليلى أنا الزمن ضى فاطرى ما انفر .. وخمسة سنين غياب مابتحملن حرة
أنا الحاضنة العذاب وآمالى محتضرة.. وإنت الفى النعيم ما خات حساب بكرة
مسكينة التقول فى الإغتراب سترة .. وتتناسى القروش فى يوم تكون ضرة
حليل زمنك وكت عايشنا بالأُجــرة .. يا ريــــت لا عرفـــــــت ولا مرق برة
**********

الكاتما فى جواى كتير متملك الجوف والعصـب.... وما كت دايرة أقولو ليـك لكن لسان الحال غلـب

ما بنسى يـوم ودعتـنا وسافـرت فى غـرة رجـب. ...خلـيت وراك الـدار حـزين يتباكـا والدمع انسكـب

أعذرنى والله العظيـم لو ما الضـرورة أنا ما كـتب.... وأنا خايفـة فى بعـدك يكون الضاع هو ضعف المكتسـب

اليومـة داك ناس البلـــد هنونى شايقيــــــى وعرب.... قالو لى مبروك خير وجاك يكتب سلامــــتو الإغــترب

قالو لى دوب نجم السعد طلاكى من بعـــــد إحتجــب.... يا دوبا بالك يستريح وتنسى العـــــــذابات والتعــــب

فضّلت أحسب فى الشهور قاعدالى فوق نيران لهــب.... صابرة وحريصة على العيال لا بيقو للريح فى المهـب

سديت خانتك مــن مشيت قايمـابو واجبــــى كأم وأب....والأســــرة يضنيها المسير .. وتتهاوى لو ما فيها رب

والله ما بنــــكر جميلك برضـــــــــو لينا ثناك وجب.... موكب هداياك ما انقطع .. كان سترة فى الزمـن الصعب

لابسين وماكلين والنعيم كايلنا فى يوم ما نضب .....وعايشين معيشــــــــــــة المترفين .. طولنا والطبع إتخرب

البيت مفرش بالحرير ومليانة إيدى بالدهب.... لكن خسارة على محل .. عاش سيدو خمســــــــــة سنين عزب

الشى المهم ما قلتو ليك وليهو إنت ما ظنيت حسب.... كبرو الصغيرونين خلاص .. خايفالم الطبــــــــــع الكعب

وصولوها مرحلة الخطر .. والأمن ما زال مستتب.... وانا كتّ قادراهم زمان لكـــــــــــــن بعد كبــــــرو اتغلب

حصلنى قبل الجد يفوت .. دوبنهم فوق العتب.... قبال نحصـــــــــــــــد الخير ندم .. ومابيجدى كان لمت وعتب

خايفالم الطيش فى الدروس .. ومابرضى لو واحد رسب.... خوفنى المتعبنى الكبيـــــــــر بعدين يمرقو بلا أدب

وريتك الحاصل على لا فيهو ثورة ولا غضب ....شان الحديث مايبقى نى .. والواحــــــــــــــــــة يكتنفا الجدب

أنا قلبى مازال لسة حى .. ونجمو الملاهج ماغرب..... وآخر كلامى ترد على .. لا أبقة بكـــــــــــــرة أنا السبب


ما كنت دايــــرة اقولو ليك .. لكن لسان الحال غلب ..

[أبو وائل]

حاتم حسن الدابي

الرواسي

بدر مدر يا رواسي نحن بعاد لحقنا القيفة
انت مدبج ونحن نقاسى فى برد امشير والموج والزيفة
مركبك الماليها مطارق تمشي تقيف تسرح بى كيفه
مرة مغارب ومرة مشارق وانت تخاف الريح وحفيفه
ساوها زينة وفوقها بيارق وانت مدبج توب وقطيفة
فيها المات والضاربه الفالق والسلمين فى حالة مخيفة
كل الناس ترزح في كفة وانت وناسك فوق الدفة
الدايشين والراسهم لفة والشاخصين فى المدى للضفة
صوف افضالك فوقهم جوة فوق الموية وريقهم جفة
من العطش النص اتوفى وباقى النص الفضل جيفة
....
ضاقوا المر والحال استعصى الشغال واللاحق الحصة
الواصال للرحم اتقصة والهداي مو لاقى الفرصة
الرساي سافر ما وصى خلى محمد واحمد وحفصة
الاطفال العرفو القصة سدت جوة حلوقهم غصة
من الجوع الدم اتمصة واصبح كل الحلم رغيفة
.....
كل الراكب شاف احلامه دون احساس ماتت قدامه
فنُ كتابه وكسر اقلامه لا الوالدين لا جار ما لامه
ناس الحلة القعدوا وقاموا اصر والح يمشى كلامه
هزموهو اخوانه البى الجوع نامو وكم خريج ما لاقى وظيفة
.......
يا الفكيتها وقلت لها سيرى وعارف انه الدنيا دميرى
لا فى ضفاف لا شفنا جزيرى لا فى الحيرى ولا في الطيرى
كسرت جناحها وقلت لها طيرى اتملكت الكانت ميرى
يا السودت الناصع وجيرى ايد الحق صابونى وليفة
......
قبلك كم متعلم وقاري عكس الريح فكولو الصارى
مشدوهين متعشى وحارى ريسها شلته والبحارى
كم سنوات علام البارى واقفى وهم شايفنها جارى
بقينا هلاك والقيف متضارى لا حجار لا دوحة وريفة
.....
حسك عينك ما تتمادى وتنسى الراكب عنده ارادة
الاهوال الشافها وخاضها كان فى مدرسة والا عيادة
شفنا الايد الكان اجوادة يا مبتورة يا شحادة
وياما رقاب كانت سدادة علمت الله من التعريفة
......
يا ريسنا قدر مديرك فك الدفة وادها غيرك
احفظ نفسك ترضى ضميرك وقف اوع تواصل سيرك
كان طاوعتنى شن بيضيرك عرض اكتافك وفك البيرك
لا هنى شكرا وكتر خيرك وكل انسان في الارض خليفة

[أبو وائل]

حاتم حسن الدابي

الزواج العرفي


:::::::::::::::::

انا الغلطان وكت غشيم وعدتك والوعد بوفى
بانك تكملى التعليم حلفت وداير ابر حلفى
درجتك بعقل سليم وامك واقفى فى صفى
دريج الرياح للغيم يبل عطش الارض يشفى

هندمتك حنان هنديم وغتنك تياب عطفى
وسولبت الكسانى قديم غضبى وثورتى وعنفى
قلبك كان سديد وصميم ومن الموبقات معفى
ترباة ريفنا احلى اديم ورزقا من حلال كفى

دخلتى الجامعة والله عليم بالفرح الغلبنى اخفى
كأنو مذاقو من تسنيم وقلت خلاص غمد طرفى
امك ليله كلو تقيم تشيل حر النهار تشفى
فراقك علما التنجيم وقليبه براكى بتعرفى

بتسأل الله والله كريم يعينك والمراد تلفى
يكسيك ثوب عفاف يا ريم وبى توب عافى تتلفى
كل الناس زمان سين جيم يخافو عليك زى خوفى
خلوهو السؤال فى الليم ومننا قطعو العرفى

عرفو بناى بدا الهديم ولا سريقه وما واقفى
واتاريك اتخذتى نديم واخرته كان زواج عرفى
لانك عمتى فى تيار معاهو بقيتى تنجرفى
بهرنك مدن وانوار وفيها سرحتى وا اسفى

وانا الناسى الزمن غدار ومانى قايلك بتنحرفى
اتاريك ضل ضحى وديار تركنى انا فى الهجير مكفى
نظرات البعيد والجار يوسوسو بى كلام مخفى
يوقد فى قليبى النار حى لكنى متوفى

كلام فى غيبتى ما هو اسرار يولع فى البلد ويطفى
واتسرب وصل للدار لا صدقتو لا بنفى
عمت فى البلد اخبار بقت جهرا قبيل خلفى
بقت نمه وبقت مسدار على وتر العصب عازفى

نسيت انا فى النهار الحار اكابد لى نجاح جرفى
اطارد فى الجراد والفار وانضف منو فى الطرفى
بعد خدر ملا النوار كساهو سماح يفوق وصفى
اتاريهو المتيربو عدار والسلكتو قام حلفى

انا الودرته عمرى ودار ومنك ما وقف صرفى
ليكى غزلت عرقى ازار وفى الشتاء بيه تندفى
مصاريفك على كتار وانتى تقولى ما بتكفى
واخافلك تقطعى المشوار أقولك اصبرى حقك فى

لاخليتى حق إيجار وحق المعهد الصيفى
تصرى تقولي جانى انذار وحقك تاخدى متكفى
تشيلني حرارة الإصرار وأعكر دمى شان تصفى
واصغر نفسى للتجار ديونا راقدى فوق كتفى

حليل زمن العلم أنوار موقدى نارو ما بتطفى
وحليل زمن القلم مزمار حلات نغماتو متوالفى
حليل امك وقليبه الطار رقدت بى شلل نصفى
ورغم انى اكتسيت بالعار ابوكى أنا رغم عن انفي

[أبو وائل]

حاتم حسن الدابي

ما راعت شعورك
*************
مادام هي لا راعت شعورك ولا ضميرة هي استحه
انساها والبكا مابيفيد قشقش دموعك وامسحه
*****
كلمني شن وداك قبيل تفرد مشاعرك تفضحة
خليتا حي السوق رياض يانعة وزهورة مفتحة
طولت ايدك لي قطوف زهرة وغميصة مسارحة
زي ماهي عاشقي الاغتراب برضو انت عاشق ملمحة
*****
صح كت يامسكين زمان دايما تشكرة تمدحة
مابترضى لو كان بالغلط بي كلمة انسان يجرحة
ما قتا فوق كل البنات تسرق محاسنة تشرحة
كانت عواطف انسان ضعيف ساكت جناحي مجنحة
*****
انشاء الله منها تتعظ وتكون خطاك تتوشحة
كانت حساباتك غلط في القسمة والضرب اتمحة
اتأنى في جبر الكسور براحة اجمعة واطرحة
واخر شي كان تعرف براك حتى الغرام بقا مصلحة
*****
بت حوة يا مظلوم بقت للمال عقولة ملقحة
يا ريت عقول الناس بعد ما تحب تخش المشرحة
يقروا اللي كان مافي القلوب كيف الشرايين تنضحة
ويتراجع النطقو اللسان صح ولا زي ضل الضحة
*****
مغرورة ما دارت سكون بلدا شقاوة ودردحة
لا تمشي تنزل بي تحت لا حتا ارضك تنقحة
لابوقة لا موية شراب لا واطة ماها مصلحة
لا شلت للمحرات سطور لا شتلة ماها مصفحة
*****
كانت قبيل طمعاني فيك فارس جيوبو متمسحة
دايراك يوم جيت للعرس نار الله في الناس تقدحة
الشيلة بالشنط الكبار مبطوحة راقدي مبطحة
دي الحلي والناس جات تشوف راجين متين تجي تفتحة
كان بالة في شهر العسل طول الزمن ما يبرحة
تسكن معاك في بيت كبير موكيت وحيطو مسلحة
عربيتك الملك الحلال جلد النمر والملفحة
بوتوجاز مولع وديب فريزر واب ريموت والمروحة
*****
تسرق مناها قبل يتم كل المشاعر تجرحة
يا جعفر الحياة مدرسة دايما مقررة في الصحة
ممكن نعينك في الدروس لو انت غلبك تشرحة
واعرف بانو اول درس الزول بياكل المملحة

[أبو وائل]

حاتم حسن الدابي

مراكب الريد

يا الراحلة مني بلا وداع ما تقولي لي متأسفة
يا حوا أدمنتي الخداع يكفيني تجربــتي وكـفـى
أنا في رجاكي زمن طويل نشف سنين عمري الجفــا
وارتج في جوفي القصيد والــكلمة هربت أحـــرفــــه
سبتيني وحدي في هجير بعد الـــظلال الـــوارفـــــــه
وماتت أغاني الريد خلاص يوم فتي من شاطي الوفا
طلوحتي في الموج والرياح ودي الليك كت أنا خايفه
ضربت مراكبك فــي عبــاب ما كنــا بدري بنــعرفــــه
ســبـتـيـنـي لـلـبـرد الـشـديد كانت مضاجعي الأرصفة
متقتي بــي كـــذب الــوعود وفـــارش الأماني الزائفة
ابحرت في نهــر الــخــداع بـعـدت مراكــب شــايــفــه
طلوحتي وإتعدم الشراع وهبت عليكــي الــعــاصـــفــة
بعتيني بي أرخص تمــن بــعــد إنــعــدام الـعــاصفــــة
وشفتي الدنانير ليها ناس لو هي الدنـانـيـر منــصفــة
شركتي للسبعة الكرام فـاكـره الـمـشــاعــر نــاشــفــة
يا سلعه ما بين التجار في سوق تـجـارتــه مـكـاشـفـه

[أبو وائل]

حاتم حسن الدابي

كلمات للحبيب

لاكنين فى العرف تنفع ولا الدموع فيها استفاده
ياحبيب كل شى قسمه واراده
فى الحروف يادمعه شفتك تعشق الداكن سوادا
وفى دروب عابره وكنين وجارى حفيان فوق وهادا
عامل الاحزان مطيتك شادو سرجك فوق جيادا
ده المخلى العيشه عندك صوره من عام الرماده
صح مبادى الريده عندك فى الصغر قويت عمادا
شلت نغمات قيس وعنتر فى كنينه الماضى عادا
كم سنين بى فوقنا فاتت وحتى ماعارفين عدادا
لى كنين فى الكير تفتش وانت فتها فى المخاده
لوصحيح كانت تبادلك ريدك الصار ليك عباده
رغم انها سامعه صرخات صوتك الفى جوفا نادا
ياكنين ريدك هلكنى واورث العين سهادا
على الاقل كانت تقولك ريدى بالاكتر زياده
سامعه كل القلتو فيها هاديه بعد انتم مرادا
عايشه فى خيره ونعيما وزاهيه فى حلل السعاده
وراهنه تنعم بى دلالا وبى رفيق دربا وبلادا
حليل خيوط احساسا بيك وين كتاياتا وودادا
كل ماجيت فوق ديارا نوخت ابلك قصادا
تبكى اطلال سيدا سافر بالسنين ماطال بعادا
لالقيت الغايبه منك لاالسنين لميت حصادا
ناسى والايام بتاكل فى عمرنا خيوت نجادا
يارفيق الدرب ارجع وخلص الروح من عنادا
ماتلين تكسر جموحك وشدو حيلك فى جهادا
زيدا من جرعات صمودك واليقين اليبقى ذادا
وحزر المثل البقولك موت عشان الحب زيادا
ابدا قبل العمر يكمل حصل انحل والندادا
ابتسم تبسم ورودك وافرش الافراح وسادا
صيده كان اصطادا غيرك مابيحللك اصطيادا
حكمه لو كان الف طائر منو اخير فىالكف جرادا

[أبو وائل]

حاتم حسن الدابي

حبل الوصال

تاريـهـو ريــدك كــان كـلـو جــور ونـفـاق
كذابـه ضاحـكـه عـلـى يــا نـاكـره للميـثـاق
ويـــن جـــدول التـحـنـان الـكــان بيـرويـنـا
الضحكـة ليـك عـنـوان يــا حلـيـل عناويـنـا
بـدلـتــى كــــل الــكــان مــاتــت أمـانـيـنــا
كانت هى فى الأحضان اليوم على الأعناق

ضاعـت عهـود الـريـده لـيـه تبـقـى كـذابـه
حلـم العديـل والـزيـن اصـبـح حـكـم غـابـة
يــا زهــرة الياسمـيـن مــا عـدتـى خـلابــه
دهبـن لقيتـو لجـيـن الـحـق عـلـى الصـيـاغ

كان الضمير مرتاح من جـور بنـات حـواء
قـلـب الـهــوى الـنـبـاح لا حـــول لا قـــوة
سمكـرتـو و المفـتـاح ضيعـتـو فــى هـــوة
لا قلتـا لـزول ضـاع لا يــوم فتحـتـا بــلاغ

تـاريـهـو جـــرح مابـيـبـرى بـــى دكـتــور
كــل التـسـوى الـلـيـد يتحـمـلـوا المـجـبـور
جرحـاً صبـح تأبيـد جـوه القلـيـب مهـجـور
تلـت علـي القيـد زعزعنـى فــى الأعـمـاق

التوبه يـا قاسيـن لـى تانـي مـا فـى رجـوع
واشكى العلى لى مين والبوح حرام ممنوع
اخفيهو تانـى يبيـن عبـرة وسـروح ودمـوع
قالـوا القلـب والعيـن بحـر الـهـوي الـلـداغ

اسف زمانى الضاع درب الرجـوع قاسـى
وانا تانـى مـا بنصـاع لـى لوعـة احساسـى
سـر الدواخـل زاع وانـا زولـى لـى ناسـى
قلـب المحـنـة خــداع إنـشـره فــى الآفــاق

[أبو وائل]

حاتم حسن الدابي

الواقع المرير

تاني ما بندسه الخبر نحن قدام واقع مرير
فى البنات زي السوس نقر يا خى دنيا اخر زمن
عوانس فى المجتمع ديل بقن للبنوت عبر
قبلهن كم الات سماح ضاعن واخير ياخدن الحذر
الزواج صح قسمه ونصيب حكمة مما خلقوا البشر
بيهو كم عاشقين ضاقوا مر مؤمنين بيهو قضاء وقدر
اوعه ما تخدعك الوجوه المندية متل الزهر
تبدو مبتسمه فى الصباح وفى الدواخل عدوان وشر
السماح ماهو سماح عيون واقعه متمتعه بالحور
ماهو عود نادى ومستقيم نامي فوق عز وفوق بطر
ما تقول سمحات الشفاه المنديه زى الزهر
ما بتأكدوا ليك الكتوف المردم فوق الشعر
ما تقول سمحات الشفاه الكلامن يهز الوتر
ما بتأكدوا ليك الكتوف المردم فوق الشعر
السماح فى العفة والدين القناعه وغض البصر
دي القناعه وكنز الزمان واحتمال نكبات الدهر
البنات تابعات الهوي مغرمات بالليل والسهر
الغرام بقى بس بي الجيوب والبيوت والطين والمتر
الواحدة تتعلق بالدروس والمراوغة منذ الصغر
تنتظر لن تقضي الدروس وتسهى لمن يفوتها القطر
حتي كان قلتا الامهات العرس سونو متجر
اصبحن للدنيا العبوس وللقروش سعرانات سعر
يا حليل زمن الابهات كانوا غسالين للصقر
الزمام صار عند الحريم صار عديل البيع فى المهر
فات زمان الحن والحنين الفضيلة وعاها اندثر
لا تهم يا اخوي إن سمع قالوا قام شوك للعشر .

[أبو وائل]

حاتم حسن الدابي

مشورة

يا خلا دلوني الطريق قايدني بيكم مشورة
عاشق يهد ليل فوق نهار أسعد عيون أسهرة
***
زولاً متيم من زمان كم شاب طالب المشترى
لكنو ماعرف الوصول واقدامة ثابتات في الترى
تابع دريب زولا حنين في دربو كم ساسك جرى
وغلبو اصطياد قمريتو حد مادودرى
***
الله على زولاً هلك في عتبة قدامو ووراه
يتباكو كل ماذكروا مدرسة ولا قالو مذاكرة
انت الأماني الفي القليب آمنا بيك يا جوهرة
لمتين رجوعك للقرير صبحت بلاك مكدرة
***
انا زولي ضاوي وجيهو زي القمرة نايري مدورة
والعود نداوتو الخيدران والقامة زي المسطرة
خلقي وعيونو مكحلات يوم بي كحل ماجرجرة
مافيش شبيهو بلا المحيط في كل مداها ومحورة
***
حزمة سبيب للعاشقين مردوم مدفق بي ورة
أما الشفاه لهجن عسل كلمات يقطر سكرة
أما القوام قايم يداب موجو زي نهر أدبرة
بشتني خلى الناس تقول مجنون دا قبالو وبرة

[أبو وائل]

حاتم حسن الدابي

يا ساري الليل

من يوم البحر الجانا وتسب وقام
يوم دخل الحلة وهدم بيوتنا ترا وهدام
صبحنا ضيوف ما خلاّ وراهو صلة أرحام
يوم داكا عوض خلاها مرق سفره طويل مع الأيام
ثم يسترسل في أوصاف عوض
درويشاً صغير عشرة أعوام
الزول زول الله من الصلاح الرفعت عنهم الأقلام
من غرث الرسل الدارو الآخرة أم خيرن دام
التركو نعيم الدنيا الزايل للعبدوها وللحكام
ثم يبدا في وصف ملابس عوض وما كان زاده يوم خروجه
متجلبب بي تيبان الرحمة غتا وهندام
متنعلت بي أرض الله الواسعة خطى الأقدام
متزود شايل خير الزاد تقى وإلهام
يا ساري الليل ما شفت جناح جبريل
غتاهو بقالو مظلة جلوس وقيام
يا ساري الليل أين ذهب عوض هل غرق في جوف الليل
أم رحل في رحلة تصوف
يبقالي نجع متوجه قاصد أرض الشام
ما شفتو هناك مع الحجاج لابس الإحرام
بين يثرب ومكة وفي بيت الله المكسي رخام
يبقالي هناك يكون مندسي مع الخدام
يا ساري أبل جهدك نحنا فتشنا في كل محل ما خلينا بكان
فتشنا سما أرض ما شفنا منام
في التمر الشايل تكا سبيطو مدلول خام
في الجرف الأخضر في لوبيهو وفي النجام
في جدول جاري تسرسر مويتو نعيماً دام
ومع ذلك لم نجده وقد طال الغياب
ولن نيأس فالحلة في الانتظار فاينما وجدته بلغه السلام
يا ساري الليل أنا داير أوصيك وأديك كلام
الروح إين صعدت لي باريها وفي جنات الخلد مقام
لو لاقيتو في إي مكان في إي زحام
روح كلمو قولو الحلة بكت من شوقا إليك تغريك سلام..

[أبو وائل]

حاتم حسن الدابي

الى رحم امي


(خطاب الطفل لاخية الجنين)..



صيغة خطاب مكتوبه من قلب الولد
من جوف طفل لحظاتو بين مره وشهد
لسع ما عرف طعم الحياة ويادوبو لسع في المهد
كلنو كان يعرف تمام غير انو مخلوق في كبد
كانت رسالتو دروس حياة في الزهن تسكن للابد
فيها المداد دمعة عيون منسابه الهبة الغدد
كلماتو من معجم لغات الدنيا كلها تستمد
مظروفا جوف كاتم انين فياض دوام ما ليهو حد
والطابعه كانت قبله من بين الشفاه مختومه بي صبر و جلد
عنوانا كان ظاهر مبير من غير حروف اللا اسد
الي رحم امي وختي قوس قبال يقفل القوس قصد
يكتب كلام شان يلفت الانظار قصد
مضمونو بين قوسين يقول( ممنوعه ما يقراها حد)
وكان الخطاب عبر البريد السري حافظ المستند
في ذبذبات هذت دواخل امو لهبا ما برد
لمن صرخ ومسك الثدي واتواري في حجرا وغمد
لما الخطاب وصل الرحم بقي نطفه يادوبك تعد
تكوينا ما وصل المشيج في علقه منتظره المدد
لكن قدر يحكي الظروف الجات عليه بلا وعد
حكي لاخوه وقال كلام لابد من يلقالو رد
وكان الحدث صحوة ضمير علاما حلال العقد
دي رساله من طفلا صغير حكي لاخوه وقال سرد
********
دنيانا ما دنيا واحلامنا ما احلام
دي حقيقه ما رؤيا وقالو السبب اقسام
لو ليك كتب تحيا ضي عالم العلام
طال شوقي لي لقيا وخايف من الايام

بالله زنبنا ايه من قبل نتلاقي
نرد الغفار والتيه في الدنيا نتشاقا
ليه شجرة الوالدين يتحتو اوراقا
ما نلقي جيم لسين غير المعيشه اقسام

انا شوقي لجيتك دايرك معاي رفيق
بي جيها خايفلك عيشت نشاف الريق
انا نيتي زي نيتك لمت شقيق وشقيق
سالكين طريق مسدود ما بمشي لي قدام

انا داير احكي لك احوالي بالتفصل
انا كالضفاف مخضر كانت حياتي قبيل
لكن بدين اصفر لمن هجرني النيل
اسع بقيت مجبر اتحمل الاقدار

العيشه بين والدين من مده متفرقين
زي المياه والطين وفقد النظر للعين
بيقلوا مشتاقين شاربين كؤس البين
كاس الوداد في الحين اصبح شرابو حرام

ما راعوا للجاين وما قدروا المولود
واظنهم ناسين الجاي والموجود
حتي الشرع والدين اتناسو ليه حدود
لما الصحف رفعت وجفت الاقلام

والليله ندمانين ايه الندم بيفيد
خلوني باكي وحزين عايش فرد وحيد
زي زهرة الياسمين من ايد اروح لي ايد
قطعوا الشديد ومتـــين لا غربه لا ارحام

انا داير اوصيك اصبر علي البلوه
ولا بد تلاقيك المره و الحلوه
كل العشم فيك انك تكون اقوي
من كل بلاويكا دنيكا تبقي سلام
ودنيانا ما دنيا واحلامنا ما احلام..

[أبو وائل]

حاتم حسن الدابي

سافر عليك الله

شيل الاماني معاك
وشوف البي يبكي عليك
او حتى يترجاك
***
انا ما تعبتا خلاس من جور انت علي
تزعل بدون أسباب ومن تاني ترجع لي
خليك معاي واضح لايبق قولك ني
يا انت ابق معاي يا انت مالك بي
***
رغم الحصل والكان يا ما صبرت عليك
كان العشم جواي تصدق معاي عينيك
لكن غرورك فاض كتل البراءة الفيك
خلاك تظن مجبور انا بكرة برجع ليك
***
اوع تظن في يوم انا قلبي بيرضا الزل
أو يستكين هيمان ويرجاك عند الظل
انت الفتحت الباب وقت للخصام أدخل
انت الزرعت الشوك وقلعت شجر الفل
***
انا في النهاية انسان مرهف رقيق حساس
داير اعيش في امان واصافي كل الناس
لكن اذا جا الريد فوق الكرامة وداس
مجبور اقول القول القالو ابوي فراس
***
في شعرو قالو كلام مدهش جميل يسبي
لاتملك الحسناء مهما تكون قلبي
انا برضي زيو كمان اعلنت لي حربي
وعارف قليبي بيقول يا اخوانا ايه ذنبي
***
والله يا المريوت خليتني فيك محتار
مرات بشوفك نور ومرات بحسك نار
مرسالي وقتن جاك قابلتو با ستهتار
وما تنسى أي حريق دايما بدايتو شرار
***
ياقلبي اصبر اصلو الظروف قاصداك
معليش اذا جا الليل وخيم علي دنياك
عذرا اذا الاحلام اكبر من الادراك
وعفوا اذا حبيت زول ما عرف معناك
***
عليك الله ســـــــــــافر .. عليك الله

[أبو وائل]

حاتم حسن الدابي

شتيلي الزارعو

ضقت فوقو المرة لكن يحصدو الغير
يا شتيلي الزارعو من بعدك تباشير
***
يا الرويت حضانو مسروف ماهو قطير
ماقطعت شرابو في الحراية وأمشير
شالو تكت سبيطو زايد يومي خدير
لا يبس لافيهو شخلوب المرق صير
***
ريو كان من دمي مابنشلو من بير
جاري من شرياني ماهو شراب مواسير
فتحت زهراتو لادن عودو يبس اير
بالامل شعبتو خوفي يجيهو كسير
***
لا رياح بتهزو لاهبة أعاصير
كت ديمة بخافلو نقيد الزرازير
كل حاجة عشانو كانت بالمقادير
للأسف يا تعبي ما كان ليك تقدير
***
أنا ما بلومو أنا عارفو طيب وماهو شرير
كان حنين قلبو لكن جاهو تغيير
العليهو اتواصو سراقيين مضامير
وخلو حنو أقل من الينقو تصدير
***

[أبو وائل]

حاتم حسن الدابي

ســــــت الجـــــــــمال

قدر الله ما ادى الجـــمال اداكــــى لامــــن قتى بس
حد حواء ما جابت سماح مايسوى من حسـنك قبـــس
عاجبنى وصفك يـــــــالفلو الامـــاتو سر حنبو التبــس
وقفن وراء وقـدام غفـــــر خايـــفات وداساتنـــــو دس
يتلفتــن ويشرفن كــان ذل فى القدلة صياد قــنـــص
طلعة وشيك ذى الصباح الدابو خته وشال نــفــس
شـع وبهـر كشف الظلام لا صر لا فى يـوم عبٍٍٍـتس
الحكمة بين صبحا شرق وليلا مـــــن الظلمــات دمــــــس
لا تعــاقبن لا تفــــارقن لا ازدواج بينن حدث
عندك خديد تفاح عديل لا ايد تطولو ولا اتلمس
و الرشمة فيهو كما الفراش القبل الزهرة وهمس
اهواكى انا واهوى الرحيق المـــن ثناياكـــى انبعث
وفى فاهو ريق يحرق حريق مسخ طعيمو عجو المحس
عندك عيون تقسى وتهون قطعت رميشاتن مجس
فيهن سوا علة ودواء وصفات الحاظن زاتو مس
عودك لدن وكتين يميل يشبه فريع البان رخس
كان جه النسيم ما بستقيم يرقص معاهو ويتعدل لو كان كرس

[أبو وائل]

حاتم حسن الدابي

صيغة الخطاب

صيغة خطاب مكتوبه من قلب الولد
من جوف طفل لحظاتو بين مره وشهد
لسع ما عرف طعم الحياة ويادوبو لسع في المهد
كلنو كان يعرف تمام غير انو مخلوق في كبد
كانت رسالتو دروس حياة في الزهن تسكن للابد
فيها المداد دمعة عيون منسابه الهبة الغدد
كلماتو من معجم لغات الدنيا كلها تستمد
مظروفا جوف كاتم انين فياض دوام ما ليهو حد
والطابعه كانت قبله من بين الشفاه مختومه بي صبر و جلد
عنوانا كان ظاهر مبير من غير حروف اللا اسد
الي رحم امي وختي قوس قبال يقفل القوس قصد
يكتب كلام شان يلفت الانظار قصد
مضمونو بين قوسين يقول( ممنوعه ما يقراها حد)
وكان الخطاب عبر البريد السري حافظ المستند
في ذبذبات هذت دواخل امو لهبا ما برد
لمن صرخ ومسك الثدي واتواري في حجرا وغمد
لما الخطاب وصل الرحم بقي نطفه يادوبك تعد
تكوينا ما وصل المشيج في علقه منتظره المدد
لكن قدر يحكي الظروف الجات عليه بلا وعد
حكي لاخوه وقال كلام لابد من يلقالو رد
وكان الحدث صحوة ضمير علاما حلال العقد
دي رساله من طفلا صغير حكي لاخوه وقال سرد
.................................................. ...
دنيانا ما دنيا واحلامنا ما احلام
دي حقيقه ما رؤيا وقالو السبب اقسام
لو ليك كتب تحيا ضي عالم العلام
طال شوقي لي لقيا وخايف من الايام
********
بالله زنبنا ايه من قبل نتلاقي
نرد الغفار والتيه في الدنيا نتشاقا
ليه شجرة الوالدين يتحتو اوراقا
ما نلقي جيم لسين غير المعيشه اقسام
********
انا شوقي لجيتك دايرك معاي رفيق
بي جيها خايفلك عيشت نشاف الريق
انا نيتي زي نيتك لمت شقيق وشقيق
سالكين طريق مسدود ما بمشي لي قدام
********
انا داير احكي لك احوالي بالتفصل
انا كالضفاف مخضر كانت حياتي قبيل
لكن بدين اصفر لمن هجرني النيل
اسع بقيت مجبر اتحمل الاقدار
********
العيشه بين والدين من مده متفرقين
زي المياه والطين وفقد النظر للعين
بيقلوا مشتاقين شاربين كؤس البين
كاس الوداد في الحين اصبح شرابو حرام
********
ما راعوا للجاين وما قدروا المولود
واظنهم ناسين الجاي والموجود
حتي الشرع والدين اتناسو ليه حدود
لما الصحف رفعت وجفت الاقلام
********
والليله ندمانين ايه الندم بيفيد
خلوني باكي وحزين عايش فرد وحيد
زي زهرة الياسمين من ايد اروح لي ايد
قطعوا الشديد ومتـــين لا غربه لا ارحام
*********
انا داير اوصيك اصبر علي البلوه
ولا بد تلاقيك المره و الحلوه
كل العشم فيك انك تكون اقوي
من كل بلاويكا دنيكا تبقي سلام
***********
ودنيانا ما دنيا واحلامنا ما احلام

[أبو وائل]

حاتم حسن الدابي

اخر زمن


تاني ما بندسه الخبر نحن قدام واقع مرير
فى البنات زي السوس نقر يا خى دنيا اخر زمن
عوانس فى المجتمع ديل بقن للبنوت عبر
قبلهن كم الات سماح ضاعن واخير ياخدن الحذر
الزواج صح قسمه ونصيب حكمة مما خلقوا البشر
بيهو كم عاشقين ضاقوا مر مؤمنين بيهو قضاء وقدر
اوعه ما تخدعك الوجوه المندية متل الزهر
تبدو مبتسمه فى الصباح وفى الدواخل عدوان وشر
السماح ماهو سماح عيون واقعه متمتعه بالحور
ماهو عود نادى ومستقيم نامي فوق عز وفوق بطر
ما تقول سمحات الشفاه المنديه زى الزهر
ما بتأكدوا ليك الكتوف المردم فوق الشعر
ما تقول سمحات الشفاه الكلامن يهز الوتر
ما بتأكدوا ليك الكتوف المردم فوق الشعر
السماح فى العفة والدين القناعه وغض البصر
دي القناعه وكنز الزمان واحتمال نكبات الدهر
البنات تابعات الهوي مغرمات بالليل والسهر
الغرام بقى بس بي الجيوب والبيوت والطين والمتر
الواحدة تتعلق بالدروس والمراوغة منذ الصغر
تنتظر لن تقضي الدروس وتسهى لمن يفوتها القطر
حتي كان قلتا الامهات العرس سونو متجر
اصبحن للدنيا العبوس وللقروش سعرانات سعر
يا حليل زمن الابهات كانوا غسالين للصقر
الزمام صار عند الحريم صار عديل البيع فى المهر
فات زمان الحن والحنين الفضيلة وعاها اندثر
لا تهم يا اخوي إن سمع قالوا قام شوك للعشر

[أبو وائل]

حالتم حسن الدابي

حظى التعيس

أنا مالـــى دون النــاس مســــــــوده أيـــــــــــــامي
لاضــو لــي نــــــــبراس فـــى ظلمـــــه أحلامـــــــي

ليـــه دون خـــلايق الله حظي التعيـــس مســــــود
يـوم الفـــــــــرح طـــــل مــــات قبـــل مــــــا يولــــد
فتحـــــــــت للأحـــــزان وســـــاعة الفــــرح غمـــــد
اتغتــــا بيـــهم أســــاي متوســــــــدة الامـــــــــــى

بـاب السعـد مقفــــــول مـــــا أتلقـــــــا المفتـــــــاح
مـــات الشعــــاع مكتول صبـــح السعــــد مــــــا لاح
لمتيــن معــاي يا غـــول يـــــا طـــــــــارد الأفـــــــراح
كل ما أتفتــح لـــي باب ألقــــــــاك قدامـــــــــــــي

صبحـــاً يشـــــع قـدام طولـــــــــــت أهــــــــــاتيبو
شـــايفاه فــي أحــلام عطرنــــي بــــــي طيبــــــو
يظـهر لـى فجـأة ظـلام جــــــــــــارات جلاليبــــــــو
يكشـحني بـــي أوهـام تحرمنــــــي نســــــــــامي

قدامــي كـــل النــــاس أفراحــــــها مــــــا ونـــــــت
عايشين سماح أحساس بيـــــهو الطيـــــــور غنــــــت
الكــــاس يلاقــي الكـاس ذي مــــــــــا هـي إتمنــــت
عنـــدي الأمــاني يبـــاس مــــــــات القبيــــل نـــــامي

كـل الخطــى الثابتــــات تتماشـــى لـــى قــــــــدام
وأنــا لـو حظيت خطـوات بيردهــــــــــــا الــــــــــهدام
البعــدي عـــدى وفـــات متوســـــــــد الأحــــــــلام
وأنــا مــالي ليــه راجعات طوالـــــــــــــى أقدامــــــــى

[أبو وائل]

حاتم حسن الدابي

يا محسنين لله

قومة من النباه ما ضاقلو قوت الفاه
غير كلمتين فى اليوم إعتادن الحلقوم
من الصباح للنوم يا مـحسنين لله
تبدأ الصباح بالآه ومنك زمن تواه
وتتمسى يا الله من شدة المأساه
ترقد رفقت الشاه حالاً صعب رضاه
000000000000
جواها صوت مخنوق ما بيسمعوا المخلوق
وبالاً شتيت ممحوق وأنه أسى وخازوق
بحت لسان مريوق ينادى مـعـتـصـمـاه
00 يا محسنين لله 00
حبل المروه الكان ممدود من الجيران
وأعـمـــامـه والخلان بالمطرقة وسندان
يا حليل رجلنا زمان بس فضلو الأشباه
00000000000
قبال ثلاثة سنين يتمت من الوالدين
ومن بعـــــدو بسنتين راح الكفيل وحنين
خلا لها دمعة عين وخلا لها خمسة أفواه
000000000000000
صبارة قادرة تطيق كل الآلم والضيق
وتغلب نشاف الريق والمصلا والابريق
وقلبـــاً وفى وصـــــديق لا ضل يوم لا تاه
000000000000
إلا الصغيرونين يتبـــــاكو هم دايرين
فى لحظة وحين مـا بيعوفـوا المن وين
والحــوجة سيفه سنين يقتل رقاب الجاه
0000000000000
سالت دموع أنهار جسر الصمود إنهار
عارفى العدم جبار مر ما بيراعى صغار
إلا الفقر مـو عار بس للوجوه شواه
000000000000000
ضايقى العذاب كم نوع وعارفى السؤال ممنوع
شبعانه فوقو الصوع ورويانه نوح ودموع
الله يجازى الجوع كم كم حنالو جباه
0000000000000
تب يا زمن مـحاق من ضلك الرقـــــاق
يا قاسى يا فراق يا اللى الفرح سراق
حنضل أساق دقاق مـا بيحملنو شفاه
000000000000000
عطش السنين فى الجوف طرد السئم والخوف
فرش دواخلى حـروف روينا بالمعــــــــروف
ولا قلة المصـــــــروف لا الحـــــوجــة تتوطاه

*****************

[أبو وائل]

محمد الحسن سالم ( حميد )

آخر الريد
................
جاييك من آخر الريد مشياً
على الأشواق
عز الليالى البيد آنست
نورك باق
خبيت مشاعرى شديد
الدروخة الساساق
كلما لك انت بعيد
توميلي بالاطواق
بى آيه تفتحى الأبواب
للجاك عديل ودنا
داير عينيك قراب وتبقيلي
دار ودنا
لو بالمحبة حباب إبن الملوح أنا
لو بالنغم زرياب وما خلى
فيك غنا
لو بالعلم دا كتاب مفتوح لك
ألف سنة
لو بالضرب دي حراب عنتر
مدارقو هنا
لو بالرسم جذاب عند أمو كل جنا
لو مو الشمس كضاب البدر
يضوي سناء
لو بالقرش وين جاب ما جاب
براهو هنا
لله كم خطاب تتمنى حالو مني
يا بت بلا استغراب تكشحلى
جور وضنا
وأنا اجدر الخُطاب واكتر قلوبه عنا
راجيك تقولى حباب يا ......
ريدتى هاك كفنه
فالدنيا دون أحباب غيمة
الضباب دفنه .

................

[أبو وائل]

محمد الحسن سالم (حميد)
في عشق الهلال

سلام الهلال السوداني

الليلة دا يوم السودان ..

البلد الليلة هلالابى ..

النيل الأزرق نشوان..

والأبيض أبيض ياأحبابى..

يامشرّف كل الأتيام..

فى يوم السعد الافريقى ..

يا مفرّح كبدالأيتام ..

باللعب البعد الموسيقى..

يا هلال فى جبيرة سودانك..

فى جبين الشعب الحبّوب..

أبشر لاباشر وأقوانك ..

ياعريس السمر المحبوب..

تعجبنى الرمية الزنجية ..

لى رأس الحربة النوبية ..

بى خفة لمسة بجاوية ..

تتسامى الهامة العربية ..

وتتناول نسمة صعيديّة..

تسكن بى كلّ أريحيّة ..

ما بين الخصل البنيّة..

وزغريدةتبق سودانية ..

لى أروع دخلة على النية ..

لى أروع دخلةهلالية..

البحر الليلة هلالابى ..

المطر..

الحجر..

الترّابى..

الشدر الشايل متكابى ..

الساقى عروقو الحطّابى..
الشوقو عنقريب هبّابى ..

الشاقّى مروقوهلالابى..

الوسّار ذوقوهلالابى..

القمر البيتو قصاد بابى ..
حبيتو لانو هلالابى ..

وين تمشى الراضى على المابى ..

بالشمش الفوقوهلالابى..

يا .. ليم يا الكورة وكت تبقى ..

أخلاق مو######## مع الخلقة ..

الغالب حاضنو المغلوب..

بمودة وحنية ورقة ..

وجمهور بيشجع مصحوب ..

بالنغم الطيب والصفقة..

الله ياشعب ياحبوب..

ما أحلى الدخلة على المرقة ..
.
يا فريق بيطلع كم فرقة..

يامارق بينا من الزنقة ..

وحدناشبعنا من الفرقة ...

جددنا عشان نبقى وتبقى..

ياريت الطالقة المنطلقة ..

ياريت يا أبونا يا ابو الحرقة ..

لو تقرا بياضك والزرقة ..

[أبو وائل]

محمد الحسن سالم ( حميد )

نادوس

أصبحنا يا نادوس
وأمسينا بيك يا أم
أمسينا يا نادوس
وأصبحنا بيك يا أم
يا سوسة ضد السوس
قلباً بلاكي يضم
ليل الضياع مهووس
يحلم هواكي يؤم
بعد الحصاد الروس
عالم نداهو يعم
ختيت هواك فانوس
بقّابي شلتو وحم
جيت المدن باخوس
لاقيتو جالب السم
راشح هجير البوس
وكل الوجوه دم دم
… … … …

[أبو وائل]

محمد الحسن سالم (حميد )
ست الدار بت احمد




باسم الحاضر والمستقبل
ست الدار بت أحمد قالت :
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
باقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قلنا نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
بسم الله .. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
ولا خبيراً للمشروع
علماء آثار .. فضلت في آثار
ما خموها الجونا قبلكن
شن خلولنا بلا حجار
الله يصرف الخواجات
بينات جعفر والمحجوب
والمحجوب والخواجات
طقت حجي .. العمدة طفاها
باقي الناس الجات للفرجي
قنبو قيلو شبعو لحوم ..
والخواجة يصور ساكت
ستة خرفن وتيس ما كفن
ستة خرفن في فد يوم
المعدوم أشكال وألوان
أي خدار في اليوم داك في
كملن رف كمين دكان
أول كفو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحروم
ستة خرفن وتيس إنصفن
ستة خرفن في فد يوم
جات من صالح بت كلتوم
تسكت تخبز طول اليوم
لمن حرقت الدولاب
قنبت المسكينة تدعي
الله يصرف الخواجات
غاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
سب الدين والأمريكان
جنس بدع
زولك ده يحير
عند الجد كان أده ينقنق
عند الفارغة يشيل ويبعزق
إذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
كيف الناس والحالة عموم ؟
والعزابة الكحيانين
سيد البيت عل ما زكاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار
والحاصل البحصل كل صباح
شتلاتك قبضن
الحملان كبرن بلحيل
العضمين الروكة إنزرعن
اوعك تشفق من تالانا
ولا نبقالك مشغولية
زيك واحد مستورين
وما ناسين المسئولية
هي يا الزين زغرد
بت ام زين جابت لها بت
ستة أولاد حتان البت
المحجوب ينشد من خبرك
شافعو محسب من يومين
التومات طيبات ونصاح
إلا غباش بلحيل آ الزين
راشد كرر .. شهر اتنين
كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
وما تتوصى .. وداعة الله
أوعى البشغل والعربات
والحيكومة السمها فاير

أم أولادك ست الدار بت أحمد جابر

ست الدار بت أحمد كيفك
جاني جوابك مفتوح شارع
جاني جوابك
وانا بتذكر في ناس راشد والتومات
في الشتلات والحالة عموم
ناس حلتنا التحت .. الفوق
الليهم الله وعيشة السوق
جاني جوابك وانا بتصور
في المشروع وعمايل جعفر
ولما بكيت .. يا ست الدار
أيوة بكيت .. يا ست الدار
لما قريت علماء آثار
علماء إيه يا بت الناس
سواح إيه .. ما عندك راس
ست الدار تتوهدبي ليه
ديلا جماعة السي آي إيه
تعرفي إيه السي آي إيه ؟؟
امريكان في كل مكان
ديل مالين الدنيا ملي
ديل قالين الخلق قلي
باسم الدين والأمريكان
أي عوج مبدي ومختوم
صوتنا هناك وهنا مكتوم
ومافي فرق في الوقت الراهن
بين واشنطن والخرطوم
أنا مأزوم .. مأزوم .. مأزوم
يا خرطوم وينك وينك
يا خرطوم شن شبّ وقلبك وسلبك
حلبك ؟ زنجك ؟ بجتك ؟ نوبتك ؟ عربك ؟
أنا مأزوم .. مأزوم .. مأزوم
يا خرطوم أزمني الصلبك فوق الطلحة الأمريكية
يا خرطوم .. أوه خرطوم .. أوه واشنطوم
طن .. لفتك فجراً يقطع رحطك
ست الدار سامعاني
يا اخيتي ومرتي وامي وأم الكل
أنا بندهلك من شارع الله
فوقي هجير والتحتي بقل
سبي معايا الشردو راجلك
والحرمونا شوية الضل
سبي الحالة العالة علينا
حتى احكيلك بالتفصيل
حاصل الحاصل يا بت أحمد
جاني وفد في المصنع زاير
وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف المصنع فيهو خساير
وقالوا يخفضوا مئتين عامل
مئتي عامل في فد مرة
مائتين عامل .. مائتين عامل
يبقوا هوامل .. يبقوا هوامل ؟؟
ما يهموش .. الهم المصنع
تفّ قراروا وفات في حالو
مسئولين ونقابيين مافي العارض واللا اترجى
العمال من سمعوا احتجوا .
سيرو موكب صامد وصامت
إتضامنا معاهم سرنا
أب عرام دور عربيتو .. العربية الامريكية
زنقح خلا الموكب ثابت
احتجينا مع الإحتجو
إتكلمنا كلام موضوعي
قلنا المصنع حق الدولة
والعمال أصحاب الحق
هي اللي تقرر والتتولى
هي البتحدد سير المصنع
إيد العامل هي العاد تنتج
ما المكنات الأمريكية
زيت العامل ياهو البطلع
مو المكنات الأمريكية
ودرن الأيدي العمالية
أنضف من لسنات الفجرة
ودين الدقن الشيطانية
ومن كرفتة البنك الدولي
وكل وجوه الراسمالية
وأشرف من ..............
داك الحين المصنع هاج
جات عربات اللات بوليس
فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتخريب والتحريض والشيوعية
البوليس صاقع شيوعية
وفاكر نفسو بنبذ فينا
هي آ بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقهم أو تحقيق الأمريكان
اسبوعين عشناهم جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالهم شاهد
ست الدار الشوق الواحد
لي حلتنا وليكم ليكم
وللإشراق في عينيكم
وكل الناس الزولهم صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
لمت لمت .. كان ما لمت أنا جاييكم وما ندمان

( بعد الحاصل والإتحصل ست الدار بت أحمد تكتب ) :
زيني الزين .. أب حالاً زين
جاني جوابك .. يا المبروك
وسابني أشوف الدنيا كويس
وأعرف غلط الصاح مظبوط
سابني أميز .. وأقدر أفرز .. أرجع أميز
فرحانابك يا أحزان
فرح النار بي لوح الزان
مبسوطابك يا المبسوط
ما هزاني مصيرك
قدر ما هزوني الميتين عامل
ميتين عامل في فد مرة
ميتين اسرة تروح وين
في الأيام النجسة المرة
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بنية
ينتج كيف؟ شغال بي فونيا؟
عامل ينتج عشرين حتة
تلحقو منها قيمة إتنين
ستة بغطوا المنصرفات
سبعة.. تمانية .. تسعة بغطوا
أدها تسعة المنصرفات
كل الفايض .. بدخل وين؟
قولوا البفضل بمشي لي مين؟
وبرضو خساير؟
والله مهازل
يا مضغوط .. خفض ميزك حبة تين
تنك القعدة تلاتة خطوط
خفف مرتك توب مضغوط
من التمسحبو كبابي الصين
خفض عمرك يا ابن الفانية
وبي نظارتك واجه ثانية
ثانية عيون الشغالين
ثانية وبس
والله مهازل
ميتين عامل ؟
ميتين بيت ؟
ميتين اسرة بلا راس خيط؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليه يا الزين بتوصي عليّ
وانا بت احمد ست الدار
ام اولادك وهم صغار
ام اولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
اسبوعين قضيتن جوه
يبقى غصب .. زادنك قوة
ليش يا الزين بتوصي عليا
ليش يا الدخري توصي عليا
وعارف ام راشد والتومات
مرتاً دغري وغلباوية
آه يا الزين .. لو كنت معاكم
كنت بقيت النوباوية
ما تهتم يا الزين بالحاصل
واصل سعيك .. واصل واصل
واصل سيرك
كان ما كنت الزين ود حامد
كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوت شو
فرقو غيما الأمريكان
ياتو رصاص ما عقبو خلاص
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو راحو الديش
غزّا بكانا اتنين رطانة
صاقع كلو من اسماعين
هو الفسر لهن الشغلانة
ويا اسماعين
ما كان الديش شقّ مسيمعك بالجبخانة
لو المجلس قبل اوراقك
أو في الثانوي لقيت لك خانة
لكن قدرك يا إنسان ..
بلداً هاص هيصة جبانة
طالو الناس التريانين
ضلو الله الما ضلانا
أخّدو نورة الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفاء شكوهو وما لقو حق
المحجوب إتلقى اخبارك وقال جاييك في أول بص
البرسيم طهرنا البارح
نعجة راشد صبحت والدة
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
وفي الأتراح .. الزين الزين
ما تشغل بالك
بس يا الزين كان درت مشورتي
اصلو كتالك ياهو كتالك
تجي مندلي
الواطة تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزالة السوق
مبعوتالك عشرة جنيه
والأشواق من هنا لا عندك
ست الدار أحمد جابر
تلغرافات :
تلغرفين في وقت واحد :
نوري . السوق .. ست الدار بت أحمد جابر
المحجوب في قطر اليوم
عفش الزين
النوباوية
الخرطوم .. الخرطوم بحري .. كشك الشعلة .. الزين ود حامد
راشد راقد والواطة جعفر طالق فيها بهايمو
ست الدار بت احمد جابر
نوري السوق المحجوب ود أحمد جابر
كتب الزين .. كل الاوراق .. راشد كيف
النوباوية
الخرطوم .. الخرطوم بحري .. كشك الشعلة
النوباوية
أنا في السكة وست الدار
راشد ود الزين ود حامد

[أبو وائل]

محمد الحسن سالم ( حميد )
شوك الشـــوق

شوك الشوق لى الشوف آ خَىْ
ضارب فِطن النسج الحى
يا منقاش أحزانى إنشرت
وادى الفرح إتمدد صَى
يا راحلين عِـنْ دُغُش الليل
ما لاقيتو جناياً زى ..
تكية نخل الفجُر الجاسِر
فوق فى المتَرَة .. عَرَاجِنْ ضَى
آ رعاوة .. العرب الرُّحّل
ما لاقاكُنْ فى المطرانى ؟
فى كاويقْ الجرف الأمحل
بين أسراب الرهو الراحِل
ساند أكتاف الليل الميّل
عِنْ ساساق الغيمة عليكُن
بين رقراق الخيمة معاكُن
ما أديتوهو شِوَىْ ... بى حرجل؟
*************
آ رطّانة الليلُن ليّل
ما لاقاكُن فى ونساتكُن؟
بين الشادِى وبين كاساتكُن
فى صلواتكن .. عِنْ دعواتكن
أو .. دقساتكُن عِز خلواتكُن
.. زول .. زول الله
إن مِحِن .. آ .. بِسأل
الهبّاد لى غُلبْ أخواتو
الفرّاح عوّان الحلّىِ
الفدّاع لى الليل ظُلماتو
آ نجمات .. شقيش قولن لى
ما لاقاك طالِع .. متدلّى ؟
المطيوب من طيبة أُمّاتو
كالفجّاج .. الندّ نباتو
موج البحر اللّحَمَر هوجتو
وعِرق العِرِق .. اللاّوى ثباتو
وش أطفالنا الليلة حلاتو
وغنى معانا غنانا هويتو
غنِّى العالم
غنى حياتو
لا ساومنا عليها قضيتو
ولا فكينا من إيدنا .. وَصَاتُو
ألف شليل يا نورة يفوتو
عشان ما يجيك شليلك زاتو

[أبو وائل]

محمد الحسن سالم
طيبـــة

كل ما تباعد بينا عوارض
كل ما هواك يا طيبة مكنِّى
تلقى الغربة تكرب الواحِد
بيكى أسمى الشوق .. وأكنـِّى
لمـّا أفوتك من دون خاطر
أو دون خاطر منى تفوتى
بلقى حبايب فى كل حِتـّة
وكل بيوت الفُقرا .. بيوتى
لا غيرت وراك الجِتـّة ..
لا بدلت ملامح صوتى
لا غافلنى وهادن فنى ..
غامل المدن .. الما عِرفتنى
دقن الشوق الصبرو .. مصوبر
للأرياف الكم .. وفّتنى
وللأطفال الناشفة ضلوعا ..
ونازفة بغنى
أطمن روعة .. وأهدّى دموعة
لبسمة بكرة اللاّها تمنى ..
ولا مصنوعة
للاطفال النازفة ضلوعة
وناشفة بغنى
********
أغنى لشعبى ومين يمنعنى
أغنى لقلبى .. إذا لوّعنى
مخيـّر دربى الما رجعنى
إذا طلعنى دخلت القرب ..
ولا الغربة الكدروبية
تنزل غنوتى بى قمرية
أو وقـّعنى فى بطن الجـُّبْ
بطلع يوسف بالأغنية
***********
أغنى الناس الما بتسمعنى
المِنِّى بعيدة .. ومبعدة عنى
ا نادى نشيدا .. وكنت المعنى
الإيدى فى إيدا .. وإيدا بتبنى
فى دنيا جديدة اليوم .. راح تدنى
حسيس طنبارة .. مع نـُقارة
صفِقتاً حارة .. ودارة تغنى
فيا حلتنا عليكى تـُرابك ..
وإنتى شبابك زينة الجَنـِّى
أحلى عروس البلد اللّتنا
ولاّ الغُبُش الرّابّة تهنى
ولاّ هدير المدن التصحا ..
وتمحى ظلام الحاصل .. عنـّى

[أبو وائل]

محمد الحسن سالم( حميد )
من الواسوق

من الواسوق أبت تطلع
من الأبرول أبت تطلع
من الأقلام أبت تطلع
من المدفع طلع خازوق
خوازيق البلد زادت
يفيض النيل .. نحيض نحنا
يظل حال البلد .. واقف
تقع محنة..
ولا النيل القديم ياهو ... ولا يانا
نعاين فى الجروف تِنهد .. ولا يانا
رُقاب تمر الجدود تِنقَص .. ولا يانا
متين إيد الغُبُش تتمد ؟
ولا قِدّام ولا قدام
تتِشْ عين الضلام بى الضو
تفرهِد شتلة لا هدّام
ولا فيضاً يفوت الحَد
عُقُب يا نيل تكون ياكا
ونكون أهل البلد بى الجد
عُقُب يا نيل تكون ياكا
ونكون أهل البلد بى الجد

[أبو وائل]

محمد الحسن سالم ( حميد )
يا مطر عز الحريق


يا مطر عِز الحريق
يا مصابيح الطريق
يا المراكبيى البتجبِد ..
من فك الموج الغريق
جينا ليك والشوق دفرنا
يا نشوق روحنا ودمَرنا
يا المحطات الحنينى
القصّرت مشوار سفرنا
************
ياما شايلك بينى حايم
لا الليالى المخمليى
لا العمارات السوامق ..
لا الأسامى الأجنبيى
تمحى من عينى ملامحِك
وإنتى جايى المغربيى
دايشى .. داقسى .. المغربيى
وشِّك المكبوت .. مكندك
سمسونايتك زمزميى
كون شِبِر .. طوريى .. مُنجَل
سِبحِى .. فانوساً مدردح
قلتى بيهن لى زمانِك
يا زمان الحاجى عِندك
يا زمان الآهة حدّك
لا تَطَـأ الوردة الصبيى
لا تطأ الوردة الصبية

[أبو وائل]

محمد الحسن سالم (حميد )
عم عبد الرحيم
فتاح يا عليم
رزاق يا كريم
صلى على عجل
همهم همهمة
حصن للعباد
وهوزز سبحتو
ودنقر للتراب
هم فوق هم همـة
صنقع للسما
وكان فى الجو
فى غيم
وكم نجمات بعاد
وكان الدنيا صيف
لا قالتو كيف
كيف اصبحت كيف
لا لمسة حنان
لا لمسة وداد
لا رمشة طريف
من قلبا وفى
زى ايام زمان
ايام الدفى
***********
كانت ماهـا فى
كانت فى المراح شدتـلـو الحمار
تحلب فى الغنم
لى شاى الصباح
والطير ما نضم
ما رسل نغم
عم عبد الرحيم
اتوكل نزل
فى المشرع لقا
زملان الشقا
الجا من الجريف
الجا من الجبل
عل الناس بخير
صبح هاظرم
نقنق ناقرم
غاظوه نعل
وعم عبد الرحيم
ما بخبر زعل
كل الناس هنا
ما بتخبر زعل
تزعل من منو
وتزعل فى شنو
كل الناس حنان
كل الناس صحاب
كل الناس اهل
والماهم قراب
قربم العمل
الطاق اليطق
عشت ابو الزمل
بالحالة العليك
بالفال بالامل
**********
عم عبد الرحيم
كت فتاح فى يوم
فى ايدك تنوم
على كيفك تقوم
لا دفتر حضور
لا حصة فطور
تقرع بالقمر
تزرع بالنجوم
لكن الزمن دوار ما بدوم
عم عبد الرحيم
ماشى على الشغل
فى الباب القديم
اتعارض تكل
تنشايح جراح ..
يا كيف الغسل ؟
الدنيا ام صلاح
تبدا من التكل
من حج الصباح
فى حق الملاح
فى اللبس الجديد
فى القسط القديم
وبيناتن عشم
فى الفرج البعيد
***********
امونة الصباح
قالتلو النعال
والطرقة انهرن
ما قالتلو جيب
ما قالتلو جيب
شيلن يا الحبيب
غشهن النقلتى
والترزى القريب
بس يا ام الحسن
طقهن آبفيد !!
طقهن آبزيد !!
انطقن زمن
وان طق الزمن
لازمك توب جديد
وبى اية تمن
غصبًا للظروف
والحال الحرن
شان يا ام الرحوم
ما تنكسفى يوم
لو جاراتنا جن
مارقات لى صفاح
او بيريك نجاح
ده الواجب اذن
وايه الدنيا غير
لمة ناس فى خير
او ساعة حزن
عم عبد الرحيم يا حر
ماكا حر
ياريت التمر
يا ريت لو يشيل
كل تلات اشهر
والله ايام زمان
كانت ما تمر
كان ما جاك هوان
ما لاقاكى ضر
كان لا ضقت ضيق
لا اتغرغر فقر
لا شابيت غريق
لا طلوح صبر
وكان ما كان وكان
كان اكسيكى در
*******
حيكومات تجى
وحيكومات تغور
تحكم بالحجى
بالدجل الكجور
ومرة العسكرى
كسار الجبور
يوم باسم النبى
تحكمك القبور
تعرف يا صبى
مرة تلف تدور
ولا تقول برى
او تحرق بخور
هم يا الفنجرى
يا الجرف الصبور
كل السقتو ما
باقى على التمور
وارضك راقدة بور
لا تيراب وصل
لا بابور يدور
والماهية اف
عيشة هاك وكف
فى هذا الزمن
تب يا دنيا تب
فى هذ الزمن
تف يا دنيا تف
يا العبد الشقى
ما اتعود شكى
لكن الكفاف
فوقك منتكى
والسوق فيك ياسوق
حالا ما تسر
الا كمان فى ناس
فايتاك بالصبر
ساكنين بالايجار
لا طين لا تمر
واحدين بالايجار
ما لا قين جحر
سلعتم الضراع
والعرق اليخر
عمال المدن
كلات الموانى
الغبش التعانى
بحارة السفن
حشاشة القصوب
لقاطة القطن
الجالب الحبال
الفطن الفرن
الشغلانتو نار
والجو كيف سخن
فرقاً شتى بين
ناس عيشا دين
مجرورة وتجر
تقدح بالاجر
ومرة بلا اجر
عيشهم كمهو
ديل شوف كمهم
وديل شوف هان قدر
*********
وناسا حالا زين
مصنع مصنعين
طين فى طينو وين ؟
ما مرابو مر
بارد همها
لا بعرق جبين
لا وشا يصر
عين والله عين
كلها كمها
عزها هان قدر
دى الجنة ام نعيم
الجنة ام قصر
يا عبد الرحيم
الا ورا القبر
يلكد فى الحمار
لا تسرح كتر
وان كان الفقر
يا عبد الرحيم
اشبه بالكفر
***********
حكومات تجى
وحكومات تغور
تحكم بالحجى
بالدجل الكجور
ومرة العسكرى
كسار الجبور
يوم باسم النبى
تحكمك القبور
تعرف يا صبى
مرة تلف تدور
ولا تقول برى
او تحرق بخور
هم يا الفنجرى
يا الجرف الصبور
كل السقتو ما باقى
على التمور
وارضك راقدة بور
لا تيراب وصل
لا بابور يدور
نقرط للحمار
نقريط الحمار
لا تنسى النعال
الطرقة ، الخدار
اللبس الجديد
تسريح السفر
للماشى الصعيد
ماشى الديش نفر
والبــال اشتغل
والبال اشتعل
ب الابا مايعيد
الحول ما اشتغل
الغبن الشديد
السابة ورحل
الضيق المحل
الفرج القريب
الجا وما وصل
زى الحال دة يوم
لا كان لا حصل
والبال اشتغـل
*************
السكة الحديد
يا عم القطر
يا عبد الرحيم
قدامك قطر
وسال الدم مطر
وطارت دمعتين
وانشايح وتر
يا طاحن الخبر
ما بين القضا
ومرحاكة القدر
الشهدو الدموم
و الدمع انهدر
ايدهم فى التراب
والعين فى القطر
عارفين الحصل
عارفين فى حذر
الخبر اليقين
بوخ وانتشر
اطفال القرى
وعمال الحضر
ادوهو الطيور
ودنو البحر
انصاع السحاب
وادفق مطر
عم عبد الرحيم
فى الشارع عصر
لى تالا اليسار
متفادى الكجر
عربية الكجر
دوية الكجر
جفلت الحمار
وطوح زى حجر
وعم عبد الرحيم
اتلافا القطر
فتاح يا عليم
سال الدم مطر
جرتق بالتراب
منشور بكتاب
روشتة وجواب
ماهية شهر
مفتاحا قراب
اورنيقين سهر
جم لبدة حمار
مقطوعين ضهر
عم عبد الرحيم
يا كم من بشر
عم عبد الرحيم
يا كم من بشر
صحى الموت سلام
ما يغشاك شر
صح فى الموت سلام
ما يغشاك شر

[أبو وائل]

محمد الحسن سالم ( حميد )

بين الموجة والخزان (سلام يا امى)
سنّى على النضال إيدى
سوّكى بى الهتاف .. فمّى
شوارعك لى .. دويها .. على
إذا ما آخر العلاج الكى ...
مراويدك حُمر يا أمْى
****** **********
هردت لهاتى بى الغنوات
وقتْ يبرد حشاك .. يا أمّى
من التعب البلا صالح ...
تفيقى .. تروقى .. تنجمّى
تسوّى مكانسك المطرة
تضوى البيت وتنجمّى
تمرقى صبوحة لى الجيران
قدح فوق إيد وفى دمى
يلاقوك شفّع الكتـّاب
نضاف وظراف بلا النسمى
يغنولك غناوى السـاب
وفى بيوضة مافى سراب
جبال كجبى وفيافى الكاب
تميد بى الخضرة ...منقسمى
فيافى الصّى وبيوضة ..
البراسيم فيها مفروضة
خدارا يرارى شوف عينى
على الأبواب طواريها
وحواريها ,وقماريها بقت روضة
بقت تشرب من الحامداب ..
تشوفى رهاب ... بُعُد نجمى
بشوفو قريب قُرُب نضمى
بشوف العالم التحتانى
هيلاهوب وقف ناهض
وهدّ عمايد الفوقانى ..
جوّة الجُب رمى العارض
وفى الساقوا الدمار أفراق
عريق الحب نبض قابض
متل قبض الحروف فى إسمى
وغناوينا القبيل .. رقراق
علينا تصب برد .. قارض
وأجر نمّى ...
أدوبى لهاتى بى الغنوات ..
عُقُب يبرد حشاك .. يا أمّى
***********
وطنى ولا ملى بطنى
سكاتى ولا الكلام النّى
بليلتى ولا ضبايح طى
قليلتى ولا كُتُرْ سمّى
سلام يا أمّى
سلام لا هكمى .. لا دكْمى

[أبو وائل]

محمد الحسن سالم ( حميد )

نــــورة

وكتين يضيع
عرق الجباه الشُّم
شمار فى مرقة ..
آه .. يا نورة آه
من دربك التوّر
نفس خيل الصبر
فتـّر خطاوى الشوق
وراه .. يانورة .. آه
ساعة الشموس الغُر تهضلم
تلحق الصِّح .. فى المغارب
يدفر الضو الكهارب
تستر المدن السرابية ..
الضبابية .. الكآبة
فوق قفيِّك يا أمْ عوارض...
يا أمْ عوارض .. مو دُعاشة
ماها شبـُّورة وتقيف ..
جايى ليك يا نورة غيمة
تملا ماعونِك خريف
يملا عينيكى ويفضـِّل
يروى جوّاك العطاشة
جاة ليك يا نورة غيمة
تملا ماعونك خريف .
**************
يا نفس فجر القصايد يا بلادى
دا القطع قلب الروادى ..
بى اللّواج الجاى .. وغادى
ماهو صوتك .. لاها صورتك
هى البترقش نادى
فوق صدر الجرايد
إنتى يا حُضن الصحارى
شُفّع العرب الفتارى
البفنـّوا الشايلا إيدمْ
ويجروا كايسين القطارى
لا سراب الصحرا .. موية
ولا حُجار سلّوم .. موائد
حالكم البصرخ وينادى
ياوطن عز الشدائد
*************
يا هُدى الناس الحيارى
يا ندى الفجر الببلِّل
نور عِوينات الفقارى
جايى ليك .. آه جايى ليك
جاى ليك يا نورة افة
آفة .. للسوس البنقـِّر
عود عِشيماً داخرو فيك
أصلى لمـّن أدور أجيك ..
بجيك ....
لا بتعجّزنى المسافة
ولا بقيف بيناتنا عارض
لا الظروف تمسك فى إيدى
ولا من الأيام .. مخافة
يا نفس فجر القصايد يا بلادى
ما ضِهِبْ فى بعدى عنـِّك
أصلى متغرِّب عشانك
راضى بى الجايينى .. منـِّك
ما شكيت شُح اليالى ..
وما بكيت نُحْ .. شِلتوا حالى
رغم إنو الحال بيفضح
إلاّ كٌتْ فى الحارة بصرُخ :
يا وطن عِز الشدايد
يا وطن عِز الشدايد
يا وطن عِز الشدايد
يا وطن عِز الشد

[أبو وائل]

محمد الحسن سالم ( حميد )
الضو وجهجهة التساب

الضو وجهجهة التساب
اوداها فوق قوز الرماد
كان ظنّ يوم .. يومين .. تلاتة
الموية تنزل والبحر يشرد شراد
يفضل ترا
يبراهو بالسلوكة من ورا
والعيوش والخير يعم .. يرقد رقاد
والناس تخم خم السرور .. وماهو البرا
ناساً كتار .. فاكرين كدي
يومين .. تلاتة .. الحالة ترجع حالتا
ويبنوا البيوت هو وشفعوا .. وأم العيال
وينجمعوا .. ويسترجعوا الذكرى وشتاتات السواد في صالتا
شيتاً ضحك .. شيتاً بكي
ويبقى الخراب ده رهاب .. رهاب
عبرة وحكاوي بتنحكي
بلدك متل كمين بلاد .. بدت الدقون فيها الختا
نجّس ثراها المسرفين .. كترت مواعين الفساد .. وكان كلمة الإسلام غُتا
جات اللّت الله .. وشالتا
كان ظن يوم .. يومين .. تلاتة .. مشى السبوع .. والتاني جا
والموية كل ما ليل تزيد .. بيقل رجا
وقوز الرماد الكان قريب .. فات بعيد .. بقى ما بتخوج
قوز الرماد يا الضو فضل .. جزيري ضارب فيها موج
حصار .. حصار .. كيف النجا
عاين البلد دي دمار .. دمار .. فيها إيش فضل
لعبة قصب في إيدين طفل
الحيطة وكتينا التقع .. تقع ألف وجعة على الضلع
دخانا يمرق في السما .. آهاتو تنزف في الأرض
بحر الصبر والإحتمال بيناتن إنقطع ترع
لا يلقى يربط لا يحل
لا حولة يا الكتب .. الكراريس المكرنة في الشتل
التختة .. أقلام الرصاص .. كنب المدارس كور يلوج
باب الفصل كاسحبو موج
لا قوة يا ورق الجرايد .. يا المصاحف
والصحيحات المطفحي في الزبل
ورافعين دواليبن بعيد .. طابلين خوازيقن طبل
لا حولة حال .. ما بتنقبل
يا مسلمين .. وين لي تساب عشرة .. وتساب كم واربعين
ده يمين خراب كمين سنة
يا الضو منو الفي الكون بصدق كان هنا
ليلة ذكر .. حلقة مديح .. دارة غنا
هيصة ورقيص
القرمصيص
سيرة عريس .. وحلاة عروسو محننة
يا الضو منو الفي الكون بصدق كان هنا
شفّع بيلعبو جنب بعض .. ديك لِفّتُن في الدشي غبشي مشكنة
واللا الشتل خايف لها .. فارد جرايدو وحاضنا
فيق ... لا تضيق
بات الفريق بهجي ومتمسحة بألمي .. وين يا الضو نقاقير الهنا
وينن مشاوير الفرح .. غزل البنات .. الهودنة
حش البراسيم العصر .. الليل ونستو الشيطنة
وعند الفجر .. كم ميضنة
وهذر التلاميذ الصباح .. بي جنب رواكيب الحلب
يا الضو بيوت الناس .. حياتا مبشتنة
الحلِّي كلها في البحر
كسر البحر .. ؟
واللا انتحر ؟
قلب المياه إنكبّ قبلك وحدك
ضاداك في بلدك .. شردك
نفدت قوافل الأغنياء .. جملك على الحصحاص برك
مرتاح حمامن في البروج
وإنت اب حماماً طاش يلوج
لا سوى عش .. لا ركّ ركْ
يا الدنيي كيف متقلبنة
تصحى العصافير الوديعة مع الصباح متخلقنة
شر الكلاب متمسكنة
وين (جنرتا) وهوهيوا وين ؟ الليلي غابْ
كلب الجناين زيو زي كل الكلابْ
كلب الغلابة المستغلين العبيد .. الليلي سيد ريس مهاب
كلب أب زهانة تهينو هانة .. من المهانة تقول له تكْ
حكم إنقلابات التساب .. دوارة دنيا فرندقس
ننجارى فيها صبق صبق .. نخسر بعض في هين تراب
نتلاوى عِنْ فتح اللبق .. فاكرين برانا أهل العقاب
تاري البحر عوافي عندو معانا حق
يا الدنيي زي سكرة وتفك .. من راسو فك
بعض المسافات إتلغت
الفارغي طمبجا .. والملاني إتفرغت
الدندهوبات زي بعض .. شكل العديدي ورصّها
نفس العناقريب نفسها
عفشك ده .. حق غيرك تشك
يدخل في بالك ألف شك
ما الحالة أصلاً من بعض
كل إنقلابات التساب .. الدنيي كلها حلتك
تنضم مع الفي آخر البلد .. من غير تفوتا محلتك
تحكيلو قصة تقصها
إن نفسو فيها تحسها
إن ماها فيها تحسها
حتى الأحاسيس نفسها
ما الحالة كلها من بعض
إلا المساخيت الدقون .. ختوها بين أهلك قرض
بالدين وبالطين بالنسب
بالمايكرفونات بالخطب
بالبنطلونات بالرتب
(فرق تسد)
تاخد قناديلك تفوت .. وإنكتلو في حزمة قصب
ويوم التصد .. تلقى البيوت في أزيارها باني العنكبوت
والحزمة شاهد في الترب
حرسك يظمبر منها
وفرسك يكد..لا أسيدها تسأل عنها.. ولازول يرد
أرخيلى أضانك يابلد
مرة أسمعينى من البعيد وإنطارشينى وللابد
فى حبلى ماتت شتلتى .. مات بيتى ماتت حلتى
لكنى يوم مات إتولد جواى الف إنسان جديد
وانا ذاتى من ذاتى إتولد
ورتنى ملتى ملتى
والمويه بدلت الوجوه
يابلدى من بيتك تتوه
تضهب ضهب
لو بابو مافى أو العتب
تحسبلو من قوز الرماد
أو بيت أمير المؤمنين اللسة حيطو تسوى رب رب در.. درب
والدندهوب إندك دك
هرس القزاز .. الموية جاز .. والجاز ودك
بينو الدقيق إتلك لك
ضلف الدواليب الكبار .. عايمات خشب
المكحل .. الكتشنة .. ميزان الدهب
ضوق الغضب
ضوق المذلة الدستبا الناس العزاز
سدك دخرنالو المطر .. اما إنت يكفيك الرذاذ
ويجى الجراد ... ويجى الجراد
خدرت تاني يجي الجراد
أقوى الحقيقة من المجاز .. وهنا المحك
يا أرزقي .. يا نسل حمالة الحطب
يا مستفيد من بزة أطفال السواد الما نزل فوقن ملك
بالسكر .. العيش .. السماد
الموية أولى من العباد ؟؟
في يات كتاب دين .. يات حديث
يا فاجر الله بيسألك
يا حسرة الإنغشى فيك .. كبر وراك .. جاهد جهاد لامن هلك
يا حسرة الصدق صلاتك وموعظاتك في الفساد .. بان الشرك
ايواتا لك .. ايوة ايوة يا بحر التساب .. ما أعدلك
شكراً جزيلاً يا بحر .. رغم الكساد
بحت لنا العفن المكرن في الزمن من عهد عاد
والضو وليداً ما قرا .. خرجتو منك باقتصاد .. قانون .. فلك
جف المداد .. ما أعدلك .. ما أعدلك .. ما أعدلك
بالسكر.. العيش .. والسماد
الموية أولى من العباد ؟؟
يا شارع الثورة القصاد أهلي المسالمين البعاد
يا بندقيتو .. هنا المحك
قبل على القبلة ونده
قبال يمد إيدي إنتبه
حس المطر بين الشدر
والضو مع الفيها إنشده
برة المطر .. في الدندهوب برضو المطر
خت البرش فوق راسو .. لكن المطر أوووو والهوا
راس تمرة فوق عفش المسيكيني الجريد
رمى دندهوبا العدي فاتت بالبحر
برش الصلاة اللافحو الهوا
إبريق يترتر بين كرر
يا الله .. ستها في السفر
والضو ينط من دندهوبو يجيبو صاد صوت المطر
في إيدو كوز .. سبحي .. وككر
حلة ملاح .. كراس غنا .. إعلان قضية .. علم طلب
برواز قديم ..
حاضن عروس وعريس وسيم .. بين كم نفر
السبحة والكوز مو اللتا .. تشبه أمير المؤمنين
باكر يقولو سرقتها .. فننن .. يفنها في البحر
أقوى البحر ؟؟ واللا المطر ؟؟ أو الرياح
بتصحي في الجو الجراح
بتحت من الجوف الفكر
يشفي الوعر
عش قمري بي فرخينو كان من حظ ورر
يا رازق الحيوان أخو ..
الينجا من كيد البحر .. ما ينجي من إيد المطر
والينجا من إيد المطر .. ما ينجى من كيد الرياح
والينجا من كيد الرياح .. ما ينجي من كيد الفقر
يي دي القدر.. يي ده القدر
ما أعتى حربك يا بشر
إنت الغريب .. والموج يشيل غادي ويجيب
وينكربش النيمة الدبيب
والضو مو جايب لك خبر
طق .. دندهوب ناس ستي نور .. عودو انكسر
وفات بالبحر
تحت السموات مافي إرض
في الموية .. في الريح .. في المطر
في الدابي .. في التمر الختر
إنسان يطق قبل السنة .. عراقي والوشي .. والشعر
غير وقفتو .. الدندهوب زالف هبر
يا غيمة هووووي .. ده وكت مطر
وارتج جوف الجو رعد .. يا الضو كفر؟؟
يا الضو كفر ؟؟
من بعد ما نفد الصبر .. والإحتمال في الجوف دشر
صن المطر .. والجو صفا
بنقر حجر بت الرسول .. لكن بعد ما الضو كفر
ضربت شعاعات الشمس .. في دوشة فوق قوز الرماد
كلبة مديني .. نعيجتا
ديك العجوز .. وكديس عماد
وطيرة بقر .. ودحيش غريب
شوف الظروف .. دحشك .. حمارتك والضيوف
قلعن .. يحفتن في الرماد
بالسكر العيش السماد
الموية أولى من العباد ؟؟
وبالفيتريتي العيش حكم
الموية أولى من البكم ؟؟
وملص العريريقي ولباسو .. ومصرن
ما غيرن
خمخم عقاب الكسرة واللابري القديم
من دندهوبو المنتكل .. في النيمة شال باقي الأكل
خم الدبيب في القفة مو جايب خبر
خم الرياح .. خم المطر .. خم الجراح
لفالو فرعين منقة بالمنجل هبر
حشحش صبايتاً هن صفر

[أبو وائل]

محمد الحسن سالم ( حميد )
نورا

هي .. أقيفن .. نورة فيكن
نورة نقاحة الجروف ..
نورة حلابة اللبيني .. للصغيرين والضيوف
نورة ساعة الحر يولع .. تنقلب نسمة وتطوف
تدي للجيعان لقيمة
وتدي للعطشان جغيمة
والمخلي الحال مصنقر ..
في تقاة الليل تندقر .. تدي لي باكر بسيمة
تكسي للماشين عرايا وفوقا إتقطع هديما
ما عرفتن نورة إنتن .. قولن إنتن شن عرفتن
نورة بت الواطة أخيتي .. نورة اخت كل الغلابة
نورة حاحاية الشقاوة .. نورة هداية الضهابة
الاراضي الياما أدت .. نورة بقت من ترابا
وماشي في الأعماق سحابا
مشتهنها .. والله جابا
للجنوب طبلاً يهدهد .. لي مشاعر ناس تعابة
وللشمال طنبور يسكت .. دمعة الميتين كآبة
ما عرفتن نورة إنتن .. قولن إنتن شن عرفتن
نورة عايز تقرأ قالت
فوقا حيطة الدنيا مالت
ختت الكراس وشالت
منجلاً صالت به جالت
لامن إنجرحت به شالت
للتراب فوق إيدا كالت
ومرة يوم في الدونكا لدغت
جاء الفقير بالليل حواها
ويوم ملاها الهم قطايع .. جاء البصير بالنار كواها
ونورة ما قدرت تمانع .. تقنع الناس المعاها
ومرة شافت في رؤاها طيرة تاكل في جناها
حيطة تنمغى وتفلع .. في قفا الزول البناها
في جنينة سيدي سمعت .. تمرة تصقع للوراها
الأرض لابد ترجع للتعب فوقا ورعاها
شافت النيل موجو لاها
الخليقة بقت إلاها
الشمس طبقت ضحاها
نار عقاب إنساب مكسر .. فوق تكليات متاهة
وضو من الله .. رهاب مكتف في وتيد الليل معاها
بين حضر بلدا وخلاها
فسرت للناس رؤاها
وقالوا جنت ومو براها
ونورة زادت فوق شقاها
وصدت الأيام تخش
تبني لي عصفورة عش
في السواقي تشوف عزاها
لما شوقا يسوي .. وش
تسقي تزرع
تسعى تصنع
للنهار في الليل تخش
عرفت الشقا والشقاوة إلا ما عرفت تغش
شايلة طولة البال من الله .. ومن أراضينا الإثارة
وماشي تكدح طول نهارا
وترجى لما الليل يفلل .. تسرق ألمي عشان خدارا
عشان صغارا
ولما ترجع لي ديارا
تنزف أحلام الفقارى
من عويناتا الحيارى
لي غبار الحال تقش
فوقو للآمال ترش
نورة تقعد صاحي تحلم .. بي بيوت بي نور ودش
وبالمحبة تشق دروبا .. ولي قلوب الكل تخش
نورة تحلم بي وجود
ما مشت بينو القيود
أفضل أفضل بي كتير .. بي وطن من غير حدود
نورة تحلم بي عوالم
زي رؤى الأطفال حوالم
لا درادر .. لا عساكر .. لا مظاليم لا مظالم
نورة تحلم .. ولما تحلم نورة ترجف
ولما ترجف نورة تحلم ..
ولما ريح الواقع المر .. لي عشيش أحلاما ينسف
نورة تنزف
ولما تنزف بالا يهتف .. يوم حا تنصف يوم حاتنصف
وتبدأ تحلم .. ولما تحلم نورة ترجف
ولما ترجف نورة تحلم
صاحي تحلم.. وصاح بتحلم
صاح بتحلم

[أبو وائل]

محمد الحسن سالم ( حميد )


غربة


وريني شن طعم الدروس
ما دام بكانا مشي قطر
وكيف ذاتا ترتاح النفوس
تقبل قرايةً في سفر
زينوبة كر من حالى كر
قاعد لى فوق كيمان جمر
غربة وكمان حالاً فقر
عذبني قبل اصل القبر
زينوبة كل ما افتح كتاب
القاك في اول سطر
القى الجداول والصحاب
القى الجناين والتمر
زينوبة دنيا الاغتراب
خلتني زي ورق الشدر
انحت من عدم الشراب
عم الاراضى وانتشر
كيف زاتو يا نبع الحنان
انجح من الام السهر
يا يمة حان الامتحان
من وقتو بس فاضل شهر
ما اظنِي من جور الزمان
انجح واجيب ليكم نمر


عمرك سمعتيلك جبان
خاض المعارك وانتصر
في الحصة عقلى انا قام سدر
يمه المدرس لو فكر
كان يلقى قاعد فوق ككر
في الدونكا(المطبخ) لسع ما فطر
يسمع كليمة يا عشاى
واغلى الحكم عند الضجر
وانا قلبي كلو على جناي
وقلب جنايا على حجر
والله مش لو كان نهر (يعنى المدرس)
لو كالني بسيطان بقر
ما دام عقيل الجن سدر
ما اظنو من عندك حضر
بذاتو ابوى تلقاهو قام
فاتح كتابو مع الفجر
يقرأ ويرتل في كلام
ما بفهمو الناس الكفر
الشوق متل شوك الكتر
طعن الجسم لمن خدر
والله لو ما منجبر
ما كت بفارقك بي شبر
الغربة اصلوا طعيمة مر
لكني بعقد بالجبر
لمن سنين الهم تمر
يا ربي الهمني الصبر

[أبو وائل]

محمد الحسن سالم (حميد )


عيوشة

منبوشة .. منبوشة
نبشوها قبالك .. بت حالا زي حالك
عودها إنبعج حرقان .. زي شتلة معطوشة
عينيها رماشة .. أم لمبة فتاشة
من طاقة جاتا الريح
كتر البكا .. التجريح
خلاها دعموشة
تلوشة .. واللا ضفاف
خيم عليها جفاف
زي صرخة الغرقان فوق موجة بين فيضان
شعراتا منفوشة
وشفع مبارياها .. عيوشة .. عيوشة
الليل هديماتا .. وشمش الله برطوشة
تشرب من الشارع .. تاكل من الكوشة
عيوشة .. عيوشة
وترقص لهن رقبة ، صقرية ، جابودي ، السامبا .. كاروشة
عيوشة .. جامايكا .. الهورس عيوشة .. اسلولي عيوشة
وعيوشة ما بترقص .. لكنها الدوشة
وتفلت من الشفع
في الفلتة تترتع ..
تدخل على بيتاً .. ستاتو منمدِّي .. ناساً بعرفوها
لكن بعافوها
دايرين غسيل عدي .. شاكرين يا دقلوشة
ويدوها عيشايي بي دمعة مرشوشة
وتنملك الشارع .. خطواتا مربوشة
السوق مع الأطفال .. عيوشة .. عيوشة
الليل هديماتا .. وشمش الله برطوشة
تشرب من الشارع .. وتاكل من الكوشة
عيوشة .. عيوشة
على قدر ما كاست .. عينيها ما لاقت غير مطبقة وبصلة
المطبقة انهردت .. والبصلة مقروشة
ما قلنا مغشوشة
غشوها قبالك .. ديشك يا عيوشة
يا الحاضر الغايب .. في الدنيا ما جايب خبر المدينة الكان
على رغم ما فيها من فاقة من حرمان
مرات اياديها تعطف على الإنسان
بي فكة في قروشا
بي كلمةً طيبة .. بي فضلة في مطعم او برتكانايتاً ضرباني في كوشة
والليلة بانت زي .. بيتاً في آخر الحي .. ناساتو منبوشة
يا جرحنا الحايم .. طول النهار هايم
يلبد إذا ما شاف صحبانو مكشوشة
يضحك إذا الكومر .. قبل على كوبر
واللا المديرية .. ينمطق الفرحة .. بس فرحة مغشوشة
إن تنجا من كشة .. دردير وتلتيلة ..
كيف تنجا من جوعة .. من بردها وليلا
عزت برنداتا واوكارها مطروشة
بيت الله قافلنو
مستشفى غافرنو .. ساحاتو مرشوشة
كم يوم يعز النوم
رغماً عن المشموم .. والدوخة والدوشة
دي مدينة ما هيلك
مافي البيشبهلك .. ما في البناديلك
لافي البخاويلك
غير ناس أحاويلن قطعن أحاويلك
أصحابك الساعتك لا بد يعاينولك ..
صمتاً يجيبولك
باكر تلاقيهن .. في وجبة فوق كوشة
جنب مجرى يحكولك
ودونا لي ضابط .. كالعادة وانكفرن قال وين أوديهن
والعندي ما قادر بالموية أكفيهن
والعسكر أدونا
سوطين وفكونا
كالعادة يا اخونا .. حيكومة مربوشة
دايرين شغل .. مافيش
غير نغسل العربات غير نضرب الاورنيش
حمالة .. جرسونات .. شغلاً ما يوكل عيش
وبالحالة دي الكشة
بلدية والبوليس ... مرات يجيك الديش
ما يقبضوا الباعوض .. ما يقبضوا الضبان .. الما بدور فتيش
الارزقي السمسار .. إشمعنى نحنا وليش
إحنا الحرامية واللا البدسو العيش
الزول يخاف يكفر .. يرجع يقول معليش
شقيش تقع شقيش .. حتى السجن مافيش
مافيش يا عيوشة
من تكبر آهة وآه
وآدم بدور حواه
الطيرة بي عشوشة
الفارة بي جحارة .. الكل بي مأواه
وهنا في إبن آدم تاه
ملجاه أرض الله
لا أوضة لا حوشة

[dahnoon]

لاشوفتا تبل الشوق ولا ردا يطمن
اريتك تبقي طيب انت انا البي كلو هين

الغالى ابو وائل
مشكور على هذا الابداع

[أبو وائل]

لاشوفتا تبل الشوق ولا ردا يطمن
اريتك تبقي طيب انت انا البي كلو هين

الغالى ابو وائل
مشكور على هذا الابداع


الغالي دهنون
لك التحية
و أنت تعطر بمرورك هذا البوست
أشعار الطنبور سيل متواصل من الإبداع
جيل وراء جيل و الكلمة الرقيقة
و المشاعر الجياشة هي ديدن شعراء الشمال
نتمنى أن نعكس هذه الروائع عبر هذه الصفحات
لك كل مودتي

[أبو وائل]

محمد الحسن سالم ( حميد )

قصيدة نوري

إلاَّ نوري الفيها أكتر
محمد الحسن سالم حميد
من زمان قالوها
صدِّق
إيد فرد واحدي
آب تصفِّق
إيدي في إيدك يدفّق
خيرنا للأحلام نحقق
… … …
لي جرح نورا النمرتِق
العوازل دايرا يفتِق
جات تضيِّيق ليها مشِّق
حلُّو خلَّ أرقوقا ينتق
يروي شتلاتنا وتعمشِق
لا تقوم واطاتنا تشِّق
… … …
البحر لا قدر الله
كان كسر ياهو المغرِّق
لاب يحابي مراكبي ولاَّ
بين بيوت الطين يفرِّق
للخزاز نومو ومجرّح
في الرقاد ماب يكفي فد شِق
لاب يطير الطير مجنّح
والمكتّف كيف يفشِّق
… … …
نوري يا باجور يدقدق
وإيد من أية حوض تورِّق
يا متر كلما نمتِّق
تاني حالاً زين يبتِّق
ناسه شِدّة مو التشوِّق
ما ها بالساهل تشرِّق
زول يكوس في زول يرفِّق
ما التراب كير عِقو ينتِق
في ضليل منقايي ، مشرِق
من عمرنا عياني نسرق
نحكي عن حالنا ونقرِّق
نقطع القافات نفرِّق
…. …. ….
الشمش لابد تحرِّق
لي جلودنا عشان تطرِّق
عز جدودنا تخلِّي يبرِق
ما ها من ترهاقا تشرِق
… … …
في ترح في خير تدفِّق
أمَّة .. لُمَّا عليها تشفِق
المعاوين حد ما تشرِق
لو مو نوري عليها تفرِق
يا جرف كلما نمتِّق
تاني حالاً يبتِّق
نفسي فوق قيفك محدِّق
في البحر والموج يصفِّق
نعشقه وبأسبابه نعشِق
عازة السودان
ونعشِق
عِزة الإنسان
ونعشق
والملآن شمتان يطرشِق ,, . ,,
**** **** ****
نوري ذِكْرِ
وطارة .. قبّة
نوري .. فِكرِ
ودارة .. ربَّة
أصلو لمّا رموها حبّة
وقامت اِنشرت محبّة
يا السواقيك
طِبق أناقيك
بي صلات أرحام وقربى
وين تروح الحِن يلاقيك
كيف يكون الحال في غربة
… … …
يابا يا الفكي شيخ
سلام
يا فقير فاقِشلُو قبّة
وطار يفتِّح في الغمام
والغمام بي خيرو صبَّا
عام ضرائح زوله نام
مطمئن بين أندى تربة
بختو ساب الجنِّي قام
يلقى فاكهتو ذاته وأبَّا
العمر عربون
ونوري
جنّة في حفض الله تربأ
… … …
الصغيرين يا تُمام
في عدل نسّامو هبَّ
من نخل ناساً تمام
لا عول لا فاطَّة شَربة
… … …
نوري أقول البدرِ تام
كم ليالي ألقاهو غبَّا
الشمش ..؟ .. بلقى الضلام
خبَّا بي نجماتو طبَّا
ال أقول نوري الغرام
وفي الغرام البيني شبَّا
المربِّى مع الكلام
في الدموع والدم مخبَّا
يا بيوت الطين سلام
شوقو بالتحنان معبَّا
زي مريكب مُوني عام
والصلاح في طِيابو هبَّا
… … …
يا .. ألِف .. با
حوض مباديك ..
مو كشينبة
أَوّّّ .. بحر ..
حين دارت أُمبَا
شَوّّّ .. مطر
عِن طارت أبَّا
التدورو تقول مربَّا
والبتأبى نفسنا تأبى
… …
نوري يا أم ترهاقا
يا أمِّي
يا العليك ما انتاقا
هَمِّي
بي خيول فشّاقا
هِمِّي
لمِّي شوقي الطاقة
ضمِّي
ماب أجُر من فاقة
نمِّي
عشقِ حُر قد لاقى
دمِّي
ماب ألِف الطاقة
عِمِّي
لا أم ألف محّاقة
صمِّي
وفي شمش حرّاقة
حُمِّي
وقاطع الفرطاقة
عَمِّي
من صباح إشراقة
نجمي
ومن سماح أخلاقه
نضمي
الحنان جِنِّك تردمي
الجنان جَنَّك تقسمي
يا أم عِرِق لأعراقه
إِمِّي
لا مرض لا فاقة
وأُمِّي
بين قلوب أفراقة
أرمي
ريدتك الأشواقه
ألمِي
الأناقي الساقه
حلمي
من خداره أوراقه
ضلمي
ما طريتك ..
وإنتي إسمي
لا نسيتك
وإنتي رسمي
نوري يا بغر الحواري
من بساتينا أم قماري
موية ليل ونهاره جاري
توَّرت نفس الطواري
عبَّت العطرون لواري
من خدارك ويا خداري
البلل لليلي طاري
حس حسونة الديمة ساري
مرقة الناس العصاري
والبراسيم التراري
ما أروع الليل
حين تساري
لا دواري ولا سواري
لا تِوقِّف في كباري
الحبيِّب دارو داري
في عيونو لقا ووداري
تاري يا نفضة غباري
من رحيلي وهم سفار
نوري رزقاً جاني جاري
ولاني حاري
ولاني داري ؟؟!
… … …
يا خشم باب لاب أدقُّو
ولاب أصفِّق بي إيديَّا
وفي المراح الدايرو أطلقو
أقضي للغرض العليَّا
يا الحسين رسَّل لأخيو
قالُّو طلقنا الرضية
يا الحسن مرتك مهارجي
أمِّي شان هرت البنية
الحسن ردّالو هاشِّي
والمشاعر هيَّ هيَّ
يا الحسين الطلقة ماشي
إلاّ رجعه في العشية
من ضرب للشافعي خازي
باقي حذَّرت الولية
إنت ما شفت الحرازي
حين تقع خرُّومة نية
وكيف حناناً في الجدادي
حين تحولق فوق حديَّة
شِد ضراع مِد الأيادي
فوق مواريثنا النديَّة
الكبار من كلمة طيبة
يرضو أبّان الرضية
والصغار بس كيف هي تربا
باشري بالخير دي القضية
ويا الحسين تمشي الرجيلى
وتقري خيلاني التحيَّة
قول لهم دوعلو العجيلي
حُمد أُحمد ناوي جيَّة
في الدويم ود حاج تزورو
وخت زيارتك حسن نيّة
وطاسي طاستين لي طيورو
وشيلا ندهاتاً قوِيِّة
قلبي منطبقات نذورو
والنذر دين مو شوية
… … …
في الطريق أغشاها أخيتك
وورَّها الحاصل عليَّا
كاتبي قالت وينا جيتك ؟!
ناسي ظرفاً مُو باِيديَّا
لو لا أكون كتَّر عليكا
عندي ليك كمِّين وصيّة
من وراء نار كوري توقد
ولي جبل كولقيلي حيَّة
يا الحسين نتلاقى طيِّب
وإنتو طيبين وأمِّي حيِّة
جنبي واحد من قوشابي
قالَّك أغريها التحيِّة
باقي في الغربة العصيِّة
العلائق قاعدي تكبر
والمسافات القصيِّة
بين جنات الجيهي تقصر
تلقى واحد من قرورة
وفي الجنينة مرقلُو كمْتَر
لاها صِرمة ولا الضرورة
فينا شيتاً مُو مأتَّر
يا هو زولاً في الكركي
من بعيد بي إيدو أشَّر
هوي سلام كورك كُرُكِّي
طار وكرودينا قرقر!!
ياهو دا السودان
يا أخيي
إلاَّ نوري الفيها أكتر
أيِّ زول بالله حيِّي
قول لُو صابرينبك تصبَّر
قولُّو خوجل كبرياءً
عزّة بي نوراك تنبَّر
إنت يا البتموت حياءً
وروحك الفوّاحة عنبر
صندلاً معلوم فؤادك
كلما حرقوهو عطَّر
ياتو ريح تسبق جوادك
وأيِّ غيم من لاكَ أمطر ؟
… … …
كلما نقرش مغنِّي
وبالمحبّة الخالدة طمْبر
وإن عَجَب !!؟
يبقالي عنِّي
ما قدِر بالضبطِ عبَّر
…. …. ….
أتبنك مورودة منِّي
صفحتك تملاله دفتر
يا وتر غلبك تغنِّي
صح عيونا الفيها أكتر
.؟؟؟.. …؟؟؟
جِبتَ ما خلِّيت لي جِنِّي
فيُّو خير ..
من وادي عبقر
كان فزع ..
جدع ..
إلا فنِّي
يي الحسالو
خيالو قصَّر
يا طرابيل عرِّفَني
نوري
أَم تاريخا أنضر
واللا زول
تحتك تدفني
تلقِي غطَّى ا***** أخضر
…. …. ….
ليْ بلد
رابَّة وتغنّـِي
قط .. قطَع
غنّايا دنقر
وصنَّا صيد الدارة
صَنِّـي ؟؟..؟؟
الأذان ..
الله اكبر.........

[أبو وائل]

الاستاذ محمد الحسن سالم ( حميد )
يا متخبية
خلف وضوحك
أمرقي داخُل ..
تلقي الغيم الطاش
إتلقط
لمّه وربَّط ..
ربَّط ونقّط
نقّط ورشّى
الغبن إتفشّى
القابض طينك
وطاب في دوحك
... ... ...
يصحى الشجر اليابس
أخضر
يضحى الأخضر
زائد وأنضر
يرجع طيراً
غِصب إتهجر
وشوش ..
عشعش ..
وعمَّر روحك .
... ... ...
يترى الحلم
الفينا إتحجّر
وندرأ نزوحك
تالا المدن ..
المصّت دمِّك
ودسَّت فوحك
قسّت همِّك
وقصَّت موحك ..
... ... ...
يا متخبية ...
وأنا مفضوحك
رنّة فرحك ..
صنّة ترحك ..
وين ما أقبِّل
ياني بروحك
أي مرتكب الصاح
ونصوحك ..
... ... ...
كَجَر الصمتِ
وكت داهمني
كنت متلبِّس ...
بي غنواتاً ليك
إتكرمن
من سر بوحك
للأطفال
بالزمن الجايي
الزمن الطيِّب
زمن الخير
الجالبة فتوحك
يقفل حرباً ..
باحتة جروحك
وطوفان جدباً
محّن نوحك ..
... ... ...
كبّر طفلك
ونشّن حجرو
قام الصمتِ وكجرو ..
إنكجروا ..؟
إنعدِّيتي ..
وشبّت أزمة
... ...
بين فرقات
الضو والعتمة
شقَّ نسيم
لي عِرْق الكتمة
خالَ النخل
العاول طوّل
قال وإستشهد
بي عمَنَوَّل :-
"المنحوس ..
هجّر تربالك
والمجروس ...
يا الردم الجدول
ودكَّ أطفالك
تحت الردمة
... ... ...
وقامت طلقة ..
تجاه النسمة ..
الساكنة النخل
العالي الأسمى ..
حاض الطير الحامل ..
هجمة
طرح الغيم الشايل ..
صدمة
داخ النحل العامل ..
صُرمة
... ... ...
رجمة ورجمة
في حلقَ الليل
إنشرقت نجمة
رقد النيل هبّود
بالوجمة
نفدت شيمة
بقدرة قادر
طارت غيمة
وصارت باكر
باكر رحمة
مدّت
وندّت
وشدّت
خيل الحيل
بالبسمة
نخل الغبش
الدغش إتلمَّا
الأبنوس الجاسر
يمّة ....؟
هبَّ تبلدي
تحدي وهمّة
وبحر المالح
كبّر وسمَّا
"الأديان
في القلب
يا أمّة
والإنسان
في الدربِ
أهمَّ"
... ... ... ...
البلد إتحول
بي مسموحك
ناس بتكاتل
لأجل سفوحك
ما يسقيهن
غير فد جدول
جدول
خيرو الخاوي
نضوحك
لا أشواك
تحميك تتجوّل
لا أسلاك
تنصلبط سوحك
... ... ... ... ...
يا ممتلية
كجوفي فجيعة
وآخرك أوّل
أو معتلية
كطمي الشوق
القلب الماحل
راحل طوّل
زي دعوات
الناس الظُلَّم
لمّا عليها الغول
إنغوّل
... ... ...
حلمي مدردح
دخري فقارى
إرثو ...
ضكارة
جسارة
بصارة
بإيد كرّاسو
وبي إيد فأسو
لو لا إحساسو
بعزّة ناسو
كان تكَى راسو
زمان وإتسوّل
زولاً طبعو
يفجِّر نبعو
بدّع زرعو
وماسك الأول
... ... ...
سوَّى حضارة
وشرَّف لوحك
شرحو ..
شروحك
مسحو ..
مسوحك
يفقد عطفك
ويأبى ينوحك
غامل يوم
راح ترجعي فيهو
ومجد بنيهو يلاقي
صروحك
... ... ...
جهراً ترجعي
ياوضّاحة
يا مرفوع للقوّة
صمودك
صبر الناس
اليوت كدّاحة
لنضرة عودك
... ... ...
المارقين
الذمّة هجائر
الساكتين
فوق رأي
وبصائر
مطر الحق
بالحيل سحّاحة
ناراً بق
لليل صحّاحة
شالت وجع الحال
في أصفاحه
وتنزف شان
ما تبرى جروحك
وتعبك راحة
... ... ...
شدِّي النيل الأبيض
فرسك
وفيض الأزرق
فينا جموحك
مقداف فألك
ومرسى طموحك
الإنسان اليسمع
بالك
يعرف مالك
يفتح خِزَنو
و يستر حالك
يلفح إجنو
ويقلع نالك
يكتل حزنو
ويروي قموحك
رافع رسنو
وراتعة أمبوحك
... ... ...
تنمسيبو
هديراً طيِّب
وتصحي
خرير الفجر
صبوحك
... ... ...
عشتي آواضحة
وراء مخباكي
ويا متخبية
خلف وضوحك
عشتي أصيلة
كأرضك ونيله
ومرتع واحد
لألفِ قبيلة
... ... ...
يا ال لبنايتِك ..
من غنمايتِك
يوم ما إنطفت النار
في لدايتِك
غيَّر زيرك
ولاّ ملوحك
... ... ...
قدمك قاشر
قطع الفاشر
سمسم باكر
باهي مسوحك
... ... ...
سترة بدنك
قطنة وطنك
طينك سكنك
نبضك مكنك
عرفك فطَنك
تبري جروحك
يا الطوفانك
صدراً ماهل
وشرف العزّة
الأحمر
نوحك
من دعتاية الزمن
الكافر
ينصر دينك
وتسلم روحك
... ... ...
تسلمي واضحة
وراء مخباكي
أو متخبية
خلفِ وضوحك ؟

[أبو وائل]

محمد الحسن سالم ( حميد )
الله يرضاكَ ويرضيك ,,,,, يا يوسف أخوي


أطلع .. نطلع
يا يوسف هوي ,,,,,, ما عاد يسمع
أنا حافي وساحت كرعيّا
فوق زفتِ الأرض العربية
عسمت كلماتي مع الرقبة
وداخت يا ساكت عينيّا
شاخت أيامي الشمسية
وباخت أحلامي القمرية
أطلع .. ياخي أطلع ..ياخي أطلع
لا إنعلق يوسف في حبلي
لا إنفكَّ الصبرِ من إيديّا
يايوسف ...... يوسف....... يايوسف
يؤسفني ما ردَّ عليّا .
.... ... ....
من نخلة على أختها متكيّة
أومت لي نسيمة العصرية
قيّلت إنصنّت وإنكربش
كدرومي الحالة بعينيّا
إنكرفس فيْ ضل النخلة
وإنكفت اللحظة المبكية
قمرية تراحم قمرية
وتحكيله بحرقة وراثية
قمرية من القمري الشاهِد
على خطو الميتة الدغرية
تحكيله وعينيها تناهد
عن كيف إنشرمت أغنيّة
وإنترمت أحرف من كلمة
إنسهكت روحه المقرية
حين سابه مغنّيها براها
في سفرة بعيدة وأبدية
كيف شمط الوتر الموّال
وإنفلت النم من صقريةوإنشابط في لمينة الآهة
بي غم الفجعة الكونية
المرِق السانِد والشال
طقطقبو الدمع الهطّال
إنشقق حائط كان ساتر
وإترقرق سقف الآمال
الكان بيبشِّر بالفال
والبسمة عيون الأطفال
الكان بيوزِّع في العتمة
للضو على كل الحلاّل
الكان بيفرِّق في الزحمة
عن كيف تتلمه العمّال

[أبو وائل]

محمد الحسن سالم (حمّيد)
الحسين
ــــــــــــــــــ
أنا ماشي راجع لي بيوت
تفتح لي أول ما أدق
من غير تقول الزول منو ؟
ولا حتى عل ..... الداعي خير ؟
لا ...... مالك ..... الجابك شنو ؟
***
أصلو العوج كانت فطين
ود خالا جاب لها توب زراق
وأنا قلت شين
توبك يذكر بالفراق
توبك دا حدت بو الرضية
على الحسين
**
(اصلو) الحسين من قلبو ما دار الحرب
لكن شغلة الديش كمان
جواك جنس حرة قلب
***
انو الرضية العد تعد
فوق اللدين غيبة الحسين
المن متين
وانذكرت أيام متين
الساقي هكعت _ يا الحسين
بنبونة وقعت _ يا الحسين
أمونة ولدت ـ يا الحسين
بونا امو حردت ؟ يا الحسين
تالا الشرق حدراتو وين
شافع غرق ـ مرقو الحسين
في صريف حرق ـ رش يالحسين
رفعة مرق ـ يرجو الكرين ؟!
مو برا الجدع ـ لكين متين ؟
قدح الفزع ـ خلا منو وين ؟
أول جراب فاقش ضمان ـ قطعو الحسين
آخر سراب راقش زمان ـ زرعو الحسين
داير لي جنزير ـ الحسين
داير دلو بير ـ الحسين
منشار فرش جير ـ الحسين
داير لي زول خير ـ الحسين
داير لبن طير ألقى وين ـ عند الحسين
هفالو مشوار للضعين
ما كان في بالو ـ لو مستعد
الناس قبلنا لقوا الخبر
زي المطر من دون وعد
من وين ووين
وينو الحسين؟
مصروف فرد ـ جواب طرد
يبرا الوصايا مع البرد
يحفض حفض
لا عد يسجل لا يعد
لا حول من سفر الحسين
العاقبو ما في تقول سفر
في التالتي أول من يخش
وأخر المغادرين القطر
ما شفت زول في الدنيا
يفرح بالكلف فرح الحسين
المستبد بي طيبتو زي برق المطر
مع انو مو المهبوش رزين
من شب في خير ولا شر
طوالي في راس العوين
فسراعو ... حاضر ... أيوا ... زين
الناس يلوجو شمال يمين
أما الحسين دغريتو دين
من قمنا شفنا الشفنا
يوم ما شفنا واقف بين بين
**
الزول على قرش العباد ليش ما يهم
وليشاً على نتش البلاد ديشاً نهم
لو بالمتاجرة في الولاد
لو بالمكاجرة والعناد
اجلا البلاد ما تنحكم ؟
كانت دي كلمات الحسين
اتذكرت ذلك فطين
وإنو الرضية الفد سفر
رسمت لنا الخرطوم رسم
زي النعاين في فيلم
انو الرضية العد تعد
فوق اللدين غيبة الحسين
المن متين
وآب تتلخم
حاشاها تورط في حديث
حاشاها تغلط في اسم
بين الرضية وبين فطين
غير الأسية صلة رحم
وفي الحلة كمين من رضية
بلا الرضية الواحدة
عندها فد هدم
مارقابو ما قالت تخين
داخلابو ما نقت قدم
قادلابو قبلي ومغربة
ماكي اليفكرولك حريم
لاكي المفكري في الرجال
اللاخرين
هوي يالرضية بتتد(بت ود ) مرين
التوب رفيق توبين عقاب شيلة الحسين
الجابه بي عرق الجبين
اللا يزال قاضي الورود
والمرقة والقش والطحين
**
قالوا الحسين
قام الجنوب
دا اول سفر وآخر سفر
فيهو الحسين لا شال طرد
لا جاب جواب
فيهو الحسين وصى الرضية على العقاب
فيهو الحسين دس الخبر
وما قال مودني الجنوب
عارف وساويس البشر
خايف ملاوزة القلوب
خلق الله كلها عد تكش
ساعة يرد ذكر الجنوب
**
في ذمتك يا ارض الجنوب
فوق ارضك الطيبة ام هبوب
فوق طينك اب خيراً برق
أحسن يشط دم القلوب
ولا العرق !؟؟
ما شفتي يا عينة الجنوب
كيفن ضراع الزول سمح
كيفن ورا المحرات يسوق
فد ليل تلات مترات قمح
ما شفتي كيفن هي الرضية
المنهكة صبرت مسافة أمركة
وقدرت ورا التمرات تزح
تمشي الأصابع بين فرقة الشوك
عشان شخلوب تقاسي ورا وتوح
شخلوب على شخلوب
عرس .. نقارة
والدارات تنح
ذات الأصابع طنبرت
ذات الأصابع بشرت
يا ختت الحني وتبلل
يا السمح
يا الفنجري
القدامي
يا المامون على بنوت فريقو
بهار ملاحن والملح
ما انذكرن لو شلوخو كم
ويوماتي بينن منطرح
الدغري يا دخري الطيابة
الما شرب لا فك ريقو من الغلابة
وكلو صح
الصفا دمك وكان سبب في ها الجرح
إن شاء الله لا مسى لا صبح
إن شاء الله يا بلدي المعمر بالعشم
من سف خيرنا
إن شاء الله لا فاق
لا نصح
بي الله ينكسر العوج
والصاح يصح

[أبو وائل]

محمد الحسن سالم (حميد )
ابابيل الصمد

ياابابيل الصمود
الحجر وعاد من جديد
ارمي يا امي الولود
ارمي لي اخر شهيد
الحجر في المرة دي اقوى
اقوى من عرق القصيد
وكلو من شريانا بروا
ويربى بي دمو الوريد
واحنا سميناهو يسوى
ويسوا بالحجر الوحيد
برضو سميناهو يسوا
طاقي لي بكرة ويزيد
وأصلو باكر ما بعيد
يا ابابيل الصمود
تكمل الطلقات ولكن
الحجر ما عندو سيد
تلقى في كل الاماكن
رامي شاشاي النشيد
والخرابات المساكن
ابطال الحديد (.. )
ما فتر من صبرو داكن
ذاهد النفس وزهيد
لا يكلف غير مواطن فوق ارادة ومدة ايد
من بعد في التربة ساكن تقدحو الغضبة ويقيد
الصهاينة او اليهود طالما اتحدو السلام
طالما اتعدوا الحدود بي ظلامية نظام
استساغ الاقصى هسة ونفسو في البيت الحرام
يا صلاح الدين في لسة عافيي منك لا يضام
أي فلسطين ما ها قصة ننسى عزها بالكلام
وان نسينا منو البينسى مهبط الرسل الكرام
ياحجر يادغري ياحجر يافقري سدًا
في وش الرمال (..)
ياجدع يا دغري مجدًا عالي فوق العالي عال
الورود في الفجر ندّن والعصافير كرنفال
بس ربيع الدنيا دندن لحنو من عصب الرجال
ياحجر ياوطني جدًا مابخونك لومحال
كان لي فيك من بدري مسكن ياتواريب الجبال
ياماكم دفيتلي مجدًا وحضرة الصيد الحلال
وهسي عائد كلي عودًا بيك حميدًا خب تعال
بيني والزيتونة وعدًا يشهد الله لا يزال
المراكب بدري عدّن يارياح الاحتلال
الصمود اداني جلدًا اعلى قدرة على النضال
ولي حجر دايمًا مدوزن بكرامن غضب الرجال
واصلو باكر ما بعيد طالما تحتي الحجارة
طالما في الجسم ايد طالما في الجوف جسارة
وبطن ما خلى من شهيد رابحة ما خسرت تجارة
حين بنوك الدم رصيد
تالت الحرمين يا اقصى رابعم ياحجر عنيد
يانروحي الجنة هسة يايجينا وطن جديد
باقصى من سرعة حجر (.. ) مدردح حر عنيد
ياحجر وحدّنا فرّق بين حناجرنا النشيد
كلما نحفر نغرّق لاتحت معناك يزيد
حجر الدغش
في ايد الغبش
ياحجر نجيض
ارميك في نهري
يقوم يفيض
ارميك في نار
النار حمت
لهبا العريض
(يبرق بريق)
نطّق لسانا وغمغمت
هل من بصيراتًا عمت
هل من تتار هل من مغول
مذ انظمة (روس) الاسى و(عِقل) العقول
هل من فِقِر نفض شرايين المطر قبل النزول
شرقت متَر حرقت حقول واول ظهر في الجو
حجر بت الرسول
انكممت كل الفصول باطفال معبية بالنشيد
وعلى الحجارة تيممت صلت شديد لوطن اكيد
من نوع جديد آن الافول حان الرحول
يا مترفين بان الوعيد فارت جهنم دمدمت
نارًا حمت هل من يهود تُرب السلام
هل من عرب تَرَب الكلام هل من مجيب
هتف المدى حتى المحيط عطف الصدى وكما نريد
وانا يارسول الله نشيط رُغم التعب
ودمي المراق ، نورك على ضهر البراق
(راجف شهيد )
غضبان غضب وفي الارض طفلة مدى الفراغ
تصرخ غراااااق يرجع صداها الباكي غاااااق
تزهج تعيد تمخر شديد في دجلة يلفحا للبعيد
تندهلو( ننشايل) قريب
ناس بيتنا عازمنك حليب
بي بسكويت يافا وخبيز امي اللذيذ
وانا يا عزيز مشوار بسيط
ونسة وحديث
فول بي تميس
اغشاك معاك جيب الكتاب
لاتقول نسيت وضروي كلم ناس ابوك ناس امك
انك راح تبيت
وبكرة الصباح برجع معاك نجي عن صلاة الجمعة
في فوج الحجيج .. يلا اتفقنا ؟
من المحيط والى الخليج ومن العراق حتى الفراغ
بينا اتفاق يا الدرة غاب يا درًا يغيب
والطفلة تغرق في المحيط ومن الخليج حتى الخليل
الطفلة تشرق بالنشيد
يالدرة عووووووووود
عود يا حبيب عود في الضجيج
واصوات رفاقتك زي طيور خطفا الصقور في ليل غريق
فصلك كئيب .. كل الفصول والريح بهيج
بالغم يهيج كرسيك على المافيش قعد داخ وارتعد
قال في نحيب يالدرة دااول يوم تغيب بسبب وجيه
قلدن دفاترك لي بعض
درًا نبيه وروح ما بتروج درة العجيب
في درجو مرهم وشاش جروح كان نيتو يتخرج طبيب
لكين عوارض الدنيا والقسمة النصيب
الخيبت كل الحظوظ الا الرصاصة ابت تخيب
يابوي تماسك لاتخاف الحين بجي الاسعاف وآطيب
لكنو آه لا البلد آهـ لا العرب لا المسلمين
لا بكرة لا الاسعاف قريب
يا الدرة والعالم غريب لا يشيل خبرنا ولا يجيب
قسمتنا نحنا ولاد عرب
حتى العرب قسمة ونصيب
يا درتي الغالية يالبيك فال ولدي
رفع الجباه عالية دلابا غيم جلّدي
روى مهجتي الخالية علّم ضلام خلَدي
لا ارض اعيش جالية او لايجة في بلدي
كفى يا غريب دا الدرة يرجع ذات وطن
زي درة لما يغيب بجيب
لا ينكسر طول الابد خاطر البلد لابد يطيب
بالحاجبو يحتجب الهلال وبالجنبو (..) الصليب
درة وبجي من يا لطيف بي امتك
حس البنيي كما انهتك سقف السما
وكتر رعود
يالدرة عوووووووووووووووووووود
هاك بسمتك فكيتا من فك الجنود
ساعة لقيتا ورا الهرب يالدرة زي كل اليهود
بالضبط زي بعض الجبب مشغولة بي عد النقود
وانا خاتيي حجرين زي نهود تهتز قندولين قصب طول بي كعب
عالي الكعب ( حرقت ) خطاي من غضب زي الطرب
هي والجنود غرقانة في الدم للركب
بالضبط زي بعض الجبب ظنتني بياعة هوى
فَتَحت خشوما كمن عوى فتحت خشوما كمن غوى
فوق كفة ايدك كم حجر فوقم هوى فكيتا منها فوووووووو
هوااااا ...... ياالبسمة عاين درتك
في دمي (....) سوا
وفوق حتتك غزيتو عود غزيتو بي دمعي اتروى
وفتح ورود قبل الربيع انا وانت راجينك نعود من جتتك
يالدرة عوود عدي الحدود مات من مطر مات من رعود
مات نسمة شن حرس الحدود بالله عوود
من بكرة م نماضي الجدود من حاضر الوطن الولود
بالله زي ماك ياكا عووددرة الودود
مليان حياة..... يادرة سمعنا النشيد
حفظني سورة الانبيا
كتبني في دفتر جديد
دفتر وهيط
الصفحة بارقي من الخليج
والغضبة باقة ورا المحيط
اعربني :
هل هذا الحجر سيدكُ انظمة الزجاج
أم انّ كل خروجنا بالارضِ قافلة احتجاج
يا درة علمني الدواس
انا قادرة .. ما يكفي الحماس
يادرة ما تنفي الطقوس
دا عدو وعبيط .. الحرب تحتاج الخيول
ايّ انهمي (هبط الهطيط ) اي افهمي (ر.. ) النحاس
القومتو من فجرك نشيط غضبًا منو البيوقفو
الشافو حارو يوصفّو قلنا السلام استقرفو
والكل كلامنا استنزفو لا عيد مبارك لا عفو
خليك كما الزيتونة حاد حولك لصوص البوص تلوص
لا تعود العين النعاس
سولك من الليمونة فاس لي راحة ايديك الغبش
حجر الدغش دانسب مقاس
مادام في ناس من دمنا
ويالدرة فو..دسو الرصاص يا الدرة فو
ود عمنا الواحد نفو والتاني ناس في الصحر فو
كايسلو تار من دار اخو طالب القصاص يا الدرة فو
يالدرة فو شان طلقة جلت مرفعين
بين السعن و ناشتلو راس صاد الطيوور اتسالخو
الكاس سخو والراس رخو
(والباقي ناس اتشالخو )
يا الدرة خو بالله علمني الدواس
يالله علمني الدواس
ياولا دا الزمن الحجر
راح والله مات ميت السقوط
يأجوج وماجوج القنوط
(الأمركة وزل (الشعور
يا الدرة يا حجر الحجر
اكرم من اي سلام سجر حربًا تخوض كل الخطوط
من بنكنوت لاحلام زلوط
مادام في ناس دسو الرصاص
يالادرة علمني الدواس
ابراني زي قلم الرصاص
مش (... ) دا وخلاص
خبربي هذا الانتكاس
الا الحجر دقر الكجر
أقصّر طريقة الى الخلاص
ياوعد صادق يا وعيد
يا امة نلدك من جديد
يا إما فوق دم النفاس
السبة والصرخات غضب حتى الخلاص
يا الدرة هبّ ..وانت التهبّ
إنك ذهب ..للنار لهبّ
كم جمروك من العرب
كم يضفروك على شهب
كم(تم ) من بنات المسلمين والشعب شعب من اللهب
اشحد هناامرض انا اشحت هنا امرض انا
اضرب ولا شغل الُبنا
على ارض في مستوطنة
اشحت هنا ، امرض انا
اضرب ولا شغل الُبنا على ارضي في مستوطنة
الله المدبر يا بلد والله الغني
وعالمبنا
وانا يا رسول نشيط رُغم التعب
يا كل خلاصة بت وهب يا من صبرت على اليهود
وما استحملوك بعض العرب
ياال ليك رب
خزلوك اسيادك (رباش
نصروك ضعاف كل العهود
وفي كل بلدة من البلود
في جنود أمية وابي لهب
يامستميت قابض على جمرك تقيد
حارس قضيتك يا جدع يا جنا على اعداك غتيت
شاهد)شارك على ضهرالنشيد
رادف وراك كمين شهيد والدم شطيط
نقّط نقيط بالله شدة مت سعيد زي التقول بخة مطر
لي عجوة من انجج سبيط شربا التراب ما من لقيط
سكرت (ولاد)بلاد الخير حلال والدنيا عيد
يالله ما احلى الوطن لامن يكون انساني
انساني زي صدر الرسول ماهل وهيط
والدرة يلمع من بعيد زي عقد في جيد بت يتيمة
على العرب والمسلمين على كل بال انسان امين
تقرا وتعيد صوتا البسيط المستشيط (فن ) وغضب
واشواط خليط ف فا فلسطين دا درر انسان بسيط
وا وطن ماهل وهيط حا حجر حتى المحيط
ارض تمرق من جديد جنة للاطفال وعيد
وهنا
يا رسول الله تقول
تقول سامعك تقول
وينك يا زول علّك شديد
حتى انت من طينك طريد
حتى انت بي دينك شريد
حتى انت عن وطنك بعيد
أي لا اله الا الالة الله وآه
إنسانك آهـ اطيانك آهـ
أديانك آهـ(...آهـ ) و
الاقصى آه صفا يا حجر وطن انتباه
تحت الحجر نبع المياه
كل ايد في ايد والقدس قدس الله وبس
في الارض ما في بلاهو سيد من بين
سماحتك يا الرسول ودم الشهيد والطفلة

[أبو وائل]

محمد الحسن سالم ( حميد )
النخــــــــــلة

النخلة في الليل المهول وحيدا في عز الرياح
فارس يدارق في الرماح الجاية من كل اتجاه
رغم الجراح .. شُح ألمي والزاد والسلاح
راكز يصول .. لا أنّ .. لا حنى للجباه
لا خان بصيرتو الإنتباه ..
وحتى قال ديل المغول .. ولا حتى آه
على عز قديم .. روح عجول
طوّل مداميك الصبر .. سدابا شرمات النباح
كلما نزف من جوفو دم .. كل ما عزف لحنو الصباح
نجم الميامين الحمش ينضارى شان تشرق شمش
تدي الحياة
الناس
الحقول
الدابة والطير والبمش
لكنو ما بخبر أفول
والأرض مخلاية التعب .. مصلاية العشق الصعب
ما بتستباح
زي نخلة في الليل المهول
كانت بتختبر الفصول
كانت بتمتحن الرياح
كلما تطول
والدنيا خوف .. عابر يشوف
عنف الرياح ، النخلة ، وللا النخلة في عنف الرياح
ليل مهول
طوالي راح يحلف يقول .. النخلة ما بترجى الصباح
والطيب الصابر سنين .. راجيها باكر حقو راح
لا فكّ دين .. لا سد جوف
رزقو المعلّق في السبيط .. مشهادو أصبح بين بين
لكن ضراعاً في البلد .. عارف عروق النخلة وين
خابر صمودا المن متين
ضامن ثبات ساقا الهطيط
سامع مناتقة الرياح .. ساكت صياح
النخلة ما بتقدر تخون الأرض .. مابتقدر تكون غير المراح
لي همبريب يغشى البيوت عند الصباح
نُص النهار .. عند المغيب
وشان تدِّي ضل والصيف غريب
تاخد الهجاير وبي ارتياح .. عز الرياح
النخلة تتجاسر تصون عش الطيور
اللينا تفرد للجناح
ترقص تميد والجو براح .. والساق هطيط
وفي الأرض ماشي عرق بعيد
ييبس جريد ينحت سبيط
والنخلة تشده بي الجريد .. النخلة تتعب في اللقيط
النخلة ياها النخلة لا بتعرف تخاف تقل المطر
كُتر الرياح .. لا فتوة الريح العبيط
طوالي في أجمل وشاح .. كل الرياح فوقا بتمر
ومن كل أصناف الرياح .. النخلة ما بتخبر خلاف
ريح اللقاح .. والهمبريب .. ريح الصلاح
ما ليها غير تطرح تمور .. تملا الشواويل والقفاف
ينتم زين ينحل دين
واقف على حد الكفاف
من ركّة الرزق المتاح .. رزقو المعلّق في السبيط
ينزل كما الطير الخفاف .. يقدل نشيط
مخضرة زي شتل الضفاف
كلما النشاف بدا في السبيط
والنخلة لو عنف الرياح .. الصّاقعة .. أهوال الفصول
آفة الذبول .. قِدرن على ساقا الهطيط
تقع وآبتموت .. روحا المدردحة ما بتفوت
جسدا المكفّن بي الكفاح
تلقاها خشّت في البيوت بي كل صراح
تقروقة .. سجاجة وطهوره .. طبق من العرجون
ضنيب هبابة .. قفة وكسكسية .. حبل متين
فتلوهو في ضل الدليب
نشلوبو من بير للشراب ..
نسجوبو بمبر وعنقريب
حبيل جريد .. يعرش سقف بيتاً جديد
أول دخِلْتو عريس سعيد .. مبسوط يقرقر بي انشراح
أو حتى واقوداً تقيدو السمحة في نار بي ارتياح
لي يوم عزيز .. يطلع خبيز .. دكّاي صُفاح
يطلع ملاح برّوبو ناساتاً ضيوف
أو زول وراه شغل العيد جابرا الظروف
يطلع قهيوتو وشاي صباح
آخر المطاف ...
والموت بيشرق نسمة في كف الصباح
والموت بيسرق بسمة من توب الزفاف
النخلة ترباية العباد .. بي جلالا تتحول رماد
ورمادا يتحول سماد .. وسمادا يدخل كم بلاد
وديانا تخضر والبطاح
شوف كيف كفاح النخلة يوت لا حيلة بتحدى الرياح
تصبر على مُر الحياة وتتمطّق الموت بي جلد
من بعد ما مَلَت البلد .. شتلات معمرة بالألوف
شايل مخلّف بي ارتياح .. طول المصير
النخلة حوةَ الصحراء .. أو جدي الجروف
تلقاها مرتاحة الضمير .. يكفيها دا ويكفيها صاح
بجراحا رجّتنا الصباح .. يا القلتو ما بترجى الصباح
النخلة تحت الواطة سر والنخلة فوق نخلة نصاح
والأرض أعمق ما تكون والجو براح
يكفيها دا صاح .. عز المطر .. عز الجفاف
ما استسلمت لي ريح غريب
ولكنها كل الرياح فوقا بتمر ..
من كل أصناف الرياح
النخلة ما بتخبر خلاف .. ريح اللقاح والهمبريب ..
ريح الصلاح
ومعوض الليل بي الصباح ..
يا معود النار اللهيب .. روّض نخلنا على الرياح
وفي لجة البحر الضريب
أدِّي الرواويس الصلاح ..
***

[أبو وائل]

محمد الحسن حسن سالم (حميد)

مساورة

يا جمة حشا المغبون .. في الزمن الهلاك منجا
تكون حانت مواعيدك .. يكون وقت المطر قد جا
شرق ضو البلد عيدك .. وطابت نسمتو العرجا
نكون يا طيبة تمينا .. وبدينا ولفنا .. غنينا الغنا الراجا
وبدت كاس المودة تلف .. عشق من حلفا لي راجا
ألف في ألف .. حبابك ألف .. إيه يا عنزنا القرجا
يا لـبّانة في الزمن المراحو نشف ..
يا جـبّانة للخوانة .. للعوج البدور ويلف
دميرتنا البتروي جرف
ضفيرتنا وعرش بيتنا .. تميراتنا اللي كانو وقف
أصابعين الرجال رصاص .. صمغ راس البنية سقف
أصابعين الرجال رصاص .. عضم ضهر القضية سقف
تكون دارة الزمن عمرت ..
نكون لمينا في الفاتو
وتكون فاقت ملامحنا وتضاريسنا القبيل غمرت
دغش ساقت بوابيرنا وندت شتلات بعد ضمرت
ضراعيك يا الولد كبرت .. مراعيك يا البلد كترت
خدار .. خدرت
غزار .. غزرت
نضاراً زين
برغم الصيف وصناتو ..
وسموم البين وأناتو
عصافير الجلد قدرت تباصر غيمة منتحرة
تضاير نسمة مندحرة
تضاير الغابة والصحرا
من الغمة وضلاماً شين ..
ومنك يا دقين ننفك .. تكون فكت عقدة الدين ..
عقب سيرة البلد سارت على الدرب العديل والزين
بعد ها الحال بلا مرسال .. يجو العمال .. يجوز الزراع .. يجو الكداح
يجو الناس البخبرو شليل .. وشقيش راح
وقمريتين جناحن دلّ فوق الصاح
من الغفلة وعساكر الليل .. ولي الدنيا الجديدة جناح
صباح نندلّ شدة حيل ... بلدنا وما بنقيف بين بين
فيا خيالة عدو الخيل .. ولي الطيبة البتملى العين
مدى ونياه .. في حز القلب غنوة وآه
حنان بلدو .. وحنين منفاه
يا بت العز .. يا ست الجاه
يا هسع دية .. يا بكرانا .. يا ماضينا .. يا بعدين
نكون كنا .. وبقينا متين
وكيف تكدح مواعيدك مواعيدنا ونساورك وين

[أبو وائل]

محمد الحسن سالم ( حميد )


بحبك بحر


بَحبِّك بَحَرْ
مَعاي
وْ غِشيتِكْ أسلِّم عَليكْ
أتكِّل قُصَادِكْ
هُموم الحَرَازْ
أطمِّنْ طيوف الخريف الوشيِك
أبشِّر دواخْلِك بوعَدْ الرَزازْ
مودِّر مَلامحِكْ
غبِيتِكْ
لِقيتِكْ
بتلفُظْ شوارعِكْ بيوتِكْ
تصادر خُطاي َ وتْكَاجِر مَشيِكْ
تَغَالِطْ حَواسِكْ مَلامحِكْ
وتْحَرد عيونِكْ مقَاطع وَشِيكْ
!سَألتِكْ: خَبَارِكْ
مَسُوكَرْ لسانك
! وصَمْتِك يشفِّقْ
خَبَارِكْ! بِتَغْرُب شُموسِكْ
زمانَ الشَموس البِتَشرِقْ
تضيع الملاحه التَّعطِّن وجيهِكْ
ومِّنك تَدَفِّق
!خبارك غريبة
أَقلِّب دواخِلكْ
أكوس الحبيه اللى عنِّك بِتفْرِق
بتَفْرِق حبيبتى البِتَلْبس فصول الخُصوبه
بِتضْحَكْ أغاني
وتْدفِّق عُذوبه
وْبِتَنْزِل
مَطَرْ
عِشِقْتِكْ لأنِّك حبيبتى
وْبحبِّك بَحرْ
(ياعبيديه)
عِشِقْتِكْ
لأنّك خواتم الحقيقه
وطريق الوصولْ
لأنّك بداية الْخليقه
واساس القبولْ
أَحيِّي الغيوم
البِتَفْطُم ذُبوِلكْ
تَرضعِّ سُهولِكْ ، مواسم الهُطولْ
واحيِّي المداين البِتَفْتَح حدودا
وتمنح عيونِكْ جَواز الدُخولْ
يزيد خيرِكْ
ولا طابت بَلاَكْ عِيشَه
مقسَّمة إنتِ فى غيرِكْ
مقسَّمة فيكِ ما فيشه
ومخيَِم ليلك العَسْعَسْ
لا بَرقَنْ بُروق صَحوِكْ
لا صُبْحِكْ رضِى اتْنفَّس
يَحنْدِك فى العَطش غيمِك
تمطِّري إنت فى الخاطر
وتُنْفِّضي من دواخلي العَسْ
بديتْ اِتسامى للآخِرْ
رميتْ توب البِيات الرَّثْ
قِوِيتْ إتْيَقَّنت روحي
وسقَطَ منىِّ الكلام الغَثْ
أنا الدّاخرِكْ بصيره وشوفْ
يا بُقْعَة ضو
فى عَتْمة قلبى المحفوفْ
ومُسْربَل بالشِتا واللْيل
والخوفْ
فارغه ومليان بِيكْ
وضيقَه عليكِ البِشره
أنا غيّبْتِكْ بينى وكُنْتِكْ
زمَّلتِك فى الخاطر بُشرى
مزَّقت ستار الجِلد الهَشْ
وطَلَعْتىِ مِنْ الجسد القشره
تازقتَ
لقيتِكْ فينى النَفْس الكامله
تِتْوقِّي اليابسه
والنهرِ فى إيدِكْ صَلصَال
يتسارق ضوِّك خافت
متهافِت نحوك أجري
مُهرول راكض
سابَقْت خُطايَ وْحَدَقْتِكْ
غيمه..وضُلْ ..وبُحيره..
ضارفْتِكْ بينى وضاريتِكْ
من الحزن القابض
نَفَسِي وروحي
واقِف عَارِض
ستَّفتَ عُيُونِك بالمطَرَه
وقَرّحتكْ ضد الزمن الراَكضْ
وحَدَقْتِك حبيبتى
البتَشْبه فُصول الخُصوبه
تَضَحْك أغاني وتدفّق عُذوبه.
وبتَنْزل مَطَر
عِشِقْتِك لأنك حبيبتى
وبحبِّكْ بَحَرْ.

[حسن الشايقى]

الحبيب أبو وائل 0
واصل التغريد وحواسنا جميعها ملك لابداعك 00
وأفرح الله قلبك و أنت تدخل الينا الفرح من أوسع الابواب 00

[Aamir]

الراقي أبو وائل ..

اتحفتنا بجمال الكلام وقطر الندى وعذب الجمل وبروعة شعراء بلادي الرائعون وكلك ذوق وكلك حنية .. هل من مزيد !!

[أبو وائل]

الحبيب أبو وائل 0
واصل التغريد وحواسنا جميعها ملك لابداعك 00
وأفرح الله قلبك و أنت تدخل الينا الفرح من أوسع الابواب 00



الحبيب أبو علي
لكصادق مودتي
وجود قامة شامخة على رأس هذا القسم
يفرض علينا أن ننبش كل الدفاتر باحثين
عن كل جميل و رائع يليق بهذا المقام
أعلنت لنا ضربة البداية و بإذن الله
يستمر المسير على الدرب

[أبو وائل]

الراقي أبو وائل ..




اتحفتنا بجمال الكلام وقطر الندى وعذب الجمل وبروعة شعراء بلادي الرائعون وكلك ذوق وكلك حنية .. هل من مزيد !!




أخي الغالي
فتشت عليك
لك عاطر التحايا
إختفيت عنا فترة و عدت إلينا
كعهدنا بك رائعاً .. مبدعاً
جميلاً كشعراء بلادي
معكم يتواصل المشوار
عبر الكلمات المنمقة
و العبارات العذبة الندية
أشكر حضورك
مع خالص مودتي

[أبو وائل]

محمد الحسن سالم ( حميد )

مناقيش العدالة

مني متعشم طلوعك ..
كلي مستنيك تعودي .. ويغسل الساحات رجوعك
في حشى أحراش الليالي منتظر بقة شموعك
تشتلي الضو في الضهابة .. ترخي للجايعين ضروعك
يرجع الطير المهاجر .. يملأ في الفجاج ربوعك
.......................
في كلام الناس بفتش .. بين عوينات المدارس
في صدى آذان المساجد .. ورنة أجراس الكنائس
في إندهاشات العذارى .. في إرتعاشات الموامس
في بحر فرحان يبشر .. موجو لي جية النوارس
الرواويس طمبروك .. وهز بيك في الدارة فارس
.........................
بين سكات القرية أفتش .. بين هضاريب المدائن
يا نسيماتاً تكربت .. شايلة أشواق الجنائن
لي جديول حلقو ناشف .. أو عَرَق تربال يكادن
في وشي الأفراح بفتش .. بين قفا اللحظات أعاين
بين سواقير الفقارى .. الجاية من تالا المدافن
مرة طال الليل عليّ .. ووصلت الآهات مداها
قلت لي النجمات مو جايي .. قالت الأيام تراها
يا ضيا القمرا القبالي .. شوكة الظلم الخيالي
عسمت فوقنا الليالي .. خبي في إسراعك تعالي
يا مناقش العدالة
بتنا فوق الصبر عالة
يا تعاويذنا وعزانا ..
خلي نور الفرحة يطفر من عوينات الحزانى
صخرة الأحزان تقيلة .. ونحنا ما بنملك سوانا
قولي هيلا هوب معانا .. من على الشارع نشيلا
سكة العمر الطويلة .. ترتى في الجايين ورانا
صرنا زي رحالة عنك .. فتش الكون تبني لبني
وراح سأل طيانة تبني .. وقالوا جاية
بالعوينات البقومن بدري شايلات القراية
في تلوت الليل تبوغ .. سارقة للدنيا السقاية
ولما تورد .. بنسلينا الجردقة .. القرض .. المحاية
جاية من ضهر المسافة .. البين بناء الطين والسرايا
طالما في الدنيا ناساً .. فاتو للجايين فداية
وناس على جلاتا تكتب بالثبات .. والنيل دواية
جاية .. جاية
دفة التاريخ في إيدا ..
دم عروق أماً بتنده راجية نص الليل وحيدا
بيتت في القلة مويتو .. وزادو في المعلاق عصيدة
جاها في جواب يسلم .. للبلد داني وبعيدا
يمة يا نفس الوصية .. الكل ما شرقت نعيدا
يانا يا شخب القضية .. الصافي في قدح القصيدة
مانا قنعانين تملي ..
من دواية الصبر نكتب فينا والإصرار يملي
تنعدم موية وضونا .. بيها نتيمم نصلي
الزمن ينقض وضونا .. تاني نتوضأ ونصلي
ونمشي فوق دربك نباصر ..
في الرمال والشوك نحاصر
بي شعاع بكرة المسافة .. سطوة الليل والعساكر
تنهزم ريح العوارض .. والمواريث التعوقك
ومن شقايا الحال تبقي .. وتقدح التاريخ بروقك
وكلما مرقت غبينة .. تمشي لي داخل عروقك

[أبو وائل]

محمد الحسن سالندم ( حميد )

كرويات الصبر البيضا

كرويات الصّبر البيضاء انهزمتْ

ووجمتْ

وخرّ جوادَك ... قبل يقرِّبْ

حمُيّات الغُلُب السّوداء

إنلمّتْ

وضمّتْ

وغَزَتْ أجسادَك .. وبتّ تهضْرِبْ



من هضريبك ومُر تعذيبك ..

بين النخلة ومجرى النسمة

انساقط طاير ...

فَتْفَتْ

حَتْحَتْ

ريشو قُصادَكْ ...

وكان ده حبيبك ... وقُمت تجقلِبْ

بين القيفة وباب النّهر ..

دبيب الرِّيح من دَبَش القهر ..

اتلوّى اتلبّدْ ولَدَغ الشّيمة

الشّيمة انكفتْ ..

البحر انخجّ ..

الزبد انعجّ ..

الطين انحتربْ ..

ومرقت عقربْ

ورفعت شارة ..

اندفعت فارة

تجاه المركبْ

ووقعت سارة على صنقور رواسي قريبك

وقام مِنْوهدِبْ

وكابسو الجندبْ ..

وكان دي امجادك

بين الميضنة والإرصاد

انجرحت غيمة ..

الغيمة الطيبة وحاملة حلالْ

من ألق البسمة الفي الأطفالْ

من عَرَقْ النسمة الفي العُمّالْ

والنّاس الفَالْ

انسرحت فيها شظايا آذان الوقت الواقع

بين تغريبك ... وسرقة زادكْ

مَدّتْ إيدك تالا القبلة ... رشاشها يصيبكْ ..

تسبي نديهتك ..

تفقد جيهتك

تنزف تنسف دانات دعة الهوس الديني

الطيني

الجيني

قوافل اورادكْ

تقضف ..

تركُض تالا جنازك ونعش أولادكْ

باري نحيبك ..

ترجف تتعب ..

تغضب تهتف ..

تلقى قُصادَك سدُّ مرابي

أرزقي ..

رباطة

وكور همباتة ..

لحى ونخاسة ..

وكل السّاسة الباعو نصيبك باستشهادكْ

عاد ان شاء الله تكون الجنة الماهلة ميعادكْ

إلا الحاصل ديل حُسّادكْ

بعضِ يقول الله لا عادكْ

وبعض إن لاقي طريقة يعيدك

تاني عشان الموت يصطادكْ

يا مجلوب في سوق الآخرة ..

ويا متمقلب تحت جهادكْ

خرّ جوادك ..

مات الطاير ..

لدغت شيمة

كرش الغيمة إنبعجت

دمّت ..

عينيك طمّت ..

وغمّ قليبك .. وكان دي بلادكْ

وين مستغرب .. ؟؟؟

تقدر تكسر حمرة عينك ..؟؟

تنكر سيفك ؟؟

تابى جفيرك .. ؟؟

دابك تقوى

يا بني آدم .. تفقد مرة .. مريرة ..

ضميرك تكسب ثروة ..

وتلقى العالم تحت سريرك

تشبع

تروى ..

وترضع ذاتك ..

من لذّاتك ..

وحلو الحلوى

من ما تبلع يوت تتبرع ..

وكلك نخوة ..

صدقة لعمرك .. وباقي حياتك ... ونصر الدعوة

حبّة جوامع ..

وقبة صوامع ..

وكوتة

وكوتة

تفوت الفوتة

بأسرع صهوة

عُمرة وحجة ... وتسأل ربّكْ

يقبل توبتك يغفر ذنبكْ

يمسح سفّكْ ..

خيرات شعبكْ ..

اصلها كانت عترة في دربكْ

لما تعبت ... وفاتك حزبكْ

لما ضهبت ...وخانك قلبكْ

كانت هفوة في لحظة سهوة

عن الإنسان والحال الأسوأ

ودابك فُقتَ ..

وجاتك صحوة

وجيتَ تكفّر ..

يا رب تغفر ..

اغفر ..

اغفر

عبدك خاسر شيء ما بيسوى

انت القادر ... إنت الأقوى

؟؟؟؟؟؟

يا البتخادع حتى الله .. !!!

وين الشُّهرة .. المال ... والجاه ؟؟؟؟

وين السّطوة ..؟؟

الجّشَع .. ؟؟

القسوة .. ؟؟؟

اركزْ ..

اركِزْ

لا تجيب رَخْوَة

يا مِتلبّك في الأدران ..

الحجر الأسود ما هو البروة

وما ها مكاوى الكعبة تجيها ..

حين ينكَرْفَسْ توب التّقوى

ومافي خُرَط لي الجنّة تودِّي ..

لا في خُطط ممهورة برشوة

والمشروع الديني الخالِصْ ...

ما محتاج لدراسة جدوى

يا من قال يارب من قلبو ..

رد الخالق دائماً أيوة

اركز ..

اركز ..

لا تجيب رخوة

اركض ..

اركض ..

تالا اشجار العملة

واقصِفْ ..

اقصِفْ من اوراقها ..

يمكن تستر عورة شينك ...

وما سواهو زمانك جملة

اركز ..

اقوى ..

ولِفْ بشكيرك فوق الرأس ... النشّف غيرك !!

لا تستهوى ..

قضّي منافعك وتم العُمرة

وفوّر موية زمزم قهوة

اركز .. اركز .. لا تجيب رخوة

ماك غلطان .. !!!

غلطان الشعب الجزّ جراد الغفلة كفاحو

الجنى أرباحو .. ضياع أرواحو

وجيد للحاصد ...

وبخت الحاصد

ماك غلطان !!!

غلطانين الشهداء الراحو ..

الواحد ..

واحد

ماك غلطان !!!!

غلطان الحزب الجمّ سلاحو وخيلو تناهد

ماك غلطان !!!!!

غلطان زمنكْ

واصلاً وطنكْ

ياها جراحو وعندك شاهدْ

رَفْضَك .. سَجَنَكْ ..

شان الكادح

والمتكادح

يلقى صراحو .... ويبرأ السّاعِدْ

تهتف لامن تقضف دم ..

وشارعك هازيء ..

يهز اصفاحو .. وبرضو تجاهدْ ؟؟؟

لامن صَقّرْ سن منقارك ....

لامن طايرك قصو جناحو ....

وخرّ يكابدْ

ما حَسّابَكْ ... إلا عذابكْ ..

وليلاً دائماً كارمه صباحو ..

ونجمك ساهدْ

لما بديت تفرز لي عيشتك ..

لاكو عويشتك ..

واجمعوا جملة بأنك تالفْ

وانو سقطت .. مع أنك واقفْ

فوق اسمنت وتحتك عملة

هم ساقطين في البرد الناشف ..

وجاهم زاحف قوز الرملة

الإملاق العيش الشاظف ..

وفي ظلمات الزمن العاصف ...

قاسي عبور اليم ... يا نملة !!



وهسه غلابا الدنيا الكنت بتتعب غنية عشان يرتاحو ..

المنك راحو ..

الكجنو حِنّك ... وعنك أشاحو

ضراعم غادي

عليك يتجارو .. بدون ما تنادي ..

وصاروا نفيرك وقت حصادك .. ورابى نصيبك

هرِّب ..

هرِّب ..

خير بلادك برة وسيبكْ

يا أوعية البلد القطّتْ ..

ما بيسقيك الدم الفاسدْ

ويا أودية الولد الشطّتْ ..

ما بيشفيك اليمّ الراكدْ

إلا الدم البدأ يلقّط ..

واحد ..

واحدْ

إلا اليم أب غيماً نقّط .. وجاييك قاصدْ

يا محبوبة في وضع خريف ..

شالع دجلو ..

وكضباً راعدْ

بيت راكوبة ..

وحوشو صريف ..

سَوّسْ مِرْقو ..

وسقفو يناهدْ

احسن تحت المطرة نقيف ..

بي كفيك ..

كفّي ..

والسّاعدْ

وراسنا ...

نضاري الطفل الواعدْ

لامن يبقى سمانا نضيف ..

من تخويف ..

تسويف ..

من زيف

ونلقى الوطن الحِنْ ..

مو الطاردْ

واللا الموت

الدغري

الواحدْ

</b></i>

[أبو وائل]

محمد الحسن سالم ( حميد )

من حقي أغني

من حقي أغني لشعبي .. ومن حق الشعب عليّ
لا بي إيدك تمنع قلبي .. ولا قلبي كما بايديا
علمني أغني .. الطين .. المخرطة .. والطورية
الناس الصابرة .. سنين بالحال .. الما دغرية
القابضة الجمرة في إيدا .. والجمرة تلهلب حية
لا قادرة الجمرة تقيدا .. لا قادرة تولع هيّ
يا قلبي بلاش نستعجل .. يا قلبي شوية شوية
علمني الشوق نترجل .. نستحمل وجع الجية
واصلين الما بتأجل .. اليوم الشمشو قوية
لا القش بيهاب المنجل .. لا الطب .. النار .. الكيه
يا صقر الآه يا ريح .. لا تنفض عش قمرية
من حقو يغني صريح .. ذرية ورا ذرية
من حقي أغني العالم .. إبداع وعلم حرية
إنساني شعوب تنسالم .. تنسالم بي حنية
على نخب الود نتنادم .. لا جنس ولا لونية
لا عرق لا آه نتقادم .. سكتنا بياض النية
مش كلنا جينا من آدم .. ومش آدم ابو البشرية
السجن إذاً يتهدم .. نبنيها قلاع ثورية
عقبال الخير يترادم .. والدنيا تمش دغرية
مد كفك يا بني آدم .. حرية سلام حرية

[أبو وائل]

محمد الحسن((حميد))
ياتو وطن
ياتو وطن في الكون الواسع
دون عينيك راح يبقي وطن
وياتو سكن في الدنيا الغنوة
دون عينيك راح يبقي سكن
ياتو شمس راح تشرق تطلع
لو عينيك بالدمعة بكن
وقام منديلك.....غازل خدك
غطي عيونك....غصبا عنك
هاج منديلك..اغمي عليهو..وقع من ايدك
ومن الدهشة الفيهو رطن
ياتو وطن؟؟
تعرفي ناس عنتر حبو؟
وليلي وقيس ضاقوها محن ؟
اصل القصة عيونك انتي
كانت نجمة تضوي سماهم
وكانت كل كلمات الالفة مسطرة فيها
كان عاشقين السما والنجمة
عبدو النجمة لانك انتي وانو السما في ذاتا ملابسك
كبرت بيهم احلام حبك
وقام رسموك في كل قصيدة
عيون بتحدد نوع القصة
وقصة تعبر عن تحديدك
كرسي وكنبة ورحلة طلبة
يزورو النيل والموية العزبة
يلاقو النيل كان دمعك انتي
واصل الرحلة..........
دهشة وخلعة يوم عينيك بالدمعة بكن
وقام منديلك.....غازل خدك
غطي عيونك.....غصبا عنك
هاج منديلك......اغمي عليهو
ومن الدهشة الفيهو رطن
قريش يوم عبدت الله حجار
كان فاقدين لي حنك وعطفك
عبدو اللات والعزة وغيرن
حج وطواف تقديس ووهن
انا سويتك نفس القصة
احلي يمين من احلي وثن
قلت اذوب في حبك راهب
واعبد الله الرسمك جوة
واقفل بعدك محراب حبك
واقعد جوة احبك واعبد..احبك واعبد..احبك واعبد..احبك واعبد..احبك واعبد..احبك واعبد..احبك واعبد..
وارسم دنيا تكون ترنيمك
واصنع دنيا تكون تحديدك
واكتب في عنوان دنيانا
مافي وطن في الكون الواسع
دون عينيك راح يبقي وطن
ومافي سكن في الدنيا الغنوة
دون عينيك راح يبقي سكن

[أبو وائل]

السر عثمان الطيب


المشتهنّك


يا المشتهنّك في غيابك بالنا بيك ضمّه إنشغل
النوم وراك يبقالنا شر . . فارق عيونّا خلاص رحل

ضايقين متين ترجع تعود . . نسأل متين قطرك يصل
حارسين شويفعنا البجيب لينا البشارة يجيب أمل
يجري ويناهِت من بعيد شايل لو شنطة وبي عجل
يفرح يقول: "خليتو جايي وراي يسالم في الأهل"

والساعة ديك عاد البلد تنجارى قاصداك يا السمح
والناس توسوس لي بعض يي داك وصل والله صح
حتى الّلي كان محزون وباكي الليلي عاد هشّ وفرح
في يوم رجوعك يا حبيّب روحنا تب يبرا الجرح

والساقي بعد العنكبوت الفوق حطيبا خلاص بنا
بعد الكآبة ومسحة الحزن العليها مهيمنة
مرقت تلاقيك زي عروس متعطّرة ومتزيّنة

جدولنا من بعد اليباس الكان موجّع تقنتو
بعد السنين العاشا في بعدك بيكتم أنّتو
بعد العذاب الفي غيابك كان يزيد لي مِحنتو
بِلِقاك فرح جاك زي عريس يا دوب جديد بي حنّتو

والقمري من بعد الألم والحسرة والنوح والجراح
بعد الدموع السايلة دايماً وعمرو في كفكيفا راح
في يوم رجوعك جفنو من بعد السهر دابو استراح
فوق السبيط زوزا ورقص طربان يزغرد للصباح

واوتار طنابيرنا الأبت يا حِبّي في غيبتك ترن
حلفت محال ما تجيب نغم يفرح قلوبنا ويسعدن
عادت هي متل أيّام زمان تشرح نفوسنا وتبهِجِن

[أبو وائل]

السر عثمان الطيب



اللــون

يا لون الجرف الشارب
خضرة لون الزول السمح
الخاتف من لون الليمون
مبتلّة شفايفو الزي أم راس
السال عسلا ونقّط فوق العرجون
يا لون الفرح إنشرّ في جبين جدّي التربال
ال "لمّ" المسرة
وفرح الشفّع كان مرهون بي لون الجرف
الشارب خضرة لون الزول السمح
الخاتف من لون الليمون
وبرنين أوتار طنبور "أب خبتة"
الفجّر صمت ليالي الشاطي
إنساب جوّه الأرواح بهدوء وسكون

الله . . الله . . أنا آه
يا لون الراية المرفوعة
يا لون الخرقة المرقوعة
يا لون الطيبة وينبوعا
يا لون البت المفدوعة

يا قزح العصُر النجّا الدفّيقة
يا نضرة لون الوجه الأغبش
نام في لهيب الشمس وحرّيقا
الحيا . .
فوق وجه الزينة الإتوارت
عِن شوفة العاشق إندارت
خلف التمرات

الله . . الله . . أنا آه
يا العسجد مندفّق
عِن غيبت الشٍّمِس النّعساني
متمدّد . .
فوق الغيمة الفتراني
الجات من نبع القدرة الرّبّاني
روّت بيّوضة العطشاني
تفترّ . . ثغور البرقالبِشلع
نورا الأبيض
متلو جلاليب ناسنا
الغسلوا نفوسُن
قصدوا الجامع
رفعوا كفوفن
حمدوا الرب
يوم خدّر نبت الأرض المحلاني

الله . . الله . . أنا آه
يا لون الصبح وإشراقو
الغيب ابوابو مسوجرة
بين طيّاتو وآفاقو

الله . . الله . . أنا آه
يا لون محزون . . ممكون
مجنون . . مفتون
بِهواك يا لون بلدي السودان

[أبو وائل]

السر عثمان الطيب

تُراب بلدي

مَغَستي..
رحل تِلُوت الليل...
شقاوتي...
رحل تلوت الليل...
مسالكي ضُلُمة ماب تنشَق..
سكت روَّح..
نويرةَ الفُرقة..
جوة الجوف تسوي البق.
مشيت..
لا زاد أشيلو معاي
ولا زولاً... مع اترفَّق
ولما خلاص بقيت ماااارق..
نجيم الليل مشى اتفرق
بيكت.. وبكيت..
طريف العين متمسح بالدموع رقرق
عشان مظلوم...
زماني الليلي شتَّت.. للشمل فرَّق
بسوي الووب..
نحاس أحزاني
جوة قليبي... ينقر.. دق..
يوهدبني..
يلوِّعني..
واخاف من المصير واشفق
اوادع الناس..
وافوت مجبور..
يجيني نغيم..
من الطنبور..
اشوفلِي جِنّيْ.. وقف صفَّق
ينُط لا فوق...
يطير يندَق.. واطير واندَق
وادنقِر فوق تراب بلدي...
أخُم بي إيدي في رحلي..
أقول يا ليل وافارق الدار...
أجر فوق الوداع مسدار...
أنوني .. أنوني...
شاق الواح..
محال ارتاح..
أدخِّل إيدي في رحلي...
تُراباً فيهو تسوَى الكون..
تراب بلدي...
أشيل منُّو..
أشم وارتاح..
أشم طيبةَ أهلي..
مِنُّو تفوح.. ترد الروح
عيوناتُن تلوح.. وتلوح
عراريقُن.. طواقيهُن..
طواريهُن.. سواقيهُن..
أنين الساقي لما تنوح..
حسيس البربَخ المفتوح..
...........................
واعاين يا تراب بلدي...
أشوف فيك صورة ماب تنشاف
واشم ريحة الكُليت والشاف
بنات بلدي.. بنات بلدي...
طريحاتِن.. مناديلِن...
رقيصاتِن.. شبابيلِن...
حليلي.. حليلي... يحليلِن..
............................
واشيل من زادي واتكرَّف
واشوف فيك...
يا تراب بلدي الحنين المابي يتوصَّف
سماح ناساً
حلاة ناساً بلا السُكَّر..
طعم قراصة..
في قدحاً من الدَّبْكَر
كواريك شُفَّع المغرب
يقَلِّبوا في الجَّمر قنقَر..
ولاد بلدي.. ولاد بلدي...
نقاقيرُن.. طنابيرُن...
جبابيدُن... سنانيرُن...
...........................
وافوت يا ناسي في دربي
أقول يا أهلي واااغُلبي.
خلاص ريدكُن ملك قلبي
منو الغيرْكُن بشيل حبي...

[أبو وائل]

السر عثمان الطيب

بت البلد( 1 )

الليله في يوماً صباحو صباح هنا
واحة عبير نغمة غنا
ريحة لبينه مقننه
مر الجنى وسلم على بت البلد
ذي عادتو سلم وأبتعد
تابعاه عين بت البلد
بت البلد سمعت ضريبات القلب
ياالله مالو ده ها القلب
بعد الثبات كيفن خرب
بت البلد عرفت تحب
***
واليوم داك وماجاها نوم
مادام خيال ود البلد يمشي يحوم
بين الخيال شافت وجيهو الهاش وباش
شافت عيونو الفيها فيض أحلامها عاش
شافت سحاب الريدة فوق واديها راش

أتذكرت قول حاج مُحُمد والدها
حالف بي يمين ود البلد ما يخدها
لو كان ركع قدامها صلى يعبدها
***
أتذكرت قول حاج مُحُمد والدها
وصف العريس الجاي بقطر الأحد
كتَّر محاسنو عددها ....
راجل موظف عندو مال
يأويك في بيتاً حلال
تبقي لو أماً للعيال
أتذكرت لمن أبت قول حاج مُحُمد والدها
كيف نهرها وكيف نهزرها
حالف بي يمين بيودرها
لو ما رضت بالجاي بي قطر الأحد
***
قاليها: ما عندك أدب
تعبان سنين فوقك تعب
بديك لي زولاً كعب
تربال عشتو عدم عدم
لو قاري لو ماسك قلم
لو أخديتو تندمي صح ندم
يشقيك يورك الألم

أتذكرت كيف الحبيب ود البلد
في الغربة سافر وأبتعد
بكت لمن الخبر زاع في البلد
أنو العريس قام بالأحد
***
الحلة جاطت والحريم يتهامسن جاي الولد
لكنهن ما عرفن الشوق كيف وقد
ما عرفن هي شوقها تب ما عندو حد
مو للعريس للحبيب ود البلد
دا الراح في زحمة ضياع ما توجد
يا حليلك إنت يا بت البلد

[أبو وائل]

السر عثمان الطيب

بت البلد ( 2 )

وبلا خبر طق الخبر مالي البلد
قالوا العريس قام بالأحد
والحلى جاطت والحريم يتهامسن
جاي الولد
كوم من بنات للبير ورد يتحدثن
جايي الولد
يا بختها وواشوقنا نحن الفينا جمر الشوق وقد
كل الحديث الليلي فوق بت البلد
وساعة خلاص الليل دخل
وآخر شعاع من الشمس روح نزل
ضي القميره جا من بعيد بهر قدل
دافر ظلام الحلى قدامو ووصل
ناس البلد النام رقد
والماسك السبحي وعبد
مشغول هو بي خبر العريس
القالوا قام يوم الاحد
وهناك بعيد بي غادي فى آخر الديار
راكوبه ضلها احرّ من حر النهار
كوم من بروش وجريد تمر عيدان صغار
ودلوق هدوم موروثه من زمن الكبار
وتلات عنا قريبا صغار
كرابا متقطع نزل والنوم من البي فوقا روح تب جفل
راقد هناك كوم من ضياع مركب مسافري بلا شراع
احلام مسافري بلا وداع ودموع ضياع
تتجارا من غير انقطاع احرف انين ما خطتن
ايد بي يراع وليلاً نجومو يودعنو
خلاص مسافرات هن سراع
بت البلد عبراتا سدت فى الحلق
تبكي وتنوح تشرب دموعا وتنشرق
لمان حسيس نقاره جاها من الشرق
اتوسدت ايدا وبكت قامت على الحيل صنقرت
وبكت بكت تانى انتكت شالت طريحتا للدميعات كفكفت
فجأة السنين الفاتو جن ايام زمان اتلملمن
واتذكرت كانت تقوم فجر الصباح
لمان يقوموا اهل الصلاح
ابوها شايل السبحي صاح يا شافعي
سوي الشاي سريع شدى الملاح
شيلى المناجل وامشي قدامي الجرف
واتذكرت كانت تسبقو وتمشي تنزل بي تحت
تمسك سبيط التمره بي ايدا وتحت
تقعد تحش اللوبي للكاويق تقس
تصل البحر والموج يداعب فوق هدوما ينط يرش
وبعدين تشيل القش تفوت
واليوم يفوت وتمر سنين وتفوت سنين
يكبر عمير بت البلد يكبر معاهو كمان حنين
وبعد تمر كمين سنه في يوم صباحو صباح هنا
واحة حنان نغمة غنا ريحة لبيني مقننا
مر الجنا سلم على بت البلد
زى عادتو سلم وابتعد تابعاهو عين بت البلد
بت البلد سمعت ضريبات القلب
بعد الثبات كيفن خرب بت البلد .. عرفت تحب
والغي سهامو عليها جات شاقي الدرب
واليوم داك بت البلد ما جاها نوم
كيفن تنوم ؟ ما دام خيال ودالبلد يمشي ويحوم
بين الخيال شافت وجيهوالهاش وباشن
شافت عيونو الفيها فيض احلاما عاش
شافت سحاب الريده فوق واديها راش
بت البلد تاهت مع الشوق اللي ماعاد ينكتم
والصورة هادي الفي قليبا بتترسم
واسمو العلى نوتات خدودا صبح وسم
تاهت خلاص بت البلد تاهت مع ربط الحرير
والقعده جنبو على السرير لمان يجيها كدي ويسير
والرقصه قدام البنات يا ربي وين تلقى الثبات
والقرمصيص وغنا البنات والصفقه من تالا الولاد
ماب تسمعا وجاياها من آخر البلاد
تاهت مشت سايقاها دقات الدليب
لى دار حبيبا منى القليب
لى قعده عصراويه فوق العنقريب
للونسي والخاطر يطيب لى مسكه في إيد الحبيب
وسيرة فرح شاقي الدريب
وشفع حنان اسماء وحنان عادل كمان
وصوت الحبيب لمان يرن وشمعات هواهو ينورن
في دار جديدي بتنسكن
وفجأة النقاقير جاتا راني من الشرق
وبت البلد عبراتا سدت في الحلق
واتذكرت كيف حاج محمد والدا حالف يمين
ودالبلد ما ياخدا
واتذكرت كيف حاج محمد والدا قال ليها ما عندك أدب
تعبان سنين فوقك تعب واديكي لى زولا كعب
تربال وعيشتو عدم عدم لا قاري لا ماسك قلم
يشقيك يزيد ليك الألم ياخدك بتندمي صح ندم
واتذكرت كيف حاج محمد والدا
وصف القالوا قام يوم الأحد كتر محاسنو وعددا
واحد موظف وعندو مال يأويكي في بيت الحلال
تبقيلو عاد أم العيال ما فيش مثيلو ابدا محال
واتذكرت لمان أبت قول حاج محمد والدا
كيف نهرا وحالف يمين بيودرا
لو ما رضت بالجايي بي قطر الأحد
واتذكرت كيف الحبيب ودالبلد ساب البلد
شايل عذابو معاهو زاد ما حن لى دار اهلو عاد
وبكت بكت بت البلد لما الخبر ذاع في البلد
إنو العريس قام بالاحد
والحلى جاطت والحريم يتهامسن جايي الولد
كوم من بنات للبير ورد يتحدثن جايي الولد
يا بختها وواشواقنا نحن الفينا جمر الشوق وقد
لكنهن ما عرفن الشوق كيف وقد
ما عرفن غتو هي شوقا تب ما ليهو حد
مو للعريس ليهو الحبيب ودالبلد
ده الراح وفى زحمة ضياعو هو ما أتوجد.

[أبو وائل]

السر عثمان الطيب

بحر المودّة "يا يُمّــه"

شوفي الزمن يا يمه ساقني بعيد خلاص
دردرني وإتغرّبت وإتبهدلت ورّيني الخلاص
ساقني القدر منّك بعيد لأذاي كاس . . جرّعني كاس

يا يمه يا فيض الحنان الما كمل
يا يمه يا بدري البشع دايماً يهل
يا يمه يا نور الصباح وكتين يطل
وا شري يا زينوبة
ولدك في بحور الشوق كتل
محروم من الحب والمحنة وراك همل

يا يمه يا بحر المودة وكتين يفيض
يا يمه يا شعلة أمل زادت وميض
يا يمه يا عنقود كلام منظوم قريض

يا يمه يا نغماً حنين بالشوق يرن
وافكاري فيهو بيرتعن
دمعاتي شانو بينزلن

بتذكّرك يا يمه
في الدغش النسايمو يهبهبن
قايمي الصباح متكفلتي وشايلي الحليلي على المراح
والساعة ديك يا دوبو ديكنا بدا الصياح
والطير صغارو يغرّدن . .
جبتي اللبن بي إنشراح

وإتذكّرك يا يمه في ساعة الهجير
صالاكي نار الدوكي عستيلنا الفطير
رشيتي قلتي اكلوهو خير
وإتذكّرك يا بسمة الطفل الغرير
وكت الخلوق ترقد تنوم
وارقد براي ارعى النجوم
والشوق يرف جنحيهو
بي فوق لي يحوم
واهتف باسمك في الخيال
طيفك بي فوقي جال
واتمنى لو لحظات يدوم
لكني فجأة ألقاهو زال

وإتذكّرك يا يمه ساعة الناس يجونا من البلد
ناعم ترابا علي جسيماتن رقد
ريحة التمر فوق الهدوم لون الخدار خانس لبد
والشوق أوارو بيشتعل . .
كان ظني فيهو يكون خمد

وإتذكّرك يا يمه والناس قالوا قايمين البلد
رصوا الهديمات عدّلوا
ركبوا اللواري وقبّلوا
خلّوني وحدي بلا أنيس
كيف إنفرادي إتحملّو؟
شالوا السلام من عندي ليك
وإن شاء عندك يوصلوا

يا يمه ساعة يوصلوا ويقولوا ليك ..
شفناهوا في بلد الأمان
مبسوط ورايق في أمان
إنبسطي يا نبع الحنان
وأنا حالي يشهدبو الزمان
يا يمّه . .
رسّلي لي عفوك ينجيني
من جــــور الزمان

[أبو وائل]

السر عثمان الطيب

نَسْمه & شُوق

يا نسمة كيف أحوال أهلنا وحيّنا؟
أحكيلي..
عاد ما باقي طوّلوا مِنّنا
زي ما زمان طارنّهُن طَارنّنا؟
زي ماب نشيلُن في القلوب..شايلنّنا؟
حتي البعاد فتّق جروحُن زيّنا؟
**************
يا نسمه ما تدسّي المكَتّم عنّنا..
تمراتنا كيف؟
يا نسمه عرجونا انتنَى؟
شيلاً.. تقيل..
فوقو الدّباس رسّل غُنا..
لمْلَم عويشو مع الصباح
للعش بنَى حضن الجنا؟
الساقي كيف؟
جدولنا كيف؟
البوغة كيف؟
يانسمه..
ماشفتي المَتَرْ سايقِنّو صيف؟
عرباً بُعاد.. يانسمة كيف؟
ما قالوا ليك..
بيُوضه..رشّاها الخريف؟
*************
يانسمه قولي بدون بُكا..
المنقة كيف؟
والبرتكان
يانسمة صِح شال وانتَكى؟
يانسمه..
مالِك ساكتي؟ماقلبي اشتكَى..
يانسمه قُولي..
فترتَ اْنَا..
احكيلي..
عن ناس حَيّنا..
شيلي السلام..
يا نسمه بالكوم منّنا..
ودّيهو ليهُنْ..
في الشمال من عندنا
وان شاء الله توصلي..
بالسلامة..بدون عَنَا

[أبو وائل]

السر عثمان الطيب

القدم كان ليهو رافع

القدم كان ليهو رافع
قاسي فرقك يوم اوادع
لو فضل في العمر ثانيه
تاني لابد ليكي ارجع .. تاني راجع يا بلادي
ان نسيت ماب انسي مرة
كيف فى بعدك ضقت مرة
كان اخير لى اقعد هناك
اعيش ولو بى كسري مرة .. تبقي حلوى في بلادي
عشت يوت فى الغربة امنح
ابكى طول الليل وانوح
كل ساعه اتمنى ارجع
امشي اشد رحلي واروح .. امشي اروح لى بلادي
شان اشوف دار الأحبه
اصطفاها القلب وحب
فيها اترعرع تربي
بين حنان خلانو شب .. شب عاشقك يا بلادي
إن عطش يسقيهو نيلك
أكلو من ثمرات نخيلك
ياحلاتك ويا حليلك
والقمر يلصف في ليلك .. وين مثيلك يا بلادي
يا حبيبه تعالي شوفي
شوفي كيف حالى وظروفي
شوقي نار توقد في جوفي
حار على فراق ولوفي .. خوفي تنسي يا بلادي
خوفي تنسي حنان وليدك
فاكري إنو مرق من إيدك
راح جفاك واختار سواك
وقلبو تب ما عاد يريدك .. حاشا حاشاى يا بلادي
انت لى عيني نورا
بهجة الروح كل سرورا
جنتي الغنت طيورا
زهرتي الفاحت عطورا .. والفؤاد عابدك عبادي

[أبو وائل]

السر عثمان الطيب

يا بلدي البريدك انا

جور زمنى العلي جنى
باين فى عيوني ضنا
شايل من قليبي هنا
يا بلدي البريدك انا
عشت الغربه تسعه سنه
ورثت روحي هم وعنا
ماشف يوم سعادتي دنا
كل أملي انكتبلو فنا
مالقيت غير قناعتي غنى
كم شيد خيالي بنا
اترايملو كل ما بنا
فوق احلامو ديك دفنا
زولاً شال هموم حضنا
والروح للعذاب رهنا
كان يا ناس سبب سجنا
وين ينتملو تاني منى
كيف يصبح بكاهو غنا
ما عينى الدمع عطنا
آه لو شفتو حالتو هنا
روحو الفارقت بدنا
ياهو الغربه عاد تمنا
الناس لو حكم زمنا
مرة تقوم تسيب وطنا
تشقى كتير يزيد شجنا.

[أبو وائل]

السر عثمان الطيب


الحنين وداني جيت بالساقي سادر

الحنين وداني جيت بالساقي سادر***قلت انشد ناسا عن زولي المسافر


الحفير شوف عيني يبكي معاي يكابر***دمعو جدول جاري لبيتكم مجاور


قال لي وين ما بنت طوّل ماك ظاهر***دار اجيكم قلت لو كان لاقي خاطر

كانت الايام حنان بلحيل نواضر***الله يلعن حظي شوم يااخواني عاسر

لمحل اللقيا سقت خطاي ازاور***استعيد الماضي اتعللبو صابر

احضن الاغصان واهيم في وهم سادر***وحدي تحت المنقة للأحزان مصاقر

مالو من خلاني ما يكتب يخابر***بس لعلّو المانعو خيروكتر بشاير

ناس فلان قالوا لي طاريك ديمة ذاكر***بغرامك قلبو ديمه ملان وعامر

لابس الاخلاص حرير وهلال واساور***قلدو فوق عنقو اكليل من ازاهر

آه..تقاليد ريفنا يا الابو ماب تشاور***نحن سر مأساتنا بتنا قولا قاصر


برضي بمحبوبتي مهما كان بفاخر***زولتي خلقت مني زول فنان وشاعر

من جراحي ونوحي والاذي والدرادر***من جحيمي الفيهو مرمي كأني كافر

من ضيا القمرة البشق الليل يدافر***من حسيس طنبور يرن في روعة يناقر

من فؤادي وروحي من آخر وآخر***بهدي اجمل شعري لؤلؤ در جواهر

[أبو وائل]

السر عثمان الطيب

مايقوما ..مايقوما ..
(حكاية شافعي لا أم ...لا أبو)..!



في العاصمة الخرطوم
في لحظة من ذات يوم
والجو هبوب وسموم
كابات غيومو سِموم
إنسان وإنسانة
ما هُن عريس وعروس
شيطان وشيطانه
كان تالِتُن إبليس
عمداً وبي إصرار
لا خوف ولا رهبة
من جُرم أو عاقبة
إشتعلت الرغبة
إنعدمت النخوة
إتبهلت الشهوة
واندلعت النزوة
وإتمادوا في الهفوة
إتمادوا فاتوا الميس وحدّ اللعب بالنار
عيييييك
غابوا في النشوة
وانزرعت البذرة
والبذرة مشؤومة
مايقوما.. مايقوما
وسواري آخر الليل.. اللافي راكبي الخيل
حايمي ومشيها تقيل
اتسمرت وقفت.. حرنت، صهيلا صهيل
لما القلوب وجفت، شقت سكون الليل
صرخة وأنين وأنين
في خور تحت كبري، إتناوشن كلبين
إتهاوشن جم كوم
نهشن طرف طرحة
ما بين صراخ وعويل.. الكوم نزفلو دموم
والعسكري الضكران
فت.. نطّ .. جبد الكوم
واتفرزعن كلبين
كاكيهو شرب الدم
وعينيهو دمعت دم
شال نفسو واتحزم
الطرحة لمّاها
الطفلة ضمّاها
وفي دفتر الأحوال سماها مايقوما..!
من عطفو أداها، مايقوما وداها
لي حي عتيق وعفيف
ومايقوما ضيفة الحي
لكن هي ما كانت، زي أي كائن حي
مقطوعة من شجرة، ثمرا المحرم نيّ
بي طيبة الطيبين، الدار بقت دارا
وارثين مكارم طي، ما مات لهب نارا
الفُقرا، ما فقرا
شان خاطر الأطفال
بيناتن النبقة... واللقمة مقسمومة
***
يا مؤتمر وطني، لو إنت صح وطني
يا مؤتمر شعبي، لو إنت صح شعبي
يا إتحاديين، لو إتحاديين
يا حركة شعبية
بعثِ وشيوعية
يا أمة، يا أمة، كان إنتو صِح صادقين
يا ناس يا حاكومة، يا معارضين، يا هووووي
يا مشتتين جبهات
ومفرقين حركات
ومقسمين جيهات
يا اخوانا بالذمة
اتجيهوا، اتلموا
ما أروع اللمة
ما أجمل الأمة
لمّان تكون، لما
على قلب زول واحد
متماسكي ملمومة
تسمع صراخ طفلة
مسكيني، محرومة
ما نطقت اليابا
ما شافت اليُما
في دفتر الأحوال
سموها مايقوما..

[أبو وائل]

السر عثمان الطيب


استحلفك بالريد

استحلفك بالريد أوعك تفارقنى
لاتسبينى فى الاحزان أبحر تغرقنى
ياروحى مشغول بال محتار أنا ومحتار
مابهون فراقك يوم ألم الفراق تاوار
يا المستحيل بعدك يا الحار فراقك حار
قلبى الحنين أصبح موطن هواكا ودار
دنيايا غير عينيك ليل مسدل الاستار
فيهو القى روحى بلاك مسجونة دون أسوار
انت المعاى أنغام داؤود بلا مزمار
تسكر حنايا الروح من كأس ندى الازهار
أستحلفك بالفيك والفى موقد نار
بى صرخة فى الاعماق دار تفضح الاسرار
بى دم دموع عينى بى دمعك المدرار
يرويك ويروينى ويخنق غنا الأوتار
بالالفة حلفتك بالخوة حق الجار
أوعك تسيبنى تفوت ترمينى للأقدار
خايف عليك وعلى من جور زمن غدار
خايف من الايام ودولابن الدوار
لالا لا ترحل كوس للقعاد أعذار
دابن خطاى وخطاك فى الريد بدوا المشوار

[أبو وائل]

السر عثمان الطيب


في حمايا

في حمايا وفي ضرايا .. . استريحي .. واستجمي
يا قريبة كما إخيتـي .. أفتديـك بالـروح ودمـي
لا تــخــافـــي .. ولا تــهــمـــي .
أتكلي الوجع البتاورك .. ختّي حملو على كفوفـي
من ضباب الحزن أجبدك .. ليكي ممدوات كفوفـي
لو وسط لهباً مولقد ... جوة جوفك وجـوة جوفـي
ما بيزحزح من عزيمتي.. على انتشالك مرة خوفي
والبرٌشّك بـي لبينـي .. تلفـا درقاتـي وسيوفـي
نامي في حضن القوافي.. وهاك وساداتك حروفـي
لو نهار الصيف سمايمو .. بقّت الحر فوق جبينـك
اتلفحتي التوب طريفو .. ضروة بي أطراف يمينـك
كفّك الأيسر مميّـل .... كسكيقـة علـى عيونـك
واتلفتي تكوسي فـيَّ .. مـا بخيّـب لـك ظنونـك
واللّه حتماً تلتقيني .. فيكـي متحاوشـك أصونـك
من شتيلة خديرة شبّت .. دابـا فـي عـز النـداوة
ليك بفِر سعفاتا طرحة .. فوقك الضـل والطـراوة
قلبي منقاش لي همومك.. للضنا وشـوك الشقـاوة
وكلما زاد حنو ليكي .. زاد على العـزال قسـاوة
يا قميرات صيف بلدنا .. نـورت قبـس الأماسـي
راقشي فوق النيل تكشّف .. للمراكبيـة المراسـي
وفي النهارات ساوي حنِّك ..للمزارعية الشماسـي
من دموع جرحك تكتبي .. وصفة للموجوع تآسـي
ريدي ليك درعاً مدرع .. في وشي المحن القواسي
لو عليك زمن الأفاعي .. جار وجاك بي سمو ناقع
والخلوق فرّاجا قاعدي .. وضاحكي شمات الفواجع
يا الهواك قدري ونصيبي .. احتميبي من الصواقـع
سايم الروح ليك رخيصة ، صامدة عن حصنك تدافع

[أبو وائل]

السر عثمان الطيب

ساقتنا الظروف

ساقتنا الظروف يا صاح لـي دار العـذاب والغربـه
فارقنا القرير نتباكـي احكـام الزمـن صـح صعبـه
من شفع صغار يـا دوبنـا ماسكيـن الشطـر نتربـي
مـا فتنـا البلـد بالمـرة حبهـا قـام معانـا وشـب
بـي فـوق البحـر نتجـارا عاشرنـا وبقينـا احبـه
حارسين الجبابيد ديمه نشـرب مـن مياهـو العذبـه
نتغاتت كتير في بعضنـا دسينـا الطعـم فـي العلبـه
مـره نلفـو فـي الأشميقـه بالكشونـه تلقـى مخبـا
نحلف للكمـل صارقيلـو مننـا مـا يضـوق الحبـه
نرجع تاني ننسـى القلنـا نديهـو وتعـود الصحبـه
والطاهر جزيرتو حليلـه نسامـا العليـل فـاح هـب
يلا عليها قـوم يـا رامـي لـو بينـا بيـدور القبـه
آه أنـا حليـل رملاتـا منهـا كــم نشـيـد قـبـه
نرميها ونقـول لبعضنـا سجمانـي ودي فوقـا التبـه
نرجـع للتقـا ونتلـم نسـأل عـن صديقنـا الـغـبَّ
ندفرلـو الصغيـر فينـا يتـأكـد يـعـرف السـبـه
يمشيلو ويجيبو ونبدا كـم فـي الخـط نصيـح نتنبـأ
ماهـن ستـه لـع والله ياتانيهـو عـيـد الحسـبـه
ماهن سبعة لـع والله ماهـن تسعـة جبـت الكضبـه
فجأة يقولو شـد نتجـارا واليركـب تكونلـو الغلبـه
وينو شليـل حليـل فتيشـو ماكنـا بنخـاف أو نأبـه
نتحـاوم حفايـا نكوسـو يدفعنـا الحمـاس والرغبـه
نرجع لامتيـن لقريرنـا يفـرح عـاد قليبنـا الحـبَّ
نيلووروض نخيلو الزاهي حاضناهو الأراضى الخصبه

[أبو وائل]

السر عثمان الطيب

أريدك

كل ما تغيب عن عيوني بتبقي قريب لـى فـؤادي
خلاص اصبح قطعه مني بريدك انـا زى بـلادي
يمين جواي انـت خالـد خلـود البركـل زيـادي
خلود النيل يجري دايماً يجود بالخير في البـوادي
فراقك ماكنت دايرو رضيـت بـي حكـم الارداي
بساهر وطيفك معايا وبسـوي الاحـزان وسـادي
قليبي كمان سبتو امانه أمانه معـاك فـي بعـادي
شقاوتي انا في غيبتي عنك عذابي واوطول سهادي
اكون جنبك كل لحظة قريـب لـو ينتـم مـرادي
احاول اقول مره اصبر يكون حزني علـى بـادي
اخت ريدك بين ضلوعى يكون لى في الغربه زادي
اشيل من ينبوع حنانك اعود ألقى قليبـي صـادى
بريدك وشانـك بغنـي تغنـي معـاي الشـوادي
يردد طنبـوري اسمـك يرنبـو فـي كـل وادي
ارقص زهر الخمايل يميل طربان جـاي وغـادي
الملم ناس بلدي ديلـك يضـاروك مـن الأعـادي
يسوولك في الضريـري يقولولـك فـال وعـادي
واقلدك انا يا الحنين وشـاح مـن ريـدى وودادي
دحين لامن اعود واجيك على نار الشـوق قعـادي
دوام صورتك في عيوني ألاهي بذكـرك وانـادي

[أبو وائل]

السر عثمان الطيب

أرض النيل

يا مرسى امان القلب التايه ليهو زمان
أرويهـو حنـان يـا ارض النـيـل
اتــــــغـــــــرب راح
يحلـم بالعـوده مسـاء وصـبـاح
دايـر يـرتـاح ينـجـم الحـيـل
الــديــمـــه يـــئــــن
لـى دار أحبابـو قليـبـو يـحـن
طنبـورو يـرن ودموعـو تسـيـل
بـــعـــد الأوطـــــــان
خلاهـو يعيـش العمـر احــزان
آهـات واشجـان وراهـو الـويـل
ويــــــن امـــدرمـــان
يتـراءي جمـال المـقـرن بــان
زهـرو النديـان والنسمـه يمـيـل
اتـــوشـــح تـــــــوب
يترقـب كـان راجـي المحـبـوب
وقليبو يذوب ضاع صبـرو وعيـل
مـــــــرت أيـــــــام
واليوم محسوب في الغربـة اعـوام
والقـلـب الـهـام ردد يحـلـيـل
هـــداهـــو الـــشـــوق
لى صوت القمـري السـاو القـوق
لى ساقـى تسـوق وتنـوح بالليـل

[أبو وائل]

السر عثمان الطيب

مقاطع

الـطــيــر الـــشـــوم:
عتمـه الدنيـا غيـوم وضـبـاب
في الأفق النائي سراب وسـراب
والطيـر النـاح ينـذر بالـشـوم
فـــــي الـمــغــرب آب
قيـل وارتــاح فــى دارنــا
بـدون مـا يطـرق لينـا البـاب
ســاقــيــة جـــحـــا:
يـــا فـرحـنـا المنـتـظـر
كنـت عارفـك يـوم حتصـبـح
بـــــؤرة الــحــرمــان
لفارس سيفو فـى غمـدو انكسـر
الـــتـــحــــذيــــر:
ساعت جنا الجيران جابولو طياره
قالولي: اسكت هاك ادوني عيديـه
قرشيـن ونــص يــا نــاس
مـــا زلـــت اتـذكــرت
فـــي سـاحــة الاعـيــاد
والله ما جابـت لوكـان طحينيـه
الــــصـــــبـــــر:
فـوق فـراش المـوت طـريـح
الذبيح يـا خوانـا دايـر يستريـح
ويـنــو مـفـتـاح الـفــرج
والكلام الضال عن المعني الصحيح

[أبو وائل]

السر عثمان الطيب

آه يا بلد

يا راقـداً قـدام عيونـي نهـر عسـل
وتـــرعــــة لــــبــــن
أنـا ليـك أشابـي وبـيـك أهـاتـي
وضـمـه مــا قـــادر أصـــل
حوريه من الجنه فـوق وجـه الأرض
يـا دي السماحـه ويــا الـعـرض
انـا قلبـي بـى دوب حبـك انــت
الـنـار تحـرقـو تــب نـجــض
لهـفـان علـيـك آه يـــا بـلــد
جــــاي مــــد ايــديـــك
جيـب حضنـك الـدافـي الحـنـون
ابــقــالـــي عــــــــون
انــــا مـــــا ولــيـــدك
خافـلـي يــا وطـنـي الجـنـون
الــبــعـــد عــــنــــك
ربى فى فكـري الهلاويـس والظنـون
مــا بـيـن شـجـون وشـجــون
وحاتـك كـل يـوم تـزداد شـجـون
متل العصيفير صرت وكت الريح تولول
تلقا حـاس مندسـي بينـات الغصـون
إن طــــــار يـــخــــاف
كيفن مصيرو مع الرياح باكـر يكـون
وان حــــــاول الـــنـــوم
تلقى نومو تملـى فـار مـن العيـون
آه يــــــــا بــــلـــــد
لــــــولا الـــظــــروف
والله فـرقــك مـــاب يـهــون

[أبو وائل]

السر عثمان الطيب

ليلى العنيد

ياليلـى يـا لـيـل يــا عنـيـد
قـــالـــد مـــعــــاي
طـــول صـبــري فـيــك
مـدد مساحـات الحـزن جـواي
وطـــــول واكـــســـر
كـمــان حـاجــز الـزمــن
وامـتــد تـانــي وتــانــي
ارجـــع مــــن جــديــد
بـــي دمــعــي اكــتــب
فـوق نجومـك بـيـت قصـيـد
يـروى الغـمـام لـمـان يـمـر
كان الحنين وداهو لي أرض الصعيد
ياليـلـي يــا لـيـل ياعـنـيـد
فـي صمتـك الممـزوج أســى
وكبـل مشاعـري بـقـالا قـيـد
ردد صـــــــــــــدى
شوقـي الحبستـو بعـيـد بعـيـد
لا تــســـيـــبـــنـــي
يـالـيــلــي وتـــفـــوت
شـــيــــلــــنــــي
وامـــــــــــــــش
فــــــى جـــوفــــك
الـــمــــلــــيــــان
انـيــن نــاســاً تــريــد
مـــا اصــلــي مــنــك
وانــــــت مـــنــــي
وبينـا كــان الـريـد شـديـد

[أبو وائل]

السر عثمان الطيب

الريح العاتى

الـريـح العـاتـي الـجــات بالـلـيـل
شــالــت تــمــرات أبــواتـــي
الــلـــيـــل والـــلـــيـــل
رغــم المـأسـاه وعـمـق الاحــزان
ومـــرارة الــجــرح الــنــازف
جـوه قلـوب النـاس ماسـوو الــووب
كان نـص الليـل والـداره عجاجـا يعـج
والــــنــــاس بـــتـــنـــح
نغم الطنبـور ينسـاب فـوق مويـة النيـل
يعبر بي غادي يمازج قولـت الليـل الليـل
اهـــلــــي الــصــابــريــن
صـبـرا مــزروع فـــى نـفـوسـن
قـــــــــالــــــــــوا:-
الريح ماب تقدر تقلع من واطاتنا ولو شبرين
والساقى تسوق والقمري يعود ويسوى القوق
والناس زي أولي تمشي السوق نفطر قراصه
وفـوق جدولنـا نقيـف ونــدق الـكـف
ونغني الليل والليل والليل قمراتو تظل قمـره
وضــفــاف الـنـهــر الـخـالــد
رغم زمان المحل الجاير برضو تظل خضره
يا كرم الناس القاهـر كـل الضيـق بتـدوم
يــا فــرح الشـفـع يــوم الـعـيـد
الـمـر علـيـهـن زي كـــل يـــوم
فـي عيونـن يـوت مرسـوم احـسـاس
بـحـلاوة الشـقـا عـنـد الـمـحـروم
بــتــدوم ونــــدوم ونـغــنــي
الــلـــيـــل الـــلـــيـــل.

[أبو وائل]

السر عثمان الطيب

جور زمنى

جور زمنى العلي جنى
باين فى عيونـي ضنـا
شايل مـن قليبـي هنـا
يا بلـدي البريـدك انـا
عشت الغربه تسعه سنه
ورثت روحي هم وعنا
ماشف يوم سعادتي دنـا
كل أملي انكتبلـو فنـا
مالقيت غير قناعتي غنى
كم شيـد خيالـي بنـا
اترايملو كـل مـا بنـا
فوق احلامو ديك دفنـا
زولاً شال هموم حضنا
والروح للعذاب رهنـا
كان يا ناس سبب سجنا
وين ينتملو تانـي منـى
كيف يصبح بكاهو غنـا
ما عينى الدمـع عطنـا
آه لو شفتو حالتو هنـا
روحو الفارقـت بدنـا
ياهو الغربه عـاد تمنـا
الناس لو حكـم زمنـا
مرة تقوم تسيب وطنـا
تشقى كتير يزيد شجنا

[أبو وائل]

السر عثمان الطيب

لبيك يا وطني


يــاوطـــن لـبــيــك جـيــنــا
جيـنـا قــوم لا حـيـلـك انـهــض
يـــلا هـــاك قـالـدنـا .. قـــوي
رغــم إنـــك كـــت معـضـعـض
مـــن كـــلاب مـايــو الـتـهـوي
يـــا جـمــل شـيـلـت تقـيـلـنـا
فى الظلام والسكه غابه ياكا فانوسنا المضوي
يا وليد آخر عمرنا يا الرموك جدعوك مكسح
جيتا تسندنا ونسندك يا وطـن لبيـك هوبـح
نحن جندك جينا ننفض للوشي الضبلان مكتح
دار نـعــوس أحــــرف غـنـانــا
لـقـمــه للـمـصـرانـو يـنــبــح
مــن سـنـيـن غـــرزت بقـيـرتـو
داجــي بـيــن فـقـريـن مـشـوبـح
يــا وطــن يــا ضـــل مقيـلـنـا
يـــا جـمــل شـيـلـت تقـيـلـنـا
يــــا التـسـامـحـنـا وتـقـيـلـنـا
يـــا سمـعـنـا ويـــا بـصـرنــا
يـــا نفـسـنـا وطـــول عـمـرنـا
يـــا مصـيـرنـا ويـــا قــدرنــا
يـــا دربـنــا الـفـيـك ســرنــا
سـرنــا سـرنــا ومـــا عـتـرنـا
جينا نقلع من تقانتك كمـر الـذل والمهانـه
فـوق نـزرع كــم شتيـلـه وبرتكـانـه
وتانـي فيكـن يـا بيـوت النمـل حـاشـا
مـــاب نـدخــل ايـدنــا ضـمــه
تـانـي يـــا النـهـريـن وحـاتـكـن
مـــاب تـفــوت روح الـعـطـاشـا
يـــا شـعــاع ابـريــل وحـاتــك
مــاب نـعـيـش قـبــس الضـلـمـه
يـــا وطـــن جـيـنــاك أمــــه
جيـنـا قـــوم لاحـيـلـك انـهــض
يـــلا هـــاك قـالـدنـا قــــوي
رغــم انـــك كـــت معـضـعـض
مـــن كـــلاب مـايــو الـتـهـوي
يـــا جـمــل شـيـلـت تقـيـلـنـا
فــى الـظــلام والـسـكـه غـابــه
يــاكــا فـانـوسـنـا الـمـضــوي

[أبو وائل]

السر عثمان الطيب

دون وداع
قام دون وداع ساب الاهل
في سفرة لا زاد لا عدل
يا صاحٍ .. وين قمري رحل؟
كان هادي من قومة الجهل
في روقة لا نقة وزعل
في روعة زوزه على النخل
جنبو المدين نقط عسل
والليلة دارو أصبح محل
بس زي خراب سوبا الحصل
قام فرّة ما عرف الكسل
واشريّ فارق بي عجل
يا حليلو كاب دمعو انهمل
بالشوق قليباً لي انزمل
مقصوص جناحو وبالوجل
ما ركّ فوق شدرة ونزل
أتمنى لو عاد صاد قفل
لي عشو قيّل في ونزل
وان شاء الله عاد مهما حصل
يرجع لي قمريّ ويصل
في عودتو ما فاقد الامل
عارف بلاي ما كاس بدل

[أبو وائل]

السر عثمان الطيب
وطن واحد

وطن واحد .. وطن واعد
وطن واعـــد .. بغنِّيلو
موحَّد .. والمصير واحد..بغنِّيلو
وطن من كسلا للفاشــر ** وطن من نمولـي لي حلفا
وطن بالوحدة يتعافــى ** ربوعـــــو تعمهــا الإلفــة
يقيف ناهض على حيلـو
شمالو البي الجنـوب قـوَّة ** جنوبـو مع الشمال خُوَّة
غربـو ال للشـرق يهوى **وشرقو مع الغـرب يقوى
سلام .. .. والناس تناديلو
وطن ما فيهو قبليـــــة ** ولا نزعـــــة إنفصاليــة
وطن زنجيتو عربيـة ** وعروبتو السمـرا زنجيـة
سوا سوا .. كلُّو حريـة
سوا سوا يا بجـة ونوبة ** سوا سوا ..فور وشايقيـة
مسيرية وشلك ، دينكــا ** سوا سوا زانـدي ، لاتوكا
وطن حق كل زول .. هولو
سوا سوا صحرا والغابة ** سوا سوا وحـدة نرضابا
سوا سوا نخلة وابنوســة**روا روا فوق ضفـاف نيلو
وطن واحد .. ولا غـيرو ** جميـع نتهنى بـي خيـرو
نغــني مع عصافيـــرو ** وننقـــرش فـي طنابـيـرو
نصفق له ونراقصو نشيل شبابيلو

[أبو وائل]

السر عثمان الطيب
حأكتب لك

لآخر شهقة في نفسي الأخير..
بكتب
لآخر زفرة في حزني المرير..
بكتب
لآخر قطرة في دمعي الغزير..
بكتب
*
حأكتب لك
لآخر لحظة..
ما بين الوجود والموت
مسجى على قفاي مبهوت
أعاين في فوات الفوت
واشهد في غناي على بآخر صوت
حأكتب لك
وأظل مفتوح عليكي كتاب
حروف ترجاك على الأبواب
وغيرك ما لقيت أحباب
ولا غيرك لقيت أصحاب
ولا كانت بلاك فرحة
ولا اكتملت على صفحة
معاني الألفة والترحاب
**
حأكتب لك
إلى ما شاء فعل الحب
إلى ما ناء بحملو القلب
إلى ما لا نهاية الدرب
بكتب لك..
**
حأكتب لك..
لآخر شمعة في وجه الظلام والريح
تقاوم وتحترق لوعة وأسى وتبريح
وتفرد كم شراع للنو
وتدي الليل أغاني الضو
وتفتح للشمس منفذ بلا تصريح
**
حأكتب لك
لآخر موجة في بحر الهوى العاصف
تشيلني مع الرحيل المر، جرح نازف
على شط الأمل برجاك، وما عازف
و لا أصوات نداي كلت.. ولا ب يرجع صداي آسف
**
حأكتب لك
إلى أن.. ترتمي الصخرة، بحضن الغنوة والأوتار
إلى أن.. تكتسي الزهرة، نداوة الغيمة والأمطار
الى أن
يحتوي المنديل مرارة الدمعة والتذكار
الى أن
تحتمي الآهة من الشوق، بي لهيب النار
الى أن
تكتفي الضفة، من السفر المع التيار
**
حأكتب لك
الى أن
تستفيق نسمة من الصمت المباريها
الى أن
تنعتق نجمة من الليل المضاريها
الى أن
تفترق بسمة عن الهم المواريها
الى أن
تنطق الكلمة وحروفا تقول معانيها
حأكتب لك.. الى أن .. أن
الى أن.. أن
الى أن.. أن
حأكتب لك لآخر "أن"
لآخر "أن" .............. حأكتب لك... حأكتب لك

[أبو وائل]

السر عثمان الطيب


يا الناسينا

يا الناسينا ..حبك في ربيع دنيانا شال نور
تسقي الذكريات يا روحي شان يخضر لي يكبر
همساتنا وعناقنا الحاني يا ريت ليها تتذكر
لمان من جداول ريدنا كنا بنرتوي ونسكر
ضل السيسبان والمنقة لافينا بوشاح أخضر
فرع البرتكان متدلي فوقو كنارو يتبختر
والكون كلو باسم لينا طربان غنى واستبشر
لكن جار زمانّا الليلة خلى صفانا يتعكر
بطراك ، وكتين الساقي التسوق فجراوي تتحسر
نواحا يزيد قليبي بكا واصبّرو مابي يتصبر
بطراك والقميرة معاي تشاركني الهموم تسهر
نعسان انت يا محبوبي ضوها فوق وشيك نوّر
بطراك وكت اشوفلي عريس فرح في صحابو قام بشر
واتمناك واعيش لحظات محال يا روحي تتفســر
بطراك ، يوم قمحنا سنابلو لونن يتقلب أصفر
أبكي على الديون الفوقي .. والغير في الحصاد فكر
بطراك ، وكتين الشخلوب سبيطتو تخافلو يتبعثر
تضمو عليها بي تحنان قليب الام كمان وأكتر
إلا قليبي قلبك جافا .. لي تحنانو ما قـدّر
راجيك بالسنين يا روحي ضيع للشباب ودر
تنساهو وبراهو تسيبو ..حبك ليهو يتغير؟
يتجرع وراك احزانو يندب حظو يتكـدر
يا ريت لو تعود وتجيهو أو في مرة تتعذر
شان تلقاهو قاربو وراك في لجج العذاب أبحر

[أبو وائل]

السر عثمان الطيب

خاطرك الغالي

:::::::::::::::::::::

يا غالي يامسافر ناوي الرحيل باكر
شان خاطرك الغالي اديتك الخاطر

اديتك الخاطر رغم الحيبق علي الانتظار الحار جمر الفراق الحي
اسف الرحيل والشوق سدودو مو عيني

اديتك الخاطر وانا باقي بين نارين نار الهوى وذكراك نار البعاد والبين
حرماني من شوفتك اضماني شوق وحنبن مهما تطول غيبتك برجاك
سنين وسنين

بوصيك يا راغي يامرهف الاحساس بي طبعك الرايق ونهيجك الوناس
سلم علي الحبان فرح قلوب الناس ابطر شوارع الحي بهجه وشذى وايمان

في مقرن النيلين والجلسة يوم تحلى بين زهره نعسانه والشاطى والنخله
لما النسيم طربان ينساب على الخسلة زي موكب العرسان في ليلة الدخلة

اطراني يا محبوب خليني في بالك لاقيني واحكيلي في الغيبة اخبارك
انشد غناوي الريد غرد بموالك لو في المنام والطيف رسلي مرسالك

درب السلامي معاك في الفوتة والعودة يبقة الفراق المر ايامو معدودة
لو الله رايدلي والفرحة موعودة باكر تعود وتعود الروح لمريوده

شان خاطرك الغالي اديتك الخاطر

[أبو وائل]

السر عثمان الطيب


يوم الجمعة الفاتت شفتك



نص الليل والـليل كان هـاجع
رامى هـديمك من فوق كتفـك
يا العجـلانى وقاطعى الشارع
لا إتلفتى على سلمتى
لا ناضمتى الناس كلمتى
أشــــنو الـشـادهـك يا محبـوبة ؟
بالك .. بالك يا محبـوبة
الـعربية الجاتك طـايرهـ
المخــبول مـا دق الـبــــورى
الـصـامتين المــارة إتلمـــوا
مخـلوعـــين خمــوك فى لـورى
بـاقى الجسـد الـنازف دمــــو
غــاب الـوعى الـشـايل همــو
قـالــوا ...... ( مـسبلــــه )
سـبحـــــان الله !!!!!!!!
كـــــان ممـنوع تبكــيك الحـله
**
يــــوم الـســبت العـاقب الجمعـة
شـفـــتك فى مـاشــــاف الـنايم
فــوق خـــــدين النهـــرين دمعة
تبـــكى زمـان الرحمـة الـصـايم
تشـرح ســر المـأســاهـ وتحكـى
قســـوة قـــلب الفجـر القـادم
الـسّــواك للـصــبر تلكـى
ومـــوج الـليل فــوقك متـلاطم
يا الحـارسـا وجــاييـك مـتوكى
لاوى ضـراع الشـيمه وعـايم
**
أحــدُ أحــــدَ الأيــام تمضــى
وأنـا حلمـان ما أحــلى أيــامى
أقــرا الـفاتحـة وأنـا متـوضى
إنت عــروسى فـتــاة أحــلامى
فــال الخير هنـدامك أبيـض
زفـة خــيل قـادلات قـــدامك
قـــلتى الــراح باكـر يتعـوض
أنـا عـارفاك زولاً قــدامى
أمــر الحــال لى الله مفــوض
هـو الـداواى للجرح الدامى**
الإثــــنين نحـن إتـلاقينـا
الإثنين مـارقــين من غــابه
الـسحـارة الـسكنت فـينــا ...
وقــالـوا بتـأكل الـناس كضــابه
وقــالـوا تـسـل الـروح بى عــينا
يـا هـادى أرواحنـا إنسـلت دابـا
وجـه الشمـس الـطلت ضـاحكه
ســالمنـا وضمـينـا علينـا
يــوم قسمّنـا الـفرحة ولايـم
للماجانـا ...... والجايينـا
للـتلمــيذ الحرد الحصـه
للمترملة حـاضنه عــوينـا
للماعاشو أحـداث القصه
والعـايشـين الحـزن البينـا**
مـرهـ ....... تـلاتـا
فـرزت عيـونك
وط الـناس والجمـع الحـاشـد
كـان متـلاشى
وباهـت لونك
يـفضح جـور الـزمن الجاحد
والـعـنين كـادت تتكلـم
ويـــنك ؟
ويــن ؟ ؟ يـا الفجــر الـواعــد ؟
قـت لِك يـا دُخـِريّ إسـتنى
جـاييـك بـاكـر بالتتمـنى
بكـرهـ معـاى حتمـاً تتهـنى
والقمـرية الهاجرى العشـه
ترجع وسـط أسـرابا تغــنى**
يـوم الأربعا ماكت نـايـمكـان وايّاى
طـيفك سـاهـر بى
كــان يحكـيلى وكت بحكـيلو
الـفى قــلبك والفـى قـــلبى
قـالى إن بقـى عـاد مـاك مـستحمل
طــول الغيبـه ونـيران حـبى
والمشـوار إن خـايفــو يـغلـبك
لِم خطـواتك وفــارق دربى
قـلتلــو حـاشـا أنا ما مـتراجع
لا بنــتر ..... لا بـرفع إيــدى
مـتل الـصـايم الـدهــر إســتنى
أحـرس وأرجــا
صـباحـات عــــيدى
مــالأيــام
قـادوس الـسـاقى
طـالـعى
ونازلى .. مـلانى وفـاضى
وكــت الـصـيف
بالـســرسـار راضـى
لا بــدنـو الــنيـل بيتـسب
وعــد الـغــيم
مـاب يخــدع .... يـكــــذب
والمســتقبل ثـغــرو البـاسـم
مـا بيكممــو غـم الماضى
صـوت الـعـدل الحق بيــدوى
رغـــم ......
ضجـيج تـزييـف الـقاضى
**
مــرّ خمـيــس
والإسـبوع يمـضى
وأيـام الله عـلىّ تتـوالى
إنـت معـاى وأنـا أحلم بـِك
مـتـلى عــديل
كـل يــوم فى حـاله
الأشـواق بينـاتنـا بتكـتر
كـل مـازاد ســاسـاق مـرسـالا
لا بــد يـوم بالـصـح نتـلاقـا
كـان اليوم
أو كان يـوم بـاكـر
نسكن جوّهـ الـبيـت الواحد
نأكـل فى المـاعــون الـواحد
نشرب مـويـة الـنيـل الـواـد
نكتب فـوق اللوح الـواحد
بى فـد إيـد بالـقـلم الواحد
قـصــة ريـدنــا
الـسـامى الخالـد .....

[أبو وائل]

السر عثمان الطيب

الربيع

خلاص رحل الربيع خلَّف زهورو
للصيف لى يباسو، ولى هجيرو
صحت قبل الفجر صدحت طيورو
بكت مزجت غناها مع عبيرو
جاها الناعى ناح سمعت صفيرو
كل جوز فى عشو فارق لى صغيرو
سابو رحل بعيد ، يندب مصيرو
زى الناسك القام خلَّ ديرو
على حلَّ المحل طالت شهورو
مليون آهة ما بتقدر تديرو
بس قلبي المجندل مين يجيرو
دكين الظلمة من غيرك ينيرو
قليبى إزداد وله ، غلَّب بصيرو
تايه فى الغرام ، ودّر عميرو
حليل عهد التلاقى حليل سميرو
مين جلب الالم والحسرة غيرو

[أبو وائل]

السر عثمان الطيب


{الرد ....السد }


الرَّدْ ...السََّدْ
السد ... السَّدَّ بوابات الظُلمَة
الهَـتـَك استار الغُمَّة
وكهرَبْ عصبات الليل
كشفت أنوارو العتمة
**
الرد... السد
السد البلَّل ريق العطش الكان
متوهِّط فوق شفتين النيل
العطش الحرَّق جوف الأرْضِ
وخلاَّ جروفنا ..
حصا وضانقيل
كَتَل التمرات ..
الكانت
شيّالة ، سبيطا اتكابا
هلك البقرات ...
الكانت
مندلِّى ضروعا وحلاَّبا
ومحَّق كوم صبرِك يا أمة
**
الرد...السد
السد .... منَّ الله مدد
مدد الله ... المالو عدد
السد ... عرق الإنسان
السد .... جُهد الانسان
إنسان ،، هذا السودان
إتوكّل على ربُّو ووحَّد
**
الرد...السد
السد
بعد الدمعات ... البسمة
بعد الكتمات ... النسمة
بعد البكمات .... الكلمة
بعد الآهات ..... النغمة
على كلِّ ثغور....... البسمة
وقالدي العتمور ... النسمة
ومندلقي سطور ..... الكلمة
ورنّة طنبــور .... النغمة
لي شعبِ صبور ... السد
لي شعبِ جسور ... السد
**
الرد... السد
السد .. رابض .. ضرغام
السد .... هَدَم الهــدّام
السد .. لُقمة ..... وهِندام
الهازم .... غيلان الجوع
الجاسر .. طوفان "النوع"
الكاسر ... طوق الجِّهويّة
الآسر .... شبح الإثنيـة
الراوي .. رؤيـة وأحلام
ومداوي .. كِلْيَة ، وأورام
السـد ... هبَّتْ أنســام
خُرتايــي ، ودفتر واقلام
للشفع ........ فقرا وأيتام
أرزاق ...... قَسَمَا القَسَّام
للنبتة ........ وكلَّ الأنعام
**
يا حارسَ اْقوان أسيادك
يا لاعب .... قدَّامُنْ باك
الباب مفتوح .. مفتوح
تنتاوق ليه بالشُّبـــَّاك ؟
يا رامي الشبكة الأفاك
تصطاد في الموية العكراني
صدقني حتجني الأشواك
أشواك في قلبك يافاسق
المنَّك مرقت بالساحـق
رجعت لك ... صدّت بالماحق
يا تور الله الأنطـــح
ترباية الســـي آي ايه
ومدوعَلْ عند "الشَّاباك"
قرنينك "عوزي" و"ساركوزي"
"باراك" .. الدَّفَرَك وباراك
ما اتعلم من دقـْسَت "بـوش"
"الزيدي" وضرب البرطوش
ادخل لا جُوَّة وناطِحْنا
بالسد بنناطحك ....
بننافحك
بالحق الناصر نصر الله
بالعزم الثوري الشافيزي
**
الرد... السد
السد ... قهرك ، هزمَكْ
السد ... دحرك ، لطمَكْ
السد ... هكمك ، دكَمَكْ
السد .... صفعك ، لكَمَكْ
السد ..... هجمك قَهَمَكْ
السد ........ كمّل فهَمَكْ
السد..... لجَمَك ، لخَمَكْ
السد .... دقشك، صدمَكْ
السد ....... سجَّم سجَمَكْ
السد .... نهشك ، كدمك
السد .... فتلك .... برمك
السد ... كتلك .... فَرَمَكْ
***
السد..... لطشك ، صفَعَكْ
السد ...... قشطك ، لبَعَكْ
السد ...... ربَشَك ، خلعَكْ
السد ....... فنَّاك ، جدَعَك
في النيـل ، والنيـل بلَعَكْ
كُلْمالَكْ ، تحتل ، تغرَقْ
تتغورر ،، لامِنْ تشْرَقْ
تنطنبج .. تشهق ما تلحق
**
المحكمة ...!! قُتَّ جنائية؟
الجن الكلكي الفي اضنيك
تتعلّق قِـرَبُو ويغباك
الحَقْ يأباك ... يأباك
ألْحَقْ ياباك... ياباك
أهدافك غابت ما جابت
أهدافك خابت ما صابت
دعواكَا فشَنْك وماسورة
***
ما شايف ؟؟ عينك تتقدْ
بالرمد الرامــد تنسدْ
الدنيا شعوبا المأسورة
في غزة ... وقانا ..غوانتانامو
في بحر البقر المقهورة
بُوغريب ... هيروشيما .. وتورا بورا
الناس معصورة وممصورة
أطفال مطحونة ومصهورة
**
ما شايف ؟؟ عينك تتقـَـدْ
أحَوَلْ ؟ أعور ؟ مكفوف ؟
الحَوْلا بصيرتَك ... عورا
مكفوف إحساسك وضميرك
مين زيك إنت ومين غيرك
في الدنيا جريمة انسانية ؟؟؟
**
تتذكر ؟
إنت بتتذكر ؟
تتذكر "تاتشر" و"الفوكلاند" ؟؟
تتذكر إنت "ارجنتينك" ؟
عِنْ ساعت الجد والحارَّة
هارب مرقنّك كرعينك
فكّيت البيرك على هارفارد
تندسدس إنت وتتلصص
تتعلم كيفن تتجسس
ما أبخس علمك في هارفارد !
ما أرخص علمك في هارفارد !
يا ماص الدم .... الدم
من عرق الحرف المعتوه
ياداس السم .... السم
في كاس العدل المشبوه
السم اليهري مصارينك
تتبجح وتنبح في لاهاي
إِشْ يا كوراك .. كوراك
كَرْ يا كاكاي ... عَرْ .. وِشْ
عَـرْ .. وِشْ .. يا جار الكارو
جر يا نبَّاح ... لاهاي
الصقعة الصاقعة ... الصاقعة
اللبعة اللابعة قفاك
الصفعة الصافعة الخد
اللبقة التزرد حلقومَـك
حلقومك إنت وحرُّومك
حرُّوم المحكمة ... إتلمن
غزلَن فتلَن
المشاطات
اللخباطات
الهراطات
الفراطات
السواطات
الفبراكات
الأفاكـات
الشرباكات
اللفاقـات
النقناقات
زرعَـن ... شَتَلَن
في ليلِن إنت الوطواط
يا ثعلب....... والثعلب فات
في إيدينو ... سبعة كضبات
ومذكرة حتلت في البير
واتماصت من قولَتْ تِيت
والبير إتهدَّت هد
إندفنت ... جافاها الطير
صاحِبْهَا .. واحد خنزير
خنزير، في صورة إبليس
إبليس سمّوهو لويس
الزير ... زير الحرّوم
ما زيرنا .. وما موية النيل
النيل الحاضن السد
والسد ...سوداني أصيل
**
حالفين ... حالفين .. حالفين
حالفين بالسّوّا جبل مرة
نتوحد في الحلوي ومُرّة
وبحقِّ الخلق الرّجّاف
ما فينا الراجل الرّجّاف
والنصب البركل وتوتيل
والنخلة الفارهة على النيل
الشمش
الطير والانسان
القمر الساطع والليل
حالفين .. حالفين .. بالقرآن
يس ... بي نون .. والرحمن
قسم التوراة والإنجيل
بالمد الشعبي الإتوحد
والغضب الشعبي الإتمدد
ماب نركع يوم بين أقدامك
نتصدى نقيف لك قدامك
نتحدى .. ننجِّم نجّامـك
ونشد بطّانك ولجامــك
***
ياخويا عمر ... ياخَيْ
ياصاحي ضميرك حي
كيَّك مُو نَيْ .. مُو نَيْ
حَرِّق مروادك ونجِّضْ
فوق كبد اوكامبو الكي
وبنونة تقول لك سَـيْ
ومهيرة تقول لك سَـيْ
قول لي مورينيو المبدول
رُوقْ أدّها صنّة واسمعنا
إشْ معنى بلدنا وإشْ معنى ؟
نحن الشاتلنــا وزارعنا
غير الله كدي اليجي يقلعنا
أصبحنا بِـِ الله وأمسينـا
رصينا صفوفنا اتواسينـا
أخلصنا النية اتواصينــا
وان بقى شايفنا اتمسكنّـا
بالمسكنة نحن اتمكنّـــا
**
يا خويا عمر يا خَــيْ
نضمك مُو نَيْ .. مُو نَيْ
قول لي مورينيو المبدول
وسمِّـع أركان المجهول
دارفور دي أهَلْنَا وأحبابنا
دارفور اخواننا واصحابنا
دارفور دي ترابنا وتيرابنا
جامِعْنَا الدين والوطنية
سحنات الزنج العربية
وسِمَات العرب الزنجية
في حوش القـُرْب الإنساني ..
على بَعـْضِ اتفتحت ابوابنا

[أبو وائل]

السر عثمان الطيب
قلبي الموجع

الله يا خلايا لى قلبى الموجع
حبى فارق تانى ما ظنيتو يرجع
وين صفا ايامنا لما زمنا طاوع
كنا ننهل ديمة من فيض عطفو نرضع
للامانى الحلوة والآمال بنزرع
نبنى عش لارواحنا بعد الفرقة يجمع
فى الاماسى الحالمة لما قمرنا يسطع
كان نبث نجوانا والنيل جارى يسمع
يا حليل آمالنا ضاعت مننا اسع
قلنا نسرع ليها كان مقدورنا اسرع
آه وآه محبوبى دمعو ودمعى ترع
لما قالد ليا بالاحضان وودع
قت لو نان يا حبى حالى دا ما بيشفع؟
كيف تروح وتسيبنى حبك فى ترعرع
قالى لا تبكينى كيفن منك اقنع
ما دى عاد قسمتنا لابد ليها نخضع
ماهوراضى الفوتة كم خطوات تراجع
لما غاب واتوارى ليهو عيونى تتبع
مالو فات خلانى للاحزان تجرع
من بحور دمعاتى قلبى انا شال وكرع
ما خلاص فى روضى زهرى انا جف وقع
ما اظن والله تانى اشوفو اينع
والكنار فى غصنو ما جاب لحن وابدع
فاتو سيد الهامو كيفن تانى يسجع
الصبر ما قالو للممكون بينفع
مالو ما داوانى بيهو انا كم تذرع

[أبو وائل]

السر عثمان الطيب
تمري

تمرى الما نجض دفيقو .. جوهو اتقسموهو وراحو
ما عارفين شقيت بى دربو ..بالحق لى نفوسن اباحو
تعبان يوم رميت شتلاتو .. نامو منعمين وارتاحو
صنقر فى الهجيرى حرستو .. فد يوم جنبى تب ما لاحو
حدر لى جداولو سقيتو .. بى وش القباحة اشاحو
جاو قالولى من وين جبتو .. ضبلن ما بيعدى صباحو
يوم سل الجراب وانشق .. شميت لى عطورو الفاحو
شفت جماعتى قامو اتلمو .. كل واحد يزيد فى صياحو
واحد قال نقسمو علينا .. واحد قال كتيرى ارباحو
عقدو الراى على وديرى .. قلبى جريح وزادو جراحو
فت خليت حقوقى ورحت ..لى ناس بالعدالة اطاحو
اشكيلن عذابى البى .. قاضيهن تصيبنى رماحو
اتوكل على الله صبرت ..هو المن خلقو اقوى سلاحو
ينصر للضعيف فى الدنيا .. كان الهم كتر واجتاحو
كم ولهان عليل انا زى ..يكتر فى الليالى نواحو
يطرا الخالقو ينصح تانى .. ساعة الموت تحوم اشباحو
حزنان الدباس فى فريقنا .. ما طول نهار افراحو
يبكى معاى حتى الدابو .. ما اتعلم يفر لجناحو
قالى لا تئن يا خلى .. اكتم ناس كتار ما اباحو
شوف حمد سعيد من صبرو .. متقلد عذابو وشاحو
يبقى نهار حياتكم يصفى .. تشربو سلسبيل رحراحو
كيرو الكان قبيل بي شيمتو .. منو يفوت بعيد تمساحو
تتهنو وتعرفو الفرحة ..ينتشى فى الغصين صداحو
يعزف ديمة مزمار حبو .. تسكرو كلكم بى راحو

[أبو وائل]

السر عثمان الطيب

عبيـرك

"عبيـرك" دَفـَـق في الغيوم إنهمارْ

مطر.. وانسَكَبْ

رَشـَـعْ .. كَبَّ ، كَبْ

نـَفَـضْ من ضياء النجوم الغبارْ

نداهو اتحـَلب فوق رشَارِشْ عيون العَوِين الصغارْ

غُـنا وازدهارْ

فتح كم دروب اندهاش وانبهارْ

نضح كم جداول تجاه الجروف والنخيل والخدارْ

رَسَمْ قوس قزحْ

جناحين فرح للقماري البِـتَـعْزِف أغاني الرجوع للوطنْ

مقاطع نشيد لي رجوع الوطن ، البَخَافْ ـ إنْ غَفَلْنَا ـ ومَرَقْ

تاني وين نلقَا ؟ وينْ ؟

حرام .. زي عبيرك بعد ما عزف للوطن أغنيات الرجوع والحنينْ

يخاصم الوطن

يخاوي الرحيل .. يسيب الديــارْ

يقوم يمشي ينجَعْ .. يقاسي المحنْ

يسافر .. يهاجر .. بعيداً بعيدْ

يجوب الفيافي .. ويكون منتهاهو أقاصي الوَدارْ

من مطارْ .. لي مطارْ

يكابد يصارع دواهي الشَّتات والمنافي

شتاتاً يغرِّق بيوت القصيد بالدموعْ

بلا حضن دافي

ولا مدَّة ايــد

حشاهو اتـْحَـرَق بالحسار..

حشا النيل عليهو اتـْحَـرَق ، بَقَّ نارْ

متين الرجوع ؟ متين الرجوع ؟

متين ـ يا عبيرا ـ ألاقيك هناكَا

نواحي البلد

مع نسمة نايمي ومقالدي الجروف



أقالدَك .. .. واسالمـَك

اناضْمَـك واكالمــَك

أضمَّــك .. أشمـَّك

بلا أدنى كُلفَةْ ..

ولا أدنى خوفْ

واعيشك بقية حياتي

برغمِ الظروف .. الحِراب السيوفْ

طعم من بلدنا

يفجِّر حنيـنـي

يعطِّر سنيني ، بمعنى الحياةْ

يكسِّـر دروب القطارا التسَاسِقْ

تشيل جاي وغادي .. وتفَرْتـِكْ ملمَّات فرَحْنَا القَبُلْ كُلِّ عيدْ

[أبو وائل]

السر عثمان الطيب

أشواق … النخلة

شِـبِّي ، هُوبْ .. يا نخلة .. شِـبِّي

قومي طولِك

أوعي ترخي العزمِ لحظةْ

شدِّي حيلِكْ

مدِّي هامتِك فوق وفوقين للسحابة

ما السَّمي المنشرِّي هُولِكْ

بي جريدك

قوِّي راكوبة الإرادة ..

أصلاً الريح ..ماب تشيلا .. وماب تشيلِكْ

**

قومي ..

مهما الغم تمكَّن

لا تخلِّي الليل يباغتِكْ

أو يطول بالآهة ليلِكْ

حتى كان الشوك مشكَّن

ولاَّ فيك الهم مدكَّـنْ

ولاَّ عودِك بي شقا الأوجاع مجكَّنْ

حومي ..

خلي العافي تسري .. في البدن تلقالا مسكن

ابني من سعفات جريدك .. قشة .. قشة

لي صغار القمري .. عُشَّةْ

من ندى الصبح العليك فجراوي رشَّ

بِلِّي ريقِك .. وبلِّي ريقا

إنت شوقك طال عليها .. وطال عليك في الغيبة شوقا

مدِّي ضلك فوق شتولِكْ

هزِّي جذعك وارمي من قلب السبيطي

فوق تِقِي الأمل الوهيطي

تمرة .. تمرة

للعوينات التَّشابي .. سوِّي قيسابين .. تلاتةْ

هبِّدي النار بين ضلوعك .. جمرة .. جمرة

وطلِّقي الآهــ .. بالتلاتة

مسِّري الرجا وافْتليهو .. والعشم حبلو ابْرُميهو

شدِّي تالاك .. وامْسِكيهو

قوِّي .. أوعك تقطعيهـو

ماب يضيع في الله عشَمِك

وماب يضيع منِّك شليلِك

شبِّي .. هُوبْ .. يا نخلة .. شِبِّي

قومي طولِك

أوعي ترخي العزمِ ، لحظةْ

شِدِّي حيلِكْ .. شِدِّي حيلِكْ .

[أبو وائل]

السر عثمان الطيب
يا عيونك
يا عيونك لما تضحك
تضحك الدنيا وتزغرد
ماشى قادلى فى احلى سيرة
شايلى حنة وحق ضريرة
والعريس فرحان يبشر
امو رابطالو الحريرة
اختو جابتلو الجبيرة

يا عيونك ...
فرحةفى عين العروسة
لما تلبس قرمصيصا
تمشى تمرق فى السباتا
يا حلاتا .. ويا حلاتا
تضحك الدنيا وتزغرد
والعروس تخجل تغمد
ايدا فوق بتضارى عينا
الا اشواقا وحنينا
جوة مكتومة ودفينة
فى القليب ترقص تعربد

يا عيونك
يا مشاعر الدنيا واحساسا وكلاما
يا عيونك ... زى غمامة
لى هجير الصيف تبرد
والبريق عبادى شايل
يعبر الآفاق يزغرد

يا عيونك ..
لما شفتك مرة جاية
بالفكر جالت حكاية
وكت ضفايرك جا النسيم فراها شالا
جم عيونك وما رتالا
قت يا ريت لو كنت نسمة
كت بضارى عيونك انتى
من عيون الناس واغتى
كنت بحلف ليك وحاتك
يا حلاتك ..يا حلاتك ..يا حلاتك
اما عينيك ..كنت بحلف ليك وحاتن
يا حلاتن ..يا حلاتن ..ويا حلاتن

[أبو وائل]

السر عثمان الطيب
ليل مأساتي

ودع وفات رحل دون عودة ليل مأساتى
طل صباحو واشرق نورو فى ساحاتى
ريدك ضو يا محبوبة كل ظلماتى
صار لى الدليل يا روحى فى طرقاتى
قبلك كنت غرقان فى بحور دمعاتى
فى المى وعذابى انا كنت فاقد ذاتى
عمرى العشتو غيرك ضاع مع اناتى
طال لامن بقت لى كالسنين ساعاتى
متجرع براى يا روحى كاس مأساتى
ما لقيت ليا زول شاركنى فى آهاتى
لكن جيتى لى لملمتى كل اشتاتى
خليتينى ليكى اصدح واجيب غنواتى
واهديك من قليبى الحابى كل كلماتى
حتى القلتو قبالك كمان والآتى
ليك جارى النغم قوقن بو قمرياتى
منتشى ديمة من طيبة عبير زهراتى
والكون قام رقص ردد جميع ابياتى
فرحان قال معاى حالف يعيش لحظاتى
ترديد اسمك اصبح لى من عاداتى
فى سرى وكمان فى جهرى بين غنياتى
منقوش ديمة بى نور فوق قصور جناتى
عاشقو انا ليل نهار زايدلو فى دعواتى
غيرك تب محال تخضر يوم واحاتى
ما بيرشع وراكى الغيث يرش واطاتى

[أبو وائل]

السر عثمان الطيب
قلبي ولهان
قلبى ولهان .. قلبى يا ناس .. قبلو عاد وحيدو
راح ضهب تاه .. كتر الآه .. دار يموت بى ريدو
العذاب طال .. هادى والحال .. لما كشكش قيدو
لا مرق حام .. لا رقد نام .. جفنو طال تسهيدو
دمعو سال كاب .. شوفو يا صحاب ..منحوا ابكو وزيدو
جيبو اخبار .. اقرو اسرار .. فى عيون مريودو
وصلو القول .. قولو مكتول .. جيبو زكرو وعيدو
كان هو بيحن .. ورو كيفن .. دا المصير بى ايدو
قلبى بالليل .. باقى بالحيل .. النواح بيجيدو
صارع الهم .. مابى ينجم .. بيهو عالم سيدو
كان مشى الدار .. للحبيب زار .. يبقى داك يوم عيدو
دابو ينعم .. وبرضو يسلم .. من زمانو وكيدو
عارفو فنان .. يرسل الحان .. يا حلات تغريدو
بالحنين ذاب .. غنى كم جاب .. كان غناهو يفيدو
ترجم احساس .. جابوللناس .. زادو فى ترديدو
غرد الكون .. كلو مفتون .. باسمة ترقص غيدو
للقرير داك .. خلى قوماك .. يلا ننظر صيدو
تلقى كيف كيف .. حتى فى الصيف .. خلفو جارى وليدو
فى التمر فوق .. تسمع القوق .. دا الدباس بنشيدو
بالبلد طاف .. ما جفل خاف .. ما الخلوق بتريدو
قوس قزح بان .. للسحاب كان .. زى عقيد فى جيدو
والفرح زاد .. والغصن عاد .. حلوة نايرة ورودو
والبرق فر .. مرة كركر .. غيمنا رابطة رعودو
الرذاذ رش .. خضر القش .. تانى زاد فرهيدو

[أبو وائل]

السر عثمان الطيب
الوداع

لسة ما كملت سعادتى .. بى وصولك ودار تســافر
الوداع انا اصلى عارف .. قدرى كاتبلى الـــدرادر
يوم قدومك حالى اصبح .. كالربيع يغشى الازاهر
واستحال حزنى المدفن .. فرحة احــكيبا واجاهر
طلة نور البهجة ساعت .. نور محياك جانى زايـــر
الوجود الكان مضلم .. فجأة حسيت بيهو نايــــــر
شوفنى شوقى الفى عيونى.. داير اضارى ومانى قادر
اللسان كان غلبو يحكى .. والدمع فاضح المشاعـر
فيك لقيت املى البكوسو .. رجيتو طول العمر صابـر
ما بصدق كونو القا .. وين بيتلقى حلم عابــر
ودار تسافر ما اظنك .. للبيبقى وراك خابــــر
يتقطع راس خيتى وابقى .. كاليتيم فى الدنيا حايـــــر
اشقى بى سهر الليالى .. بى غدر زمنى المكاجــــــر
واستعيد الماضى علك .. لى زمانا الولى فاكـــر
لو نفد قدر الله فيَى .. وليك نعونى من المنابـــر
لا تنوح شن بسوى باقى .. ما زويل غناى وشاعــر
الوداع آه موج اساى .. وراك شوف كاسحبى دافـــــــر
ما لقيت فى قشة امسك .. الوداع فى الدنيا بعدك كل شى شايفو غريب ونافر
لا غنا الاطفال غناهن .. ولا ازاهــــــــر الــروض ازاهـــــر

[أبو وائل]

السر عثمان الطيب
أفتش ليك و ألاقيكي

افتش لك
وكت اضهب
وسط ليل الضنا الودر على اثرك
حرس كل الدروب .. قنَب

الاقيكى ..
نجيمة تضوى قدامى
اماسى سنينى وايامى
قوافل الشوق تقوم ترحل
عديل قاصداكى ما بتتعب

افتش لك
وكت بحر الاسى التسب
تماسيح موجو والشيمة
على فى نصو تتكالب

الاقيكى
جروف آمالى قاصدانى
ايديك ممدودة خاتفانى
على كفيكى شايلانى
تجاه بر الامان مركب
افتش لك
قسا الايام لدغ عقرب
فراقك سمها الهارى
قطع اوصال شرايينى
يفور فى الجوف اهضرب بك
اناجيك والفكر غيب
الاقيكى
بسيمة تلوح امام عينى
دموع ريدك تآسينى
حنان الهمسة واللمسة
بلاسمى اكركعا واشرب

افتش لك
سموم الدنيا كتاحة
هجاير فُرقتك مرة
متل اقدارى لفاحة
كما الازمان دواليبا
تدور وتدور وتتقلب

الاقيكى
نسيمة على الشِتيل هبت
سرت فى روحو واتربت
كِبر واتنفس العافى
قَلب رطبو وشرب لونك
مندِى متل نداك رطَب

افتش لك
بكا صخرك عليك يا خنسا ما كفََى
تقيد نيرانو جيبة اسمك
يلوحلو على الطلل رسمك
يفرتق جرتقو ويرحل
يموت لا سيرة لا زفة
رحيل لا قِبلة لا مذهب

الاقيكى
وِشى امى اليصابحنى
كلام اختى اليفرحنى
حنان بتى التداعبنى
تكيل فوقى التراب تلعبافتش لك
وتر محزون بكى اتعذب
وكت رمت الهدم ثاكلة
جرت ندبت بكت لطمت
خدود فجر الغنا الغرََب
الاقيكى
قمارى تقوقى حامدى الرب
حمدتََ الرب تسابيحى
غناها يزيل تباريحى
اقيف وسط الخلوق عشقان
اغبِِِى واترجف واطرب
افتش لك
سراب صيف ما دنا وقرََب
قطع نفس الامل حسرة
مبارى وما انقطع عشمو
فقد راس خيتو واتوهدب
الاقيكى
لقاك بالدنيا والفيها
ربيع ما اروع اللقيا
رحيق ما ابدع السقيا
مقيلى معاك وسط واحة
يعيد للفرحة افراحا
سحاب طوالى دار دمعو
يجود لا غشََ لا كضََب

[أبو وائل]

السر عثمان الطيب
العيد
اسباب اساى وسر بكايا العيد يمر
للناس فرح وانا لى ترح من حالىكر
الناس تقوم تمرق تحوم قبل الفجر
بين هاش وباش وانا دمعى راش لازم الصبر
الطير نضم رسل نغم فوق التمر
شوف يا رفيق كم بى ضيق العيد فقر
وانا حالى حال ما فى بال مشغول كتر
بى زول نجع لى ما رجع من كم تشر
شيشك بشيش لو لى ريش كت ليك زر
كت عاد بجيك واتهنى بيك باقى العمر
بعدك يمين انيت انين فوق الجمر
كيف النجاة وطعم الحياة فى حلقى مر
جوفى اتحرق وانل ما مرق حدى العصر
لى مافى زول يهدى ويقول ياخد الاجر
انا ما بلوم لو جيتنى يوم فوقى النذر
قبال اموت والروح تفوت امشى القبر
زولى الحنين القالو وين عاد العذر
خلانى تب آه ما كتب لى فد سطر
بين السحاب اتلاشى غاب ضى البدر
سود على دنيانا حى عز الضهر
مبروك عليك العيد يجيك بى حال يسر
يلقاك معاى فى بيت هناى يا الليكى در

[أبو وائل]

السر عثمان الطيب
يا طيفاً
يا طيفا صابحنى ... بالله ماسينى
اوعك تغيب يا طيف .. فد لحظة عن عينى
اسكن مسارب الدم .. بينات شرايينى
شاركنى فى الانفاس .. اكتلنى واحيينى
مجروح فراقا عليل .. طببنى آسينى
لازمنى ليل ونهار .. هجِدنى رسِينى

يا طيفى عيش واياى ..فى سرى فى بوحى
زى ما هى عايشة معاى .. عصفورة فى دوحى
غنت غناها صداى .. شجنى وتباريحى
انساها كيف يا طيف .. حتى ان نسيت روحى

دى الفى عيونا لقيت .. افراحى واحلامى
وقدت مشاعل الضى .. فى دربى قدامى
شالت معاى الهم .. احزانى وآلامى
صبحت منابع الهام ..الحانى وانغامى

حالتنا دابو الريد .. بادنو مشوارو
راجنو عمرو يطول .. تتفتح ازهارو
لكن زمانا المر .. جارت بنا اقدارو
ليل الهنا المأمول .. انفضوا سمارو

هجمت خطى الايام .. قاصدانا فراقة
تتلصص الاقدار .. لى الفرحة سراقة
صالانى نار البين .. فى جوفى حراقة
فى الدنيا لو عايشين .. لابد نتلاقى

ساعت الوداع الحار ..فضحنى دماعى
ابكى وانوح بالبى .. والحولى ما واعى
الضاعف الاحزان .. والزود اوجاعى
همست لى قالت لى .. ودعتك الراعى

خلتنى فى حال زول ..ضهبان فقد دارو
كالقمرى طاش والريح .. عصفت باوكارو
معقول يرن طنبور .. هجرنو اوتارو
والنهر هل بيسير .. يوم عكس تيارو

يا طيفا انت عزاى .. فى غربتى القاسى
قاسمنى سهد الليل .. واشرب معاى كاسى
ياكا الوحيد فضَل .. سلواى وايناسى
داخرك وجيع ورفيق .. وشاهد على احساسى

[أبو وائل]

السر عثمان الطيب
فرحان بها

البى صفاها وصحها
رغم انكفاها وجرحها
من قلبها ..
أدتنى غاية حبها
فرحان بها .. فرحان بها

نادتنى من عمق البعاد
جاوب حرارات الندا
هزَانى هز نبض الفؤاد
يا ريت مسار رجع الصدى
سارعت قبَال المعاد
ما ارهق الخطوات مدى
صيَرت ماضى الحال مداد
دوَنت حاضر المبتدا
الحاضر المليان بهاء
والحاضر المليان بها
فرحان بها .. فرحان بها

جبدتنى من حزنى النفق
ضوتنى نص الليل شمس
لحقتنى فى آخر رمق
سوَت مآتم الروح عرس
فكَتنى عصفور فى الشفق
كتبتنى للاطفال درس
حاكتنى جلبابين الق
مرقتنى من توب هم امس
كل ما اكون مليان بها
القاها كون مليان بهاء
فرحان بها .. فرحان بها

فى ريده نادمنى السحاب
عبَانى خدرنى المطر
خدََرت فوق وش التراب
صفقت لى صفق الشجر
دوبيت وغنونى الصحاب
خاوتنى انغام الوتر
لميت مطارات العذاب
سديت بهن سكك السفر
كل ما اقول مليان بها
القاها قول مليان بهاء
فرحان بها .. فرحان بها

[أبو وائل]

السر عثمان الطيب
أرض الله الشاسعة
ارض الله الشاسعة وواسعة
ضاقت فى عينى من دونك
شارع شارع وانا اتلفت
حايم لاف كان القى عيونك
جوة عيونى ملامحك دمعة
زاد مشوار الدرب الكايسك
ماشى عليك ما خنت السكة
متمسك بك وبيك متماسك
لا جهجهنى البعد القدرى
لا همانى العارض الحابسك
داخر عشم القاك ومصمم
متقوِيبك جابدو وماسك
آه يا طفلة فجر احلامى
فى الاعماق رنت اجراسك
انا بندهلك لا تندهدهى
عجِلى جيتك تالا مدارسك
للمرقات رتبت ضفايرك
باللولاى دللت عرايسك
ليك حاحيت غربان الفُرقة
واستنيت فى الشاطى نوارسك
كل ما هبت وعدت نسمة
اشهق منها حر انفاسك
افرد حضن الشوق لى حضنك
وكل ما افتش فيى الامسك
انتى معاى فى غيبتك عنى
منى ومنك جواى داسك
قاسمتينى الروح والنبضة
واتقاسمت معاكى حواسك

[أبو وائل]

السر عثمان الطيب
ممكنة
يا اللأنك ..فى وجود الامكنة
وفى خلود الازمنة متحكرة ومتمكنة
ممكنة ...
سر حقيقتك ما مجاز
مستحيلك ..
غصب عن قيد الليالى المرة جاز
يا البنلقاك فى منافينا الملاذ
واندفاقات الرذاذ
كلما الصيف حاش خريفنا
ولح روح شدر الحراز
ممكنة ...
يا اللى حنك فجَر الفرحة اهتزاز
فى سكون المنتميلك باختياراتو العزاز
بى قناعات انو زولك
وانو هولك ادى فرض الانحياز
ممكنة ...
يا اللى عنك كم بنهمس بى حكاوينا اللذاذ
او نونس طفلة ترسم وطفل يكتب باعتزاز
عن حضورك حجوة فوق لوح اردواز
انتى جيتك تكسر الصمت البهضرب
بالعيون الشاردة فى النوم الخزاز
انتى جيتك تكسب الاحلام الى الواقع
نفاذا واستطاعة الاجتياز
وانتى جيتك تضبط النغم النشاز
تبقى للنخل البميل استنادو وارتكاز
تدى قمرات العشية لاستدامة الضو جواز

[أبو وائل]

السر عثمان الطيب

ياشول


عقيدتي وديني إسلامي
يا "شول" ليك ديانتك
تراب سودانا ليناسوا
تعال شأن جرحنا الدامي نجد نزفه ونكوس له دواء
***
تملًي عدونا متربص ، يصد المثلي والمثلك
نصب دولارو ، شرك لي ، يمد اللقمة قانص لك
ولا هو جواد ولا بيحجز
يهد ساساتنا شان يركز
يدور يحلب يمصًرنا
رماحنا يفرًقن عنوة
نهون ، فد إيك تكًسًرنا
***
غروب شمس البلد داني
روت من دمنا القاني
تعال نبقي الفجر ثاني
تفجر صمتو أجراسك
تعانق روعة الداني
تكون الركعة لي الله
تصادف دعوة الصلي
***
عشان اليوم قبل بكره يطيب جرح البلد يبرا
تقوم تقدل بعد عترة تجول في الدنيا منتصره
تحقب زادا بي بقرة حريف أو لفتين كسرة
تحرق الجمرة واطيها كفانا كفانا نتحَرق
كفاها بلدنا ما بيها حرام بي إيدنا نتمزًق
تضيع في اليم جواريها منو البسلم وكت تغرق
دسايس الفرقة مرفوضة تبور في سوقا معروضة
نحرق ونصلى بي نارا لسان العملا تجارا
تعال سوا نقلع الكاكي نآسي اليتًم الفقرا
***
نداوي الشافع الباكي
كلانشنكوفنا طورية
أزيز مدفعنا نقارة كتايب الحرب طنبارا
انين المننا استشهد ترانيم غنية نيلية
حروفا إندونت عربي منقًطة وشمة زنجية
***
تقالد "حلفا" " توريتنا"
بلدنا السهل والغابة أرضنا وضلنا وبيتنا
***
سلام يا "شول" على "مريم" يجر نعش الحب ناعي
حمامة وعنكبوت يبنن دروع الخالق الراعي
نسايم السلم تتسخر تهز بشويس جذع نخلة
رطب لي "منقو زمبيري" بشاير بي قدرة الله
***
وسط رحم البلد ينبت
سلام لي منقو زمبيري
سلام ياشول على مريم
سلام بيهو البلد تسلم
سلام بيهو البلد تسلم

[أبو وائل]

السر عثمان الطيب


الصداح


قول واطربنى يا صداح
علِّى من العذاب ارتاح
***
زيد فى اجمل التغريد
بسكر وابقى ليك عربيد
***
جيب سيرة اميرة الناس
ما انت وانا الجلاس
***
بهديك كاس وكاس من راح
عد ايام زمانى الراح
***
فر جنحيك ظلال غيمات
وعطِّر ليلنا بى غنوات
***
سو سيرة العديل والزين
فوت لى زولى رمشة عين
قولو الفرقة ما بالايد
قلبى اتحش حش بالريد
لا متين لى يسووا الفال
وامى تقولى يا البلال
***
غرد فى سكون الليل
بى حساً شديد بالحيل
لا تسكر تغبى تفوت
ما ب يفرقنا الا الموت
***
رسل لحن زى مامان
خلنى ها الاظل طربان
شان نطرا الحبيب الغاب
ده الما جانا منو جواب
***
طول غيبتو جات لي حول
دار يكتلنى انا المكتول
لامتين لى يعود فى يوم
ان شا الله السعادة تدوم

[أبو وائل]

السر عثمان الطيب
بعض أشواقي


تفضل أيها الساقى
وخاطب انت اعماقى
وقل لى ايها الساقى
بحق شرابك الباقى
امافي الكاس يروينى ؟؟
لتزهر كل افاقى؟؟
واعزفها مزاميرى
تترجم بعض اشواقى
وأشواقى !!
اتدرى ؟؟انت لا تدرى
اما كانت
ينوء بها مكان القلب من صدرى
اما كانت
حصادالعمر من عمرى؟؟
وغيثا صب فى قفرى؟؟
واشواقى
اتدرى ايها الساقى
لقدكانت مزيجا من ترانيمى
واسفارى وتهويمى
ورحلاتى بلا كل واشفاق
معى دينى
لدنيا انت تعرفها ابث بها تعاليمى
وزادى كان ايمانى
واشجانى والحانى
وحبا ظل يا ساقى
يهدهدنى ويملا كل اركانى

[أبو وائل]

السر عثمان الطيب
اتنكري
سوى البيبقالك عديل لى فى صدودك كترى
اوعك تحنى على تيهى ...واغدرى
زى ما صحابك قالوا ليك انسيهو ما تتذكرى
انسينى ما تتذكرى
وتابعى الوشاية واغدرى
اتنكرى
وبكى العيون ما ترحميهن ... وسهرى
ماب تقدرى
وعارفك بلاى ماب تقدرى
شيلى السعادة ..عذبينى ودردرى
وخلى الموع فوق الخدود يجرن جرى
اوصيك ما تتكبرى
وعارفك بلاى ماب تقدرى
ولوتقدرى
فى يوم لقانا اتاخرى
كان ثانية بس اتاخرى واتعذرى
لكن محال حا تبدرى
وبلقاكى واقفة تفكرى
ومرات براك تتحيرى
يسرح خيالك فى لقاى تتذكرى
بالك يغيب وتودرى
ولمان اغيب تتكدرى
تبكى وتوصفى ..(مزدرى)
ليلك يطول بيك تسهرى
***
عارفانى عذرك بقبلو وتتعذرى
وعارفانى بغفر ليك كمان تستغفرى
تستغفرى وتتعذرى
يا سمحة لمان تكبرى
حا تعرفى ليه ما بتقدرى
وعارفك بلاى ما بتقدرى
والله احلف ليكى وبيك ما بتقدرى

[أبو وائل]

السر عثمان الطيب
الدنيا


خربانى ام بنايا قش فراقة الحبايب
مالا الدنيا دار الغش تكتر فى النصـايب
كت عايش مع محبوبتى مبسوط خاطرى طايب
جاتنى الدنيا قالبى وشيها ورتنى العجــايب
كل املى البنيتو اتهد واصبح كوم خرايب
اطلال تحكى للما عرفو كيف قاسى النوايـب
كالمجنون بلاهى برايا فى الضحى والمغارب
فاقد رشدى ناحل جسمى لونى اصفر شاحـب
فاضلى الجتى لى فى الدنيا والفكر اصلو غايب
صر ما بفرزالنس ديمة حتى اهلى القرايــب
روضى الكان زمان نسامولى زهرو بيداعب
مالو الليلة لافحة سمومو كتاحة وهبايـب
والناس ما بتـــريح ذاتا كــــم لله عـــاتب
زاد لى الملامة وقالى مجنون وانت صـايب
غنيت ما نفعنى غنايا عاد شن لى جايب
بس ساكت معذب قلبى ديمة انا ليهو خـارب
صر زى القمارى الدايحة شايلة الشوق تغالب
زى زولا بعيد فى غربة ما اظن تانى ايب
والنار بين ضلوعى لهيبا قاصد قلبى طالب
اه يا قلبى شقيش تمشى اخير لك تبقى تايـب
غايتو السلوى يا خلايا واصحابى الاطايب
فى طنبورى ،فى نغماتو ديمة قليبى دايــب

[أبو وائل]

السر عثمان الطيب

بعدك طال على


بعدك طال على وانا قلبى متوجع
متعلعل رقد بى صبرو متذرع
كلما دق اشوف دمعاتى بترع
ساوى الخد دريب جات لا تحت تسرع
مرات العيون تبخل هى ما تدمع
للجوف الحرق عطشان عى ما تدمع
برضى على العلى انا قت اغنى ابدع
القى غناى الم فى حشايا متقطع
كل بيت من قصيد كاس ليهو متجرع
بجتراهو ذكرى ومانى متورع
يوم من تالا زولى انا جا السحاب مسرع
عبادى البريق شايل قصادى يشع
اه انا يا سحاب شيل قلبى امش ودع
خلنى ها اللموت لى سيدو هاك رجع
حبيبى انا توب فرح لى بيهو عود قنع
باقى انا بى ضناى طولت متلفع
قوليهو الفريع الكان زمان يانع
كان شايل الثمار بى شيلو متفدع
والكان قمرى فوقو يزوزى متربع
شايلاهو الهبوب جاى غادى لى تجدع
واليوم فى العمار قادل جا متسكع
حامى النوم عينى ده حسو بيعلع

[أبو وائل]

السر عثمان الطيب

البني الخديره الفنجري


البنيي يا الخديره الفنجريي
الشتيلة الشاربي من
نفس النسيمات الندي
***
المطيرة الصابي فوق جدب البيادر
يا محطة شوق مسافر
كل من صخب البنادر
***
يا بشارة يوم رجوعو
خفقت المابين ضلوعو
نور شموشو الجات توادع
في الفجر لحظة نجوعو
***
ضاوي فوق خدرة جروفو
من حنانك لون حروفو
الاستجاربها من ظروفو
ومن كواني بحر زمانو
الافحي طوفو
***
ضمي من قدر الدميري
وضاري من وهج الهجري
هونيلو قسا العسيري
ومن ضفايرك وسديهو الليل حريري
***
هدي روعو والتياعو
قوي بي حبك ضراعو
باقي داخرك في السفر
ذادو ومتاعو
***
نسي نوح زمن الندامة
المنو سارق الابتسامة
كوني لي عطشو الغمامة
رافقي تاتي وابقي
لي دربو السلامة

[أبو وائل]

السر عثمان الطيب

سطاشرات الظلم


يلا يا نيل يلا ... دفق
لينا كب خيراتك .. أدلق
الجروف ..
عطشاني ضُمّه
المحل ...
في دارنا عمّ ...
أروي يا نيل أروي ثم
في مسارك ..
هد سجون سطّاشرات الظُّلمِ ..غرّق

***
في البيوت نصبو المشانق
الدّغيش ... صلبوا الطفولة
داسوا قيمة ابن آدم ....
والتسامح .. والفضيلة ....
كتفوا الوردة البريئة
وفي احتفالن بي ذبولا
جابوا رصولا الجحافل
شان بتتفلت ..... تناتق
أروي يا نيل أروي ثم
في مسارك ..
هد سجون سطّاشرات الظُّلمِ .... غرّق

***
ختوا مرودان مَحَمَّى
فوق ضهر وطناً ممدّد
عضَّ لامن صبروا دَمَّم
لحظة تب ما انصر غَمَّد
بالعنج جلاّدو واقف
ليل ... نهار ..
يدِّيهو جَوَّد
الملح لي نزفو مَرتِق ..
والقيود في إيدو جرتق
أروي يا نيل أروي ثم
في مسارك ..
هد سجون سطّاشرات الظُّلمِ ...غرّق

***
ساطوا عين عين الحقيقة
لفوا أعناق الحقيقة ..
خمسة فوق اتنين حِداشر
وخمسة من عشرين حداشر
الرصاص جوه المدارس
الكتاب تحت المدافع ...
السحاب بالواطة يجري
الجداول يابسي طايري
الكتر .... سَمّوهُ زهره
حتى سَمّو ..
" الليلي " بكره ..
تسرق الايد البتحكم ..
وتحكم الإيد البتسرق
أروي يا نيل أروي ثم
في مسارك ..
هد سجون سطّاشرات الظُّلمِ ...غرّق

***
شطبوا من قاموس بلدنا
كل دالة على ا لرجالة ...
طرطشوا الشافع المدردح
علَّموهو على الدغالة
والمصاقر الشمس يبني
والبشيل المونه يقنت
جروا من تحته السقاله
بدلوا الكان إيدو تزرع ..
شهري صار يرجا الحواله
من جنا الفي الغربة يشرب
من شقا المر للثماله
اللصوص ...
غدروا العروسه
الكلاب ...
عَرَّت جمالا
شان عريسا .... البكره سيرتو
يبقى يوم فرحو استحاله
من عبرتو اللقمه تزرد ...حلقه
ماب تندلا ..
تخنق ....
أروي يا نيل أروي ثم
في مسارك ..
هد سجون سطّاشرات الظُّلمِ ...غرّق
* * *
قصوا جنحات الخُداري
دسوا قوقاي القماري
كبوا في قدح المحنَّه
سم عقابيل المظنَّه
ضيعوا الذات والهوية
خموا من كومنا الشويه
خَتُّوا بالن لي قمحنا
باعوا قبال ما ننورق
أروي يا نيل أروي ثم
في مسارك ..
هد سجون سطّاشرات الظُّلمِ ...غرّق

* * *
الذئاب مطلوقه تنهش ..
... يابا ...
عنوان االقصيده .
تبرز الأنياب تكشِّر
في وشي الفكره الجديده ...
تقرُش ..
اللوح .. والدوايي ..
والحروف تقطع وريدا ..
قاعدي للتاريخ تغالط ...
مادي ... للمنطق لسانا ..
تشكي من تُخمة بطونا
ناطّي ... فوق معلاق عشانا
فاكري انه الليل مكتَّف ..
ومستحيل .. الشمس تشرق
أروي يا نيل أروي ثم
في مسارك ..
هد سجون سطّاشرات الظُّلمِ .... غرّق
* * *
ولما روح الصَّبرِ ..
ضاقت ....
ضُمَّه من صبر الغلابا ..
قامت .. المكتوله تدبي ...
وسمعت الكوراك ... في غابه
الشِّويفعي .. الدَّابا ... يافعي
طنطنت .. جدعت كتابا
والمرق كايسلو لقمه ..
صدَّ .. والفي ... إيدو سابا
التِّمير... العودا عوبَسْ ...
قال : " محال ... انشق " جرابا
التقاوي .. أبا .... حتى .. يطلع
زرعو .. من بطن السَّرابا
القِميره .. انضارا نورا
ضَلَّمت ... درعت حِجابا
بلعت الأوتار .. نغيما
دومَسَتْ سكتت ربابه
" نُص رجب " حلفت تصومو ..
بايتي عطشاني السحابه ...
والسؤال ... " لمتين "؟
مسمَّر في انتظار.... فرج الاجابه
والإجابه
دون معاد ..
الكون تفجَّر ..
في وشي " الحربا " .. وصحابا
الجموع .. بي قوه هتفت ...
زلزلت ... عرش العصابه ...
هادره .. والعصيان سيوفا ..
ومطلق الإيمان ... حرابا ....
" ثورة .. ثورة "
" ثورة ... ثورة "
ثورة ... كل ا لشعب قائد ...
سكَّة أكتوبر مَشَابَا
دك .. " أمن الطغمه " أقسم
تؤخذ الغايات غِلابا
وفي سبيل العزَّه .. أهلا ..
بالرصاصه .. ومرحبابا ..
ضحى .. بي شهداهو .. صمم ..
دق للحريه ... بابا ..
أصلو لمّا ... الشعب يأمر ..
تبقى ..
لازمه الاستجابه ..
" والوصيَّه ... الوصيَّه "
القصاص .. لا بُدَّ مِنُّو ..
ونبقى .. ميَّه على بلدنا ...
ونبقى ميَّه على ترابا

[أبو وائل]

السر عثمان الطيب

الخرطوم .. بدونِك


الخرطوم بدونِك ..!!
ضهباني ..
وتفتِّش لى واحات عيونِك

**
تاهَت في الهجاير
باهِت لون جبينا
تتلفَّت تعايِن
مالي الشوق عيونا
تتعشَّم ، تصادفِك نظراتا الحزينة
تصغر بين زحاما
وتصبح ما مدينة

**
يكسي الليل بيوتا
وتتوشّح ظلاما
يحكى الحال سكوتا
ويتبعثر كلاما
فقدت يوم رحيلك طعم الابتسامة

**
النيل .. فوق خدودا .. دمعة بكت عليكي
قبلِ يحين فراقِك
ملتاع مشتهيكي
لو يقدر .. يغيِّر مجراهو ويجيكي
طافت بين ضفافا
كايساكي المراكب
وقمريّات تنادت للعُش في المغارب
والعُش.. يا حِليلِنْ .. عَصَفَتْبُو الهبايب

**
أرصفة الأماني .. طال فيها انتظارا
ساعت اللقيا عدّت .. وفات ميعاد قطارا
هزَّتْ راسا
بِلْعَتْ غمَّها وانكسارا

**
فاقداكي المآذن ..
واجراس الكنايس
لماّت المآتم .. وزفّات العرايس
السُّمرة الأصيلة .. وايَّاما العوابس
هجرات الغمايم
واطفال المدارس

**
تسألني الشوارع
عنَّك وعن مكانِك
جلسات الفتارى المنتظرين أوانِك
همهمة الحيارى .. والباكين عشانِك
الناس يسألوني
واسأل غيري عنِّك
سبب الفُرقة نحنَ .. ولاَّ الجفوة منِّك
وليه الغيبة طالت؟؟
ليه يا المِشْتَهِنِّكْ ؟؟

[أبو وائل]

السر عثمان الطيب

مشتاقة لي ؟؟


مشتاقة لي ؟؟
واللهِ بالأكتر أنا !!ّ
**
واللهِ من شوقي العَلَي
أنا ماني عارف مين أنا !!
أنا هسّه ميت ولاَّ حي !!!؟
**
الانتظار قاسي ومرير
الثانية تتمدد سنة
مشتاق ومشتاق بالكتير
في الاحتمالات والمنى
إتلاشى كالحلم القصير
إتعبَّا واتوجّع ، غُنا
لو بي إيدَيْ كان المصير
أخفيكي جوة الذات هنا
**
أشواقي ليك شهقة غريق
يتشابَى بي آخر نَفَس
صرخات نداهو المستغيث
دوّت في صمت الليل جرس
إستدعى إسمك طوق نجاة
ما كلّ صوتو ولا انحبس
مستني فيك وعد الضفاف
إسترخى بين إيديكْ همس
**
أشواقي ليك ..
ولـَـه القماري وحِـنَّــها
شغَـفَـا ولُهاها وجَـنَّـها
لو فكَّ .... جنّح منَّها
بين الرياح ـ
طلْوَح جناها وطشَّ راح
لكنها ....
بالصبرِ تستنى الإياب
آهاتا ما قسّنها
بالصَّبْـرِ تحتمل الغياب
دمعاتا ما نسّنها
تتلهى بالأمل العــــذاب
ما خاب رجاها وظنها
**
أشواقي ليك
رحلات غيوم من غير بداية وانتها
عبَرَت فضاءات الحنين .. عدَّت حدود الإشتها
يا ريت عشان أوصل أجيك
يا ريتن ، لو يوم كنتها ..!

[أبو وائل]

السر عثمان الطيب

اليتامـى


الصغيرين .....
اليتامي
البُطان
الياما ، ياما
في الوجود
ماضاقوا فرحة
ضمّة ...
لاطعم إبتسامة
اللّي ما دخلوا المدارس
ولعبوا في حيشانا
قيرة ..
الكراريسُن حِيطنا
الصّويبعاتُن قلاما
في السراب قاعدين يضَرُّوا
والحصاد
يوم القيامة
الحُنان ، الماب يضُرُّوا
الهدايا ....... الماب يخرتوا بلاسبب صفق الشِّديرة
لابيحوا القُمري قيلتو
لاب ينتّفوا ريش حمامة
لاالنَّبل في ايدُن أذيَّة
وما حصل ناشوبا طيرة
اللُّطاف
الما بيَخَتوا
العُفاف
الماب يخُتّثوا
مرة ، بالُن ، للبيدَّي
لاب يبحلقوا في جيوبو
لاب يمدَّوا عليه أيدي
* * *
الشويفعين ...اليتامي
البحوموا
ورا البهايم
في صقاع بيوضة يرعوا
من قبُل ينجض عِويدُن
بي قساوة الدنيا يوعوا
يومي
في صيفا اب سايم
العراريقُن ضراهُن
والسديريّات
فنايل في شتاهُن
العِصيَّاتُن يهشَِّن
وتاني ما فيهن آرب
غير وكِت حالُن يوتِّر حيلن الهالكا اللُّواجا
في الوقاف
ينتكلوا فرقِن
او يميطوا الشوك بشيشي
ولما يرجعوا للضارب
في المغارب
في المطيرات حين يرشِّن
لما تتكسر اللواري
وتعدم الناس الزوادة
ديل يجوك
بي طيبة يجروا
بالوجوه السمحة ... سمحة
فوقا رغم الحزن ، فرحة
كل واحد بي قفيفتو
فيها كم بسمة وزيادة
والبيدِّي ،علي الله أجرو
* * * اليتامي .......
العدَمين
الغلابا
المتعَبين
المساكين
الضَّعاف
البيحلوا بي رغيفة
جوعي
والغيرُن بطون فيها كُلْ ما يسري يمري
الفتاري
المراهقين
البلاقوا الدنيا داجِّي بابا مقفول في وشيهن
البيهنقلوا بالشوارع
من طرمبة ولي إشارة
طول نهاراتُن يدجّوا
في شمش موقودة نارا
والكريعات ماب تشيلُن
من كتر ساساق مشيهن
ولما يرجعوا
لي جحور الطين ، يساهروا
وحس مصارينن يصيّح
الصغار بايتين قواهن
هدّ طول الجوع قواهُن
للفرج من لله يرجوا
* * * *
اللّي مخلوقين كأنَّو
للدرادر والشقاوة
جوة عالم
جنّو منّو
إنقطع طار طاري حنّو
لما يوم العيد يعدِّي
لايجيب كدي .... لايودَّي
هُن يعيِّدو بي سفنجة ...
فردي
او مرات حفايا
البتكسي عرا جليدُن
فد جليليبيّي
واحدي
إتهرت
وجدعوها غيرُن
البمطَّقوا في دموعُن
بسكويتايي وحلاوة
وبرضو راضين بي مصيرُن
* * *
اللي حكمة الله قالت
يي القدر ، والدنيا شالت
منّهن عطف الأبوة
شبَّوا ، والحرمان بِراَهُن
تاتو في الأحزان بَرَاهن
الفقد حزنو البراهن
الفقر كتَّف خطاهن
واليتم واقف وراهن
* * *
أمّهُن
يا (يابت بلدنا)
ياالمحزّمة داقّي صدرك
واقفعي في وش الليالي
والمهيرات المعاك في كل خطوة
عزمهن والهمة عالي
العوافي عليك عوافي
يامدفّقي (خيرو سلوي)
اليتامي البي مصيرن
صبحت الناس ماب تبالي
دثريهُن ... بيت ومأوي
بلَّي ريقن جغمة جغمة
فكَّي ريقن لقمة لقمة
وقّفيهن حيلُن أوبح
حيل قوي وساندا هو عافي
هبّي فوقن نسمة نسمة
جودي بالحن والطراوة
إنتي إمهن ....
ابقي ابوهن
وكت ابوهن
قدرو حتّم
ولما قاموا لقوهو ما في
ياحليلن .....
ديل معاك ما ضاع شليلُن
لاعواصف الهم تشيلُن
أكفليهن ، ، ،
والبعينك في عطاك
الرب كفيلُن

[أبو وائل]

السر عثمان الطيب


ســونا


سونا ، كونى الليلة باسم لى دابو
لى فى عز صيفو جاد بالغيث سحابو
***
سونا شوفتك قلبى عادت لى شبابو
كفكفت دمعاتو ولى زمن عذابو
***
سونا قبلك هو كم تاه فى سرابو
فى جحيمو البصلى ... كم الما اصابو
***
سونا كان فى الدنيا متحمل ...صعابو
والامل ما زارو فد يوم دق بابو
***
سونا دابو الليلة تب خدر يبابو
الحمام فى غصنو حل محل غرابو
سونا طيرو يغنى فرحان بى ايابو
فى طرب شوفيهو لملم عشو جابو
سونا جوهو صغارو بالاحضان يشابو
يسالوه بلهفة ليه طول غيابو
سونا كل هم قلبى والوجع الرضابو
فات وجات الفرحة عمت كل رحابو
سونا عطفك ليهوواخلاصك اذابو
صار فى ظلمة ليلو نورو الاهتدابو
سونا بعد المرة صار سكر شرابو
من كووسو الحلوة كرع وانتشابو
سونا بى حنية قام سطر خطابو
خوفو من الفرقة خلا يسيب عتابو
***
سونا اه يا سونا حرف السين بدابو
كل شى وراكى حتى احوال صحابو
سونا ساعة حيو نام نبحن كلابو
خت( سين) يا سونا فى اخر جوابو

[أبو وائل]

السر عثمان الطيب

لا تقولي مع السلامة


من غير ما توادعي لا تقولى مع السلامه
برضي ما قادر اعاتبك ولاّ ارمي عليك ملامة
ليه تسافري بدون توادعى يقسى قلبك وين حنانو
كيف عليك العشرة هانت ريدنا ليه لحظاتو هانو
بين مخاوفى وشوقى ضايع لما سفرك حان اوانو
قلبي كان متمني شوفتك يا العليك تكلوا ورهانو
فى السراب صدقت مخاوفى ظنى اصبح فى مكانو
ما الزمان دايما معاند واصلوا ما مضمون أمانو
عدي فوقى العيد وروح لا معايده لا إبتسامه
من بعادك ونار فراقك قلبي عيديتو الندامه
لا خلوق طلت تبارك بي تهانيها وسلامه
لاالعيون اجفانه لا قت لا استراحت فى منامه
فى الغياب سيرتك معايا ياما ناجاك قلبي ياما
كلما لاوحلى طيفك ابكي بي دمع اليتامه
يا مسافري على بلدنا شايلى روحى معاك هديه
ليك وللناس الغلابة برضو شايف الروح شويه
داير اوادعك كنتا واكتب فى سواد عينيك وصيه
ابقي ميه على عيونك ريدنا ابقي عليهو ميه
سلمي لى على ترابنا كل شتلاتنا النديه
وقولى للوالدة الحبيبه انا جاي في عيد الضحيه
كلميلى ابوى عنك عن بنا الريد والمحبه
شيلى من بركات عيونك ادى اصحابى الاحبه
امشي يوم جمعه الضرايح زورى فيهم قبه قبه
أطرى درويشاً تلاقيه لبيسيهو أشواقى جبــــه
قولى للوطن البريدو قلبي بالاحزان معبا
غربتي الطالت شقتني وكل يوم زايدانى غربه
لما ترجعى بالسلامه جيبي لى معاك نسيمه
من بلدنا وجيبى لى من طنابرتا كم نغيمه
فوق جمر راجيك تعودي تومه لى روحى اليتيمه
تاني لى قبال تسافري وتبقي فى صيف عمرى غيمة
وتبقي فى الابد المؤبد خالدة عشرتنا الحميمه
ريدة تجمع بين قلوبنا عامره بالنيه السليمه

[أبو وائل]

السر عثمان الطيب

الصرخة المكتومة


يموت كل شىء
يموت فى سكون
وقبل ان يكون
يصارع الحياة
يؤ مل النجاة
لكنها تذيقه من الشقاء كل لون
تمنعه الجدال ..ترسل العيون
تقول من تكون؟
**
يحرك الشفاه
يود لويقول اننى اله
لكنه يلين
ويؤثر الخضوع يستكين
وجوده طعين
مبعثر اشلاء
يبيت فى دوامة الانين
مصمته بكاء
بكاؤه نداء
نداء روحه الى يد المنون
اتعرفون هذا الشئ ما يكون؟
انه ..هو الانسان
انسان هذا الحين

[أبو وائل]

السر عثمان الطيب

لمّا بُحتَ


لمّا بحتَ ... وبحتِ ليَّ ..إكتسى الصبح الوسامة
الشمس رسمت ضياها ، فوق وشي الكون إبتسامة
**
لما بحتَ .. وبحتِ ليَّ
إنطلق وقع الخطاوي ...
فوق دريبات السلامة ... وسكَّة الشِّفا والتدواي
**
لما بحتَ .. وبحتِ ليَّ
للحزن قامت قيامة ...
سهروا سمّار الليالي ... والمغنين والنُّدامـــــــا
**
لما بحتَ .. وبحتِ ليَّ
الكليمات الحميمة ...
والحروف البيني ، بينك ، هن مراسيلنا الهميمة
**
لما بحتَ .. وبحتِ ليَّ
إندحر زمن الهزيمة ..
إنكسر سور الموانع ... وانتصر عصر البسيمة
**
لمّـا بُحتَ .. وبحتِ ليَّ
في ظروف قاسية وأليمة
إرتضينا ندوسو شوكا .. أو نحلِّق فوقا غيمــــة
**
لما بحت .. وبحتِ ليَّ
للغيوم النخلة شابت ..
إتفدع وخدَّر جريدا ...فوق سبيطا تمورا طابت
**
لما بحت .. وبحتِ ليَّ
فاض وزاد النيل عذوبة
المراكب وضفّتينو ... الشراع والخضرة توبا
**
لما بحت .. وبحتِ ليَّ
غنت الحبوبة حجّت ..
منتكي وسهراني ليلا
القماري معاها وجّت ..
والبُطان لمَّت شليلا
**
لما بُحتَ .. وبحتِ ليَّ
في فيافي الغربة دوبا
طنبرابيكي المشلهت .. رسَّل الألحان طروبة
ريدة من غير ريدتك إنت ..تاني ماب يسلك دروبا

[أبو وائل]

السر عثمان الطيب


مسخت لى البلد


مسخت لى البلد فى بعدو ضم سئم حياتى
داجى قليبى فى نار وجدو ليل ونهار يهاتى
عاد قولى لى مين بعدو بنسج اغنياتى
مين فى الناس بيخلد قلبى لى حضنو ويتاتى
فات خلانى حاضن جرحى مسخت امسياتى
بثيت للقمر اشواقى ليهو بسط شكاتى
تتباكا النجوم قالت لى مسكين ماك خاتى
بمشيلو واقولو ارجوك حن ليهو ابقى راتى
ما فضل لى فى دنيايا شئ غير ذكرياتى
حتى الذكرى ليها نهاية لابد يوما اتى
اولى كنت ما بتنصتلو ضم حديث وشاتى
ايه الجد عاد الليلى تتقصد مماتى
برضى انا ليك برسل شوقى واعذب امنياتى
انت بقيت لى روحا تانى فيك مامازجت ذاتى
بالراح داير ازيلو ظمايا كتروا يا سقاتى
عاد يمكن عساها الليلى تبقى هى طوق نجاتى
داير اختم باسمك ديمة يا المحبوب صلاتى
عود فك الاسار من ايدى لملم لى شتاتى

[أبو وائل]

السر عثمان الطيب


لو تسافر


ذكراك لو تسافر باقية بعدك يحلو لى ترديدا
قلبى انا شيلو ما تخليهو لى نار الفراق والريدة
اه بعد الزمن لمانا مالو ارواحنا دار بيعيدا
ليه ايامو قاسى علينا ما بنسلم محال من كيدا
دى الاقدار خلاص الليلة خطت للفراق بى ايدا
وامالنا العراض فى الدنيا شن تكسب هى فى تبديدا
سافر يا حبيب روحى روحك فى وداعة سيدا
روحى انا باكية ناسجة اشعارا كان قول الشعر بيفيدا
فى لجة عذاب والله بعدك هايمة طال تشريدا
تصطاد فى الامانى الضايعة لكن السراب كان صيدا
اسراب القمارى الطاشة فى الروض ما سمع تغريدا
زى تحنانى ليك والله طال بيها الحنين لوليدا
طارت مابترك ظنيتا بالشوق دار تموت وحيدا
ديمة اهاتى زى اهاتا ..تنهيداتى زى تنهيدا
عطبرة يا قطار لو قاقوا اوعك سرعتك ما تزيدا
لو يوم شلت نور عينى فوق دربك تروح عيدا
نحن اللقيا لى ارواحنا زى ميلادا زى يوم عيدا
نبنى امالنا تانى ونمشى متعاهدين على تشييدا

[أبو وائل]

السر عثمان الطيب

العتاب


وا لومى العتاب جابوهو كيفن اسوى كيف الشورة
آهـ لو تدرو كيفن قلبى لى احزانو صار مطمورة
دمعى بحر غرق تب فيهو لجة حدودو ما مخبورة
برضى بشابى كان القاكى او منك تلوح لى صورة
جوة الامى مسجون ديمة كيف القى الخلاص من سورا
دى الايام قست والله كل الكان حصل من جورا
كت ناوى الرسالة تجيكى قبل الفرقة تلحق دورا
تلقاك كان مناى يا روحى فى بسطة ونعيم ، مسرورة
إلاً انا وا مغستى ظروفى هى الاحمتنى ابدا سطورا
من بدرى وترانى كتبت واحدى وبى دماى ممهورة
راجى الرد واطير بالفرحة بى جنحين ولو مكسورة
فى روحى المخيم ليلا تعمر لعبة بى طنبورا
عاد كل الخواطر تبقى من بعد الكسر مجبورة
واتاخرت لا تلومينى يا فرحة عيونى ونورا
جاتنى رسالة آهـ وأنا روحى كيفن تبقى تانى صبورة
ما دام كل حروفك قاسية ، بالصح ليكي حق ، معذورة
انساك؟ لا لا… لع والله ، وحدك عندى يي المذكورة
نان شن عندى تانى ؟ الدنيا غيرك ما بطيقا وادورا
وانت الفى رياضى صدحتى عِنْ شق الصباح عصفورة
بانى العنكبوت فى غصونا قبلك طولت مهجورة
وانت جداولى حس خاويها شاق محل السواقى وبورا
كانت دار تموت بالعطشة فرناغة ودوام محفورة
آهـ انا يا هناى ونعيمى يا ذاتى وجنانى وحورا
منِّك أبعدتني الدنيا ، والناس ترضى بي مقدورا

[أبو وائل]

السر عثمان الطيب

الجلابه


يا جلابة الله .....يا جلابة الله
يا جلابة جيدا جيتو
ما شفتولى زول يا اخوانى
ساعة للرحال شديتو
***
ما شفتوه لى يا اخوانى
فى حزن القرير وافراحو
فى دمع المسافرين بالعتامير راحو
***
ما شفتوه لى بالمرة
فى عش فاضى
فوق راس تمرة
طار جوز قمرى
منو......وفرً
***
بى دوبو الوحيح والانى
ما شفتوهو لى يا اخوانى
فى صوت السواقى النايحة
فى شوق القواديس
التقالد المويةغاديةورايحة
***
ما شفتوهو لى يا اخوانى؟
فى حس طار ولاد الماحى
فى دمع الحجيج ينجارى
بلً الدارة سال صباحى
***
ما شفتوهو لى يا اخوانى؟
فى همس الحبيب وحبيبتو
ساعة فى القمر يتلاقو
من كتر الغرام والريدة
لى عند الصباح ما فاقو
***
كان فى رعدة
كان فى غيم نزل نقناقو
فوق نوار بريسيم
رش بل اشواقو
***
كوسو معايا يا جلابة
ممكون قلبى شابا وشابا
***
داير اعرف بكان محبوبى
ان بقى فى التراب زى لوبى
جيبو عروقو سووهن وسادتى وتوبى
***
ساكتين ليش دحين دلونى
فى بلد الحبيب دلونى
وان بقى ما لقيتو اخوانى
الله كمان يكون فى عونى

[أبو وائل]

السر عثمان الطيب

مُنادي الشوق


مُنادي الشوق ينادي داير أرجع لي بلادي
أحكي للطيبين وأغني أنسى ألامي وسُهادي
أصلي ما كان في مُرادي يوم أفارق داري غادي
أهجُر الأوطان وأسافر بالسنين يبقى إبتعادي
بلدي طيبة وما بتعادي وفي الكرم غنالها شادي
دوزن الألحان وأبدع راح يطوف كل البوادي
حبي ليها وريدها زادي شايلو في عيوني وفؤادي
ليها برسل كل حروفي ودمعة الأشواق مدادي
***
شوقي ليها ولي ضِفافها وطهرها ونورا وعفافا
سلسبيل نيلها البيجري بالسنين خدّر جفافا
أي زول لو مرة شافها زاهية في حُلة زفافا
تاني يحلم ما يفوتا لو زمان الوصل صافَ
شوقي لي ذرات ترابها ولي سهولها ولي هِضابا
زهرة الياسمين تضاحك خُضرة الصفصاف في غابا
طفلة من الزاندي دابا عنفوان القاش شبابا
راقصت في عبري رنة حلوة من وتر الربابة
***
شوقي ليها ولي نعيما وفوقنا دايماً راشة غيمة
روحي من الغربة ضاقت دايرة ترجع لي قديمة
كل ما نطرى بلدنا ديمة تنهمر دمعات أليمة
نحن إخلاصنا ووفانا لي بلدنا بقالنا شيمة

[أبو وائل]

السر عثمان الطيب

دون وداع


قام دون وداع ساب الاهل
في سفرة لا زاد لا عدل
يا صاحٍ .. وين قمري رحل؟
كان هادي من قومة الجهل
في روقة لا نقة وزعل
في روعة زوزه على النخل
جنبو المدين نقط عسل
والليلة دارو أصبح محل
بس زي خراب سوبا الحصل
قام فرّة ما عرف الكسل
واشريّ فارق بي عجل
يا حليلو كاب دمعو انهمل
بالشوق قليباً لي انزمل
مقصوص جناحو وبالوجل
ما ركّ فوق شدرة ونزل
أتمنى لو عاد صاد قفل
لي عشو قيّل في ونزل
وان شاء الله عاد مهما حصل
يرجع لي قمريّ ويصل
في عودتو ما فاقد الامل
عارف بلاي ما كاس بدل

[أبو وائل]

السر عثمان الطيب

امـال


أقول امال أشوف امالى بتتجــدد
أقول امال مباهج الدنيا في عيني تتحـــدد
أقول امال قطار الشوق يسافر بي بلاد ابعد
أقول امال متين أوصل؟ تطول قضبانو تتمدد
أقول امال هناك ترجاني نتسالم ونتقالــــــد
أقول امال دموع الفرحة تفضحني وتبل الخد
أقول امال أشوف الكون بدون راح انتشى وعربد
أقول امال ولحن الريدة يا دوب من جديد يولد
أقول امال أهيم في نشوة أقضى ليالي بتعبد
أقول امال أشوف آمال محط امالقليب مجهد
أقول امال ولطوى جراحي ،باب الهم خلاص يوصد
أقول امال ينابيع صافية نشرب منها ونسعـــــــد
أقول امال محاسن لا نهائية ومحال لي زول بتتعدد
أقول امال سنابل خضرا فوقا الطير فرح غرد
أقول امال ترانيم حلوة ليها قليبي يتوســد
أقول امال وأخاف امالى يا امالى تتبـــدد
أقول امال في رحلة عمري حبك بيهو بتزود

[أبو وائل]

السر عثمان الطيب

تراب بلدي


انا وآآآ
مغستي رحل تلوت الليل شقاوتي رحل تلوت الليل
مسالكي ضلمه ما بتنشق سكت روح نويرة الفرقـة
جـــوة الجـــوف تســـوي الـــبق
مشيت لا زاد أشيلو معاي ولا زولاً مـــــعا اترفــــق
ولما خلاص بقيت مارق نجيم الليل مــشي إتفــــرق
بكيت وبكيت طريف العين متمسح بالدموع رقـــرق
عشان مظلوم زماني الليلي شتت للشمـــــل فــــــرق
بسوي الووب نحاس احزاني جــــوه قليبي ينقـر دق
يوهدبي يلوعني واخــــاف من المـــــصير واشفـــق
اوادع الناس وافوت مجبور يجيني نغيم من الطنبور
اشوفلي جني وقف صفق ينط لا فوق
يـــــــــطير ينــدق واطـــير وانـــدق
وادنقر فوق تراب بلدي أخم بي إيدي فـــــي رحـلي
اقول يا ليل وافارق الدار اجر فوق الوداع مستــدار
أنــــوني أنــــوني شـــاق الـــواح محــال ارتــــاح
ادخل إيدي في رحلي تراباً فيهو تســــوى الكــــون
تــــراب بلـــــدي
اشـيل مــــنو اشـــم وارتـــــاح اشـــم طـــــيبة اهــــلي
مـــــــــــــنو تفوح ترد الروح عويناتن تلـوح وتلـــوح
عــــــراريقن طـــواقيهـن طــــــــواريهـــن سواقيهـــن
انين الســــاقي لــــما تنوح حــــسيس البربخ المفتـوح
واعاين يا تراب بلدي اشوف فيك صورة ماب تنشاف
واشم ريحة الكُليت والشاف بنات بلدي بنات بلـــــدي
طريحاتن مناديلن رقيصاتن شبابيلن
حـــليلي حـــليلي يــحليلن
واشيل من زادي واتكرف
واشوف فيك يا تراب بلدي الحنين المـــابي يتوصف
سماح ناساً حلاة ناساً بلا السكر
طعم قراصه في قدحاً من الدبكر
كواريك شفع المغرب يقلبوا في الجمــــر قنــــقر
ولاد بلدي نقاقيرن طنابيرن جـــبابيدن سنــانيرن
وافوت يا ناسي في دربي أقول يا أهلى واغلبـــي
خلاص ريدكن ملك قلبي منو الغيركن بشيل حبي
تراب بلدي بنات بلدي ولاد بلدي

[أبو وائل]

السر عثمان الطيب

ليلى العنيد


ياليلـى يـا لـيـل يــا عنـيـد
قـــالـــد مـــعــــاي
طـــول صـبــري فـيــك
مـدد مساحـات الحـزن جـواي
وطـــــول واكـــســـر
كـمــان حـاجــز الـزمــن
وامـتــد تـانــي وتــانــي
ارجـــع مــــن جــديــد
بـــي دمــعــي اكــتــب
فـوق نجومـك بـيـت قصـيـد
يـروى الغـمـام لـمـان يـمـر
كان الحنين وداهو لي أرض الصعيد
ياليـلـي يــا لـيـل ياعـنـيـد
فـي صمتـك الممـزوج أســى
وكبـل مشاعـري بـقـالا قـيـد
ردد صـــــــــــــدى
شوقـي الحبستـو بعـيـد بعـيـد
لا تــســـيـــبـــنـــي
يـالـيــلــي وتـــفـــوت
شـــيــــلــــنــــي
وامـــــــــــــــش
فــــــى جـــوفــــك
الـــمــــلــــيــــان
انـيــن نــاســاً تــريــد
مـــا اصــلــي مــنــك
وانــــــت مـــنــــي
وبينـا كــان الـريـد شـديـد

[أبو وائل]

السر عثمان الطيب

القيثارة الحزينة


يا قيثارة الحانى
اعزفى لحنك الحانى
***
فرحى قلبى ودرى همو غردى جوه ..وجدانى
رفى على جناح الشوق وابقى سحابة ظللى كل اركانى
رزازا يرش ربوع دنياى وتخضر الزهور تانــــــى
وابقى شتول مزاهر ريدى ........ارعاهن بتحنانــى
اشقى عشان يفرهدو لى اسهر ديمة وحدانـــــــــــى
********
يا قيثارة بى ترنيمة الحب اللى عاش .....مظلـــــوم
احكى الحال وورى الناس واشرحى للى كان مكتوم
طوفى الكون
لو الناس ابدو ليك حنية
ما تتخدعى يا قيثارة؛لما تفوتى لحنك ما اظنو يدوم
********
شفنا كتير...سمعنا كتير
ما فيش حد يا قيثارة يحفل بى متاعب الغير
وما فى ضمير يحس بى اهة المحـوم
*******
ولما تعودى يا قيثارة راح تلقينى حاضن كل احزانى
ارجوك تانى يا قيثارة اعزفى لحنك الحانـى
وفرحى قلبى ودرى همو غردى جوه وجدانـى

[أبو وائل]

السر عثمان الطيب

ست ريدي


ست ريدى فى ذاتك عبدت الله
زاد ايمان قليبا لى قبلك.....تاه
***
رحلةعمرى كانت اه بتعقب اه
ضاع قاربى الودر كايس دوام مرساه
***
بيك يا نور حقيقتو الضو نال مرماه
واتحقق كمان يا روحى ما اتمناه
***
بسماتك بقت لى نور هداية وزاد
دير يبقالى ملجا عاد مع الزهاد
ساعة الناس تنوم ويهوموا العباد
ياكى القبلى لى قلبا عليكى اعتاد
يتركع وينده ويخشى ضر حساد
قولى وطمنيهوه بلاكى تب ما راد
***
فى عينيكى حلق قلبى فى الفردوس
رافل بى سعادة وبى ملاك محروس
ابليس اللعين وسوسلو ده المطموس
كان رد قلبى ما داير بلاكى عروس
فات خابت ظنونو وراح بعيد ممغوس
باكي وفي قيود حسراتو بات محبوس
***
فى طيبة قليبك طيبة اهل الخير
موكضاب سحابو وديمة صح مطير
رش الدنيا جادت خدرت خدير
تنى جريدو تمرا كان بيمرق صير
إنت الدنيا جوه رياضا غنى الطير
غيرك ايه تكون الدنيا وايه يكون الغير
***
فيك بمزح رويحتي وأغني اجيب ألحان
اتمايل طرب وارقص دوام نشوان
وارسم بى دموع الفرحة انا الفنان
لوحات ما بتمر يوم بى خيال انسان
وأهدي الناس جميل ألحاني ما ندمان
ما دام انت سر لوجودي اعيش فرحان

[أبو وائل]

السر عثمان الطيب

ياغايبة ياحاضرة


يـاغــايبـه ... يـا حـاضــرهـ
يـا الـفى الفجــر تـســطع أنـوارك الـبــاهـــرهـ
عـــين الـفجــر راجــاك .. من كـم زمــن .. ســـاهــرهـ
يـا غــايبـه مـن فجـــرى
يـا حـاضـرهـ فى فجــــرى
إنت الـزمــن غــيرك ســارق ســـنين عمـــري
إنت الـزمــن بـيــكى لـحظـــة شــــجن نـادرهـ
يـا غـــابيـه ... يـا حـاضــرهـ
يـا عــايشـه فى قـــلبى ... يـا ســـاكنـه فى فكــــــرى
لــو عــــــارفـه .. لـو تـــدرى
يـا روح حيــــــــاة صـــــبرى
يـا دمـــــــــو وأنفـــاســــــــو
روح الـصــــبر وقـفت ... لانـازلـه ... لاســـــــادرهـ
يـا غـــايبــه ... يـا حـاضــرهـ
يـــاســر خـلــــود الـنيــــــل
الـنيــــل يـئن يبــكى دفـق الـدمـــــوع جــــدول
خــانقـى الجـــــرف عــبره دلاهــا بالـحنضـــل
يـا غـــــايبـه عــــوديلـو
يـا حــــاضـره جـــوديلـو
مـديلـــــو .. مـديلــــــــو
مـنــديــلك الأخـــــــضر
مـن خــدك الأزهــــــــر
أمـليهـــــــــو بى ريــدك
مـديهــــــــو بى إيـــــدك
يـا حـــاضـرهـ شـــريهـو
شــــــريهـو فــوق الـقـــــــيف .. إلــفـه وهـنـــا وخضــرهـ
يـا غــايبـه ... يــاحـاضــرهـ
يـا ضــو شمــوس زحــفت فـرســانـا شــــادى الخـــــــيل
بــين بكـــــرهـ والـــلّــيلى
بـســــــراع .. تـعــــالـيلى
الـليـل هـــــزم حـــــــيلى
قمــراتى إتــــلاشـت ... غـــرقـت خــــلاص فى الـليــل
فـكيــلى قـــــيد لـيــلى
دارجــينى أرجـــــينى
قـيلـــينى .. قـيلــينى مـن خطــوتى الـعــاثـرهـ
يـا غــايبـه ... يـا حــاضـرهـ
مـكتــوب عـليــك .. وعــلىّ
مــنذ الأزل .. فى الـلـــــوح
الــــروح تـتـــــوق للـــروح
نـتـــلاقى .. زى غـيمـــتين
بـين قــوس قــزح مجــروح
تـتعـانـق الأنـفـــــــــس
تـضـــــوى الـبروق وتـلوح
تـتـــلاحـق الآهــــات زى الـرعــــــود هـــــادرهـ
تـصــبح بحـــور الـشــــوق لـيلا ونهــار مـاطـرهـ
يـا غــايبـه ... يـا حـاضــرهـ
مــــنذ الأزل .. فى الـلـــــوح
مـكتـــــوب عـلى قـلبـك .. مـكتــــوب عـلى قــلبى
مـكتــــوب عـلى دربــك .. مـكتـــوب عـلى دربـى
ســـــوا فى سـفينــة نــــــوح
يـتـــلاقــوا رغـم الـبــــــــين
كـــان زى لـقــــا الـنيــــلـين
ســلكـن درب واحـــــــــــــد
شــــــــاهـد عـلى ريـــــــدن
وقـف الـنخـــيل شــــــاهــد
ريـدتنـــا زى ريــدن كالـسـلـسبيـــل طــــــاهـرهـ
يـا غــــايبـه ... يـا حـاضــرهـ
يـا ســـــاكنـه .. فى إنـســـــان
فى الـذاكـــره .. والـنســـــيان
فى الـلاشعــــــور إحـســـــاس
فى دمـى فى الأنفـــــــــــــاس
يـا الـفى مـلمــــاتى مــدّانـى صـــــبر أيـــــــوب
دثـرتـى قــلبى أمــان صــبح الحــزن مصـلــوب
حـســيك إنت أنـا .. أنـا ذبـت فى الـمحبــــــوب
عـايـش حـلـول الـذات .. وإتـكشّــف المحجـوب
يـا رابـعـــــه فى الحضــــــرهـ
يـا غــايبـه ... يـا حــاضــرهـ
سـبحــانـوا رب الكـــــــــــون
سـبحـــــانـوا أبـــدع فـــيك بى قـــدرتـــو الــقـــــادرهـ

[أبو وائل]

الشاعر عبد الله محمد خير


أنا المعجب


أنا المعجب
أنا المشتاق أشوف عينيك
كل صباح واتعذب
وأسمع من شفاهك ديل
ألذ نغم برأى أطرب
وتلوح لى فى صفاء عينيك
بحور من ريد ... أدور اشرب
ومرة اتوه ... اقيف مشدوه
اقول يا عـــبدو أتــــادب
زمـــــــانك فــــــات ..
والــــريد فى قليبك مات
ليه فوق جـــمرو تتقلب
واشيل مـــــن عمــــرى
عشــــرة ســـــنين
اقول يمكن يكون انسب
وأدلى دلوى مع الخطاب
مع العشاق يجوز اكسب
وأعاين لى عيونك يمكن القى سعادة
القـــــى غضــــب ...
واشيل فوق راسى هم الدنيا
فوق افكارى يترسب
قلبى رهيف
ما خاض زى حروبك ديل ولا جرب
وفجأة يعود صوابى الغاب
أشوف انا نفسى جنبك زى وليد يلعب
بيجرى وراء سراب ورهاب
بعيييد...................لليلة ما قرب
وهل مـعقول ..!!!
يكون فى وصول ؟
متين يا رب ..؟
ما تصارحيه ........ خافى عليهو
قولى ليهو لا يتعب
انا المعجب
انا الولهان ولى سنين
بعانى من الصعاب أصعب
وقالوا على كبرت خلاص
ولسع ماقدرت خطب
انا المعجب
انا المشتاق ....
انا الطوالى بترقب
انا التائه
وعيونى بلاك ما شافت
يمين كوكب
شوية ريده
ليه يا صيده
ما دا انا المتيم تب

[أبو وائل]

الشاعر عبد الله محمد خير


رحلة النسيان



نــــســــيــــتـــك أنـــــــــــا
نـسـيـتـك مـــــا لأنـــــي إنــســـان ونــســـاي
نــــــســــــيــــــتـــــــك أنــــــــــــــــــــــــــا
لأنــــي بـقــيــت لــمـــا أطـــــراك بـســاهــر
وإنـــــــت طــيــفـــك مــــاهــــو لــــــــولاي
نــــســــيــــتــــك أنـــــــــا
عــشـــان ردة فـــعـــل ذكــــــراك جــــــواي
بــقــت تـنــتــر مــغـــس مـــــرات ولـــــواي
نــــــســيـــــتـــك أنـــــــــا
ونسيت كل السماحه الفوق دريبـا بقيـت غنـاي
وخليت لـك بلـد بـي حالـو قمت رحلـت بـي جـاي
غلطانه إن بقيت فهمتي إنو رحيلـي فـوق رأي
مهاجر شان أحسن حالي وأرجع ليك شاشـاي
وحاتك لا لا .. دنيـاك مـا بتوافـق تانـي دنيـاي
وحاتك لا لا .. لا داير أخادعك ولاني خازاي
قـــســــا الــقــلـــب الــبــبــكــي الــــشــوق
عــلـــيـــك بــــقـــــي مــــاهـــــو بــــكـــــاي
وجـــفـــاهـــا الـــقـــمـــري عــصــريــاتــنــا
مــــــاعــــــاد فــــيــــهــــا .. قــــــوقـــــــاي
صحيح حسدوني فيك زمن عزلتك وقالوا نقاي
ما عارفني بكدح وبشقـى ساكـت ومانـي لقـاي
يفيض بحرك يعم وما فيهـو مـن تـالاي سقـاي
نـــســـيــــتــــك أنـــــــــا
وبـفـتـش فـــي دلـيــل لـــي دربـــي ضـــواي
دحيـن أطفيهـا نـار الغـيـره أو زيديـهـا بـوبـاي
وأبكي على غرورك بعدي أو كوسيلو رضاي
وقـول لـي مـعـاك سـلامـه أو قوليـهـا بـاى بـاي

[أبو وائل]

الشاعر عبد الله محمد خير
ياقمــرة


يا قمـره ... صبـي السنسنـي الحمـره
شوفي أبوي أنا الراجاهو كلو صبـاح
يا زينوبه أبوكي هو أصلو حالـو بـره
لو قاري العلم هو ولاهـو سيـد خبـره
ومو زول غربه لكن الظروف جابره
مالو إن كان صبر كل الخلوق صابره
والصابـرات روابـح لـو يجـن قـمـاح
هو أصلو متين نساكم يُمة شان يطـره
بيتـنـفـس هـــوا ذكــراكــم الـعـطــره
رهيـف إحسـاس حنيـن قلبـو بالفطـره
نديمـو بقـت دموعـو الديمـه منقـطـره
وأصلو إن مـا قعـد بينكـم ولا بيرتـاح
جاهو العيد كمـان زاد القليـب حسـره
سـاد العبـره حلقـو ونفـسـو منكـسـره
هو لا لمّ القـروش لا حصـل المسـره
بلد ما فيها زول مات من عـدم كسـره
فراقكم ليها يا أحبـاب ولا كـان صـاح
يــا أمـارتـي الـمـا طـاعــت الأمـــره
ندمـانـي وبـقـت محـتـاره فــي أمــره
بعـد قـسـن الــدرادر قـصـرن عـمـره
الشوق فـاض وعماهـا الحنيـن غمـره
الـشـوق للبـلـد لــي بهجـتـه وسـمـره
الشـوق لـي مقيـلا ضــم ضــم تـمـره
الشـوق لـي حديثـا ضـم ضــو قـمـره
الـشــوق للـبـلـد جـابـريـتـا وكــكــره
كان الشوق يخفف والله يبـرى جـراح
مشـتـاق للحسـيـنـاب أسـقــه وبـكــره
مشتـاق للقبيـل إتـربـوا فــوق حـكـره
مشـتـاق للدمـيـري ومويـتـه الـعـكـره
مشـتـاق للجـزيـري وتشـقـه وهـكـره
مشتاق لي قطع بحره ودخـول وكـره
مشتـاق للأبـي يـفـارق الـفـؤاد ذكــره
مشتـاق للعـلـى مشـغـول دوام فـكـره
مشتـاق للصبـاح ديـدن غنـاي شـكـره
وياريت كت بقدر أسوي شوقي جناح

[أبو وائل]

الشاعر عبد الله محمد خير

أيام الشباب


بعشقك مهما السنين سرقتني أيام الشباب
وأعشقك مهما رؤاي غتاها من تالاك ضباب
وأعشقك مهما يقولو الناس علي جن ومصاب
بعشقك من غير حساب .
***
وليك من غير ما تقول لي سلام بقول أهلا حباب
وأفضل أستناك قدر زمني الرجيتك فيهو
لو قدري أستجاب
كلو عمري نذرتو لي قمري المطول مني غاب
وإنت مهما طال زمانك ..
ليك آخر يا عذاب
***
بعشقك وما شفت أنسان أدمن الريد
ومنو تاب ..
بعشقك وما شفت مجنون ...
غير فقيرو يمسو طاب ..
ألا خايف عمري يكمل ولسه في صبري العقاب
وكت بمد أيامي لولا أن ..
لكل أجل كتاب .

[أبو وائل]

الشاعر عبد الله محمد خير

كمان زعلان


تعاتبـنـا !!! ومــا قـبـلان تكاتـبـنـا
مـا إنتـو البيـتـو الحـلـه يــا نــوره
ورحـتـلـو بـعـيــد بــــلا شــــوره
تراها الحله من يوم قمتو مهجوره
ومـا رضيانـه بعـدك إلا مجـبـوره
ومــــــــشـــــــــتـــــــــاقـــــــــه
عارفـه الدنيـا لمـان تقسـى فراقـه
حلـيـل الـحـلـه .. ويـــن أمـلاكــه
(ويـن حـوره)؟؟ ويـن شاديـهـا ؟؟
يـــــا شـاديــهــا مـــــا تـــــزوره
يـــــــــــــــــــا فــــــتــــــنـــــــه
يـا البعـد الله مـنـك كــان مخافتـنـا
أكــــان حـيـيــن .. ومــــا مـتــنــا
وكـان حـن الـقـدر والدنـيـا لمتـنـا
وتانـي الحلـه زي مـا كنـا ضمتنـا
بـنــحــلــف لـــيــــك بــزمــتــنــا
ســعــادتـــك كـــــــل مـهـمـتــنــا
وبــــــلاك قـــامـــت قـيـامـتــنــا

[أبو وائل]

الشاعر عبد الله محمد خير

عاشق الضفاير


روح بالبريد شيل من قليبي سؤالو
روح للصعيد شوف الحبيب كيف حالو
***
روح بالله اسأل عنو .. عن أحوالو
واسألو شوفو مالو شمالنا شن سوالو
***
خديري الفي الجريفات كنت بندلالو
مجيهو سيدو من الجيهي ماخلالو
عطش ما شافو جراي منحدر شلالو
هباب مالو نقر للجرس دلالو
***
يالخرطوم تشيلي حبيبي مالك ومالو
هو أبانا ولا كتير علينا جمالو
يميل كل ما النسيم هز الضفاير مالو
وصدرو تقيل تقيل بالله يتخمالو
***
يا ناس حوا ما ولدت غزال قبالو
ينساب ديسو فوق اكتافو ينكبالو
كل ما دق بابو خطيب أبوهو أبالو
خلو يضري ما دام النسيم هبالو
***
الناس قالو لي وقالو لي وقالو
قالو نساني قالوا أنا ذكري راح من بالو
خلو دموعي من بعد التجمل سالو
خلو قليبي خف وأنقطع تقالو
***
الذوق والأدب خل الخلوق ومشالو
أما جمالو الله من الفراديس شالو
يا ناس ذني ايه أنا قلبي لو شاشالو
بس قولو لو مبروك العرف نشالو
***
زولي الراسي بي هجراني مين اوحالو
سابني مع الغرام خايض براي اوحالو
أسعدي يا ظروف في حلو في ترحالو
أصلي انا كل ما يغلط معاي بمحالو

[أبو وائل]

الشاعر عبد الله محمد خير

العيد المضي


طـولـت شـايــل الـذكــرى فـــي عـيـنـي
لـــــلـــــعـــــيـــــد الــــــمـــــــضـــــــي
طـولــت بـحـسـب فـــي نـجــوم الـلـيــل
وأقـــــدر فـــــي مـســاحــات الــفــضــا
وأغصب مشاعرى علي الألـم وأروضـا
واتــمــنــي لــــــو لـحـظـاتـنــا ديـــــــك
تـــســـمـــح ظـــروفـــنـــا نـــعـــوضـــا
وتجمعـنـي بالحـسـن الـرفـض أفـكــاري
كـــــــــــــــــــان بـــــيـــــعـــــارضـــــا
يمـكـن قـبـل نتـبـادل الـحــب الـشـريـف
يـــــــمـــــــكـــــــن رضــــــــــــــــــــــا
تـمـضـي السـنـيـن وتـمـضـي الـشـهــور
واتـمـنــى لــــو كــــان تــمــت الأيـــــام
وانــــــتــــــهــــــت الــــســـــنـــــيـــــن
والــكـــون وقـــــف خــــــلا الـمـســيــر
كــــان قـلـبــي فــتــش عــــن نـصــيــر
خــــفــــف عــــذابـــــات الــضــمــيـــر
ومــــن قــبــل مــــا أصــــل الـمـصـيـر
الفيـهـو قـلـبـي المـحـتـرق فـكــر كـتـيـر
اتـــــذكـــــر الـــعـــيــــد الـــمــــضــــى
يــــوم بـيـتـنـا أصــبـــح كــلـــو خــيـــر
يـــــوم كــنـــا بـــــي نـــشـــوة فــــــرح
دايـريـن نطـيـر يــوم القـمـر فــي بيتـنـا
مـتــواضــع قــعـــد فـــــوق الــســريــر
وقـــال ... كـــل عـــام وانــتــم بـخـيــر
نظراتـو كـان زي بسمـة الطفـل الغريـر
وخصلات شعر تنساب متل موية الغدير
وحبـات نهـودو الطعنـن فــوق الصـديـر
حــــاولـــــت بـــيـــهـــن اســتــجـــيـــر
مـن العيـون التايهـه والخصـر الصغـيـر
مــــــــــن الـــشـــفــــاه الــعـــطـــشـــى
والــوجـــه الـمـنـيــر مـــــن الـسـعــيــر
ومـــــرت لــيــالــي طــــــوال عـــلـــىّ
وطـــــأت غـــرامـــك مــــــا بــتــخــف
حاولت أصارحـك وليـك بالبـي اعتـرف
فـــكـــرت أكـــتـــب لـــيـــك رســـائـــل
بـي دموعـي المـا بتجـف مليـون حـرف
دايــر أخلـيـك عـــن دلالـــك تـنـصـرف
دايــــــر أعـــبـــر عـــــــن مــشــاعـــر
عـــــــــن مـــشـــاعـــرك تــخــتـــلـــف
ودايــــــــــرك تـــــصـــــدق إنـــــــــــي
فــــي مــحـــراب غــرامـــك مـعـتـكــف
واجـيـب قـلـم واحـصـر تعـابـيـر الألـــم
وكــــــــــل ابـــتـــهــــالات الـــعـــشــــم
لـــكـــنـــي مــــــــــن أول حــــــــــرف
أجــــــــــد الأنـــــامـــــل تـــرتـــجــــف
وتـــتـــذكـــر الـــعـــيــــد الـــمـــضــــى
أعــيـــاد تـــجـــي وأعـــيـــاد تـــفـــوت
والفرحة تصحب كـل عيـد تمـلا البيـوت
وأنا كل مـا استقبلـت عيـد أحيـا وأمـوت
وأطبـع ملاييـن التهانـي علـى الـكـروت
تـمـضـي السـنـيـن وتـمـضـي الـشـهــور
وأنــــا قـلـبــي يـحــيــا بـــــلا شــعـــور
لكـنـو قــرر يــا القلـبـت ظـلامــو نـــور
قــرر يـحـارب كــل أوضـاعـو ويـثــور
قرر يكاشفك بـي ضميـر مـا فوقـو زور
قــــــرر يـــرســـل لـــيـــك ســـطــــور
مـكــتــوبــه فـــــــوق ورق الـــزهــــور
مـكـتــوبــه بــــــي دمـــعـــو الــغــزيــر
دايـــــر الــحـــروف تـبـقــالــو نــــــور
وتــــــــــبــــــــــقــــــــــالـــــــــــوا ....
لـــى قـلــب الـبـحـبـو جــــواز مــــرور

[أبو وائل]

الشاعر عبد الله محمد خير

المبطر


زيـدي مـن لحظـات الــوداد
يـا المبـطـر وسـيـب العـنـاد
إنــت لـيـه إخـتـرت البـعـاد
وفــي بلـدنـا أبـيــت الـقـعـاد
مالقلـوب شـوقـه علـيـك زاد
وبـي وراك أعلنـت الـحـداد
مالو سفرك من غيـر ميعـاد
بيهـو شمـتـو عليـنـا حـسـاد
لامـتـيــن يـنــتــم الــمـــراد
وبكره نسمع بيك جاي صاد
كـم وكـم فــي الدنـيـا زهــاد
بـيـك ولهـانـيـن يـــا سـعــاد
مـا عيـونـي أزاهــا السـهـاد
ومن مشيـت فارقـت الرقـاد
الله لـي صبـري مـن النـفـاد
ويا حليل قلبـي المـا استفـاد
قلـبـي لــو فــي حـبـك يـبـاد
يبقي زي المات فـي الجهـاد
داير أوصفو لوشعـرى جـاد
حاكى فرع البان فرعو مـاد
دقــو ليـهـو الـكـف يــا ولاد
خلـو يـبـدع زي مــا اعـتـاد
يـا جمـيـل ربـنـا كــان أراد
يبـقـى حبـنـا لـيـهـو امـتــداد
قلـت أسافـر وأبـقـي شـحـاد
وأمشي لي بيتن فـي المـزاد
عـاد أدق الـبـاب والله عــاد
أسكت امشي أقيف كالجماد.

[أبو وائل]

الشاعر عبد الله محمد خير

حبل الصبر


تـلـب أمـسـك حـبـل الصـبـر خـلـو قلـبـك لا يبـقـي نــي
أصلـو ود أب زيـد كـل يـوم مــن بلـدنـا يـرحـل جــدي
شــن بسويـلـك عــاد أنــا القبـلـك الحـرمـان مـــر بـــي
والضنـا الهسـا عليـك زاد مـن زمـان أنــا زايــد عـلـي
كـم حبيبـا شغـل الفـؤاد فـي العيـون كـان متـل الصـبـي
حـل بـي (توفيـق) السـواد مافـي زول قـال كـفـاره لــي
أرقــى يــا تـلــب ودعـــت قـبـلـو كـــم قـمــره مـنــوره
وكم تحـف نـادرات سافـرن وكـم فراشـه وكـم جوهـره
وكــم قـلـوب متـلـك بالـفـراق الأنـيـن والـشـوق سـهـره
شوف عوض عبدون الحروف خل مـن باطنـه ظاهـره
يـا عـوض مدرسـة الشعـر بــي جــداره إيــاك نـاظـره
بي غناك حرف السيـن بقـت فـوق بنـات جيلـه مبطـره
سـابــك الـلــى بـلــد الـجـلـيـد ودعــــك ودقّ مــغــادره
يــا قـلـب مـالـك انـجـرح ولـسـه لـيـه جـرحـك مـابــره
أمــا أنــا المسكـيـن الـطـروف غــرزت فـــي أظـافــره
ويـن غنـاي لـي شـتـل الـجـروف والجنـايـن وأزاهــره
أسألوا الدرويش عن صديق عمرو كم جمرات عاصره
خـلـو يحكيلـكـم عــن حـيـاه النجيـفـى الـهـو مـعـاصـره
الككـر يـا رحمـن زمـان ضـاع مــع العـشـاق شـاعـره
مانـفـع تغـريـدو الحـزيـن مــا نـفـع صـــدق مـشـاعـره
جنـنـو (البتوفـيـق) رحــل وهــام ورا الـقـام بالـبـاخـره
خــلا دنيـاهـو فـرنـدقـس مـــا عـــرف أولـــه وآخـــره
أرقـى يـا رحـمـن فــي السـمـاح مـافـي بـلـداً بتجـاكـره
الله مديـهـا سمـاحـه صــاح مــن كـروهـا ولــى تـكــره
أصلـو ود أب زيـد معتـرف بـي جريمتـو ومــو نـاكـره
كـلـو جــور الـقـال سـفـروهـا وقـطــع لـيـهـا تـذاكــره.

[أبو وائل]

الشاعر عبد الله محمد خير

سؤال ...؟؟


هي ...
ماك مسافر ياولد ؟
أسافر وين أقع !!
يالسمحة مكتوب لي القعاد
طول الأبد
ويا حلوة لو فالي السفر
ما كت قبيل جيت وقعد
***
ودعتك الله
وكنت من جواي بقول
إن شاء الله مو آخر وعد
وأتمني ليك من قلبي
أسباب السرور يا السمحة
وأسباب السعد
***
لكن أنا ...
أنا ما فقد
أنا ما نأيت عن حسنك الضواي
حليلي أنا ما أبتعد
وياما سعيت علشان تكوني معاي
وياما أجتهد
***
هي ماك مسافر ياولد ؟
آخر سؤال ...
لكنو هد كياني هد
مضي كالوهم ..
وفات كل إدراك الفهم
زي السهم
لما إنغمد
***
في أعمق الأعماق هناك
أشعل سعيرو الما إنخمد
وفتح سدود الذكريات
خلاها ماشي بلا عدد
جابت حكاوينا .. الزمان
كانت مزاح
ياربي شن سواها جد
كان معرفه
كانت مودة .. وكان صفا
بين ناس البلد
***
هي ماك مسافر ياولد ؟
آخر سؤال ...
وياريتو لي ما كان ورد
كيفن أسافر !!
ما ظروفي أبت
وعيشتي بقت نكد
ودخلت في عتمة هموم
وزحمة مشاكل كل يوم
ما ليها حد
واتبدلت أيامي يالعاجباني
في دنياي زهد
***
هي ماك مسافر ياولد ؟
آخر سؤال ...
روح معاهو البال شرد
آخر سؤال ...
لكني ما لقيت ليهو رد
داير أسافر
وكل يوم بعدك مسافر
عقلي ...
بس فاضل جسد

[أبو وائل]

الشاعر عبد الله محمد خير

الأمل والسراب


زيدي اللوعـه زيديها الصبـــابه
إنت كلك روعة يازينة السحابه
***
قصيبة التقنت الـــدفق تســـــابه
جمـــــال الخلقة والخلق إكتسـابه
من الحـــور أكيد صــــلة إنتسابه
قليباً لي ســـــاب الدنيـــا ســــابه
بدور الآخره مشتاق لي حســــابه
داير أهلك مــــعايه نكون نســـابه
وتبقي مركب حبنا الريس رسابه
***
إنت ما وصوك بي روحي إتوضابه
مادام بي هواك المـــولي صــــابه
ودموعه علي الفراق طوالي صابه
***
بقيت من عشاق عيونك ومن طلابه
عليك قديت الــدرب زي الجـلابه
بســـــدر بي رجـــولي وبنـــدلابه
حفظت الحــله حتي نبـــاح كلابـه
وعشقت مناظره الحــلوه الخلابــه
وبموت في بسيمته القلبي إبتلابــه
أحكام الزمــــــن دايــــما غــــلابه
علي السمــحه قامــــت بانقلابــــه
وقليبه من الحديد زايد صـــــلابه
***
يا شـــــادينا قـــــوم دق الربابــــة
شوف سمانا الصافيه مالو كتر ضبابه
وليه الجاهله قافله علينا علينا بابه
عمرنا الضاع ســــداً في شبابـــه
***
ليه أعصــابنا زات في إطــرابه
وليه يرضيك تحطيمه وخـــرابه
وكيف تقبل يكون هجرك شرابه
تشوم حظها وينعــــــق غـــرابه
وتبني أمل يضيع تجني السرابه
***
ياحليل الحله بي دومــه وترابـه
وياحليل الرجحت بي كل أترابه
وحليل الكل محـزون ينسرابـــه
بدور حبك معاي يصبـــح قرابه

[أبو وائل]

الشاعر عبد الله محمد خير

مشاوير الفرح


غريبة ما بكت العيون في يوما داك ..!
لما انكتم نفس القليب
الكان بشيل هوا من هواك
***
تاهت خطاوي عليك من قبل الوصول
وقفت هناك .....
***
ورثت من الزمن الصبر
ممهوله ما صبقت خطاك
مع إنو يا القمر الملجلج في سماك
أطول مشاوير الفرح كانت معاك
***
مبهورة ما بكت العيون
مسرورة للفرح الملاك
معصورة بالحزن الدفين
مغمورة بي فرحة لقاك
مسحورة بالحسن الرزين
مأمورة تنظر لي بهاك
مكسورة تخفيه الحنين
مجبورة ما رادت سواك
محصوره في الوجه الحسين
ياصورة أجمل من ملاك
***
وغريبة إني وقف أمام عينيك
وما إنهارت قواي !!!
اتجمعت كل المعاني السامية
ديك اللحظة واتحدت معاي
غاية رجاي .....
قيمة وفاي .....
معني غناي .....
وتمن شقاي .....
يامن وهبتك كل ما مضي
من شبابي ومن صباي
أنا هل ظلمتك ؟
أم ظلمتني ؟
لما سبتك لي سواي
***
لي حكمة ما بكت العيون
الشاخصه في وجهاً جميل
حافـــــظ نــــــداي
والليلة كاسيهو الشحوب
في يوم زفاف خاصم هواي
كان صاغيه لي صمت العيون
الكان بردد يا ضناي

[أبو وائل]

الشاعر عبد الله محمد خير

الجــروف


الجزيري بقت مخادة
وتانى ختت طين زياده
السواقى البى الغرب طلعت قصادا
وفى الضهارى الرمله الناس زرعت مقادا
الجرف سبروقو ملح
والبحر فات منو روح
قام لبس التوب وسرح
من بعيد بى ايدوا لوح
قالوا مندلين يشوفوا
كل زول ينزل جروفو
الجرف بالخصبه رجح
وللبذور الطيبة نجح
فى الاصيل قمريهو يصدح
لى نعيمو وخيرو يمدح
داك يسلك وداك ينقح
وداك بالشرقية ينبح
جاى دافر القش متمسح
مرة يغطس ومره يطفح
التبش نوارو فتح
والدخن قندولو دندح
خدر الشتل المصفح
جاب قلوب لى اهلو فرح
قالو مندلين يشوفوا
طل زول ينزل جروفو

[أبو وائل]

الشاعر عبد الله محمد خير

حلفت بالله


ترانى حلفت بى الله
وتانى بقول وحات الله
وكت السمحة فى هيباته تتجلى
تشيل خطوات فى ايقاع
حلات ايديها فى التله
تودى صديرا قداما
تسيبو سبيبا يندلى
تخلى الداره فوق نيرانا تتغلى
طبيعى غزير
لا باروكة لو سله
كانو حرير
و كاسيه السواد حله
كل الشافو بارد الحشى وصلا
واصبح فوق سعير
اشواقوا يتملى
قليبا لى مشغول
ديمه يا خله
هو اصلو عليل
وشوفته زادت العله
اقولو خلاص تخليها
يقول لى نان هى بتتخلى
اقولو كفاك تبل الشوق
هو شوق الجن بيتبلا
تعال يا بدر عاين بدرنا الهلا
وعقلك يكون ثابت
مايكون ولى
نورو جهرنا
نورك يابدر ضلا
ما هماه شوقنا ان زاد وان قلا
عشان عارف السميحين
زيو فى قله
كل ما قلنا ينزل ليك يتعلى
بتسعد دارنا
كان اداها يوم طله
ينور بيتنا
الجيران
والحله

[أبو وائل]

الشاعر عبد الله محمد خير

سيل الشوق



اجمل منو في الكون كلو ما شفنـا
جـود يـا الله بـي لقيـاهـو أنصفـنـا
راضيـن نحـن مهمـا حـبـو كلفـنـا
لأنو ملك شعورنـا ملـك عواطفنـا
والفـنـاهـو لـــو يـرحــم يوالـفـنـا
نحـن نطيعـو مـا دايريـن يخالفـنـا
حاول مره زورنا عشـان تشرفنـا
وبي معنى الجمال الفطري عرفنا
لفيـنـا المـدايـن والـقـرى وطـفـنـا
زيــك لا بـنـلاقـي ولا بيصـادفـنـا
يــا سواقـنـا قـــدام بـيـتـو وقـفـنـا
خليهـا الـزهـور تـمـرق تلاطفـنـا
مـا حبيـنـا غـيـرو وهــو عارفـنـا
دايريـن لـي لماهـو الحـظ يحالفنـا
ليـك غنيـنـا وتــر سلـكـو عازفـنـا
نظـمـنـا القـصـائـد فـيــك وألـفـنـا
دايـم حبـي ليـك ومستحيـل يفـنـى
وسيل الشوق على الحابنو جارفنا
تعـال بالله أرقــص تـانـي أتحفـنـا
وبـي عينيـك لـو بتـحـب تكاشفـنـا
ناري أنا من عيونـو المنهـن خفنـا
عيـونـا بالسـهـام كـــادت تنشـفـنـا
إن نسفـت سبيبـه معـاهـو تنسفـنـا
وإن مالـت بـعـد سابتـيـن ترجفـنـا
حياتنـا عليـهـا مــن قبـلـك تأسفـنـا
ولو ما شفنا حسنك تاني شن شفنا

[أبو وائل]

الشاعر عبد الله محمد خير
سماحك مني داريهو

سماحك منى ضاريهو
اتاريهو .........
جبرنى أقوم اباريهو
كسح وانفر صاريهو
صدح بى لحنو ساريهو
فترت غلبنى اجاريهو
غراق بالحيل ......... مجاريهو
رحل فارق حواريهو
هجر (حشمو) ...... (وجواريهو )
سكت غفرو .... وسواريهو
خفت ..... قوقاى قماريهو
عذاب .... قلبى ........ المواريهو
وحاتك .. مانى .... حاريهو
حلال .... زولا تدوريهو
وسعيد ....... ال الله ....... يوريهو
زمانو معاكى طاريهو
زمن كنتى بتزوريهو
اماااانى قعد تضريهو
وكت ..... توبك ... تفريهو
قوامك جل ..... باريهو
وحات ...........ليلا مباريهو
يحير .. سفرو قاريهو
ويشكر ... سوقو .... شاريهو

[أبو وائل]

الشاعر عبد الله محمد خير
زينـــــة العمر


من الأزاهــر اندى يا ضـــــــــــــــو القـــــــــــمــــــــر

يا المنو صــــــــافى واهدا يازينـــــة العـــــــــمــــــــر

***********

لهوالكى مابتعدا واحفظ لى عهودك يا المحاسنك عده

عن حبى ما برتدا لى ليلة الزفاف بعمل واعد العــــده

************

حبك عـــقيــده ومبـدا ريدك لى طريق انا منو لازم ابدا

بحسب جفاكى موده واترقب لقــاك مهما تطول المده

************

آه من شذاك ياورده وآه انا من عيونآ بالسلاح تتـــحدى

فى هوانا ايه الجدا ليه قلبك نســـانا وجــار علينا وصدا

************

عطفك على لابدا هجرك لايطول يا الجاهله لايمتــــــدا

خايف الطريق ينسدا خايف للبنيتو معاكى يوم ينهــــدا

[أبو وائل]

الشاعر عبد الله محمد خير
بعد فيضان 1988م

لينا الله يسهِّل طُرُقنا
معاك يا بحر أتفرقنا
ِشهور في جسرك عِرِقنا
لحظة كسّرتو قلع عِرِقنا
نحن لا في جَوفك غِرِقنا
ولا من َخوفك مرقنا
و من يوم ما الخلّاق خلقنا
أنت ياك هيامنا و عشقنا
في حماك و بيك انعتقنا
و أمان من طارقا طرقنا
نعيمك و خيرك حدقنا
و شلنا معاك في حدقنا
هِبة و ربّنا بيك رزقنا
و كُل ما نحلف بيك َصَدقنا
زمان ُكت سيفنا و درقنا
و ملاذنا و مصدر ِرِزقنا
جار و فاض فيضانك سرقنا
و جا قمَّحنا و أكل عَرَقنا
شال خَدِيرنا البى مُويتو سُقنا
و أخد ماروقنا و عَزِقنا
شِن تَجِيب الشَفَقة إن شِفِقنا
بعد ما اتْحَتْحَتْ صَفَقْنا
َكِتير يا بَحَر اْتْمَحَقْنَا
شديد ِبْلحيل أتْلَحَقْنا
و بَعَد غيبوبتنا فُقْنَا
ِلِقينا عَجَب ما صدّقنا
حِليل بى تِحِتْ آ رَفَقْنَا
َمِقيل ساعة الحر خنقنا
نخيلنا التِّحْتُو انطلقنا
نَدَرْدِق للعوم فـِلَقْنَا
سَمِح ضُلو الليهو تُقنا
و سَمِح ُ رطَبُو الدابو ُضقْنَا
و بين حورو سمح صَبَقنا
و سمح سعفو الفوق طبقنا
لعبنا و طينك زلقنا
و كرّينا الحوت بى خلقنا
و قدر منك ما انحمقنا
عليك مكروه ما نطقنا
أخير ما نكشف ورقنا
قول الله يسهل طرقنا
و معاك يا بحر اتفرقنا
من بيوت ابواتنا اتفرقنا
من ضليل تمراتنا اتفرقنا
من قعاد خلواتنا اتفرقنا
و من كل حيلتنا اتفرقنا
و سلام يا الخلا فيهو رقنا
و مناخو معاهو اتفقنا
هجير الخلا كان حرقنا
تانى ياهو غربنا و شرقنا
و كان ضُمَّ ابيت ما تسقنا
عبّادى يكركر برقنا
و بى موية الخلا كان شرقنا
أنت مويتك توجع حلقنا

[أبو وائل]

الشاعر عبد الله محمد خير
سحر الطبيعة

جـافــانــي الـمــنــام وأصــبـــح مــحـــال
يــــا ســلــوى مــالـــو عــذابـــي طـــــال
طـريــت زولـــي العلـيـهـو قلـيـبـي مـــال
طـريـتــو الــلــي مــنــام عـيـنــي شــــال
طـريــت الحـسـنـو آيـــه مــــن الـجـمــال
الـوحـيـد بـيــن جـيـلـو مــعــدوم الـمـثــال
بـوصـيـك يـــا رســــول قــبــل الــــزوال
ســافــر وفــــي عــقــاب الـلـيــل تــعــال
أمـــش لـلـفـي الصـعـيـد شــــد الــرحــال
قـولـو طيـفـك فــي خيـالـي أنــا لا يــزال
أقـــول ظـبـيــة ونــشــت بــيــن الــتــلال
والله أقـــول حـوريــة مـــن جـنــة بـــلال
أقــــــول غــــــاده ومــــــكلله بـــالـــدلال
دي قطعة من سحر الطبيعة الفي الشمـال
سلوي ليـه فكـري أنشغـل بيـك يـا غـزال
ولـيــه طـــال إشتـيـاقـي ودمـعــي ســـال
مـتـيــن ألــقــاك فــــي بــيـــت الــحـــلال
وألـقـي كـــل شـقــاي كـــل عـذابــي زال
حـجـبــت ضــيــاك عـنـنــا يــــا هــــلال
ونـسـيـت بـلـدنـا يـــا ســمــح الـخـصــال
تـــطـــول يــــــا الله أيــامــنــا الـــقـــلال
نـعــيــش ونـحــقــق أحـــــلام الــخــيــال
أســــرت قـلـيـبـي يــــا تــبــش الــرمــال
أنا لا يلوموني إن بقيت فـي هـواك ضـال
مــــع ذكـــــراك دايــمـــاً فـــــي نـــــزال
أنا نومي جافى وعقلي مافي وحالي حال.

[أبو وائل]

الشاعر عبد الله محمد خير
مشاويرك عديلة

عديلـه عليـك مشـاويـرك عديـلـه
عديله إن كان قصيره إن كـان طوليـه

عديله عليك محـل مـا تمشـي تمشـي
يـا عديلـه أبقيلـو زي الغيمـه رشـي
أما أنـا الهامانـي راحتـك أول الشـي
ليـك تأمرنـي وعلـي أمـرك بمشـي

بس توعدنـي مـا طـول بيـك غيبـه
وعد من أنبـل حبيـب لأجمـل حبيبـه
فيـك شفـت الدنيـا قاصيهـا وقريبـه
ومنـك اتعلمـت كيـف أقـدر أجيـبـه

لا متين يا نومي فيـك رؤيـاي تصـدق
ولا متين يا شوق موالي قليبـي تحـرق
تاني جود باللقيـا يـا زمنـي المفـرق
وتاني يا اجمل صباح في عمري أشـرق

يا حلاة العُشرة وكتين تبقي صـح صـح
ويا حلاة الريده وكتيـن تصفـى تفـرح
يا حلاة ليلاً معـاك مـا درنـا يصبـح
ويا حلاة صبحاً معاك تكون إنت المصبح
في الربيع قالوا الزهـور تنضـر تفتـح
يا ربيع في حضنو كـم لفانـي وارتـح
صار يباب بستاني من غيـرك مكـردح
غير سموم في أم شير وغير أم شير تكتح

حبـك الخلانـي لـى زول مـا بجافـي
وحبـك العلمنـي أنظـم ليـك قـوافـي
حبك أكبر مهر لـي طهـري وعفافـي
آي بحبك وأصلـو حبـك زيـو مافـي

[أبو وائل]

الشاعر عبد الله محمد خير

أصـــحي

اصحى وصحى المشاعر لبيهو نداء قليبك
ابني طريق من أزاهر يصل بينك وبين حبيبك
معاك تصفي الدنيا تحلى يطيبها يا طيبه طيبك
تعيش سطور السماحه وخيال الناس يحييبك
متل بالحب ماابتلاني الله بعدو الريد يصيبك
تباري خطاى تتبعيني ده انا الكليت فوق دريبك
شياطين شعرى سون فى وقبل ما يبقي جوابك لبيبك
اذا جفى مدادى قوافى فلا شك يكون ده عيبك
دريباً كان منى ساقك هو نفس الدرب البجيبك
متل ماعاد لى حبيبي بعود لى ضرعك وجيبك
تعالى تعالى وانثري درر قوافي وشعر صافى يكون حليبك
يعاود روضك نضاروا ويزينو غناء عندليبك
قريب يا دار الحبايب معانا ينقز دليبك
يقلّب فى الدار صيدك عجيب يا داره قلّيبك
حسان الانس والجن بنات الحور اباهيبك
سماح الكون بيك يبدا وسماح وعقب ينتهيبك
عشان كدي يا نور عيوني صباحى مساي الاهيبك
مصيري خلود فى جنانك ما خد حقى انا في لهيبك
دموع عيني الهميله انا كفاى وكفاكن صبيبك
دحين ارتاحى من عذابك خلاص ولى زمن نحيبك
رموش افراحى الجميلة الله لا جاب ايام مغيبك
بحر عطفك فاض غمرنى على زادن مناسيبك
معاجيز وآيات جمالك تخلى الوراء يقتديبك
خدودك كرز معتق يحدثبوا حساء نديبك
وزارات صدرك تخوف قريبن تب مو قريبك
كسي الارداف بي ظلامن بحر واتهادى وضيبك
احبك وقادني لى حبك حياء ادبك وتهذيبك
احبك واعشق دلالك غرورك وحتى تعذيبك
احبك ويفرحنى صدقك بطرب لى اكاذيبك
احبك وغاية مناى اني اكون آخر مجاذيبك
احبك وكيف ما احبك حبى قدرك ونصيبك

[أبو وائل]

الشاعر عبد الله محمد خير

التوفيق السياحي

خلاس أنا هبت رياحي وصفالي زمان ارتياحي
زاد لي سهري ونواحي القام بالتوفيق السياحي

من عند الفاتح قيامو ختم ورقو واخد تمامو
يا ربي تبارك ايامو وتعدل الخطوة قدامو

سمح توقيتو الصباحي مريح سفرك كالسباحي
منع غنايو النباحي وسمحلو الغزل الاباحي

توكل وبالحاميه نشَّ دقايق في قبولي (القبولاب) خشَّ
لقى الخلا ماخلدو رشَّة وكسح بالنور والمنشَّة

سرح زي ظبي الضواحي السرح بين الوديان وواحي (واحة)
كفاي يا نوح من نواحي وأزاي من عدة نواحي
تعاين فى الكرسى واحد تآمن بى الله واحد
تشوف الفى زمانو واحد عيارعشرين فوقو واحد
رقيق الزول وإنفتاحى وشفيف ذى زهر الاقاحى
معاهو أن لوأجد صراحى تكون إندملت جراحى

رزاز والنسام ربيعي تجمَّل وخليك طبيعي
نكوس في الفرص الوسيعي سواقنا طوابنا الوسيعي
سرت فى جسمى نتاحى خلتنى أشرك وأحاحى
بقيت غبيان مانى صاحى وده شيتا مو شيت نصاحى
يلقط يوت في النوادر يشيل ويودي البنادر
مخيَّر عاد والله قادر هن ماهن شبه الدرادر
وأنا لانى برعى ولانى ماحى أنا إتخصص فى السماحى
بصيبرة عيونى لماحى وتصيب مابتخيب رماحى
نكتِّر لله الحَميدي الضهر حاضر في الحِميدي
رحلات التوفيق سعيدي قربت للناس البعيدي
يا الزباينك واسع نطاقا عشان تصلك بازلي طاقا
بقى حجزك بالبطاقة في ترحيلات الصداقة
السواقة وراثة ودراسة مو جربنديِّ وعواسة
رزانة وحكمة وفراسة ودي ود ابزيد كان اساسا
القيادة محكِّم نظاما ذوق وأدب واستقاما
بقت في بوريك علامة بركة الجيت بالسلامة

[أبو وائل]

الشاعر عبد الله محمد خير
بطالع

بتسالي في ايش فيك ياخي بتطالع
بطالع في بدر فتق الخمار طالع
و اطالع في برق بهر خطف شالع
بطالع في القوام الامرد الفراع
و بطالع و في جمر بيك ببلاك والع

و تسالي في ايش فيك ياخي بتطالع
بعاين بختي في سمر الرياض ضايع
مبعثر حظي بينا لذكري و الشايع

و تسالي في ايش فيك ياخي بتطالع

بطالع الا انا قبلك شبعت جايع
و بطالع ويش في بين الشاري و البايع
يفتح الله يستر الله يا رايع

و تسالي في ايش فيك ياخي بتطالع

بطالع في اللي في صيد القلوب بارع
و اطالع في عزيزتي تلاوي و تصارع
و اطالع في القيامي القايمي في الشارع

و تسالي في ايش فيك ياخي بتطالع

بطالع في بهاك يا حسنةالطالع
و اطالع في النفس لا يبقى مو طالع

[أبو وائل]

الشاعر عبد الله محمد خير
أجمل الحلوين تعال

خلينى احكي ليك حكايات الغرام المزمنه
خلينى اشكى ليك وأشرح حرقت الشوق والضنا
خلينى اسمعك الغنا
يا اجمل الحلوين تعال شان انت تعرف مين انا
انا ما جميل العاش متيم كم سنة
ومانى الملوَح قضى عمرو مع المنى
انا زول جديد
مجنون شديد
يعرف يريد
يعزل .. عزل .. الا البريده مكجنا
انا من مشاهير المحبين الحنان
ولمن عشقت عشقت من حور الجنان
واسمع كمان
انا من مظاليم الزمان
يا روحى بسألك الامان
دايرك حياتى تأمنا
انا ما اظننى فى خيالك يوم بطوف
وانت البراك شايف بلاك انا ما بشوف
بهواك فى كل الظروف
وأقراك فى كل الحروف
وألقاك فى النيل والجروف
ليه يا عطوف مالينى خوف
ألحق رويحتى وطمًنا
انا يا حبيب منك بدور اسمع كلام
زى ما تقول .. انا عارفو كلو معاى تمام
اتمنى لو كان فى الغرام
أو فكره فى الشوق والهيام
ان شاء الله حتى يكون ملام
او فى المنام واقول بيحلم بي انا

[أبو وائل]

الشاعر عبد الله محمد خير
البت عفيفة

مشت خلتنا صيدتنا النحيفه
مشت خلت عليباتة وبريشاتة ورفيفه
نست حش القشوش وضفير سعيفه
ونست فرك الملاح والقرقريفه
بقت شافعة مدن فاهمة وظريفه
اخر قندفة ومسكت وظيفه
وظيفتا مااتلقتلك يا الخليفه
هى مالا ومال بلدنا ومال نكيفه
ومال البيبرى حركاتة ويشوفه
ابوها وعمها وشيخنا الخليفه
وعاملين كل واحد ابو حنيفه
حلاتا فوقة كان شوفت الوقيفه
تنقسم خمس كيمان نضيفه
صديرة ونصها راسة وكتيفه
سماحة الساق تقلب بى رديفه
من فاتت بلدنا وقش جروفه
لابتاكل ام رقيقة ولا الشريفه
لا القراصة لا المفروكة لاالمرة الرهيفه
شان ما تتهضم ليها بتعيفه
تاكل مرة سلاطة ومرة بطاطه
ممكن كوسة ممكن باسطة او بيبوسه
وعشان رجيمة ما تاكل نص رغيفه
تاكل الشطة وكمان الشطة النضيفه
وبتعرف ناس وناس اصحاب وظيفه
ولو من بدرى عرفت ديل كان صبحت مضيفه
وكمان عصرية ما رجعية حاشاها الاديبه
وما لسع بتدهن وبتسرح سبيبه
لا دى اخر موضة ومنقوش زى حبيبه
ولانها حرة ما مسجونة فى حوش او زريبه
بعد لم قريشات فى عليبه
من تمر الهبوب حبة وحبيبه
بقت ماهية يوم تلتين تجيبه
طالعى ونازلى تقدل بى حقيبه
قليمة وبدرتة وطيبة وحبوبه
وكل عجائب الدنيا العجيبه
وبرضو يقولو لينا البت عفيفه
طلوعة وقفتة الفى الباب ونزهاتة الخفيفه
ولو طلعت مع اصحابة او زملان وظيفه
حضارة وبس لا اكترولا حاجات عجيبه

[أبو وائل]

الشاعر عبد الله محمد خير
سعـــــاد

سعاد يا أيه الجمال البقت بين كرمه وكريمه
وسعاد يا زينه بلدنا وسعاد نواره حريمه
سعاد السواهو غيرك مجدب وما عندو قيمه
وسعاد خدرتى الزراعه وكمان فوقه بقيتى غيمه
أخافلك أنا من زمانى من عيون عزالى وجحيمه
أخافلك أنا من جمالك من النظره من البسيمه
سعاد جاى من السعاده وهى ماخده اسمه من اسيمه
وسعاد يا معنى السماحه المقاسته حسب جسيمه
سعاد يا احلى الامانى وسعاد يا الطف نسيمه
وهنيه الراجيك محرق مناهو يفوز بالقسيمه
سعاد يا حوريه طاهره حنينى ونيتك سليمه
وسعاد بى حال المهاجر أظنك خابرى وعليمه
سعاد لو جادت ظروفنا سخت سوت بينا ليمه
معاك لو حاولنا نطمح عشمنا يقيف عن كليمه
سعاد النار البتوقد تبوبى وتحرق غريمه
وسعاد الوجع البسهد عيون الغزلان وريمه
سعاد كم صياد ماهر معاك مودر صريمه
وصريح القانون يقول الوقوف فى بابكم جريمه
سعاد وا حيرت القصائد معاكى جديده وقديمه
سعاد يا عجز القوافى عشانك هجرت نديمه
سعاد يا وردة بنفسج مفرهدى نديانى ديمه
وسعاد الفرحه البنتمنى الله يصونه ويديمه

[أبو وائل]

الشاعر عبد الله محمد خير
المنام

تعال كلمنى عن رؤياك وما فيها
صحيح بالله شفت النار وشفتنى ياجميل فيها
قول لى كان شعورك كيف وهل حاولت تطفيها
والله كمان رضيت بالحال وقلت اسيبو فى الفيها
دى ما احلام ؟؟؟ دى حاجة خفيه ما اظنك تعرفيها
وحاتك ظاهرة فى عينيك لو جاولت تخفيها
ليه ما تشوفى روضة غنية بالازهار تطوفيها
وتلقى كمان طيور الريد تناديك وتشوفيها
بقيت محتار شفاهك تروى حكاية القى عينيك تنفيها
وارجع اناجى نفسى براى يبقى عهوده توفيها
وتشوف آيه وتنال غاية وتقول احلى الشعر فيها
وتسال الله من شر خلقو والحساد يكافيها
وتنوم مسرورة من هلواسا يشفيها
وتشوف الجنا فى احلاما والاحباب تصافيها
وعيونا تقول حكاوى الريد تصالحنا ونعافيها
ونعيش ف دنيانا فرحتا وابتهاجا وكل ترفيها
حليلى انا البنات افكارى ضاعت بين قوافيها
وتاهت فى بحور الريد بتسال مين مرافيها
وين مرسالا كان يا حليلو بالاخبار يوافيها
بعد عاش السعادة معاها كيف يقبل يجافيها

[أبو وائل]

الشاعر عبد الله محمد خير

ما بريدك تاني


ما بريدك تانى
مادام البريدو نفسو بيقولو ( أنانى )
أنت ياك نفسى وحياتى
وياك كل كيانى
وانت ياك صمتى وحديثى
وبهجتى ... واحزانى
لكين وين اودى حنانى ؟؟
وفى مين عاد اقول شعرى وأجيب أوزانى
كم مرات على حبى ووفاى جازانى
كلما إعتز بى نفسى وكمان عزانى
وكم مرات .... ومرات بالفرح هزانى
كلما فر فاطرو وبى بسيمتو ادانى
حاسس بى وجودك جوه فى وجدانى
وكلما يوم أداعب خدك الوردانى
من ظرفوا الشديد لا صد لا عادانى
وما قادر أقرب من قطوفو الدانى

[أبو وائل]

الشاعر عبد الله محمد خير

مـــشهد


وجنتـــاها لمعت في الضـــوء
حتي ارتعش الضـــوء خــجل
***
وشفــــاه لثمــــت بعضــــــــاً
وظلت في عنــاق مــــــرتجل
***
وعيون نظــــــرت فانكسرت
فرأينا الحســــن فيـــها يمتثل
***
وتوأمان من الصدر أطـ ـلا
يفصل البعض من الآخر ظل
***
وسبيب كان ليـــل الحــــــفل
أســــــــــــود ينــــــــــــسدل
تتهـــــادي بين أفــــــــــواج
الشبــــــــاب المحـــــــــتفل
***
تنثني طوراً وطوراً تعتــــدل
خطوة تتبع خطوة ثم جيد ينهدل
***
ليتـــــها تـــــــدري الـــــــذي
من خلف صـــدري يعتمــــل
إنه قلب لمن شاهده لا يحتمل
***
فتنة قد خصــــها الله بــــها
وشبـــــــــاب مكتمــــــتــل
في قــــوام يتلــــوي طيعـاً
حـــين يبـــــدو معتــــــدل
***
أبمـــــــــاء الـــــــــورد ؟
أم بالطهر كانت تغتســــل

[أبو وائل]

الشاعر عبد الله محمد خير


وعد الحبيبة



عديله عليك مشاويرك عديله
عديله إن كان قصيرة إن كان طويله
***
عديله عليك محل ما تمشي تمشي
يا عديلة أبقيلو زي الغيمة رشي
أما انا الهاماني راحتك أول الشئ
ليك تأمرني وعلي أمرك بمشي
***
بس عليك توعدني ما طول بيك غيبه
وعد من انبل حبيب لي اجمل حبيبة
فيك شفت الدنيا قاصيها وقريبه
ومنك اتعلمت كيف لأقدر اجيبها
***
لا متين يا نومي فيك رؤياي تصدق
ولا متين يا شوق موالي قليبي تحرق
تاني جود باللقيا يا زمني المفرق
وتاني أجمل صباح في عمري أشرق
***
يا حلاة العشرة وكتين تبقي صح صح
ويا حلاة الريدة وكتين تصفي تفرح
ويا حلاة ليلاً معاك ما درنا يصبح
ويا حلاة صبحاً تكون أنت المصبح
في الربيع قالو الزهور تنضر تفتح
وياربيع في حضنو كم لفاني وارتح
صار يباب بستاني من غيرك مكرتح
غير سموم في ام شير وغير ام شير تكتح
***
حبك الخلاني لي زول ما بجافي
وحبك العلمني أنظم ليك قوافي
حبك أكبر مهر لي طهري وعفافي
آى بحبك واصلو حبك زيو مافي .
***

[أبو وائل]

الشاعر عبد الله محمد خير

مـالكن علــي ..؟


مالكن على
وليه يا نهيدات الجدى
سويتا العجب العجيب
فى قلبى بهدلتنو لى
نوسرتن الجرح القديم
الكان مسهد لى عينى
ومــن شفتكـن
ما شفتن الحاصل على
ما شفتن القرن القبيل كت قايلو مات
تاريهـو حـى
تاريهو زى ما كان زمان
ينبض ... شباب ... وشجون ... وغى
***
ليه يا نهيدات الجدى
يا برتكانات إستون
فوق عودن اللدن الطرى
مضمور محل .... متبور محل
نجضان ونى
لين هنا ... ونديان هناك
وسط ..... قوى
بس عندو سيد مرات عنيد
مرات ....... هدى
*****
ليه يا نهيدات الجدى
واقفات بلا قببا
فقيرن ديمه شالع فوقو ضى
ينشاف قريب ... وينشاف بعيد
بتق فى إحساس جديد
ينتر شديد
لا عرفتو ريد
لا عرفتو جن دايرلو قيد
وقفت حدود معرفتى فوق حلما صبى
يرجف .... يغازل النسمه كان هبهب هوى
***
مالك على
آ بنى هوى مالك على
وانا عمرى ما اتحدث مع زولا اسمو (مـىّ)
بس قولى شن قارنى فيك لاك عارفى (هوىّ)
***
لاك عارفى (هيى)
لاك عارفى هىّ
وللشىء البعجبك
ما بتعرفى تقولى (سىّ)
***
يا بت عليك (زاد الشجون)
وبوب مارلى والحزن القديم
اتمهلى لا تستهزى بىّ
عمك انا ... وجدك كمان
لكن مصيبتى على العلى ّ
بهوى الجمال
وبهوى السبيب كلما هو طال
وبهوى الصدير كل ما حضن رمان وشال
وبهوى البنات كلما بقن شبه الغزال
وما فيش بلا الهوى بين ايدى ّ
***
وانا من زمن بارى السراب
سارح معاهو ودىّ ودىّ
كل ما اقول بى داك عمار
ادنالو القى هويد وصىّ
***
ليه يا نهيدات الجدى
يالزى (نواطي) الترك
فى العالى ما طلاها رىّ
يا الزيكن ...ما شفنا زى ّ
طماع انا ..!! ومابرضى بى شيتن شوىّ
وما بيسعد المكتوبلو فى المحفوظ (شقىّ)

[أبو وائل]

الشاعر عبد الله محمد خير
بخت العقد
لو مرة جاد زمنى وسعد
وبقيت متلك يا عقد
ارتاح وفوق صدرو انسند
وانفر مرات وانجبد
وامزح على كيفى وأجد
لا بنسئل لا بتنشد
***
أدينى بختك يا عقد
لا يوم زعلت ولا حرد
لا خفت انك تنطرد
***
فى ذمتك قول يا عقد
كم مرة فى اليوم تنجرد
كم مرة بالشوق تنزرد
وكم مرة دليت الورد
***
سبح لمولاك يا عبد
وسيب المشاغلة واقتصد
كان أصلو ما عندك قصد
***
وداير تبالغ وتستبد
بالمتعة داير تنفرد
وبين برتقالتين تنعقد
يا الله ما أحلى العقد
وما أحلى لحظات العقد
***
داير تقولى يا عقد
كان أصلو ما عندك قصد
لو قال لك أرحل...مستعد؟
ما انت غلطان يا عقد
وكم زول على غلطك شهد
خل السميح الينجبد
دام ماك مغطى من البرد
الله من الجلا والبرد
والله على فلذة كبد
كان نايمة قدام الكبد
***
خلى العقد وخبر العقد
خايفك تكون يا قلبى رد
شايف عينيك أبن الغمد
ونارى اللبت ما تنخمد
وجسمى المصلصل كيف ورد
***
عارفنى ليهو انا مانى ند
ويمكن أكون للزيو جد
ياريت لو الوابور يمد
وينسى (السليم)لو بالعمد
شان من جمالك نستمد
شان لى وداعك نحتشد
دايرين نصافحك وده القصد

[أبو وائل]

الشاعر عبد الله محمد خير
تقبل و اللا ما بتقبل
عــاد ياقلبي كيــف تعمل
ماضيــك اللكـــان أجمــل
سعادتك فيهـو ماش تكمل
ودقـاتـــــك بتــتـعـطــــل
تقبـل واللا مــــا تقبــــــل
مجبور ترضي باللحصـل
تخطيطك تراهو فشــــــل
وما دليت دلــوك نشـــــل
كفاك زمن شربت عســـل
هــاك اتجرع الحنضـــــل
ظنيتـك كبـــرت عقــــــل
وفوق نيرانـــو تتملمــــل
أخيرلك صلـى وإتنفـــــل
أوعـــك تانـــى تتطفــــل
ماضيـــك بالأمـاني حفـل
أفراح فى لعــوب وحفــل
غــاب نجــم السعود أفــل
جديـا كــان ولوف وجفـل
في دنيـاك مافـي عـــــدل
شقــاوتك ما بـي تتبـــدل
بي فوقـك جا ماشي قدل
ديسـو اللي كتيفــو هـدل
يميـل ويميـــل ويستعـدل
وعينيهــو الملانـي جـدل
تقبـل واللا مـا تقبـــــــل
مجبور ترضى باللحصل

[أبو وائل]

الشاعر عبد الله محمد خير
بلا ميعاد

أنا الجيتك بلا ميعاد
معاى إسم الله لى مهرك
شايل شيلتى خير الزاد
حقايب تقوى مليانات من لإيمان
عشان نسقيهو لى اولادنا والاحفاد

يشابيلك قليبا لى رهيف رياد
وجاييك من بلاد الرحمة من عند الحرم صياد
يدور يقنص غزال ذى الفريع مياد

أنا الجيتك بلا ميعاد

مهاجر ليك فوق صهوة أعز جياد
وسايق النوق متل عنتر بنى شداد
ورافع ليك رايات طارق بن زياد

صحيح جيتك بلا ميعاد

بغالب حزنى بى فرحك واعاندو عناد
ومنو الجاييك بلا ميعاد

ولد عز الأصل معروف من الاجداد
حفيد الكان يهوج فى بهجة الاسياد
تلوت الليل يدلى تلت من الاوراد
ومع الفجاج يكابس الخلوة بالبراد

[أبو وائل]

الشاعر عبد الله محمد خير
حبايبنا كيف الحال

..........................
حبايبنا كيف الحال بعد غيبتنا من داركم
دحين فكرتو فى زولاً مضـًا شهرين وما زاركم ؟
فضل يتعقب الجايين يكوس يتنسم اخباركم
يقول يبرد لهيب قلباً محرق ديمه بى ناركم
***
هيا ..... حلوين ... حليل ايامنا بى غادى
ويا حلوين ... حليل ... مجلسكم الهادى
وحليل ..... انساً .... متل ترنيمة الشادى
حليلوالعده خلاكم وبلاكم باقى مو عادى
***
حبايبنا ... بقت كيفن اماسيكم ؟
بعد ودعتو محبوبا يصابحكم ويماسيكم
مشرق بى قواربو الريح مفارق لى مراسيكم
يحاول .... مره ينساكم .... وينسى انو ناسيكم
***
هيا يا حلوين ... لهيب اشواقنا ... شاوينا
ويا حلوين ... بسيمات مين ... تداوينا
ويا حلوين ... نقول ... لى مين ... غناوينا
وقصائدنا .... تفتش ... عن عناوينا
وما اجمل .... عناوينا ...
***
حبايبنا ... سلامتنا تحايانا
واذا راجين هدايانا ....
دى يا حلوين مغطرسه بين حنايانا
لا بتنشاف ولا بتنشال !
دى ... من اطهر مزايانا
واذا ما قدر الله نعود ...
ونكشف ..... عن خبايانا
اصبرو وغنوا يا حلوين
غنوا...
وقولو جايانا
غنوا ...
وقولوا جايانا

[أبو وائل]

الشاعر عبد الله محمد خير
المكتوبة

المكتوبة مابتفات والمقسومة ياها الجات

حبابكم عشرة يا أبواتنا والامات
حبابكم عشرة ياخالاتنا والعمات
حبابكم عشرة يالأخوان والأخوات
حبابكم وفى العيون دمعات
حبابكم والزمن واقف
يحدق فينا بى نظرات
وتراكم شفتو كيف خلق الله من وين جات
وشفتو الدارة عامرى تملى بالضيفان وبالضيفات
عشان تدفن عذابك يا قلب وكتين عذابك مات
ما دا الفرح الفقدتو سنين معاك الليلى قيل وبات

وكت رقصت شعبت الحاج
وحمدخير ضرب فى حوشو كم طلقات
وغنى كتاب أبوى سعيد ورتل لينا كم آيات
وهزو جدودنا فوق بنوتنا وكت إتعالن الصيحات

أبشرن يابنات حلتنا يالسمحات
أبشرن يامهيرات دهمش الجامحات
أبشرن وأشكلن فى الدارة بالصفحات
أبشرن وأسمعن نظما روى الدرويش
مآسر فى طبيعة عزكن واضحات
وشوفن كيف حفيد الحاج
لعب بى ريشتو جسد لينا كم لوحات

وحاتكن يابنات بلدى
وحاتكم ياولاد بلدى
وجوهكم كت بفخر بيها يوم سعدى
ومنوا الغيركم وقف يوم سبعه كان سندى
قسم بى كل ما فى قلبى من تقديركم الأبدى

أنا البيكم بقيت عزيز ولى مكان
بقيت محسوب من الأعيان
بقيت فنان أهز الناس طرب وأسقيهم الالحان
وكل زويدى من واديكم الريان
عذاب وحنان

قسم بى كل ماحولى
بيوت اهلى نخيل اهلى
بى واطاتم المزروعه والسهلى
وطيبة أخلاقم المعهودة والمهلى
يانى وليدم العرفونى من جهلى
(ودعبدون)
عزاى الفرحة بين اندادى والمتلى

وحات خلق الله يوم الحنى بى زول زول
وحات شيختنا من العقبة للماتول
وحاتكم يالوقفتوا معاى شباب وكهول
ووحات الغايب المجهول

قسم بى كل ما عانيت
ضياع وودار عنى وتشتيت
ووحات اشعارى بى بيت بيت
ووحاتك يالبراك ابيت

وحات كل أصدقاء عمرى
ووحات البى غيوب يدرى
ووحات الفى الضلوع يسرى
معشعش فيها من بدرى

وحاتك يا اعز الناس
وحاتك يا عقيد الماس
وحاتك ياجميل الصورة والإحساس

وحاتك انت ما تلوم
وانا ما بقدر على قولا بعد باكر وسط زملاى بيه إنزم
وأنا رضيت كل التقيلة اشيلا واتلزم
رضيت انا أشقى شان ارضى الأهل من جم
رضيت اضحى شان كل الشمل يتلم
رضيت انا اشقى شان اسعد بنات العم
رضيت بالكان وكل الكان ومافى ندم
رضيت اكون ضمير انسان بيسعد ومرة يتالم
رضيت اسيب لسان الحال بكل شجاعه يتكلم
يقول للدنيا كل الدنيا فى كلمات
المكتوبة مابتنفات والمقسومة ياها الجات

[أبو وائل]

الشاعر عبد الله محمد خير
سيد الفتنة

سيد الفتنة يالحبك ملكنا
فتنا وفى هواك الشوق هلكنا

خلاص جنينا وإتقطع سلكنا

من يوم لى طريق ريدك سلكنا
فرحنا وقلنا ليك نحن إمتلكنا
ياخى مالو أبوك تانى أداها لكنا

كان قربنا تتعبك دلكنا
وتدور كل المباهج فى فلكنا
نساهر فى جديدك ياملكنا
ونوهب ليك حياتنا وماملكنا

ياسيدى الحسن ليك ما تركنا
وجينا الليلى قدامك بركنا
بعد ماجبنا ريحتنا وفركنا
دى تالت مرة مالو هبرشركنا

صبرنا ولاخطبناك لاشبكنا
راجين قلنا تتحلحل شبكنا
كم خططنا يازول وكم حبكنا
وأبوك بى ردو دوخنا وربكنا

بلا الهوى من هواك تب ما مسكنا
نحن شن سوينا يا طيبنا ومسكنا
زهدنا الدنيا لى ريدك نسكنا
وفى عينيك هناك سكنا سكنا

[أبو وائل]

الشاعر عبد الله محمد خير
حديثك شوقنا ليك
يا الحديثــــك شوَّقنــــا ليك قول لنــا أىَّ حديث نسمعــــو
قول لنـا أصلك مابتريـــدنا ويلاّ قول لنا قومـــو أرجعــو
نحـــن جيناك وقصِـــدْنا كـــان الله شَمْلنا بيـــك يجمعـــو
ولـــو يدور يخَــــرب بينا زول لابْنَبـــــارى ولابْنتبعـــو
تـبـقــى دنـيـانا هَــنـــا وسُــرور ضُمَّه عِرق الَشقا نقلعو
نزرع الريد فى كلّ دار
ونسْقِى لما يفرهِد خَــدار
ولـــمــا يتَّــــاكى يشيل ثمـــــار نِحنْ أول ناس نفْـرعــو
كـــان أمانيـــهو من الحَنــــان يروى ينهَـــل من منبعــو
والفضـــول الفى عيونـــو عاش فيكَ بعد الجوع يَشْبِعــو
تــوحى ليهـــو بلحن الخلود بى حروف من نور يطبعـو
وبيـــكَ يكبر فرحو ويزيد
ويحكى للدنيا حكاوى ريد
إلا عـــاكــــس دهــــرو العنيــــد هدَّ آمالــــو وتابعـــــو
ماإنـتـــظر من قَـــــدَرو الشديد فى أعز الناس يفجعـــو
خَــلّــــه زى فاقدين الصـــواب البيسيبو الدار ينجعـــــو
سابــــو لى شيطانـــــو أب قرون يَلْفَه بعد الناس يهجعو
يكتب الأشعار فى هواكْ
لاعِرف لابيعرف سِواكْ
جاك وقيعَـــكْ وبقى فى حَواكْ إلا ضربَــــكْ آه أوجعـــو
فــرَّ بَسْمك شـلعَــــن بروق رغم أنف الضـــو يلمعـــــو
فــرَّ فـرَّح.. فـرَّح قــليب فيـــك خاب أملـــو ومطمعــــو
يــنــسـى فـى بسماتَكْ عذاب يـنــسـى آهـاتــو وأدمعــــو
وينبهت فى لُجَج السمـاح
وينبسط لى طعن الرماح
أصلو فــى ريــدو قِمِــح قََمَــاح وسـدَّ باب الريد شمَّعُـــو
الله فى خلقو خلق (صلاح) والله مختار فى البـصنعـــــو
زادو فــــوق إيمانو (إيمان) بيهو آمن وبيكْ أقنعــــــــــو
كونـــو يهواكْ ويـــذوب حنان مافى زول يقدر يمنعـــــو
بى شبابو وساعدو مفتول
فى هواكْ مفتون ومكتول
أمسى زى الراهب البتـــول أهلو منــو خلاص يقنعـــــو
آيـــــة فى رقْصَكْ يا جميــــل وكتين إيديك يتفدعــــــــو
وصـــدرَك الدافر حبتين لمـــا يتـــهزو يبــــدعـــــــــــو
الرَّجُــــوك فــى الـــدارة واعين تلقى أفكارن ودعــــــو
وإنتَ فيها بَراكْ صُول وجُول
فى الرقيص ورينا الأصـــول
خَلّى كل النـــــاس فيكْ تقول قالوا المابـــتلحقو جَدَّعُـــو

[أبو وائل]

الشاعر عبد الله محمد خير


يامثير للدهشة

يامثير للدهشة فى الناس والفضول
ياربيع الدنيا يا أحلى الفصول
يامعانى الطيبة والرضا والقبول
ياسمح ياراقى يازول إنت يازول
*****
إذدهت بيك امنياتى الحول ورا الحول
وشرعت آمالى فيك بالعرض والطول
بس مصير قلبى البيهواك لسه مجهول
واللعب بأسم المشاعر ماهو مقبول
ياسمح ياراقى يازول إنت يازول
يابريد أهل الغرام هاك منى مرسول
مادتو الشوق والهيام من قلبى مرسول
للقليب الأبيض البطهر مغسول
لللهيج الحالى ريقو حديثو معسول
قولو زولك مو نصيح مرضان ومعلول
حالو حال الفى البحر عطشان ومغلول
خلو بى عنبو الطرى البنداهو مبلول
اليقولك زوللى امرو القاسى محلول
ده المنور دابو فى قلابو مشتول
الجديد لوريهو ماسدروبو ماتول
كم من الشيب والشباب الساعدو مفتول
صاح مع الزين جوه حوش العمدة مكتول
لامتين يالله يصبح حالنا معدول
وبى نعيم الدنيا نلقى شقانا مبدول
ننجمع بالديسو فوق اكتافو مسدول
والقوام الطيع المفدوع ومجدول
تفرح الدار تنفتح زغرودوهلول
والبنات ليل فى السباتة يغنن اللول
حين يكون صمت الحبيب أبلغ من القول
وأى هزه من الحواجب ليها مدلول
ياحبيبى الغالى كم لى فيك مأمول
قبل أجيك فوق آلة ذى ماقالو محمول
خلو حبل الريد يكون بيناتنا موصول
شان حصاد زرع السنينن نجنيهو محصولل

[أبو وائل]

الشاعر عبد الله محمد خير
أحلام
قيلتو نُصاح
امسيتو شُداد
يا ناس عن كل فرح غايبين
يا ناس تتوسد جمر البين
همّت .. لمّت .. كدر الأيام
حبّت تستمتع بلألام
مطحونة ملل
****
من قبلو دوام
من بعدو دوام
قيلتو نُصاح
امسيتو شُداد
يا ناس هجرت وطن الاجداد
نزحت .. كدحت .. في درب الزاد
في (الكرمتة) او في حوض ابو ادم
امتار عشرين
من مليون ميل
انشاء الله تكون في مجري السيل
في اكبر مشروع إنمائي
مشروع في السكن العشوائي

[أبو وائل]

الشاعر عبد الله محمد خير
غداً يا حلوتي سأراكي تبتسمي
غــداً يـاحُـلـوتـى ............ حَـتـمــاً سـتـبـتـسـمـى
ولـسْـتُ أحِــبُّ شـيـئـاً غـيـرَ أنْ ألـقــاكِ تـبـتـسـمـى
سـأفـْعَــلُ كُـــلَّ مـايُـرضِـيـكِ رغـْــمَ تـَغـَــوُّلِ الـعَــدَم
بـرغــم الـضِّـيـقِ ................. والآهَــاتِ والألـَم
سَـيـَدْفـعُــنـِى الـهَـوَى ........... لـتـسَـلـُّـق الـقـِمَـم
لـِكَـىْ ألـقـاكِ تـبـتـسـمـى سَـأكْـسِـرُ حَـاجــِز الـوَهَــم
وأبْـنِـى الـعِـــزَّ ................ والأمْـجـَـادَ والـكَــرَم
لـتـبـتـسـمـى
أضِـيـعُ تـَمَـزُّقـــاً ................. لأراكِ تـبـتـسـمـى
وحِـيـنَ أراكِ تـبـتـسـمـى
أذوبُ كَــدَغـْـدَغــاتِ الـشـَّـوْق ....... فـى الـنـَّــغـَـم
يـا أمَـلـِى الـذى أبْـنِــيــهِ ............... يـا عَـلـَمِــى
ويـا شـَرَفِـى الـذى أحْـمِــيــهِ .......... يـا قــَسَـمِـى
فـمَـا أنـا ......... مِـن ذوى الـسُّـلـْـطـَـانِ والـخـَــدَم
ولـيـْـسَ لــدَىَّ شـيـئـاً غـيــرَ مـا أمْـلِـيــهِ بـالـقـَـلـَـم
ومـايـنـْسَـابُ عـبـرَ فـَمِـى
وحُــبـُّــكِ هَـهُـنـــا .......... يـجـْــرى مـكـَـانَ دَمِـى
إذاً فـهـَــواكِ يَـدْفـَعُــنـى لـسَـــوفَ أحَـطـِّـم الـصَّـنــم
وأخـْـرُجُ نـازحَــاً لـلـنـُّـور ............. مِـن ظـُـلـُــم
لـِكَـىْ ألـقــاكِ تـبـتـسـمـى
ولـلمَـاضِـى الـذى قــَـدْ فــاتَ .......... تـنـْـتـقِــمـى
وأصْـرَخُ .............. يـاجـِـراحَــاتـى لـتـلـْـتــئـِمـى
وداعَـــاً عَـهْـــد هَـمِّـى ... حَـسْـــرَتـى ... سَـــأمـى
وأهْـتــفُ يـابـطـَـاقــة حُــبـِّى ............ يـارَقــَمـى
تـعـَـالـى
تـعـَــالى كَــإنــْبــِثــاق الـضَّـــوءِ ...... وإبـتـسِـمـى
وحِـيـنـئــذٍ سـتـبـتـسـمـى
وفـى أعـمـَـاقِ أعـمـَـاقـى ............ سَـتـِرْتـسِـمـى

[أبو وائل]

الشاعر عبد الله محمد خير

التومـات


خلهن سوا لا تفرقن
يالله توماتى انا بعشقن
دوره دوره أنا بنتاوقن
لحظة مابقدر أفارقن
ليه عيونى الشوق حارقن
والدموع دايرى تغرقن
والدن قال ما يمرقن
خايف النظرات تلحقن
وخايف العين ما تعوقن
كان زمان لى شتلو يسقن
ومره فى اللوبى يورقن
ديمه بالقعده ينقنقن
ويحلفن لو ابي ما يصدقن
هن وين تانى بيتلقن
وليه يحفظن الخالقن
يا عيونى انا لا تزهجن
ولى مشاعرى انا لا تزعجن
لى خيوط السعد انسجن
يمكن التومات يخرجن
خطوه ... خطوه ... بيندرجن
وفى عذابكن بيتفرجن
انا ما بخاف الموت والسجن
والله جسمى الصبى يتعجن
هن مالن ابن ما يجن
ويا الله مالى انا ماشى اجن
ما بصح يا الحاج اب شنب
ولسه ديل ما بقو للادب
فى المعاملة ما تكون صعب
انت ما تقسى على العنب
وما تعكر موية الدهب
شمعتين اوعه من اللهب
ونحن يا الزينيين لينا رب
متلى كم زول مات بالشجن
وقبلى ود الزومه انسجن
من ضفاير بتموجن
من خدودا بتوهجن
من تويمات اتخرجن
من عيون اترابن نجن
فوق عروش الحيا توجن
لى مريضن ما عالجن
قلبى نيرانو اتاججن
وكل اعصابو اتبنجن
مالى قبلاتى اتعوجن
امشى وين يا نور الدجن
***
ما كفاى يا التومات اذى
وما كفاى انا لعب الخذى
هو طيف ! ويلاوز لى ملاوزه
ما التويمات انا حاجزه
وحاجه غيرن ما عايزه
يا الجمالكن بقى معجزه
السن النقاد عاجزه
انت جيب اوصاف موجزه
يا قليبى انا حبزه
تبقى حالتنا مجهزه
ولحظه تأخير ما جائزه
***
ليه يضايقونا الناس كده
والغرام .. سنه .... مؤكده
أنا قلبي من اول ما بدا
بى غرام التومات شدا
والعيون مويته جامده
البعاد الطال سهده
البكى المكتوم شاهده
ليها سته شهور شارده
من زمان فارقت الندى
ما بتشوف ناس هاديه
لا زيارات .... لا معايده
لا صدف عن ساعه الغدا
انا قلت بالصبر ازوده
على البعاد يمكن اعوده
تانى ترجع متمرده
تعيد اشواقه تجدده
روحى دركت...منو ينجده؟
بلا التويمات الرايده

[أبو وائل]

الشاعر عبد الله محمد خير

تعال كلمني عن رؤياك


تعال كلـــمنى عــــــن رؤيـــــاك ومــــــا فيهــــــا
صحيح بالله شفت النــــــار وشفتنى ياجميل فيهـــا
قول لى كان شعورك كيف وهـــل حاولت تطفيهـا
والله كمان رضيت بالحال وقلت اسيبو فى الفيهـــا
دى ما احلام ؟؟؟ دى حاجة خفيه ما اظنك تعرفيها
وحاتك ظاهرة فى عينيك لو حـــــاولت تخفيهــــا
ليه ما تشوفى روضـــة غنية بالازهار تطوفيهــــا
وتلقى كمان طيور الريد تناديـــــــك وتشوفيهــــا
بقيت محتار شفاهك تروى حكاية القى عينيك تنفيها
وارجع اناجى نفسى براى يبقى عهوده توفيهــــا
وتشوف آيه وتنال غاية وتقول احلى الشعر فيها
وتسال الله من شر خلقو والحســــــاد يكافيهــــا
وتـــنوم مســــرورة مـــــن هلــــواسا يشفيـــها
وتشوف الجنا فى احلاما والاحباب تصافيهــــا
وعيونا تقول حكاوى الريد تصالحنا ونعافيهـــا
ونعيش ف دنيانا فرحتا وابتهاجا وكل ترفيهـــا
حليلى انا البنات افكارى ضاعت بيـــن قوافيها
وتاهت فى بحور الريد بتسال ميـــن مرافيهــــا
وين مرسالا كان يا حــليلو بالاخبار يوافيهـــــا
بعد عاش السعادة معاها كيف يقبل يجافيهــــــا

[أبو وائل]

الشاعر عبد الله محمد خير
يوم حنتك
يوم حنتك ..
الضوء سطع فى الحله
والالـــوان زهــــــــــــــت
ماشفت زول بى بره
كيف لونو انبهت
وكت الصحاب فقدوهو
والانظار عليهو اتوجهت
عضٌ الصبر
لكن معالم الطيبة فيهو اتشوهت
زولا وحاتك
نفسو غيرك ما اشتهت
وما مصدق انو معاك حكاياتو انتهت
وبعدك حياتو اتجهجهت
يوم حنتك ..
ما شفت زول بى بره
شايل الليل الم
والناس جميع من حولو
زابو مع النغم
لملم جراحو الغايره للاهات كتم
وطول ليلو كان صامت
مع زول مانضم
يوم حنتك ..
ضاع الفكر
واحتار قليب كم غنى
وفيك قال الشعر
ساعة بقتلو الحفلة زى حلقة زكر
فيها ..
الدراويش ..
(( تبتهج ))

[أبو وائل]

الشاعر عبد الله محمد خير


كتاب الهوى

تفاصيل غناى للامل بشرحو مواويل قليب نظرتك تفضحو
يشوفك سموم الغرام تلفحو لقاك كل يوم يكتبو ويمسحو
كتاب الهوى الكل حين بفتحو بعد كنتى سر عنو مابيفصحو
حروفك نحت تانى مابتمحو نقوش فوق جدار العمر قرحو
مشاعر كبار بيها مابمزحو تحت وطأة الشوق عليك يرزحو
لهيب فوق زناد حاجة فيك تقدحو عذوبة وخصوبة وثمار دندحو
يتهو بعيد فى العيون يسرحو مزيج من شعور يحزنو ويفرحو
يعيدو الحساب يجمعو ويطرحو يشوفوه دور إنت مامسرحو
تضاريس قوامك إذا إتمرجحو يمورو سماح بيهو يتبجحو
كتير بى محاسن الحسان رجحو دلال وإعتدال وإغتيال وينجحو
أمل يا أمل كل زول من صابحو أمل يارهاب مابيصل سابحو
فحول الكلام ديمة يتنابحو بس ياريت كنتى سوق يحمدو الرابحو
سؤال ياحبايبنا لوتسمحو هل يجوز للشيوخ فى الشباب يطمحو
بى بشيش للجواب حتى لو افلحو يبقى ما افسده الدهر مين يصلحو

[أبو وائل]

الشاعر عبد الله محمد خير
اللوعة

زيدي اللوعـه زيديها الصبـــابه
إنت كلك روعة يازينة السحابه
***
قصيبة التقنت الـــدفق تســـــابه
جمـــــال الخلقة والخلق إكتسـابه
من الحـــور أكيد صــــلة إنتسابه
قليباً لي ســـــاب الدنيـــا ســــابه
بدور الآخره مشتاق لي حســــابه
داير أهلك مــــعايه نكون نســـابه
وتبقي مركب حبنا الريس رسابه
***
إنت ما وصوك بي روحي اتوصابه
مادام بي هواك المـــولي صــــابه
ودموعي علي الفراق طوالي صابه
***
بقيت من عشاق عيونك ومن طلابه
عليك قديت الــدرب زي الجـلابه
بســـــدر بي رجـــولي وبنـــدلابه
حفظت الحــله حتي نبـــاح كلابـه
وعشقت مناظره الحــلوه الخلابــه
وبموت في بسيمته القلبي إبتلابــه
أحكام الزمــــــن دايــــما غــــلابه
علي السمــحه قامــــت بانقلابــــه
وقليبه من الحديد زايد صـــــلابه
***
يا شـــــادينا قـــــوم دق الربابــــة
شوف سمانا الصافيه مالو كتر ضبابه
وليه الجاهله قافله علينا علينا بابه
عمرنا الضاع ســــداً في شبابـــه
***
ليه أعصــابنا زادت في اضطرابه
وليه يرضيكا تحطيمه وخـــرابه
وكيف تقبل يكون هجرك شرابه
تشوم حظها وينعــــــق غـــرابه
وتبني أمل يضيع تجني السرابه
***
ياحليل الحله بي دومــه وترابـه
وياحليل الرجحت بي كل أترابه
وحليل الكل محـزون ينسرابـــه
بدور حبك معاي يصبـــح قرابه

[أبو وائل]

الشاعر عبد الله محمد خير
تباشير السلام

من زمنا بعيد فتشنا ليك وبنكوس
وبشايرك جاتنا من نيروبى ومشاكوس
خلاص ودعنا شومنا وحظنا المعكوس
وبتستعدل بلدنا الماشى بالناكوس

سنين وسنين بنتفاوض قيام وجلوس
ياما هلكنا ناس وياما صرفنا فلوس
نساوم والبلد طاحناهو حرب ضروس
والفقر اللعين سوالو ناب وضروس

إتمحنا جد فى أمر ساس يسوس
ومن استقلالنا والأحزاب تصوط وتعوس
ومن سبعين بنلعب وماحصدنا كؤوس
وكنا ننافس الهونفيد مع سانتوس

إتهملت ضقت المرة يانادوس
والبعملو كبرى عليهو يرضى الدوس
قمحا كان يمرقوا أبواتنا بالقادوس
بقينا نجيبو من كلفورنيا ومن لوس

تباشير السلام شرقت عليها شموس
تراهو الليلة أصبح واقعا ملموس
شواذ المفردات تطلع من القاموس
وأكيد بتجى الملاريا محل بجى الناموس

تعالوا نمرق الجوه الضمير مدسوس
عشان الحقد والغل مايكون فيروس
لانفعتنا تجربة لاوعينا دروس
شبابنا آمالنا بى آلة الحرب مهروس

كدى النسأل منوا القسمنا خزرج وأوس
ومشى بيناتنا يتبختر بلا الطاؤوس
ده الفكر الصليبى الناشذ المهووس
محل قبلنا نلقاهو إنزرع جاسوس
الأوطان تلم السيخ مع الهندوس
الفى إيدو مسبحة والمعضى كدوس
موغابات قويها على ضعيفا يدوس
سوا سوا ساكن أمبدات مع الفردوس

عشمنا بلدنا ينزاح منو ها الكابوس
وننافس لى بلاد زايد وسعود وقابوس
ومتل ناس الخليج يبقى السلام بالبوس

[أبو وائل]

الشاعر عبد الله محمد خير
نفير الشريان

يامواطن فسراع تعال وجيب مشاركتك من المال
شان نشوف شريان الشمال مكتمل ولله الكمال

هبوا يا أبناء الشمال و يابنى السودان الاصال
بالعزيمة وجهد الرجال نقهر العقبات والمحال
يلا شدو الحيل يا عيال وأجمعوا الدولار والريال
هبوا ذى ما يقتضى الحال كلكم أجيال وأجيال
يلا كان بى عمة بى شال والله كان بى غترة وعقال
ويلا يا ربات الحجال أجمعنوا سوارو خلخال
يلا يا أدروب ورحال ويلا يا إسحق وملوال
نحن ياما عشنا أحوال فى الصحارى وشفنا أهوال
وكم فقدنا جنود وأبطال والسبب توهان وأعطال
ونحن بأسمك يا ذو الجلال نبدأ نفرتنا بلا جدال
ولى جميع من يسأل سؤال الإجابة تبن كالهلال

أبوضلوع كان قوزو هيال والنسيم لى مجرى كيال
إندلق بى فوقو شلال ساوى بين آمنا وكمال
جبرة كانت وادى سيال سيلو يعوى وطين وأوحال
شادوا فوق الكبرى أميال وحزرو السايق من إهمال
مارش فى اللخريت جا يختال وكل راكب بى بصرو جال
فى الرهاب فى بحر الغزال شافوا بوحات قهوة حلال
أكثروا الدعى والإبتهال وكل شى ماشى تمام وعال
القطع شك ما هو إحتمال خدمة التمتام فى إكتمال
فيها مستشفى وإتصال وفيها شل وموبيل وتوتال

مالغبيشة مدينة أعمال نفتتح مسجدا فى إحتفال
وأب سدير بى شرق الجبال أم جواسير هبجة وتلال
يبقى أسفلت بدل رمال وبالسلك نحوى من الجمال
القبولاب قبل الزوال فيها قطعا مافيش قيال
طفرة ماكنت فى الخيال ويبقى مخرج عشرة السيال

فى إستراحات الدبة قال النمير والماء الزلال
فيها كوفيرات للجمال والشقق مفروسة أمال
شان نبارى النيل للشمال الغابة والبستان زهرو مال
فات زمان الباجا أم رمال للصيلنة ورش وعمال
حل ريف القولد حلال فيهو خيرات جنة بلال
ومن ربا الخندق وإنتقال لى كلام سرناقمى إيهال
بالتربتك وعندو جوال لامشعوذ ولاهو دجال
فى قلب أربى نده تعال ياولد وين راعى الحلال
دنقلا النيل كبريها طال وللسليم بقى مافى إشكال
كرمة فريق دلقو السجال ومن سروج لى كجبار قبال
يالعليك وجب الإتكال حلو قيدا مخلوف شكال
عبرى مسكاجلو كيف حال حلفا والتاريخ والنضال
جيب مكوش وكرب الحبال سيدو من مخرج عشرة مال
مال يمين قال عندو أطفال بيهم الشوق لى مروى طال
يلا يامحس أنتوا أفضال ويادناقلة بتستروا الحال
يا قبابل ألوان وأشكال من بدير شايق ولازال
يالبتكسبوا فى كل مجال يامزارع وأى تربال
بدلوا الأقوال بأفعال وجيبوا بدل الكيلة شوال
يكتمل شريان الشمال وللجنوب يبقى عمار وفال
للفرح نعمل كرنفال ونبتهج زين وعديل وفال
فولنا من حواشتو ينشال والتمر تحت أمو ينكال
نلقى فى الفاشر وفى الجبال ونلقى فى هوجرين وملكال
ويلا شدوالحيل يا عيال وأجمعوا الدولار والريال
شان نشوف شريان الشمال مكتمل ولله الكمال

[أبو وائل]

الشاعر عبد الله محمد خير
قلبى الحزين

قلبى الحزين كان يالرزين كاتم شجونو و مانعة
شان ما يقولو ضعيف أمام حورية جلا الصانعة
لو مرة بس صرحت بى حب الزهور اليانعة
ماكان عقابى يكون عذابى وبى ردود ما مقنعة

قلبى الحزين عد السنين عداها تمت أربعة
ولقاكى جوه ضلوعو ساواليك عرش متربعة
وفى حبو ليك ألف قصايد رائعة
لكنو يخشى على حروفك من مداد المطبعة

قلبى الحزين مل الأنين وقلب صحايفو وراجعه
وفتش روايات الاحبة ولمه كل مراجعه
داير يشوف هل كان فى زول
من قبلو ميت فى غرام دفيقة دوبة مبقعه


قلبى الحزين عايزك أمين وحافظ مواثيقوا المعاك ماضيعه
قلبى الحزين عاش مستكبن شايل أومامرك طايعه
وشايل بذور الريدة لى دنيا الخلود ماش يزرعه
ويفتح جداول من بحيرات الحنان من منبعه
وينساب عبير دافق على حبو الكبير أشواق وهمسات وادعه


قلبى الحزين مشتاق متين محبوبتو يمسك أصبعه
ويكسيهو بى خاتم حرير وبى بيت شعر
من قول جرير وبى آية من الواقعه
وتجى الملائكة تبارك الأفراح تشيلا توزعه
وتتبعنى فى دربى الطويل وآمالى كلها تتبعه
وتسمح لى بى هالة قبل فوق الخديد وانا أطبعه

[أبو وائل]

الشاعر عبد الله محمد خير
روح فوت
امشى روح فوت بلا ندم
لى جيت يا عيد بلا طعم
*****
فيك ما صبحت اهلى مشيت صليت
لا لا ما صافح صحاب للبينا صافيت
ما رجع لفيت بيوت حلتنا بيت بيت
لى يا عيد كان اريتك ضمه ما جيت
*****
جيت بلا اما تقول ترجوهو داير
لا زهيراتا حليوات سون ضفاير
لا عروسا فى صباحك من بسيمته كم بشاير
لا قريب تلزم زيارتو ولا غريبا جانا زاير
*****
فى الصباح حصل عذابك منتهاهو
ولى رضيت بى حالا العدو ما رضاهو
قلبى طاوع حزنو ماشى حسب هواهو
بكى ...و بكى ... وبكى ما لقى احسن من بكاهو
*****
زولك ات يا عيد براك عارف مزاجو
وكيف وسط خلانو يحلالو اندماجو
ماهو خاتى الليله كان افكارو لاجو
يطرى فى الحلوين معاك اشجانو هاجو
ما قضاك فى غربه من ايام زواجو
وكم حبايب فيك اتلاقو وتناجو
******
ديمه ذاكر فدوى والاموره يمه
وذاكر اخوات بيهو كم مقصوده تمه
يطرى انور يطرى ساميه يطرى سلمى
يطرى حين يطروهو ساعات الملمه
لعلو عبدون عافى ماتكون جاتو حمى
******
انت ما تلوم كتير ياعيد معايه
وحاشى ما ذميتك اصلى انا فى غنايا
شوقى لى احبابى عاش بين الحنايا
ومانى عارف كيف يكون عيدن بلايا
******
عمرى يا عيد ما بتجرسنى الشدايد
وما بتهد ايمانى اصناف المكائد
مافى عيدا ما بندور يجينا عايد
بس بدل احزانا يبقى فرحنا زايد
بس بدل احزانا يبقى فرحنا زايد

[أبو وائل]

الشاعر عبد الله محمد خير
زمان المتعة
( آخر ما كتبه الشاعر )
أبحر يمين وشمال ومالاقاك بر
رقم العذاب مازلت متجمل صبر
ولى الشباب والليلةداهمك الكبر
مسكين حكاياتك بقت للناس عبر
*****
ياحليل زمان كت بتشيل فوق الدبر
وترد الصعاب محض اختيارك ماانجبر
واصبح مجرد زكرى ماضيك انغبر
*****
جالس نجوم قصرت ماطلت القمر
وغرس بذور الطيبة ماضقت الثمر
والمحزن المابترضى والادهى وامر
حالك بلا العتمور محطاتك نمر

*****
عاقرت للآهات وأدمنت الكدر
وفارقت عهد المتعة ساعات الخدر
غايب دوام لكن حضورك ماندر
واما المصير مهما يصيرموخاشى لو نفذ القدر
*****
سرب الدباس حين رك فوق شركك هبر
وجسمك رهيف ما أعتادعلى طعن الابر

[أبو وائل]

الشاعر عبد الله محمد خير
دانيات القوافي
والانى الكلام شانك بجر القاف
يازميل لاتكوس انصاف
من قم يالحبيب قم رقيق شفاف
موزون الكلام موطبعك الاسفاف
ماتلوم حظك المن وصفو مو خطاف
جود فى القصيد وارجا الكريم لطاف
بختك ياخى مانظلمت من اجلاف
ظلمك من غزال مكحول وضامر الهاف
وماك مخدوع لآلئ وبهرجة اصداف
سباك اللحظو فى مرمى القلوب هداف
كم ناس فوق دريبات عابرة نفروا خفاف
وكم عابرات مضن ماخلفن أطياف
كيف حال المكث فى الريد ثمانى عجاف
لازار حيهن لافى ديارن طاف
أبحث فى القوانين وفتش الأعراف
وهاك معين حكم شيل منو بالمقراف
مديت فى الفريق وفارقتها الاطراف
أتعاطى الصبر واتعود الاسراف
زاد اعجابى بى منظومك أضحى هتاف
فك أسر لسانى الكت دارجو كتاف
سوا خميل شعر دانيات قوافى قطاف
مفعول الغرام شوفوهو فى الاسلاف
لابيجدى الفزع لابترهبو الاحلاف
كم قبلك متيم شنفوبو شناف
حتى من الأ مانى بقت معيشتو كفاف
يازمنا بقيت رغما صفال تتخاف
رضاك رجعنى للراء القبلها أتنين كاف
مشتاق شان اشاهد خضرة الصفصاف
واتوق متل الخليل لى قدلة حالق وحاف
لوبى أيدو كان حذف العويل وأضاف
معزوفة فرح وجرتق ليالى زفاف
مهما طال بكا وزرف الدمع هتاف
ماب يمطر تخايا فى سماهو رهاف
شكرى وقولى فيهو حقيقة ماهو جزاف
أصفى من التبر وزايد عليهو نضاف

نافر كيف جدى الريل ومو والاف
منالوبعيد ومابتتقربو الآلاف
منور وجهو ليلا فتر الاعطاف
خفى البدر الختم دورين ماجلج صاف
سما حة بلا الربيع فيها العقول تصطاف
ضاعت منو كيف آهه ماحرام يا ألطاف

[أبو وائل]

الشاعر عبد الله محمد خير
كان اللمبة قالت بق
دايرى اللمبة شن بتسوى بيهو النور مادام إنتى كلك نور
والا ده السبب جايانا بيهو تزور .....

يديك اللمبة لكن قالوا بقاقة وبقاقة
ياريت اللمبة لو بتحس وتشعر بالأيادى الناعمة لما تمس
كان لابتبق ولابتمل حتى لو شريطا كمل وجازا يبس
تضوى ليكى فرحانه وتعزف ليكى ألحانها

وكان اللمبة قالت بق .... تبقى اللمبة دايرى الدق
كسرها و(فجخا) وانت ليك الحق وأوعه عليها ماتشفق
عشان ماتحرقك خليها تتحرق

وكان بقت كمان اللمبة معذورة كيف بتضوى ليكى وعينا مكسورة
يمكن حاسدى يمكن شالتا الغيرة ويمكن خايفة فى نورك يضيع نورا
يانورة

وقليبى حكايتو بس خليها مستورة وسيبى اللمبة كل ماتبق وهاك غيرا
وبلدا فيها إنتى إن شا الله بى خيرا عشان كده كم قلوب تابعاكى مجبورة

[أبو وائل]

الشاعر عبد الله محمد خير
التوب المفستن
بى فستانو وبى توبو المفستن
عارفو يكاوى فى قلبى المبشتن

***

بنات أفكارى مالكن إتلخمتن
بهدلكن حسيس خطواتو تن تن
والله سباك سواد شعرو المتنتن
وهو شايل فوق صديرو جنس نعمتن

***

أحاول اداعبو لو فى عرفو امكن
يحندكنى ويقولى كدى ألمس اسكن
يجننى ويخلى عيونى يبكن
ويقولى متين معاك يجمعنى مسكن

***

حلاة شفتيهو لو بى غنوة دندن
وخدودو مع الربيع طوالى يندن
زيدن ياعيون لى الله احمدن
نسانى هو لالا متجاهلنى عمدا

***

هز ضفايرو فوق صدرو إستكنن
وجرس بيهو وأجراس قلبى رنن
بطيب أنا لو عيونو على حنن
والله لومسانى بى كفو المحنن

[أبو وائل]

الشاعر عبد الله محمد خير
نبع الشعر
لملم أوزانو على هجم من بعد شيطانو إترجم
تانى جم نبع شعرى جم
اللسان الكان ملجم يسمع الصم وكتين نضم
قمت بعد الليل إتقسم فوقو جرجرت غناى نم
***
بشكى حال قلبى المأزم كان وفى وبى ريدو إلتزم
كلما لم أمر حزم لى رجع مكسوف وإنهزم
صابو من ودعينك سهم خلى عيشتو وهم فى وهم
إنشده لاراى لا فهم زى جنايا نهرو إتقهم
***
لامتين يا قلب السجم لامتين ترتاح وتنجم
عودك اللستوى وإتعجم كيف يكون بالريد منجم
يسحرك عودو المقسم ويبهرك خدو الموسم
حاجبو متل النون إترسم يضوى براقو إذا بسم
***
لامتين بنوادع الألم بى لقاك ياظبى السلم
إنتى يالفوق جيلك علم ياكى نوارة كل ملم
بى شوق فى الجوف مكتم بالشمع مقفول مختم
أمتى قصدى الدايرو ينتم وينبلج ليلى المعتم
***
يالخلقت الكون من عدم ومتصف بالبقا والقدم
نسألك ينطلق القدم للغرامو بيسرى فى الدم

[أبو وائل]

الشاعر عبد الله محمد خير



هــالات سمــاحك

يـــا وطـــن أنـــا ديـمــه لـيــك بـحــن
وفي الدرب البجيبني عليك مالي محن
عيـنـي بالـدمـع تـانـي إتفـتـق جـرحـن
شوقـن والسهـاد بالـمـره مــا صلـحـن
دايـر أنظـر ربوعـك شـان يتـم فرحـن
ومـن هـالات سماحـك يلبسـن سمحـن
الشـوق إترسـم فـوق العيـون فضحـن
نومـن فــر سـابـن وبالـدمـوع طفـحـن
ناس أم زين حلاتن في ربـاك سرحـن
غاويـهـن جـمـالـك غـــردن صـدحــن
كاسيـهـو عفـافـن زيـنـه زي طـرحــن
ومن غير حشمه كضاب البقول لمحن
آيـات الجمـال فيـهـن بـطـول شـرحـن
وما بينضب معينو لسانـي فـي مدحـن
فـي بحـر التحضـر والعفـاف سبـحـن
وبـي درر المحاسـن شيـدن صـرحـن
تشعر بالسـرور والبهجـة مـن مرحـن
ما أجمل مساهن ويـا حـلات صبحـن.

[أبو وائل]

الشاعر عبد الله محمد خير
قطب الأقطاب

فى رثاء الشيخ العارف بالله عبدالرحيم محمد وقيع الله البرعى


من قام ونشأ لانم وشى
لاسرو فشى البرعى القوث لى ربه مشى

***
ماتغشى ومالاج طشا لى ذكر الله هاجر ودشى
حرتو وزرعو و حرسو وحشا
البرعى الغوث لى ربه مشى

****

مطروح وشا الناير لاكشر لاكشا
إنشر سحاب خدر قشا
فوق الاحباب مطرو الرشا
البرعى القوث لى ربه مشى

***

قطب الاقطاب هشه وبشه
حلب القرآن روبو خشه
وطرد الشيطان وين ماخشى
البرعى القوث لى ربه مشى

***

الدنيا عماراتا وعششا
مالا وتاجا وجاها وعرشا
زهدا وماتنعم بى فرشا
وكان دايما ينفق لى قرشه

***

جرد الالوبة سحر خرشه
كان ليلا يلامس لى دغشه
عارف باسرار الكون نقشه
قسم النبقة وللغير فقشه
البرعى القوث لى ربه مشى

***

مو ساهلى حياتو كتير بطشا
جرب مرضا وجوعا وعطشا
أبواب الخير طرقا وهبشا
وماخلى علوم حفرا ونبشا
البرعى القوث لى ربه مشى


***

صلوت الله صبحا وعشا
لى رسول الله الماذل حشا
يوم الاهوال تحرق شمشا
ودحمدخير مايشوف وحشا

[أبو وائل]

عبد الله محمد خير

زمان المتعة

أبحر يمين وشمال ومالاقاك بر
رقم العذاب مازلت متجمل صبر
ولى الشباب والليلة داهمك الكبر
مسكين حكاياتك بقت للناس عبر
*****
ياحليل زمان كت بتشيل فوق الدبر
وترد الصعاب محض اختيارك ما انجبر
واصبح مجرد زكرى ماضيك انغبر
*****
جالس نجوم قصرت ماطلت القمر
وغرس بذور الطيبة ماضقت الثمر
والمحزن المابترضى والادهى وامر
حالك بلا العتمور محطاتك نمر
*****
عاقرت للآهات وأدمنت الكدر
وفارقت عهد المتعة ساعات الخدر
غايب دوام لكن حضورك ماندر
واما المصير مهما يصير موخاشى لو نفذ القدر
*****
سرب الدباس حين رك فوق شركك هبر
وجسمك رهيف ما أعتاد على طعن الابر

[أبو وائل]

عبد الله محمد خير
محـتـــــــار ولـدك يا زينـوبــه


محتار ولدك يا زينوبه

محتار ولدك يا زينوبه .. !
محتار ما بين اوبه وتوبه ..!
بين واقع الحالة المخروبه
وبين حسن الخاتمه المطلوبه ..!
ضايع ولدك يا زينوبه
***
محتر ولدك يا زينوبه ..!
فى الناس وعيونه المعصوبه
ترقص تتمايل مغصوبه
وما شايفه شراكه المنصوبه
ضايع ولدك يا زينوبه
بين الاوضاع المقلوبه
أحزان الناس المغلوبه
أعراض الناس المجلوبه
والقيم السمحه المصلوبه
***
محتار ولدك يا زينوبه ..!
نفسو الشفافه الموهوبه
وافكارو الامست منهوبه
فى الفوضى الفايض منسوبه
وفى سوبا ان خربت سوبه
غرز الضرعات المحلوبه
هز الاوساط المكروبه
وخدر الكاسات المصبوبه
***
محتار ولدك يا زينوبه ..!
فى توقيعاتو المشطوبه
ماكينه فكرو المعطوبه
فى هادى الدنيا المربوبه
الكل حقائقه إكذوبه

[أبو وائل]

عبد الله محمد خير
بعزك يا بلد
،،،،،

مشتهيك انا يا بـلــد
وليك راجع لا محالة
بعــدما حررت نفسك
من قيودك فى بسالة
بعدما طهرت ارضك
من نواميس العمالة
مشــتهيك انـا يا بـلد
نفـســى أرجــــــع ..
والفـح الحـرية شـالة
وألبس التوب المطرز بالعدالة
وأحمى للقيم العشقتك من خلاله
وما عــرفته اعيش بدونه
ومـا قــدرت أقــولة لا لا
مـشتــهيك انـا يـابــلد
يا وطن حبك متكن جوَه ما بين المفاصل
كنا لازم نرضى هجرك ونرفض الكان فيك حاصل
الا وين ما فتنا غُلبك فينا واصل
مــشتـهيك انـا يـا بــلــد
مشتهيك من غير مفاصل
مشتــهيك انــا يـا بـلـــد
وكم بىَ من فرقك صبابة
وليــــك راجـــع يـا بـــلـد
شان اداوى افكارى من وجع الكتابة
مانى خايف تانى من عين الرقابة
مانى خايف تانى من ظُلم العصابة
وبيــــك اهـــلاً يـا بـلـد
بى حــياتك بـى صـعابه
كـل احـزانك بشــيله
وكـل اوجـاعك حـبابه
مـشتـهيـك انـا يـا بـلد
وكـم بـعزك والله عالم
عـــــزت الشـعـــــــب
الكتب بى دمو فى التاريخ معالم
عـــزت الغـضــــــــب
البـحطـــم كـل ظـالم
عشت يا شعبى المسالم
عـشـــت ســــــالم
عـشــت ســـــــالم

[بت البحر]

لله درك عمنا ابو وائل
وانت تواصل مدنا بالدرر
والروائع واصل من غير فواصل
وربنا يعطيك الصحة والعافية

[أبو وائل]

لله درك عمنا ابو وائل

وانت تواصل مدنا بالدرر
والروائع واصل من غير فواصل

وربنا يعطيك الصحة والعافية



ست البلد
بنتنا الغالية بت البحر
من أجلكم سنفرد كل جميل
صاغه شعراء شمالنا الحبيب
ليك كل شكريو تقديري

[أبو وائل]

عبد الله محمد خير
جود البخيل

أمطر سحابك فوق صحارى أيامى ليل
خدر يباس كل السهول أجمل قصايدى
رويته بيك مديت جذوره كما النخيل
جادت رطب خلف شتول ورسمت
من وجه الشبه مابين خدودك والأصيل
أزهار عصية على الزبول
*******
جواى دخلت بلا إذن وخرجت تبحث عن بديل
لاأديتنى حق أرفض ولا حق القبول
ماأستعطف الخاطر الكسير جود البخيل
وما عف سطح الأرض من زبد السيول
*******
وبى سكة الشوق والعشم والمستحيل
هاجرت ليك وعز الوصول وعزاى
ماكلت زواملى من الرحيل
مهما ليالى على تطول
أبدا ولاجفت ينابيع شعرى من نغمو الجميل
وما ونة غيمى من الهطول
*******
ستف مواعين زادى بالصبر الجميل
مديتلو من حبلو المهول
أسرج خيول ألحانى بالطرب الأصيل
لونت إيقاع الطبول
وبالامنيات شيدت للعشاق سبيل
ماب يغشى واشى ولا عزول
*******
سورتو أحلى الأغنيات حيرت أوزان الخليل
جملتهم بى أحلى قول قوقاى ونم وغنا وهديل
ما إحساسى بيك يا أغلى زول
الجاى والهسه وقبيل توهنى فى لجة هواك بلا حلول
********
لا لاقى لى وصلك دليل لادارى كيف أعمل مع الجدى الخجول
أمشيلو إستجداهو بالدمع الهميل والرغبة جواى والفضول
وجنح الصبا ولهف الشباب وحيا الكهول
وأقرب طريق أوصلبو للزين ووالعديل
يوم داك ما أحلى الوصول

[أبو وائل]

عبد الله محمد خير
ود الدابى مالك ساكت

ودالدابى مالك ساكت ما شفت ( الجلا ) السواها
شال محبوبتى سافر بيها كيفن عاد بعيش لولاها
بابور البحر مو عارفى شايل اعز زول جواها
ماهماها حالى ألبى ما دام نوره وضواها
تشتكى بالعلي عيونى أهمله ما سمع شكواها
اللحكيلك ألماك عارفو كيف مسخت بلدنا ورآها
كان كاتمه الشجن في وداعه ال دموعه مو ساتراها
وأيه فايدة حياتى البعده آخوى أتقلب مجراها
تقصر او تطول ايامى دى إنا لأمن أموت بطراها
من يومة رحيله السمحه خلت فى العيون ذكراها
خلت فى القليب بصماته أحرف كل يوم بقراها
****************************
ما بتحمل حبيبتى الغربه لا له وحاته مو قادراها
وكيف حاله إن مشت فى بلدا حاره وناسا مو شاكراها
كان فات المحطات جمله يا حسن القرير بقشاها
قوم يوم التلاتاء أندله بى تالا الرصيف تلقاها
ما تعاين كتير وتشبه ديك إياها ديك مو ياها
باينه حبيبتى من بسماته والنور يضوى من محياها
*************************
يا حسن أنت فوق أوصافه جيب أبيات وقول معناها
واوعك ترتبك فى وداعه ذى ما نحن ودعناها
واكتب لى جواب طمنى لا يبقى السفر أعياها
ما بتقدر عليها الدرجه إلا غلب عليها حياها
هاك منى الرسالة التالته وعينى بالدموع راوياها
تلقاك حافظى للبيناتنه وتبقى العشره مو نا سياها
إن كنت ما بخاف عزالى آزول كت بقوم ابرأها
لكين بخشى قلنا وقالو وحالى السمحه عارفه براها

[أبو وائل]

الراحل / حسن الدابي

** عبدو اخوى **
صحيح ياعبدو اخوى قولك حقيقه
كتير الطفشه ( الجلا ) من فريقه
يزازى نقل سميحات الخليقه
ورنين صفارتو نفسى ابت تطيقه
معاها انا كيف اسوى شنو الطريقه
تعيق فى الناس اله الناس يعيقه
اتمناله فى دالة غريقه
تحتل فيها ما تفضل شقيقه
تطير ريشاته منها بى فريقه
وصميم مكناته تلتهمو الحريقه
قمرات نومه تسكن ام دريقه
وتولد فى عنابرو عشان غريقه
بناتنا حليل سروحن فى السبيقه
لقيط ام راس مبقعى و الكريقه
اديهن حلوه غير لبس ام دقيقه
وبدون كترت غويش نفسن طليقه
جمالن خلقه لو لفحن طريقه
وبدون مضغوط فراد باهى زيقه
يا حليل قتانن الفوق السليقه
ليقيمتو تطمن الضارباهو ريقه
كتير قبلك يئن مضروب بديقه
تسد عبراتو تسمع لى شهيقه

[أبو وائل]

الراحل / حسن الدابي
آه يا خلايه
مسخت عوم البترطن في جروفه
اه يا خلايه فجولي اللشوفه
الصدير رجفاته سبب لي خوفه
خام ثمار ال الله قال دانيت قطوفا
الرقيبه قزازة الروم في وقوفا
جرعتني العلاقم بي صنوفه
بروقيها الداره لخبطي لي صفوفا
خلي حسادك عديل تخضع انوفا
ديسه شوف عيني من شكت كتوفا
الا دايما نافره يا ناس ما ولوفا
صممن جاراتا قال لي عطوفه
ملا شوفته لي تشهر لي سيوفا
العلي والبي كلو سبب عزوفا
لو تحلو رموز اصابع اليد حروفا

[أبو وائل]

الراحل / حسن الدابي
لي جارة
يا خلايق لي جاره البرتكان تقليد صفاره
فرهدت في عز عماره ما بجيبو حرام خباره
حابكة بالمليون تجاره نهار وليل قاعدين حياره
سيدا قال ليهم صغاره ما استوت دفيق ثماره
مرة ليها مشيت زياره عاكسوني أهل الغفاره
قالوا زي شوفتك خساره يا خي سيبنا بلا عواره
في الفؤاد موقودة ناره وقلبي مجروح بي حساره
زاد شراييني انفجاره إلا وقفت لي الجباره
رحت استفسر كبارا هدوني قالوا غراق بحاره
العقلة فايتي من الحدارة والخدود زاد ازدهاره
جبينا يشهد بالنضارة عبيرها منو الناس سكارى
تبتسم يغريك هزاره رموش عيونا أخد حذاره
شوفو عقليتي وجساره بقت تجيد لحن العذارى
لو تعود تسكن دياره بودي للفقرا المزارة
ما لقيت لي طريق بصاره دابة روحي قرب وداره

[أبو وائل]

الراحل / حسن الدابي
تسفكي دماي

تسفكي دماي تقولي مسافره يا محبوبه كيف
حرام لحظات تهدي بناي تقلبي ربيعي صيف
صيف لظاهو ينشف السما في الخريف
لادعاشات لامطر لاهمبريب لاحتى زيف
شبح الفرقه كشر نايبو طل علي مخيف
خلق لي زهور اقرقر وابكي ادور بقفاي واقيف
يا حليل الامو سارحابيهو بي ساي والعريف
ودلبون ما جاب قرن يادوبو للقش مو اليف
عالى كفيلو هودج صدرو اما وسط نحيف
يوقل في يدفن خوف بعد ماكان اليف
اما بسيمتو تلخم لخمه منها يا لطيف
عارفوا براي كايس بلوه لي بلواي يضيف
قلبي العندو قلت يسندو سلَََ عليهو سيف
قلت اشكيهو لي قاضيهو عارف القاضي في صفو بيقيف
اقيفوا معاي وقيعكم يا حواجنير الجريف
انهمو الفكي ابوكم قولوا جانا الدابي ضيف
كفوفكم ارفعوهن لي المهيمن واللطيف
يجيب لي دعاي انا الواقفلي فوق هدام وقيف
لا قطر ينهر يقوم لاطايره بالسما تستضيف
لا باصات ولا عربات تحركو سنت من ضلو الوريف

[أبو وائل]

الراحل / حسن الدابي
دمع الدم
يا عيون ابكى دمع الدم الزمان بى عذابى حكم
ترانى بقوقى واترنم اجرّو مع الخيال النم
على آلامى زادت الم مضروب من عيونو سهم
دقيّت بابو قالى نعم غلبنى معاهو اتكلم
قال بى مطلبك بهتم قتلو يا اخى جود وارحم
لو فى بيتو يتبسّم عبيرو يفوح بعيد ينشم
لهيجو كمين نحل ملم فويطرو بريق سحابو ورزم
جديا دابو قرنو برم بعيده مراتعو نال وسلم
طريحه وبيها يتبلّم اظنو على هلاكى عزم
قاسى قليبو ماب يرحم حديد ما من لحم او دم
مر علّي ما سلّم منو وليهو بتظلّم
قالى خلاص عليكا حكم ما دام عاينت برضو اجرم

[أبو وائل]

الراحل / حسن الدابي
ما بتدوم

ما بتدوم لله الدوام
دنيا زايلة وخيرك منام
يا عليم فوق كل علام
جافا عينى طيب المنام
يا صديقى الجلا قالو قام
شالُو وزينة وجوز حمام
دق صفارتين بانتظام
تالتة ليها رنين وانغام
رنت الاجراس يا سلام
واتجه نص البحر عام
طب تنقاسى سلام سلام
شوف دموعن ليها انسجام
فى القرير كان ليهن ايام
يا كُمُسريها حرام حرام
مروى راح فى الميعاد تمام
والمبيت ملزمبو الزام
ليهن النيل جابلو نسام
فى القرير لى ارياحو شام
صاحى ريسو ليلو ما نام
بدرى طب كريمة الكرام
قابلوهو الناس بازدحام
قالو سامعين فيهو احكام
قمت بالكومر وبرضى هام
واتجه بى على وكان همام
يجرى سابق الريح والغمام
سبعه تحت النيم دربى حام
جانى حُمد نور بى كلام
قالى واحدة المشترك قام
شالو ناس قومانُن حرام
آمنه والزهرة ودارسلام

[أبو وائل]

الراحل / حسن الدابي
يا أجواد

عليك شكينا يا اجواد
من الحاصل علينا وزاد
جدى السحسح الرقاد
يفوق اليل سبيبو سواد
معاهو شمال يمين ينقاد
وقَل شافنا قبَل صاد
نور وجناتو يضوى بلاد
وريحة جسمو تخفى زباد
حور الجنة منو بعاد
بسِمْتو تبهدل العُباد
بى تعذيبى الله اراد
بقت آمالى منى بعاد
اقضى الليل نبيح وسهاد
رمانى سهام عيونو الحاد
نغيمو البلبل الغرَاد
قنابل صدرو من انهاد
مناقبو تحير النقاد
طه حسين مع العقاد
قلبى الكان من البولاد
وقع فى كفة الصياد
امتلكو وبقولو اسياد
دم شريانى سووا مداد
كل ما شاف جبينا الناد
ليها حقير ذليل ينقاد
ما وروهو عمرو وداد
يقدح فيهو الف زناد

[أبو وائل]

الراحل / حسن الدابي
قطار الأحد

يا حليلا بلا عدد قالوا شالا قطار الاحد
فى الرصيف حسو بلا الرعد اسأل الله مكنتو تنقد
قولو آمين باكمو ينسد يلقو فى الكاسنجر خرد
تمو يا مولاى لى غرد القضيب للداخلة ينهد
شال حبيبينى من البلد سابنى حوت منو النيل شرد
بالرباطاب والليل برد تلقى نام فى توبو انجبد
فى الصدير حاضناهو الولد كحله شامتا نايرة فى الخد
فاتا عشرة ودخل اب حمد ومن هناك للسرعة زود
عطبرة الغيار مستعد شندى جاها نهارو ولقد
طب فى الخرطوم جابو رد وصلو طيبين من غير نكد
دمعى سال وبكيت تنهد لى عبراتى بقت غدد
ينفع ايه دايماً مسهد طرفى جافا النوم ما غمد
ابنعوف يابا الولى الجد معضلاتى انا شوفولا حد
من صغير وقم فى المهد الالم لى عدة وعدد
ارشدونى فقدت الرشد جانى تانى اب راساً لبد
قلبى بى نيرانو اتهرد واللهيب لا انطفا لا برد

[أبو وائل]

الراحل / حسن الدابي
لو قت سلام

فيها ايه لو قت سلام
كت تزيل من قلبى آلام
من صغير فى عهد الفطام
ما رأيت زيك فى الانام
النغيمة رطين الحمام
خدو سادة وفاطرو بسام
النهيد فى القعدة محجام
نظرتك ضربات الحسام
الصدير وزينة لو عام
هافو عامل ليهو انقسام
طرفى ساهر جافى المنام
كل زول قالى ماك ملام
اشتكيت لى قاضى الغرام
قالى عارفك كلك اجرام
لى عاين من كرسى قام
قالى وصيت حكمك اعدام

[أبو وائل]

الراحل / حسن الدابي
ما بطيب

يشهد الله عالم الغيب
غير اشوفكم ما بطيب
فى حار الطب والطبيب
واهلى زادوا الفقرا تعذيب
كم وكم قدد دواديب
داير اشوف الديسا لعيب
لو سئل عن داركم اجيب
ساقى بينكم والمراقيب
العنب ايه ولا الزبيب
جسمو خلقه يفوح منو طيب
ساقو تابر كاسى النديب
والعيون نشابن يصيب
عومو عوم الوز فى الدليب
لحظة خلا الموقف رهيب
النواح والبكا ما بيجيب
كل شيتن قسمة ونصيب
سنة الاسلام ماها عيب
قول سلام خاطرى انا كان يطيب
الله فى عونك يا لبيب
قوم وفتش لك اساليب
حالى منو الاطفال تشيب
زى كتل جساس لى كليب

[أبو وائل]

الراحل / حسن الدابي
القالوا قايم

يا حليلو القالو قايم
طرفى ساهر وطرفو نايم
لو يقوم انا برضى قايم
واليلوم الاصلو لايم
طبعو هادى عليهو دايم
وشو قمرة بلا غمايم
صدرو وز فى نيلو عايم
خدو سادة بلا رشايم
مطمئن فى خدرو نايم
طيبو جانى مع النسايم
عقلى ضاع واصبحت حايم
ماب يفيدنى العزايم
من صغير انا بيهو هايم
الجدى الما شاف سمايم
اصلى حالف بى قسايم
الا ازور فرخ الحمايم

[أبو وائل]

الراحل / حسن الدابي
دكتورات

ديل دكتورات مو لعب
جابن الدكتوراه فى الطب
امتحانن مهما صعب
منهن خاف ود الكلب
ديل سميحات زى الشلب
والقليب فى صديرن لعب
السمائم وكتين تهب
من جليدن ينشم طيب
الكتيف مهدول بالسبيب
اصفى لونن من ماء غريب
الضميرمحذوق منسلب
احجبن يا صاحب الحجب
ديل عنب تكا الشخاليب
مسهن للمرضان يطيب
ديل مريضن ابا ما يطيب
فى النجم يرعى العنقريب
نظرتن لو تقذف لهيب
تحرق امريكا وتل ابيب
ديل طويرات جنى فى حيب
والبسيمات شخب الحليب
مسخن عجوة ود خطيب
حاشا ما اتعلمن الكذب
النغيم زى العندليب
شوفتن تفرح للكئيب

[أبو وائل]

الراحل / حسن الدابي
بقيت سفر


قالولى بقيت سفر ياخى قالولى بقيت سفر
فى السمع نقلك تقرر قومة جات بالقضا والقدر
لى قيامك حت الثمر يبكى حزنان لبخ البحر
فرقة من الحنضل امر فى القلب نيرانا تسعر
طرفو مكحول خدو ازهر صدرو عالى وسط مضمر
وجهو انضر من القمر حاجبو زى النون مدور
جسمو دون تعطير معطر صوتو زى نغمات الوتر
فى القرير ديناميتو اتفجر قالو راحل اين المفر
بالرزانة الفيك مشتهر بسمتك تشفى المجنزر
دخلوهو اسليب فى القطر للوداع بى ايدو اشر
خشمو تمتم عقلى فسر عينو فاضت دمعو انهمر
واحدة كمساريهو صفر ساعة طب الكاسى ينجر
الاشرجى رفعلو اخضر كاتم الاسرار ما جهر
فى القرير كم خلد ذكر مستديمة عليها تشكر
البعاد ما كان منتظر كل شى فى الكون مسطر

[أبو وائل]

الراحل / حسن الدابي

يا ... حا

قودى وادى ايدك تله يا حا
وحات اسم الله كملتى السماحة
حلات نونات خديدا حلات صباحا
جبينا الللمغيب قصدت مراحا
كالكوكاب نهيدك بى صراحه
الوز اعترف لك فى السباحة
روحى اقول تطيب تزداد جراحا
ما بتنفعنى قولة آه وآحا
عاد جنى القديم لى مافى راحة
سببى حمامة فرت لى جناحا
ميزان العقل زاد فيك رجاحة
وارثى الطيبة حاشاكى القباحة
تحن جاراتا لى نضما ومزاحا
بنوت جيلا فات واصبح صباحا

[أبو وائل]

الراحل / حسن الدابي
مشارع الهم
مشارع الهم كتير انا واردا حتى بالآهات رئاتى مقددة
من صغير درفون مصيبتى مجلدة اكلى من زقوم شرابى من الردى
ام لهيب فى جوفى ديمة مولقدة عينى طافر نوما سقدة مسقدا
مالى دون الناس معيشتى منكدة منى ولا ارادة كايس أأكدا
ديمة شاحب لونى يا بخت العدا روحى راحت روحا قبلها وحدا
ريش نعام هضليما ديس متوسدا ووب على انا يا السرير الجن بدا
زهرة يا مامان مندى مفرهدة خرق عادة جمالا يوسف جابدا
ان نوت للقومة الكفل اقعدا هافا لفحة توبا ديمة ملبدا
النهد طغى وصل الفستان مدى تلخمك عينيها خاصاً اسودا
حاجبا الشرفولو ليهو الجو هدا والجبين لو واجه الويل يخمدا
فاطرا الفى القبسة ولول واصعدا فوقا كابى وقار خدودا موردا

[أبو وائل]

الراحل / حسن الدابي
بلبل دوح

طارمنى بلبل دوح خلى قليبى كلو جروح
حليل زولى الفويطرو يلوح تركنى انوح سلوتى النوح
حليل زمن الصدر مشروح ابوح ليهو وهو لى يبوح
من هضليمو يشكى اللوح لى جبينو كان مطروح
شوفتى بقت تزيدو جموح وانا ا بسم بسمة المذبوح
من خدو الزهر مفضوح مع النسام عبيرو يفوح
انا البى والعلى ما بروح لا طب لا محاية لوح
قليب الحاجه يا المسنوح عذابك غير شرح مشروح
على الخدين دمع مسفوح شواطى ترسى مركب نوح
ليهو سلامى غير مسموح ولا بى ايدى ليهو الوح